Jeems 3 - WƖA TENIŊ

La nandelimiŋ sɩ nagɛ ŋɩɩ

¹ Mɩ naambiiriŋ, ma tʋɔŋ, ma jesiŋ sɩ́ chɩchɛ dɩ ma ŋaa nɩa sɩɩ dagɛ ma dɔnsʋŋ tɩmma-la sɩ laa Yesu wɩaa dii, bɛɛ wɩaa ma jɩma dɩ ba nɩɩ dii dʋnɩa nɩaa sarɩya, ba jaŋ faasa dii la nɩalɩŋ sɩɩ dagɛ nɩaa sarɩya nɛ a kɩɩ la dɔnsʋŋ tɩŋŋaa.

² La kala yie ŋaa wɩaa piperigi nɛ. Dɩ nʋʋ nɛ bɩ wɩaa bʋla piperigi, ʋ bɩ wʋcheeli kɛnɛ. Ʋ wuo kɛŋ ʋ tɩtɩa nɛ wɩalɩŋ kala ʋ sɩɩ ŋaa lɛ.

³ Na jaaba, dɩ nʋʋ nɩɩ chɛ dɩ ʋ dagʋ, ʋ yie joŋ jaaba niiŋ koŋ nɛ a hɛ jaaba niiŋ lɛ. Koŋ-la lɛ nɛ ʋ yie kɛŋ, a dɩdagɛ jɔɔ-la ʋ mʋmʋ lee-la kala ʋ sɩɩ chɛ dɩ ʋ mʋ.

⁴ Bɩra na lɩɩŋ daborusuŋ ma. Ba ŋaa kʋbalaa nɛ, pel-duoŋ yie lu a kaa vɛŋ. Ama danyiŋ-bie nɛ nɩɩ-la sɩ kɛŋ lɩɩŋ daboro-la vɩvɛŋ yie kaa kuosi lɩɩŋ a dagɛ lɩɩŋ daboro-la lee-la kala ʋ sɩɩ chɛ ʋ mʋ.

⁵ Ŋɩɩ nɛ nuhuobiine nandelimiŋ ma nagɛ. Ʋ ŋaa la yaraa sɛmɛ dɔŋɔ nɛ a bɩ wɩɩkala maga aŋ bʋbʋl wʋbalaa. Má bee na ŋɩɩ nyiŋ-gel-bie sɩ jaŋ wuo chol gɩrɩ-balɩŋ a dii ʋ kala.

⁶ Nuhuobiine nandelimiŋ ma nagɛ nyiniŋ nɛ. Ʋ jaŋ wuo bʋl wʋbɔŋ kala sɩ hɛ dʋnɩa lɛ. Ʋ ŋaa la yaraa sɛmɛ dɔŋɔ nɛ. Ama ʋ wʋbɔŋŋɔɔ ʋ sɩ yie ŋaa yie cheŋ la yaraa kala nɛ ʋ chei. Ʋ yie nagɛ nyiniŋ nɛ a dii ŋɩɩ halɩɩ nuhuobiine mɩɩsɩŋ kala lɛ. Wɩalɩŋ sɩ nagɛ nyiniŋ yie lɩɩ Sɩtaanɩ teeŋ nɛ a kɔ.

⁷ Nuhuobiine kɛŋ pʋsʋŋ kala doluŋ nɛ: Baga kɩaa arɩ diibiisiŋ, arɩ kɩalɩŋ kala sɩɩ tuuri tinteeŋ, arɩ lɩɩŋ tʋɔŋ kɩaa. Ʋ kɛŋ ba kala doluŋ nɛ.

⁸ Ama nʋʋkala bɩ nandelimiŋ doluŋ kɛnɛ. Ʋ ŋaa kʋbɔŋ nɛ a kɛŋ huoŋ sɩɩ kpʋ nɩaa.

⁹ La yie kɛŋ la nandelimee nɛ a dɩdɛnnɛ Wɩa sɩ ŋaa La Tɩɩna a ŋaa la Nyɩmma ma, aŋ bɩra kɛŋ nandelime-la tɩtɩa a kaa bʋl wʋbɔŋŋɔɔ hɩhɛ la dɔnsʋŋ tɩŋŋaa ma Wɩa sɩ ŋaa ba nagʋ lɛ.

¹⁰ Nii-la tɩtɩa la sɩ kaa dɛnnɛ Wɩa, ʋ tɩtɩa nɛ la kaa bʋl wʋbɔŋŋɔɔ hɩhɛ nɩaa lɛ. Mɩ naambiiri, ʋ bɩ maga dɩ la ŋɩŋaa ŋɩɩ.

¹¹ Lɩɩ-bul-sɩɩ bala bɩ jaŋ wuo bul lɩɩzɔmʋŋ arɩ lɩɩlɔrʋŋ kala.

¹² Tutogo ma bɩ jaŋ wuo nɛŋ babɩlaa. Chɩchʋɛŋ ma bɩ jaŋ wuo nɛŋ tutogi-nambɩlaa. Ŋɩɩ tɩtɩa nɛ lɩɩ-bulo sɩ nagɛ yɩsɩŋ ma bɩ jaŋ wuo bɩrɩmɛ lɩɩzɔmʋŋ.

Wʋjɩmɩɩ-la sɩ lɩɩ Wɩa teeŋ sɩ nagɛ ŋɩɩ

¹³ Ma tʋɔŋ nɩalɩŋ sɩ kɛŋ wʋjɩmɩŋ, a jɩŋ wɩaa sɩaa, ʋ maga dɩ ma ŋɩŋaa wʋzɔŋŋɔɔ nɛ a kɛŋ ma tɩtɩa muuri, a dagɛ ŋɩɩ arɩ ma sɛnɛ kɛŋ wʋjɩmɩŋ nɛ.

¹⁴ Ama dɩ ma nɛ faasa kɛŋ yarɩ-bieriŋ dɔŋɔ lɛ, a chɩl ma dʋndʋŋa wɩaa, aŋ dɩdagɛ ma tɩtɩa arɩ ma kɛŋ wʋjɩmɩŋ, maa nyɩɛ nɛ.

¹⁵ Wʋjɩmɩŋ deeŋ doho bɩ Wɩa teeŋ lɩa. Ʋ ŋaa dʋnɩa wɩɩ nɛ a lɩɩ dʋnɩa nɩaa tʋɔbɩɩnaa lɛ arɩ Sɩtaanɩ teeŋ.

¹⁶ Dɩ nɩaa nɛ faasa kɛŋ yarɩ-bieriŋ dɔŋɔ lɛ a chɩl ba dʋndʋŋa wɩaa, ba jaŋ yuyuo dɔŋɔ, a ŋɩŋaa wʋdoho na-kala.

¹⁷ Ama wʋjɩmɩɩ-la sɩ lɩɩ Wɩa teeŋ zɔmɔ kɩŋkɛŋ. Wʋbɔŋ kala tuo ʋ lɛ. Nɩɩ-la kala sɩ kɛŋ wʋjɩmɩŋ deeŋ, yie hɔŋ nɛ sɔm a kɩkɛrɛ yuosuŋ, a kɛŋ zile. Ʋ yie jegilee nɩɩ nɩaa niiŋ wɩaa. Ʋ yie fɩfá nɩaa nenige ma nɛ woruŋ, a ŋɩŋaa wʋzɔŋŋɔɔ. Ʋ bɩ tʋɔbɩɩnaa balɩa ma kɛnɛ a bɩ nii-sɩma ma kɛnɛ.

¹⁸ Dɩ nanjejeeree nɛ pɛ nɩaa lɛ dɩ ba hɔŋ sɔm, wʋzɔŋŋɔɔ nɛ ba yie na.