JƐRƖMAAYA 12 - WƖA TENIŊ

Jɛrɩmaaya ŋmɛnɛ pɩ Wɩa

¹ La TƖƖNA, ŋ kɛŋ tʋɔpʋla nɛ bʋa na-kala lɛ, dɩ mɩ nɛ kɛŋ wɩɩ kɔ ŋ teeŋ. Ama mɩ ha jaŋ pɩɛsɩŋ wɩaa a mʋ tɩgɛ ŋ wʋtɩtɩɩ lɛ: Bɛɛ nɛ tɩɩ nɩbɔŋŋɔɔ wɩaa vɩvɛŋ woruŋ? Bɛɛ nɛ tɩɩ nɩalɩŋ kala sɩ bɩ wʋtɩtɩɩ kɛnɛ ŋ teeŋ hɔŋ, wɩɩ bɩ baa walɩmɛ?

² Ŋ chɔnsɛba a nagɛ tɩa ba sɩ chɔnsɔ nɛ, ba naapoloo tuu woruŋ, ba waa a nɛŋ nɛnɛɛ. Ŋ wɩaa hɛ ba niiree lɛ aŋ bol arɩ ba tʋɔŋ.

³ La TƖƖNA, ŋ jɩmmɛ nɛ, ŋ namɛ nɛ a magɩsɛ mɩ tʋɔbɩɩnaa na a tɩgɛ ŋ lɛ. Lɛrɛ nɩbɔmɔ-la a nagɛ ba sɩ lɛrɛ piesee mʋmʋ dɩ ba kpʋ. Pɔrɛba bil a gbɛrɛ tapʋlɩɩ-la ba sɩ jaŋ kpʋba.

⁴ Ɛɛ nɛ la tinteeŋ chɛ dɩ ʋ hɩla diene magɛ, dɩ yaŋ-la sɩ hɛ ʋ lee-kala hɩl? Nɩalɩŋ sɩ hɛ tintee-la lɛ sɩ bɔmɔ wɩaa nɛ tɩɩ pʋsʋŋ, baga kɩaa arɩ zaaraa kala sʋʋ. Ama nɩalɩŋ sɩ, “Ʋ bɩ wɩalɩŋ la sɩɩ ŋaa ka na.”

Wɩɩ-la Wɩa sɩ bʋla pɩ Jɛrɩmaaya

⁵ Ŋɩɩ nɛ la TƖƖNA bʋla pɩ Jɛrɩmaaya, “Dɩ ŋ dɩ nɩaa nɛ kɛŋ naasɩŋ fá pɩpagɩsɛ, dɩ ba kɛnɩŋ fá ŋ kala bɛsɩmɛ, ɛɛ nɛ ŋ dɩ janɩŋ jaŋ wuo fá pagɩsɛ? Dɩ ŋ nɛ gɛrɛ tintee-jaala lɛ, ɛɛ nɛ ŋ jaŋ ŋaa, dɩ ŋ nɛ hɛ Jɔdaŋ tɩɩ-lugunuŋ tʋɔŋ?

⁶ Ŋ naambiiriŋ, ŋ dɩa nɩaa tɩtɩa nɛ paala joŋuŋ yallɛ. Ba chaasa chɩŋ ŋ lɛ nɛ. Sɩ́ ba laa dii, arɩ ba sɩ bʋl wʋzɔŋŋɔɔ a tɩgɛ ŋ lɛ ma kala.

⁷ Mɩ jaŋ vɩa mɩ nɩaa Iziral tɩŋŋaa ta, Mɩ jaŋ vɩa mɩ nɩtɩɩlaa ta. Mɩ jaŋ joŋ mɩ nɩchooloo hɛ ba dʋndɔŋŋɔɔ nɩsɩŋ lɛ.

⁸ Mɩ nɩaa mɩɩra nagɛ naachigiŋ sɩ hɛ duuŋ lɛ nɛ a chɩŋ mɩ lɛ. Baa tʋɔrɛ mɩ lɛ nɛ, ŋɩɩ wɩaa mɩ bɛrɛba nɛ.

⁹ Mɩ nɩtɩɩlaa mɩɩra nagɛ kɩla nɛ mɩ lɛ, kɩllɩŋ dɔnsʋŋ gollu a chu a yuyuo. Mʋ yɩrɛ baga kɩaa kala hɛ dɔŋɔ, a kɛsɛba kɔ dɩ ba dii vɔgɛ.

¹⁰ Sɩpaalaaraa yʋga a jaŋ chei mɩ girep tɩɩsɩŋ baga a nʋɔsɛ mɩ tinteeŋ kpal. Ba jaŋ ŋaa dɩ mɩ tintee-la sɩ sɩma mɩɩra bɩrɩmɛ kʋŋkʋlʋŋ a pɩŋ hoi.

¹¹ Ba jaŋ ŋaa dɩ ʋ lɩɩ, a hɩla pɩŋ hoi mɩ sɩpaaŋ. Tintee-la kala jaŋ pɩŋ kʋŋkʋlʋŋ bɛɛ wɩaa nʋʋkala tuo dɩ ʋ beŋ ʋ nyuŋ.

¹² Laalɩyuoro-la sɩɩ chei leriŋ jaŋ kʋ waala tɔ dundollu-la kala sɩ hɛ tintee-hɩlɩŋ lɛ, mɩ-na ma TƖƖNA tokobiiŋ jaŋ chɩŋ tintee-la sɛmɛ dɔŋɔ, a kpʋ nɩaa deeŋ deeŋ a mʋ yi sɛmɛ dɔŋɔ. Nʋʋkala bɩ jaŋ wiesi.

¹³ Ba jaŋ duu mɛmpɛ aŋ kʋŋ sɔsʋŋ. Ba jaŋ lɔl woruŋ, ama ba bɩ jaŋ na kʋŋkala. Ba jaŋ dii hɩɩsɩŋ a mʋ tɩgɛ ba kʋpɛrɛɛ lɛ, bɛɛ wɩaa mɩ-na ma TƖƖNA faasa na baanɩŋ nɛ ba nyuŋ.”

¹⁴ Wɩɩ-la La TƖƖNA sɩ bʋla nɛ ŋ-la: “Nɩbɔmɔ-la sɩ jʋʋ kpɩkpagɛ mɩ nɩaa Iziral tɩŋŋaa, a kɛŋ dʋa-la mɩ sɩ joŋo pɩba kaa laa, mɩ jaŋ churi nɩbɔmɔ-la ba tinteeŋ lɛ a nagɛ mɩ sɩ churi Juda nɩaa ba tinteeŋ lɛ ŋɩɩ.

¹⁵ Ama dɩ mɩ nɛ churiba dɛrɛ, mɩ jaŋ bɩra fá ba nenige aŋ kɛŋ ba kʋŋkala mɩɩra kɔ ba tinteeŋ arɩ ba dʋa leriŋ.

¹⁶ Dɩ tintee-la nɩalɩŋ nɛ gʋnnɛ mɩ nɩaa wombiee woruŋ, a kɛŋ mɩ yɩrɩŋ tɩtɩŋ, a bʋbʋl, ‘La ŋmɩɛsɛ La TƖƖNA sɩ weye,’ arɩ ba fa sɩ leŋe mɩ nɩaa ŋmɩŋmɩɛsɛ vene-la ba sɩɩ yɩrɛ Baal yɩrɩŋ lɛ ŋɩɩ, ŋɩɩ-na ba jaŋ hɔŋ mɩ nɩaa tʋɔŋ.

¹⁷ Ama dɩ tintee kala nɩaa nɛ bɩ jegile nɩɩ, mɩ jaŋ churiba ta a cheiba gbelem gbelem. Mɩ-na ma TƖƖNA nɛ bʋla.”