JƐRƖMAAYA 14 - WƖA TENIŊ

Hɩlɩŋ arɩ losuŋ arɩ laalɩŋ

¹ Wɩɩ-la La TƖƖNA sɩ bʋla pɩ Jɛrɩmaaya a mʋ tɩgɛ hɩlɩŋ lɛ nɛ ŋ-la:

² “Juda tinteeŋ nɩaa ka yel nɛ, ʋ tabalaa nɩaa ma bɩbal nɩsɩŋ. Baa yel tintee-la wɩaa nɛ, a yele lɩlɩɩ Jerusalɛm lɛ.

³ Nɩyuŋoo tɩŋ ba tɩntɩnnaa nɛ dɩ ba mʋ ŋaa lɩɩŋ. Ba mʋ vilee, aŋ bɩ lɩɩŋ na. Ba mɩɩra kɛŋ nyuvii-hɩlaa nɛ kɔ. Ba tʋɔŋ chei, ba nandaasɩŋ yʋɔrɛ, hɩɩsɩŋ kɛmba, ba kɛŋ kɩaa tɔ ba nyusuŋ.

⁴ Tinteeŋ yɛrɛ nɛ, bɛɛ wɩaa duonuŋ bɩ tintee-la lɛ nɩa. Paaraa nandaasɩŋ yʋɔra nɛ, ba kɛŋ kɩaa tɔ ba nyuŋ.

⁵ Aamaa ma sɩ hɛ gɩrɩŋ tʋɔŋ paala vɩa ba biiriŋ ta nɛ, bɛɛ wɩaa yaŋ tuo.

⁶ Bʋrʋmba chɩŋ dundol kpʋlaa nyuŋ nɛ a huhuosi a nagɛ jolluŋ. Ba sɩaa bɩra bɩ na, bɛɛ wɩaa yaŋ tuo.”

⁷ La wʋbɔŋŋɔɔ daga arɩ la ŋaa chei nɛ. La TƖƖNA, tɩŋ ŋ yɩrɩŋ wɩaa a ŋaa wɩɩ pɩla. La vɩa ŋ harɩŋ tonuŋ a yʋgɛ nɛ, la ŋaa wʋbɔŋŋɔɔ nɛ ŋ lɛ.

⁸ Ŋ nɛ la Iziral tɩŋŋaa yɩyɩɛlɛ, ŋ nɛ la Laataara, a lɩlɩɩsɛla la wʋjʋʋlaa lɛ. Bɛɛ nɛ tɩɩ ŋ nagɛ nʋhʋɔrʋ tintee-la lɛ a nagɛ wombii-vɛnnʋ sɩ mʋ chʋa leriŋ tapʋl bala?

⁹ Bɛɛ nɛ tɩɩ ŋ nagɛ nʋʋ ba sɩ ŋaa wɩaa a dɩ ʋ lɛ a nagɛ laalɩyuori wajɩa sɩ bɩ doluŋ kɛnɛ dɩ ʋ laa nɩaa ta? La TƖƖNA, ŋ hɛ la tʋɔŋ nɛ, la ŋaa ŋ nɩaa nɛ, sɩ́ la vɩa ta.

¹⁰ Wɩɩ-la La TƖƖNA sɩ bʋla tɩgɛ nɩaa deemba lɛ nɛ ŋ-la: “Ba chaasa cho dɩ ba gɔllɔɔ baarɛ nɛ. Ba naasɩŋ bɩ lee-kala buo. Ŋɩɩ wɩaa mɩ-na ma TƖƖNA bɩ ba laa. Lɛɛlɛ nɛ mɩ jaŋ liisi ba tʋɔhɛɛ wɩalɩŋ ba sɩ ŋaa, a dɔgɩsɛba a tɩŋ ba wʋbɔŋŋɔɔ wɩaa.”

¹¹ Ŋɩɩ nɛ La TƖƖNA bɩra bʋla pɩmɛ, “Sɩ́ mɩ sʋla chɩchɛ dɩ wɩaa vɛŋ woruŋ a pɩ nɩaa deemba.

¹² Arɩ ba sɩɩ vɔɔ niiŋ ma kala, mɩ bɩ jaŋ jegile nɩɩ ba yele. Ba ŋaa kʋnyɩgaa Wɩɩsʋlʋŋ arɩ mɩaa Wɩɩsʋlʋŋ pɩpɩmɛ ma nɛ, ama mɩ bɩ jaŋ laaba. Mɩ jaŋ mɩɩra joŋ laalɩŋ, losuŋ arɩ nyanyalɩŋ a hɛ ba lɛ dɩ ba sʋʋ.”

¹³ Ama mɩ sɩ, “Ah, La TƖƖNA Wɩɩjarɩbakɔ, ŋ wʋlaabʋllaa vɛnɛ bʋla pɩpɩba nɛ arɩ ŋ sɩ, ‘Laalɩŋ bɩ jaŋ jʋʋma koo dɩ losuŋ jʋʋma dɩ ma na hɛɛŋ. Wʋtɩtɩɩ, mɩ jaŋ leŋ dɩ ma hɔŋ tinteeŋ deeŋ lɛ arɩ fɩɛlɩŋ a kaa mʋmʋ wuu.’ ”

¹⁴ Ŋɩɩ nɛ La TƖƖNA bɩra bʋla pɩmɛ, “Nɩaa deemba bɩ mɩ wʋlaabʋllaa ŋaa, baa nyɩɛ wɩaa nɛ mɩ yɩrɩŋ lɛ. Mɩ bɩ ba tɩma koo a lɩɩsɛba koo a bʋl wɩɩ pɩba. Wɩalɩŋ ba sɩ na a nagɛ duosoo tʋɔŋ a bʋla pɩma ŋaa wʋnyɩɛrɩŋ nɛ, wʋyaayaasɩ-la ba sɩ vʋga nɩna, arɩ ba tɩtɩa tʋɔbɩɩnaa wɩalɩŋ ka nyɩsɛba nɛ.

¹⁵ Ŋɩɩ wɩaa, wɩɩ-la mɩ-na ma TƖƖNA sɩ bʋla tɩgɛ nɩalɩŋ sɩɩ bʋl wɩaa mɩ yɩrɩŋ lɛ nɛ ŋ-la: Mɩ dee bɩ ba hɛ, ka ba bʋbʋl, ‘Laalɩŋ koo losuŋ bɩ jaŋ jʋʋ tinteeŋ deeŋ.’ Laalɩŋ jaŋ kpʋ wʋlaabʋllaa deemba tɩtɩa, dɩ losuŋ ma kɛŋ dɔnsʋŋ dɩ ba sʋʋ.

¹⁶ Nɩalɩŋ ma ba sɩ nyɩɛ wɩalɩŋ pɩpa, jaŋ sʋʋ laalɩŋ lɛ, dɩ losuŋ ma kɛŋ ba dɔnsʋŋ dɩ ba sʋʋ, dɩ ba paaba yuo ta Jerusalɛm womporunuŋ lɛ. Nʋʋkala jaŋ tuo dɩ ʋ hugi ba dɩ ba haalaa, ba hambolibiisiŋ arɩ ba hantolibiisiŋ. Mɩ jaŋ joŋ hɛɛ-la sɩ maga dɩ ba na a hɛ ba lɛ.”

¹⁷ Ʋ fa bɩra bʋla pɩmɛ nɛ dɩ mɩ bʋl wɩɩŋ deeŋ pɩba: “Mɩ sɩaa ka pɛllɛ sɩlɩɩrɩŋ tɩtaŋɩŋ arɩ wɩɩhɛyɛ kala nɛ a bɩ kɛrɛ, bɛɛ wɩaa mɩ nɩaa chaasa bolimi nɛ a nɩna hɛɛŋ woruŋ.

¹⁸ Dɩ mɩ nɛ jɩl pɔkɔŋ nyuŋ, mɩ yie na nɩalɩŋ ba sɩ kpʋa laalɩŋ lɛ nɛ. Dɩ mɩ nɛ jʋʋ tabal-la tʋɔŋ ma, mɩ yie na nɩaa losuŋ sɩ kɛnɛ ba sʋʋ nɛ. Wɩa wʋlaabʋllaa arɩ Wɩɩsʋllɩ sɩpaalaaraa kala mʋ tintee-la ba sɩ bɩ jɩŋ nɛ.”

¹⁹ Ŋ vɩa Juda nɩaa ta biri biri nɛɛ? Ŋ bɛrɛ Jerusalɛm nɩaa nɛɛ? Bɛɛ nɛ tɩɩ ŋ bolimi la ŋɩɩ kɩŋkɛŋ, dɩ ba sɩ́ wuo vaarɛla? La faa yɩɛlɛ dɩ la hɔŋ arɩ fɩɛlɩŋ nɛ, ama la bɩ ŋɩɩ na. Bʋa-la sɩ maga dɩ la duoro lɩɩ wɩaa lɛ, fawʋllʋŋ nɛ mɩɩra faasa kɛnla.

²⁰ La TƖƖNA, la sɛɩ la tʋɔhɛɩ wɩalɩŋ la sɩ ŋaa nɛ arɩ wɩalɩŋ kala la nyɩmmaba sɩ cheye. La chaasa ŋaa wʋbɔŋŋɔɔ nɛ ŋ lɛ.

²¹ A tɩŋ ŋ yɩrɩŋ wɩaa, sɩ́ la vɩa ta. Sɩ́ hɩɩsɩŋ joŋo hɛ ŋ kuoru kpasa sɩ kɛŋ yɩrɩŋ lɛ. Liise yi nii-la ŋ sɩ hɛ la dɩ ŋ pɛgɛ lɛ a sɩ́ ʋ chei.

²² Tinteyee nɩaa vʋɩ pɛɩba-la kʋŋ jaŋ wuo leŋ dɩ duonuŋ nɩɩ? Wɩa-nyuŋ ma tɩtɩa bɩ jaŋ wuo ŋaa dɩ duonuŋ nɩɩ. Ŋ-na La TƖƖNA Wɩa nɩɩ ŋaa wɩaa deemba kala. Ŋɩɩ wɩaa, la joŋ la yɩɛlaa hɛ ŋ lɛ nɛ, bɛɛ wɩaa ŋ nɩɩ ŋaa wɩaa deemba kala.