JƐRƖMAAYA 10 - WƖA TENIŊ

Wɩa arɩ vʋɩyaa

¹ Iziral tɩmma, má jegile nɩɩ wɩɩ-la La TƖƖNA sɩ bʋla pɩpɩma.

² Wɩɩ-la La TƖƖNA sɩ bʋla nɛ ŋ-la: “Má sɩ́ tinteye-la dɔnsʋŋ nɩaa naabʋɔsʋŋ to, a sɩ́ leŋe dɩ wʋmagɩla-la arɩ kʋmagɩla-la ma sɩɩ na wɩa-nyuŋ leŋ dɩ fawʋllʋŋ kɛmma, a nagɛ ŋɩɩ tinteye-la dɔnsʋŋ nɩaa sɩɩ fá ba.

³ Nɩalɩŋ naabarɩŋ bɩ bʋbʋɔ kɛnɛ. Ba yie keri tɩa nɛ duuŋ lɛ, saara kɛŋ ʋ saaŋ saa daa-la a kaa bɩrɩmɛ vʋɩŋ.

⁴ Ba yie kɛŋ hɔpʋla arɩ sɛlɩmɛ a kpɩɛrʋ nɛ, aŋ kɛŋ hama ŋmoo hɛŋŋɛɛ hɛ dɩ ʋ chɩŋ a sɩ́ jigisu.

⁵ Ba vʋɩya-la nagɛ ba sɩ ŋaa kʋa bil baga lɛ nɛ dɩ ʋ nyɩnyɩsɛ diiree. Ba bɩ wɩaa wuo bʋl, ba yie jomba chʋŋ nɛ, bɛɛ wɩaa ba bɩ wuo vɛŋ. Má sɩ́ ba fá, ba bɩ wʋbɔŋ wuo ŋaa ma lɛ, a bɩ wʋzɔŋ ma wuo ma lɛ.”

⁶ La TƖƖNA, nʋʋkala tuo a nagɩŋ, ŋ nɛ yʋga, ŋ nɛ kɛŋ doluŋ, ŋ yɩrɩŋ ma yʋgɛ.

⁷ Ŋ nɛ tinteyee kala kuoru-balɩŋ kʋbɛɛ nɛ bɩ jaŋ fáŋ? Nʋʋkala maga dɩ ʋ ziliŋ nɛ. Ŋ dʋndʋŋa nɛ maga dɩ nɩaa fá. Tinteyee nɩaa wʋjɩnnaa arɩ ba kuori-gentisiŋ kala tʋɔŋ, nʋʋkala tuo a magɩŋ.

⁸ Ba kala ŋaa nɩaa sɩ chʋʋla arɩ nɩyaaraa nɛ. Daasɩŋ ba sɩ kaa ŋaa vʋɩyaa sɩ ŋaa kʋpɛɩba nɩɩ dagɛba wɩaa.

⁹ Ba yie kɛŋ hɔpʋla ba sɩ kaa lɩɩ Taasɩs nɛ a libiba, a kɛŋ sɛlɩmɛ ma ba sɩ kaa lɩɩ lee-la ba sɩɩ yɩrɛ Ufas a libi. Kɩaa deemba saara arɩ libire sɩ ŋaa nɛ ba yie joŋ gɛrɩŋ sɩ nagɛ diibelimbine arɩ gɛrɩ-vachalɩŋ a laalɛ. Gɛrɩpɛ-yuori gɔgɔɔ nɛ yuo gɛnnɩŋ deemba kala.

¹⁰ Ama La TƖƖNA nɛ ŋaa Wɩɩ-tɩtɩɩ. Ʋ nɛ Wɩa sɩ weye. Ʋ nɛ kuoru-bal-la sɩ hɛ nɩmɛ a kaa mʋ deeŋ deeŋ. Dɩ ʋ nɛ na baanɩŋ, tinteeŋ yie zigili nɛ. Dɩ ʋ baanɩŋ nɛ sie, tinteyee bɩ jaŋ wuo chɩŋ.

¹¹ Má bʋl ŋ-la pɩ nɩalɩŋ: “Vʋɩyaa deemba ba sɩ to dee bɩ wɩa-nyuŋ arɩ tinteeŋ ŋaa, ba jaŋ nyɩɩgɛ tinteeŋ lɛ a lɛl dʋnɩa kala lɛ.”

¹² Wɩa kɛŋ ʋ doluŋ nɛ a ŋaa tinteeŋ, a kɛŋ ʋ wʋjɩmɩŋ ma a ŋaa dʋnɩa. Ʋ sɩ jɩŋ wɩaa sɩaa ma lɛ nɛ ʋ to a ŋaa wɩa-nyuŋ a leŋ ʋ jɛrɛ.

¹³ Dɩ ʋ nɛ kpɩa wɩaa, lɩɩ-la sɩ hɛ wɩa-nyuŋ yie huuri nɛ. Ʋ yie leŋ duoŋ-bɩlɩmbaanaa lɩɩ dʋnɩa dɩdɛrɩŋ nɛ a kʋ hɛ dɔŋɔ. Ʋ leŋ duonuŋ nɩnɩɩ, aŋ lɩlɩgɩsɛ, a leŋ peliŋ ma lɩɩ ʋ lee-la lɛ ʋ sɩ bilu a lulu.

¹⁴ Nʋʋkala chʋʋla nɛ a bɩ wʋjɩmɩŋ kɛnɛ. Hɩɩsɩŋ dii nɩalɩŋ sɩ kɛŋ sɛlɩmɛ libi vʋɩyaa nɛ, bɛɛ wɩaa ba vʋɩya-la bɩ wʋtɩtɩɩ kɛnɛ, ba bɩ wiese ma kɛnɛ.

¹⁵ Ba bɩ bʋbʋɔ kala kɛnɛ. Ba ŋaa kɩaa sɩ kɛŋ mɔmʋŋ nɛ. Dɩ ba sarɩya diiniŋ tapʋlʋŋ nɛ yie, ba jaŋ cheiba.

¹⁶ Jekɔb Wɩa-na bɩ ba naga. Ʋ nɛ ŋaa kʋŋkala, aŋ lɩɩsɛ Iziral tɩŋŋaa ba ŋaa ʋ nɩaa. Ʋ yɩrɩŋ nɛ La TƖƖNA doluŋ kala Tɩɩna.

Cheeri-la sɩɩ kɔ

¹⁷ Má paa ma kɩaa hɛ dɔŋɔ, a kɛŋ ma tɩtɩa dɩ ma lɩɩ tintee-la lɛ. Ba golli ma chu nɛ.

¹⁸ Wɩɩ-la La TƖƖNA sɩ bʋla nɛ ŋ-la: “Bʋa deeŋ lɛ, mɩ jaŋ joŋ nɩalɩŋ sɩ hɛ tinteeŋ deeŋ lɛ a yuo ta. Mɩ jaŋ joŋ hɛɛŋ yʋgɛ a hɛ ba lɛ, dɩ ba yuo kɛsɛba.”

¹⁹ Wɩaa puumi, mɩ sɩ bolimo wɩaa. Mɩ naawɩɩlɩŋ bɩ kʋfɩɛlɩɩ ŋaa, ka mɩ ha bʋl mɩ tɩtɩa lɛ, “Mɩ nyanyalɩŋ nɛ ŋ-la, ʋ maga dɩ mɩ nyalɩmɛ nɛ.”

²⁰ Ba chei mɩ lɛbɩŋ nɛ, a keri ʋ ŋmɛsɩŋ kala. Mɩ biiriŋ kala viire nɛ aŋ ka mɩ, ba bɩra tuo. Nʋʋkala bɩra tuo dɩ ʋ hɛ mɩ lɛbɩŋ, koo dɩ ʋ kɛŋ lɛbɩ-la patɩɩsamba kɛrɛ.

²¹ Sɩpaalaara-la kala yaara nɛ, a bɩ La Tɩɩna pɩɛsa dɩ ʋ dagɛba wɩaa. Ŋɩɩ nɛ tɩɩ ba wɩɩkala bɩ wasa, ba nɩaa kala pɩsɛ.

²² Má jegile nɩɩ goŋ-la ba sɩ ŋaa kʋkɔ. Yuo-bal nɛ sii wɩɩpɔsʋŋ nagʋa tinteeŋ a kʋkɔ. Ʋ jaŋ ŋaa dɩ Juda tinteeŋ tasɩŋ pɩŋ hoi, a bɩrɩmɛ jolluŋ dɩjʋʋlʋŋ.

Jɛrɩmaaya Wɩɩsʋlʋŋ

²³ La TƖƖNA, mɩ jɩma nuhuobiine tɩtɩa dee bɩ ʋ mɩɩsɩŋ koro. Nuhuobiine tɩtɩa dee bɩ ʋ naavɛnɛɛ ka dagɛ.

²⁴ La TƖƖNA, kɛmmɛ tʋra kɩɩ. Ama ŋaa ŋɩɩ arɩ sɩɩfɩɛlaa. Sɩ́ baanɩŋ lɛ to, dɩ ŋɩɩ dee, ŋ jaŋ leŋ dɩ mɩ ŋaa kʋpɛɩ.

²⁵ Na baanɩŋ tinteye-la nɩaa sɩ bɩŋ jɩŋ nyuŋ, nɩalɩŋ sɩ bɩ ŋ yɩrɩŋ ka yɩrɛ. Ba kpʋ Iziral nɩaa nɛ. Ba kpʋ ba kala nɛ gbelem gbelem, aŋ chei ba tinteeŋ kala.