JEMBIEE 3 - WƖA TENIŊ

Nʋʋ sɩ na hɛɛŋ aŋ bɩra kɛŋ yɩɛlaa

¹ Mɩ nɛ nɩɩ-la Wɩa sɩ na baanɩŋ a kɛŋ ʋ daŋkpɩlɩŋ dɔgɩsɛ.

² Ʋ kirimi ta nɛ a leŋ mɩ vɛŋ birimiŋ tʋɔŋ. Ʋ bɩ sɛyɛ mɩ vɛŋ pʋlʋmʋŋ lɛ.

³ Wʋtɩtɩɩ, ʋ chaasa ŋmoomi nɛ a bɩra ŋmoomi, a ŋmoomi halɩɩ tapʋlɩɩ-la kala.

⁴ Ʋ leŋe mɩ hɩɛsɛ nɛ mɩ yaraa kala ŋmɩɩmɛ, mɩ haŋgbelee nyʋgʋsɛ.

⁵ Ʋ tɔ mɩ hɛ nɛ a gollimi chu a leŋ wɩaa jʋʋmɛ woruŋ, mɩ faasa nɩna hɛɛŋ.

⁶ Ʋ leŋe mɩ hɛ birimiŋ tʋɔŋ nɛ a nagɛ nɩaa sɩ sʋʋ faafaa kala.

⁷ Ʋ saa kɛrɛ nɛ a gollimi, a vɔɔmɛ bil arɩ chɔrʋmɔɔ.

⁸ Dɩ mɩ nɛ paala yɩrʋ a ŋmoo niiŋ pʋ dɩ ʋ pɛ mɩ lɛ, ʋ yie vɩa mɩ sʋla nɛ.

⁹ Ʋ paa tabɩaa nɛ a kɛrɛ mɩ wɛnɩŋ, a leŋ mɩ wombiee golibi.

¹⁰ Ʋ pɩna gbɛrɛmɛ a nagɛ lʋgʋmʋŋ nɛ, a nagɛ naachigiŋ sɩ faa.

¹¹ Ʋ lɛrɛ lɩɩsɛmɛ mɩ wombiiŋ lɛ a kɛmmɛ pʋɔsɛ nɛ aŋ lemmi ta.

¹² Ʋ lɛrɛ ʋ toŋ hɛ nɛ a joŋ hɛmɩŋ hɛ a kaa pɛsɛ mɩ lɛ.

¹³ Ʋ huoŋ tʋɔŋ hɛŋŋɛɛ nɛ ʋ lɩɩsɛ a yagɛmɛ a jʋʋ kɛŋ mɩ chʋbagɩlɩŋ-buguluŋ.

¹⁴ Mɩ ŋaa mɔmɩɩ nɛ mɩ nɩaa kala teeŋ, ba kɛmmɛ hɛ yɩɩlɩŋ a sisieri mɩ lɛ tapʋlɩɩ kala.

¹⁵ Ʋ leŋe mɩ na hɛɛŋ a nagɛ nɩa sɩ nyʋa susuŋ sɩ hɛyɛ nɛ.

¹⁶ Ʋ leŋe mɩ chaŋ kpaga nɛ, mɩ nyɩlaa bori, ʋ nʋɔsɛmɛ ŋmʋrɛ hagɩla lɛ.

¹⁷ Ʋ pɔ mɩ sɩ́ fɩɛlɩŋ na nɛ, mɩ yʋ sɩma wɩaa.

¹⁸ Ŋɩɩ nɛ mɩ bʋl, “Mɩ wɩɩkala dɛrɛ nɛ, wɩalɩŋ kala mɩ fa sɩɩ yɩɛlɛ La TƖƖNA teeŋ lɛlɛ nɛ.”

¹⁹ Mɩ sɩ liise yi ŋɩɩ mɩ sɩ na hɛɛŋ a gɔllɔ baarɛ lɛ, ʋ nagɛ susuŋ sɩ hɛyɛ nɛ mɩ teeŋ.

²⁰ Mɩ chaasa liisiba nɛ woruŋ, mɩ tʋɔŋ chaasa chei.

²¹ Ama wɩɩ-la lɛ mɩ sɩ yie bɩɩna yi a kɛŋ yɩɛlaa nɛ ŋ-la:

²² La TƖƖNA chono-la sɩ bɩ dɛrɛ wɩaa nɛ tɩɩ la bɩ sʋba, bɛɛ wɩaa ʋ sɩɩ fá nɩaa nenige ŋɩɩ bɩ birigi.

²³ Chʋchʋɔ na-kala ba yie bɩrɩmɛ wʋfalɩa nɛ. Ŋ wʋtɩtɩɩ chaasa yʋgɛ nɛ.

²⁴ Ŋɩɩ nɛ mɩ bʋl mɩ tɩtɩa lɛ, “La TƖƖNA nɛ mɩ kʋa kala, ŋɩɩ wɩaa mɩ jaŋ gbɛrʋ.”

²⁵ La TƖƖNA wɩaa zɔmɔ nɩalɩŋ sɩ kɛŋ yɩɛlaa ʋ lɛ, nɩalɩŋ sɩɩ chɛʋ teeŋ.

²⁶ Ʋ ŋaa wʋzɔŋ nɛ dɩ ŋ nyalɩmɛ a gbɛrɛ La TƖƖNA dɩ ʋ laaŋ ta.

²⁷ Ʋ ŋaa wʋzɔŋ nɛ dɩ nʋʋkala gʋnnɛ hɛɛŋ, ʋ hambiriŋ lɛ.

²⁸ Dɩ La TƖƖNA nɛ joŋ chʋga chʋŋ nʋʋ, ʋ maga dɩ ʋ fɩɛla hɔŋ chɩm.

²⁹ Ʋ maga ʋ kɛŋ ʋ tɩtɩa tuu tinteeŋ, kapo yɩɛlaa ha jaŋ wuo hɛ nɩmɛ.

³⁰ Ʋ maga ʋ joŋ ʋ chaŋkpaŋɩŋ pɩ nɩɩ-la sɩɩ ŋmobu a sɛɩ hɩɩsɩŋ,

³¹ bɛɛ wɩaa La TƖƖNA bɩ nɩaa vɩa tɩta deeŋ deeŋ.

³² Ʋ yie wuo leŋ nɩa na hɛɛŋ, ka ʋ bɩra fá ʋ nisusuŋ. Ʋ chono-la sɩ bɩ dɛrɛ yʋga kɩŋkɛŋ.

³³ Ʋ tʋɔtɔrʋŋ dee dɩ ʋ dɔgɩsɛ nɩaa a leŋ dɩ ba na hɛɛŋ.

³⁴ Ʋ bɩ cho dɩ ba nʋɔsɛ nɩalɩŋ kala ba sɩ kaa tɔ bɩnɩŋ dɩa bil tinteeŋ lɛ,

³⁵ a vɩa dɩ ba leŋ dɩ nuhuobiine na wɩalɩŋ sɩ maga dɩ ʋ na. Wɩa sɩ kɩɩ kʋŋkala bɩ ŋɩɩ cho.

³⁶ Dɩ ba nɛ pɔ dɩ ba sɩ́ kʋsɩŋŋaa joŋo pɩ nʋʋ sarɩya dɩ-diiliŋ, La TƖƖNA ka na nɛ.

³⁷ Kʋbɛɛ nɛ jaŋ wuo bʋl wɩɩ, aŋ leŋ dɩ wɩɩ-la ŋaa dɩ La TƖƖNA bɩ wombiiŋ pa?

³⁸ Wɩa sɩ kɩɩ kʋŋkala nɛ yie leŋ wʋlɔrʋnʋŋ arɩ wʋzɔŋŋɔɔ kala kɔ.

³⁹ Bɛɛ nɛ tɩɩ nuhuobiiŋ kala jaŋ gʋrɩmɛ wɩaa dɩ ba nɛ dɔgʋsʋ a tɩŋ ʋ wʋbɔŋŋɔɔ wɩaa?

⁴⁰ Má leŋ dɩ la beŋ la wʋŋaalaa aŋ kɛmba bɩɩna na, aŋ mɩɩra mʋ La TƖƖNA teeŋ.

⁴¹ Má leŋ dɩ la pʋllɛ la tʋɔŋ a bal nɩsaa Wɩa sɩ hɛ ʋ jaŋ lɛ teeŋ a bʋl,

⁴² “La ŋaa wʋbɔŋŋɔɔ nɛ a vɩa ŋ niiŋ ka ŋ bɩ joŋo chɛla.

⁴³ Ŋ joŋ baanɩŋ tɔ ŋ tɩtɩa nɛ a kire to la harɩŋ. Ŋ kpʋla nɛ a bɩ la nenige fá.

⁴⁴ Ŋ joŋ duoŋ-bɩlɩmbaanɩŋ tɔ ŋ tɩtɩa nɛ, dɩ ŋɩɩ leŋ dɩ ŋ sɩ́ la sʋla nɩɩ.

⁴⁵ Ŋ kɛnla bɩrɩmɛ pupuluŋ arɩ nʋsʋrʋŋ nɛ, la guoli tinteyee nɩaa tʋɔŋ.

⁴⁶ La dʋndɔŋŋɔɔ kala chaasa suri ba niiree nɛ a sii chɩŋ la lɛ.

⁴⁷ La dʋndɔŋŋɔɔ cheila nɛ, ka la jaŋ pɩŋ jikpeeŋ. La tuu buotuonuŋ nɛ, fawʋllʋŋ faasa jʋʋla.”

⁴⁸ Ba chei mɩ nɩaa nɛ, ŋɩɩ nɛ tɩɩ sɩlɩɩrɩŋ pɩpɛllɛ mɩ sɩaa lɛ a nagɛ fuoŋ.

⁴⁹ Mɩ sɩaa jaŋ pɛllɛ sɩlɩɩrɩŋ a bɩ kɛrɛ. Ba bɩ jaŋ wiesi

⁵⁰ a kaa mʋ yi bʋa-la lɛ La TƖƖNA sɩ hɛ ʋ jaŋ lɛ aŋ bee na.

⁵¹ Wɩalɩŋ mɩ sɩ na dɩ ba joŋo ŋaa haala-la kala sɩ hɛ mɩ tabalɩŋ lɛ leŋe mɩ tʋɔŋ chei nɛ.

⁵² Nɩalɩŋ sɩ ŋaa mɩ dʋndɔŋŋɔɔ ka mɩ bɩ ba wɩɩ cheye, ka bagɩlɛmɛ nɛ a nagɛ mɩ ŋaa diibie.

⁵³ Ba walɩma dɩ ba kpʋmɛ nɛ a jommi hɛ buotuoŋ lɛ, a joŋ tabɩɩŋ tɔ.

⁵⁴ Lɩɩŋ tɔ mɩ nyuŋ, mɩ bɩɩnɛ dɩ mɩ sʋba nɛ.

⁵⁵ La TƖƖNA, mɩ hɛ buotuo-luŋii-la lɛ nɛ aŋ yɩrɩŋ dɩ ŋ pɛ mɩ lɛ.

⁵⁶ Ŋ nɩɩ mɩ sɩɩ sʋllʋŋ nɛ, sɩ́ ŋ dɩgɩlaa tɔ mɩ sɩɩ ŋmoo niiŋ dɩ ŋ laamɛ ta.

⁵⁷ Mɩ sɩ yɩrɩŋ, ŋ kʋ kpagɛmɛ nɛ, a bʋla pɩmɛ, “Sɩ́ fawʋllʋŋ fá.”

⁵⁸ La TƖƖNA, ŋ chɩŋ mɩ harɩŋ nɛ a laa mɩ mɩɩsɩŋ pɩmɛ.

⁵⁹ La TƖƖNA, ŋ na wʋbɔŋ-la ba sɩ joŋo ŋaa mɩ lɛ nɛ. Laa mɩ wɩɩŋ jɩma pɩmɛ.

⁶⁰ Ŋ na wɩalɩŋ kala ba sɩɩ chɛ dɩ ba joŋo tiŋ mɩ lɛ nɛ, wɩalɩŋ kala ba sɩ vʋʋra a chɩŋ mɩ lɛ.

⁶¹ La TƖƖNA, ŋ nɩɩ jomo-la ba sɩ tʋʋsɛmɛ nɛ, wɩalɩŋ kala ba sɩ vʋʋra a chɩŋ mɩ lɛ,

⁶² wɩalɩŋ mɩ dʋndɔŋŋɔɔ sɩ lʋara gʋrɩmɛ a sii chɩŋ mɩ lɛ chɛɛ-la kala.

⁶³ Bee naba, dɩ ba hɔnɔ nɛ koo dɩ ba chɩna nɛ, ba kɛmmɛ hɛ yɩɩlaa nɛ a sisieri mɩ lɛ.

⁶⁴ La TƖƖNA, joŋ wɩɩ-la sɩ maga a tiŋ ba lɛ wɩɩ-la ba sɩ ŋaa.

⁶⁵ Ŋaa dɩ ba tʋɔŋ dol, dɩ ŋ ŋmɩaŋ diiba.

⁶⁶ La TƖƖNA, kire to ba harɩŋ arɩ baanɩŋ a cheiba, dɩ ba bɩra sɩ́ dʋnɩa lɛ hɛ.