Jeems 5 - WƖA TENIŊ

Kɩaa tɩŋŋaa ma kɛŋ ma tɩtɩa woruŋ

¹ Ma nɩalɩŋ sɩ kɛŋ kɩaa, má jegile nɩɩ mɩ teeŋ. Máa ŋmoo niiŋ a yiyel a tɩŋ hɛɛ-la sɩ jaŋ jʋʋ ma wɩaa.

² Ma kʋ-daŋ-la suomo chichei nɛ. Tiiŋ ma suomo didii ma gɛnnɩŋ.

³ Ma sɛlɩmɛ arɩ ma hɔpʋla kala nɛ sʋa. Kɩalɩŋ sɩ sʋa ŋɩɩ daga arɩ ma bɩ woruŋ ŋaa. Ma kɩalɩŋ sɩ sʋa ŋɩɩ, ŋɩɩ tɩtɩa nɛ ma yaraa ma jaŋ pʋa a nagɛ nyiniŋ sɩ die. Lɛɛlɛ dʋnɩa kpagɛ dɩdɛrɩŋ nɛ, aŋ ka ma-na ha nyagɛ kɩaa bil.

⁴ Ma vɩa dɩ ma tiŋ nɩalɩŋ ma, ma sɩ ŋaa ba tɩŋ ma bagɩsɩŋ lɛ nɛ. Ba nɛ yele hɩhɛ ma lɛ. Ba yele-la jʋʋ La Tɩɩna Wɩa dɩgɩlaa nɛ, Nɩɩ-la sɩɩ beŋ dʋnɩa kʋŋkala.

⁵ Ma sɩ hɛ dʋnɩa lɛ, ma nɩɩ sɩma a ŋaa ma tʋɔtɔrɛ wɩaa nɛ. Ma dɩɛsɛ ma tɩtɩa a nagɛ nɛsɩŋ ba sɩ dɩɛsa ba nɛrɛ dɩ ba kpʋ nɛ.

⁶ Ma joŋ cheeriŋ pɩ nɩalɩŋ sɩ bɩ wɩɩ cheye nɛ, a kpʋba. Ka ba bɩ lobo dɩ ba laa ba tɩtɩa.

Má kɛŋ kenyiri a chʋchʋɔlɛ Wɩa

⁷ Mɩ naambiiriŋ, má kɛŋ kenyiri a gbɛrɛ chɛɛ-la La Tɩɩna Yesu sɩ jaŋ mɩɩra kɔ. Ma bee na ŋɩɩ paara sɩ kɛŋ kenyiri. Ʋ yie gbɛrɛ nɛ duoŋ-puso nɩɩ, ʋ duu kɩaa, a bɩra kɛŋ kenyiri a gbɛrɛ gbanchaaŋ-duonuŋ lɛ ʋ kɩaa ŋaa, ʋ kʋŋ.

⁸ Má ma kɛŋ kenyiri ŋɩɩ, a chɩŋ kpaŋ kpaŋ, bɛɛ wɩaa tapʋlɩɩ-la La Tɩɩna Yesu sɩ jaŋ mɩɩra kɔ kpaga nɛ.

⁹ Mɩ naambiiriŋ, má sɩ́ wɩaa gʋrʋmʋ dɔŋɔ lɛ, dɩ Wɩa sɩ́ ma sarɩya dii a joŋ cheeriŋ pɩma. Na nɩɩ-la sɩ jaŋ dii la sarɩya nɛ chɩŋ boiŋ niiŋ a ŋaa siri dɩ ʋ jʋʋ ŋɩɩ.

¹⁰ Mɩ naambiiriŋ, má bee na Wɩa wʋlaabʋlla-la sɩ bʋl wɩaa La Tɩɩna yɩrɩŋ lɛ, ba na hɛɛŋ nɛ woruŋ aŋ ha kɛŋ kenyiri. Má ma hɛ doluŋ aŋ to ba naabʋɔsʋŋ.

¹¹ Wɩa pɛ nɩalɩŋ sɩ wuo nyalɩmɛ ŋɩɩ a mʋ dɛrɛ lɛ nɛ woruŋ. Ma nɩɩ ŋɩɩ baal kʋbala ba sɩɩ yɩrɛ Job sɩ na hɛɛŋ aŋ nyalɩmɛ nɛ, a bɩra nɩɩ ŋɩɩ Wɩa sɩ pɛ ʋ lɛ ʋ hɛɛ-la harɩŋ lɛ. Wʋtɩtɩɩ, La Tɩɩna ka fá la nenige arɩ la nisusuŋ nɛ kɩŋkɛŋ kɩŋkɛŋ.

¹² Mɩ naambiiriŋ, wɩaa deemba kala harɩŋ lɛ, sɩɩfɩaŋ wɩɩ nɛ mɩɩ chɛ mɩ bʋla pɩma. Ʋ nɛ ŋ-la: Dɩ ma nɛ sɩ ma jaŋ ŋaa wɩɩ, má sɩ́ ŋmɩɛsʋ. Má sɩ́ wɩa-nyuŋ kʋŋ ŋmɩɛsʋ, má sɩ́ tinteeŋ kʋŋ ma ŋmɩɛsʋ, koo má sɩ́ kʋŋkala ŋmɩɛsʋ. Dɩ ma nɛ sɛyɛ, ʋ maga dɩ ma bʋl, “Oo, la sɛyɛ nɛ.” Dɩ ma nɛ bɩra bɩ sɛyɛ ma, ʋ maga dɩ ma bʋl, “Aɩ, la bɩ sɛyɛ,” aŋ sɩ́ ŋmɩɛsʋ. Dɩ ma nɩɩ ŋaa ŋɩɩ, Wɩa bɩ jaŋ joŋ cheeriŋ pɩma bʋa-la lɛ ʋ sɩ jaŋ dii ma sarɩya.

Ma laa Wɩa dii ma Wɩɩ-chʋɔlʋŋ lɛ

¹³ Dɩ nʋʋ nɛ hɛ ma tʋɔŋ dɩ wɩaa wʋwalɩmʋ, má leŋ dɩ ʋ chʋɔlɛ Wɩa a sʋlʋ dɩ ʋ pɛ ʋ lɛ. Dɩ nʋʋ ma nɛ hɛ ma tʋɔŋ, dɩ ʋ tʋɔŋ tɔrɛ, má leŋ dɩ ʋ yɩɩ yɩɩlaa a dɛnnɛ Wɩa.

¹⁴ Dɩ nʋʋ ma nɛ hɛ ma tʋɔŋ a wʋwɩɩlɛ, má leŋ dɩ ʋ yɩrɛ nɩalɩŋ sɩ laa Yesu wɩaa dii aa hilimi tʋɔŋ kʋhɩasɩŋ dɩ ba kɔ ʋ teeŋ a chʋɔlɛ Wɩa pʋ. Ba jaŋ lɔgɛ nʋʋŋ a tɩsʋ, aŋ sʋl Wɩa pʋ La Tɩɩna Yesu yɩrɩŋ lɛ.

¹⁵ Dɩ ba nɛ laa dii arɩ Wɩa jaŋ sɛnɛ ŋaa wɩɩ-la ba sɩ sʋlʋ chɩchɛ, ʋ jaŋ leŋ dɩ nɩɩ-la sɩɩ wɩɩlʋ duori a kɛŋ doluŋ. Dɩ ʋ nɛ kɛŋ wʋbɔŋŋɔɔ ma, Wɩa jaŋ joŋ ba kala chɛʋ.

¹⁶ Ŋɩɩ wɩaa, má dagɛ ma wʋbɔŋŋɔɔ a pɩ dɔŋɔ a sʋl Wɩa a pɩpɩ dɔŋɔ, dɩ Wɩa wuo ŋaa dɩ ma duori. Dɩ tʋɔpʋl tɩɩna nɛ sʋl Wɩa, ʋ Wɩɩsʋlʋŋ yie faasa kɛŋ doluŋ nɛ a ŋaa wɩɩ-la ʋ sɩɩ chɛ pʋ.

¹⁷ Má na baal kʋbala baa yɩrɛ Ɩlaaja. Ʋ ma fa nagɛla nɛ. Ʋ faasa sʋl Wɩa arɩ sɩɩfɩɛsɩŋ dɩ duonuŋ sɩ́ nɩɩ. Duonuŋ sɛnɛ bɩ nɩa jɩsɩŋ batori arɩ chɛnsɩŋ balɩdʋ.

¹⁸ Ŋɩɩ harɩŋ lɛ nɛ ʋ bɩra sʋl Wɩa a chɩchɛ duonuŋ. Ŋɩɩ nɛ Wɩa leŋ duonuŋ nɩɩ, ba duu kɩaa, ba kala wasɛ.

¹⁹ Mɩ naambiiriŋ, dɩ ma tʋɔŋ nʋʋ nɛ faa to wʋtɩtɩɩ lɛ aŋ bɩra leŋ wʋtɩtɩɩ-la, ka nʋʋ dɔŋ bɩra kɛnʋ mɩɩra kɔ ʋ tuto wʋtɩtɩɩ-la,

²⁰ ʋ tɩɩna sɩ ŋaa ŋɩɩ pɛ wʋbɔŋ ŋaarʋ-la lɛ nɛ ʋ leŋ ʋ wʋbɔŋŋɔɔ ŋaanɩŋ aŋ mɩɩra kɔ a tuto wʋtɩtɩɩ-la. Ʋ laa tɩɩna mɩɩsɩŋ pʋ nɛ. Wɩa jaŋ joŋ nɩɩ-la wʋbɔŋŋɔɔ kala chɛʋ. Mɩ teniŋ dɩdɛrɩŋ nɛ ŋɩɩ.