JƐRƖMAAYA 11 - WƖA TENIŊ

Juda nɩaa chei nii-la sɩ hɛ ba dɩ Wɩa pɛgɛ

¹ Wɩɩ-la La TƖƖNA fa sɩ bʋla pɩ Jɛrɩmaaya nɛ ŋ-la:

² “Jegile nɩɩ niiŋ deeŋ sɩ hɛ mɩ dɩ ma pɛgɛ wɩaa, a dagɛba pɩ Juda nɩaa arɩ ba nɩalɩŋ sɩ hɛ Jerusalɛm lɛ.

³ Bʋla pɩba wɩɩ-la mɩ-na ma TƖƖNA Iziral tɩŋŋaa Wɩa sɩ bʋla nɛ ŋ-la, ‘Ŋmɩaŋ jaŋ dii nɩɩ-la kala sɩ vɩa dɩ ʋ to wɩalɩŋ sɩ hɛ niiŋ deeŋ sɩ hɛ mɩ dɩ ma pɛgɛ lɛ,

⁴ wɩalɩŋ mɩ sɩ joŋo dagɛ ma naabalɩmaba bʋa-la lɛ mɩ fa sɩ laaba ta Ijipiti tɩŋŋaa nɩsɩŋ lɛ a kɛmba kʋ lɩɩ, lee-la ba fa sɩ chaasa nɩna hɛɛŋ.’ Mɩ fa bʋla pɩba, ‘Má to mɩ niiŋ a ŋaa wɩalɩŋ mɩ sɩ dagɛma. Dɩ ma nɛ ŋaa ŋɩɩ, ma jaŋ ŋaa mɩ nɩaa, dɩ mɩ ma ŋaa ma Wɩa.’

⁵ Ŋɩɩ nɛ mɩ jaŋ leŋ dɩ nii-la mɩ sɩ hɛ pɩ ma naabalɩmaba, a joŋ tinteeŋ sɩ zɔmɔ a kɛŋ kɩaa woruŋ a pɩba kʋ ŋaa wʋtɩtɩɩ, tintee-la nɛ ŋaa ma kʋŋ ŋɩɩ jɩnɩmba.” Ŋɩɩ nɛ mɩ bʋl, “La TƖƖNA, Amɩɩ.”

⁶ La TƖƖNA bɩra bʋla pɩmɛ, “Heele bʋl wɩaa deemba Juda tasɩŋ arɩ Jerusalɛm womporunuŋ lɛ, ‘Má jegile nɩɩ wɩalɩŋ sɩ hɛ niiŋ deeŋ sɩ hɛ mɩ dɩ ma pɛgɛ lɛ a toba.

⁷ A chɩŋ bʋa-la lɛ mɩ fa sɩ kɛŋ ma naabalɩmaba a lɩɩ Ijipiti tinteeŋ lɛ a kaa kʋ yi jɩnɩŋ, mɩ kpʋrɩsɛ ba dɩgɩlaa bʋlɩa bʋlɩa nɛ a bʋl: Má to mɩ niiŋ.

⁸ Ama ba bɩ jegile nɩɩ, aŋ vɩa dɩ ba tomi, ba mɩɩra to ba nyuduoŋ arɩ tʋɔbɩɩŋ bɔŋŋɔɔ harɩŋ nɛ. Ŋɩɩ nɛ mɩ joŋ ŋmɩaŋ-la kala sɩ hɛ nii-la sɩ hɛ mɩ dɩ ba pɛgɛ a hɛ ba lɛ. Nii-la mɩ fa sɩ sɩ ba to ka ba bɩ to.’ ”

⁹ Ŋɩɩ nɛ La TƖƖNA fa bɩra bʋla pɩmɛ, “Juda tɩŋŋaa arɩ ba nɩalɩŋ sɩ hɛ Jerusalɛm lɛ vʋʋrɛ wʋbɔŋ nɛ a tɩgɛ mɩ lɛ.

¹⁰ Ba mɩɩra ŋɩŋaa wʋbɔmɔ-la ba naabalɩmaba-la fa sɩ vɩa dɩ ba jegile nɩɩ mɩ niiŋ wɩaa aŋ ŋaa nɛ. Ba to vʋɩyaa nɛ a kpaarɛba. Juda arɩ Jerusalɛm nɩaa kala chei nii-la mɩ fa sɩ bile mɩ dɩ ba naabalɩmaba pɛgɛ nɛ.

¹¹ Ŋɩɩ wɩaa, wɩɩ-la mɩ-na ma TƖƖNA sɩ bʋla nɛ ŋ-la: ‘Mɩ jaŋ kɛŋ wʋlɔrʋŋ ba sɩ́ bɩ jaŋ wuo fá kagɛ a kʋ hɛ ba lɛ. Ba jaŋ ŋmoo niiŋ mɩ teeŋ, ama mɩ bɩ jaŋ jegile nɩɩ ba teeŋ.

¹² Juda tasɩŋ arɩ Jerusalɛm nɩaa jaŋ mʋ bunso pɩ vesi-la ba sɩ nyɩgɛ kʋsʋɔrʋsʋŋ pɩpa. Ama ba bɩ jaŋ wuo pɛ ba lɛ dɩ wʋlɔrʋ-la nɛ jʋʋba.

¹³ Ma Juda nɩaa kɛŋ vʋɩyaa yʋga magɛ tasɩ-la ma sɩ kɛnɛ nɛ. Korunu-la ma sɩ saa dɩ ma nyɩgɛ kʋsʋɔrʋsʋŋ pɩpɩ ma hɩɩsɛ vene-la ba sɩɩ yɩrɛ Baal ma yʋga nɛ a magɛ Jerusalɛm womporunuŋ.’

¹⁴ Jɛrɩmaaya, sɩ́ mɩ sʋla pɩ nɩaa deemba, sɩ́ ba naasɩŋ lɛ chɩna sʋlmɛ chɩchɛ dɩ mɩ ŋaa wɩɩkala a pɩba, bɛɛ wɩaa mɩ bɩ jaŋ jegile nɩɩ ba teeŋ bʋa-la lɛ hɛɛŋ sɩ jaŋ jʋʋba dɩ ba yɩrɛmɛ.

¹⁵ Wombii bɛɛ nɛ nɩalɩŋ mɩ sɩ cho kɛŋ dɩ ba hɛ mɩ dɩɩ-balɩŋ lɛ a ŋɩŋaa wɩaa, ba sɩ gɔllɔ to ŋaa wʋbɔŋŋɔɔ a yʋga magɛ ŋ-la? Ba bɩɩna ba jaŋ giri wʋlɔrʋ-la ta dɩ ba nɛ hɛ niiriŋ aŋ kpʋ pʋsʋŋ a ŋɩŋaa Wɩɩsʋlʋŋ. Wɩaa deemba jaŋ wuo leŋ dɩ ba tʋɔŋ tɔrɛɛ?

¹⁶ Mɩ-na ma TƖƖNA faa yɩrɛma olif tɩa sɩ kɛŋ pɩpaarɩŋ nɛ, a kɛŋ nɛnɛɛ sɩ faasa zɔŋ. Ama mɩ jaŋ leŋ dɩ pel-duoŋ dɔmɔ sɩ nagɛ taŋ sɩ dɔmɔ lu ʋ nyuŋ, a bori ʋ naakelee, dɩ nyiniŋ diiu.

¹⁷ Mɩ-na ma TƖƖNA, doluŋ kala Tɩɩna sɩ leŋe ma hɛ nɩmɛ, bʋla arɩ wʋlɔrʋŋ jaŋ jʋʋma, bɛɛ wɩaa ma Iziral arɩ ma Juda nɩaa ŋaa wʋbɔŋŋɔɔ nɛ a nyɩgɛ kʋsʋɔrʋsʋŋ pɩpɩ vene-la ba sɩɩ yɩrɛ Baal a ŋaa mɩ baanɩŋ sii.”

Ba pagɛ Jɛrɩmaaya lɛ

¹⁸ La TƖƖNA nɛ joŋo dagɛmɛ ŋɩɩ ba sɩ pagɛ mɩ lɛ. Bʋa-la lɛ, ʋ dagɛmɛ wɩalɩŋ ba sɩɩ ŋaa nɛ.

¹⁹ Mɩ fa nagɛ pie-bie sɩ ŋaa chɩm ka ba kaa mʋmʋ dɩ ba kpʋ nɛ. Mɩ fa bɩ jɩŋ dɩ ba pagɛ mɩ lɛ nɛ a bʋbʋl, “Má leŋ dɩ la nyʋgʋsɛ tɩa-la arɩ ʋ nɛnɛɛ kala. Má leŋ dɩ la keru ta nɩweyee tʋɔŋ, dɩ nɩaa bɩra sɩ́ ʋ wɩaa liisu.”

²⁰ Ama La TƖƖNA, doluŋ kala Tɩɩna, ŋ nɛ yie dii sarɩya arɩ tʋɔpʋla, a magɩsɛ nɩaa tʋɔbɩɩnaa arɩ wɩalɩŋ sɩ hɛ ba nyuŋ lɛ a jɩmba. Leŋ dɩ mɩ na ŋɩɩ ŋ sɩ jaŋ joŋ ŋ baanɩŋ a tiŋ ba lɛ, bɛɛ wɩaa mɩ joŋ mɩ wɩɩkala hɛ ŋ nɩsɩŋ lɛ nɛ.

²¹ Ŋɩɩ wɩaa wɩɩ-la La TƖƖNA sɩ bʋla a mʋ tɩgɛ Anatɔf baala-la sɩɩ chɛ dɩ ba kpʋmɛ lɛ nɛ ŋ-la: “Sɩ́ wɩaa bʋl La TƖƖNA yɩrɩŋ lɛ, dɩ ŋɩɩ dee la jaŋ kpʋŋ.

²² Ŋɩɩ wɩaa, wɩɩ-la mɩ-na ma TƖƖNA, doluŋ kala Tɩɩna bɩra sɩ bʋla nɛ ŋ-la: Mɩ jaŋ dɔgɩsɛba. Ba bapʋɔsaa jaŋ sʋʋ laalɩŋ lɛ, dɩ losuŋ kpʋ ba hambolibiisiŋ arɩ ba toloo ma dɩ ba sʋʋ.

²³ Ba nɩbala ma bɩ jaŋ ka, bɛɛ wɩaa mɩ jaŋ lɛrɛ wʋlɔrʋŋ kʋ hɛ Anatɔf nɩalɩŋ lɛ, jɩna-la lɛ mɩ sɩ jaŋ dɔgɩsɛba.”