Jeems 2 - WƖA TENIŊ

Má pɔ dɩ ma sɩ́ nɩaa kaa pʋpɔrɛ

¹ Mɩ naambiiriŋ, lɛɛlɛ ma laa La Tɩɩna Yesu Kirisito wɩaa dii nɛ, ʋ-na yɩrɩ-balɩŋ Tɩɩna. Ŋɩɩ wɩaa ʋ bɩ maga dɩ ma zizil nɩaa dɔnsʋŋ aŋ ka ma sɩɩŋ bɩ dɔnsʋŋ ka su.

² Má leŋ dɩ la joŋ arɩ nɩaa balɩa nɛ kʋ jʋʋ lee-la nɩalɩŋ sɩ laa Yesu wɩaa dii sɩ hilime. Dɔŋɔ kɛŋ kɩaa a laalɛ gɛrɩ-zɔŋŋɔɔ a joŋ sɛlɩmɛ nenii-pɩraa a kpɩɛrɛ ʋ tɩtɩa. Dɔŋɔ ma ŋaa summu a ma laalɛ gɛrɩ-kɔsʋmɔɔ.

³ Ŋɩɩ nɛ ma kɛŋ nɩɩ-la sɩ laalɛ gɛrɩ-zɔŋŋɔɔ woruŋ a pʋ dɩ-hɔŋ-zɔmʋŋ ʋ hɔŋ, aŋ bʋla pɩ nɩɩ-la sɩ laalɛ gɛrɩ-kɔsʋmɔɔ dɩ ʋ hɔŋ tinteeŋ koo dɩ ʋ chɩŋ nɩmɛ.

⁴ Dɩ ma nɛ ŋaa ŋɩɩ, ma kɛŋ nɩaa pʋpɔrɛ nɛ. Ma daga arɩ nɩaa dɔnsʋŋ nɛ kpɩa dɔnsʋŋ. Ma tʋɔbɩɩŋ bɔmɔ-la nɛ ma kaa ŋɩŋaa ŋɩɩ.

⁵ Mɩ naambii-kpɩanaba, má jegile nɩɩ mɩ teeŋ. Nɩalɩŋ sɩ ŋaa summoo dʋnɩa deeŋ lɛ, Wɩa tʋɔsɛba nɛ dɩ ba laa ʋ wɩaa dii woruŋ a jʋʋ ʋ kuorii-la, lee-la ʋ sɩ sɩ ʋ jaŋ joŋo pɩ nɩalɩŋ sɩ chou.

⁶ Ama ma bɩ woruŋ ka ŋaa, ma sɩ yie ŋaa wɩaa jʋjʋʋ summoo lɛ ŋɩɩ. Kɩaa tɩŋŋaa nɛ yie didii doluŋ ma lɛ, a fʋga kɛmma mʋmʋ sarɩya dɩ-diiliŋ.

⁷ Ba yie chichei Kirisito yɩrɩ-zɔŋ-la Wɩa sɩ joŋo hɛ pɩma.

⁸ Ba ŋmʋnsɛ Wɩa teniŋ tʋɔŋ a bʋl ŋ-la nɛ: “Cho ŋ dɔŋɔ tɩɩna arɩ ŋ sɩ cho ŋ tɩtɩa ŋɩɩ.” Dɩ ma nɛ sɛnɛɛ to niiŋ deeŋ, ma ŋaa woruŋ nɛ. La Kuoro Wɩa nɛ joŋ niiŋ deeŋ pɩla.

⁹ Dɩ ma nɛ kɛŋ nɩaa pʋpɔrɛ, maa ŋaa wʋbɔŋ nɛ. Maa chei wɩalɩŋ Wɩa sɩ leŋe ba ŋmʋnsa bil dɩ nɩaa tuto nɛ.

¹⁰ Dɩ nʋʋ nɛ paala tuto wɩalɩŋ kala ba sɩ ŋmʋnsa bil dɩ nɩaa tuto aŋ chei ba tʋɔŋ wʋbala ma, ʋ naga ʋ chei wɩalɩŋ kala nɛ ŋɩɩ Wɩa sɩpaaŋ.

¹¹ Wɩa-la sɩ sɩ dɩ ma sɩ́ nɩaa haalaa chɛ, ʋ tɩtɩa nɛ sɩ dɩ ma sɩ́ nɩaa kpʋ. Dɩ ma nɛ bɩ nɩaa haalaa chɛ aŋ kpʋkpʋ nɩaa, ma ha chei Wɩa niiŋ wɩalɩŋ ʋ sɩ bile nɛ.

¹² Dɩ ma nɩɩ bʋl wɩaa aŋ pɛ ŋɩŋaa wɩaa, má liise yi arɩ Wɩa jaŋ to ma wʋbʋlaa arɩ ma wʋŋaalaa lɛ nɛ a dii ma sarɩya. Ʋ jaŋ to wɩalɩŋ lɛ ʋ sɩ leŋe ba ŋmʋnsa bil dɩ nɩaa tuto nɛ a dii ma sarɩya. Wɩaa deemba nɛ laa nɩaa tɩta.

¹³ Dɩ nʋʋ nɛ bɩ nɩaa nenige ka fá, Wɩa ma bɩ jaŋ fá tɩɩna nenige bʋa-la lɛ ʋ sɩ jaŋ didii nɩaa sarɩya. Ama nɩɩ-la sɩ fá nɩaa nenige bɩ jaŋ fá wɩɩkala sarɩya-la chɛ-diiliŋ.

Wɩa laa diiniŋ arɩ wʋzɔŋŋɔɔ ŋaanɩŋ

¹⁴ Mɩ naambiiriŋ, dɩ nʋʋ nɛ sɩ ʋ laa Wɩa wɩaa dii nɛ aŋ bɩ wɩalɩŋ Wɩa sɩ cho ka ŋaa, ʋ ŋɩɩ zɔmɔɔ? Dɩ ʋ Wɩa laa diiniŋ nɛ nagɛ ŋ-la, ma bɩɩna Wɩa jaŋ laaʋ ta koo?

¹⁵ Má leŋ dɩ la joŋ arɩ ma naambie bɩ gɛrɩ-zɔŋŋɔɔ kɛnɛ a bɩ ʋ niiŋ kʋdiilee wuo naa dii,

¹⁶ ŋɩɩ nɛ ma bʋla pʋ, “Wɩa jaŋ pɛ ŋ lɛ a pɩŋ kɩalɩŋ ŋ sɩɩ chɛ.” Dɩ ma nɛ ŋaa ŋɩɩ aŋ bɩ sɛyɛ dɩ ma pɛ ʋ lɛ arɩ kɩalɩŋ ʋ sɩɩ chɛ, ʋ ŋɩɩ zɔmɔɔ?

¹⁷ Ŋɩɩ wɩaa, dɩ nʋʋ nɛ sɩ ʋ laa Wɩa wɩaa dii aŋ bɩ wɩalɩŋ Wɩa sɩ cho ka ŋaa, ʋ laa diine-la ŋaa pɛɩ nɛ.

¹⁸ Ŋ bɩ pɔ nʋʋ dɔŋ jaŋ hɛ nɩmɛ a bʋla pɩŋ arɩ ʋ laa Wɩa wɩaa dii nɛ. Dɔŋɔ ma bʋl dɩ ʋ maa ŋaa wʋzɔŋŋɔɔ nɛ. Dɩ ʋ nɛ bʋl ŋ-la, mɩ jaŋ pɩɛsʋ, “Dɩ ŋ nɛ bɩ wʋzɔŋŋɔɔ ŋaa aa pɛ ŋ sɩ laa Wɩa dii lɛ, ɛɛ nɛ ŋ jaŋ wuo dagɛmɛ arɩ ŋ sɛnɛ laa Wɩa wɩaa dii nɛɛ? Mɩ-naa ŋaa wʋzɔŋŋɔɔ nɛ aa dagɛ arɩ mɩ sɛnɛ laa Wɩa wɩaa dii nɛ.”

¹⁹ Ŋ jɩma arɩ Wɩɩ-bala nɛ hɛ nɩmɛ koo? Dɩ ŋ nɛ jɩŋ ŋɩɩ, ʋ ŋaa wʋzɔŋ nɛ. Ama sɩ́ yʋ arɩ jɩŋ-bɔŋŋɔɔ ma jɩŋ ŋɩɩ lɛ nɛ, ŋɩɩ ŋaa fawʋllʋŋ kɛmba, ba chichel.

²⁰ Bɛɛ nɛ tɩɩ ma yaarɛ ŋ-la a bɩɩnɛ dɩ nʋʋ jaŋ wuo laa Wɩa wɩaa dii aŋ bɩ wʋzɔŋŋɔɔ ŋaa pɩpɛ? Má leŋ dɩ mɩ dagɛma arɩ nʋʋ nɛ sɩ ʋ laa Wɩa wɩaa dii nɛ aŋ bɩ wʋzɔŋŋɔɔ ŋaa pɩpɛ, ʋ Wɩa laa diine-la ŋaa pɛɩ nɛ.

²¹ Má liisi la naabalɩma Abɩraham wɩaa. Bɛɛ nɛ tɩɩ Wɩa leŋ Abɩraham wuo ŋaa tʋɔpʋl tɩɩna ʋ sɩpaaŋ? Wɩɩ-la sɩ tɩɩ nɛ ŋ-la: Ʋ to Wɩa niiŋ nɛ a kɛŋ ʋ bie Aɩzɩk a kaa mʋ dɩ ʋ kpʋ ŋaa Wɩɩsʋlʋŋ koruŋ nyuŋ.

²² Abɩraham laa Wɩa wɩaa dii nɛ a faa ŋaa wɩalɩŋ ma Wɩa sɩ cho. Ʋ ŋaa wʋzɔŋŋɔɔ a pɛ wɩalɩŋ ʋ sɩ laa dii lɛ nɛ. Ŋɩɩ nɛ ʋ Wɩa laa diine-la sɛnɛ wasa su.

²³ Ʋ sɩ ŋaa ŋɩɩ nɛ, wɩalɩŋ ba fa sɩ ŋmʋnsa Wɩa teniŋ tʋɔŋ kʋ ŋaa wʋtɩtɩɩ. Ba fa ŋmʋnsa arɩ Abɩraham laa Wɩa wɩaa dii nɛ, ŋɩɩ nɛ tɩɩ Wɩa leŋ ʋ wuo ŋaa tʋɔpʋl tɩɩna ʋ sɩpaaŋ. Ŋɩɩ wɩaa nɛ nɩaa paala kɛnʋ yɩyɩrɛ Wɩa nandɔŋ.

²⁴ Ŋɩɩ daga arɩ wɩalɩŋ nʋʋ sɩɩ ŋaa nɛ yie tɩɩ Wɩa leŋ ʋ wuo ŋaa tʋɔpʋl tɩɩna ʋ sɩpaaŋ. Ʋ sɩ laa Wɩa wɩaa dii dʋndʋŋa dee bɩ tɩɩ.

²⁵ Ŋ-la tɩtɩa nɛ ʋ fa nagɛ Rahab ma lɛ. Ʋ fa ŋaa hachɔrʋŋ nɛ. Iziral tɩŋŋaa tɩndaaraa sɩ kɔ ʋ teeŋ, ʋ kɛmba woruŋ. Ba sɩɩ chɛ dɩ ba lʋara lɩɩ fá viiri, ʋ dagɛba wombii-tanɩɩ nɛ ba to a fá lɛl ba dʋndɔŋŋɔɔ nɩsɩŋ lɛ. A tɩŋ ʋ sɩ ŋaa ŋɩɩ wɩaa, Wɩa leŋ ʋ wuo ŋaa tʋɔpʋl tɩɩna ʋ sɩpaaŋ.

²⁶ Dɩ nuhuobiine nɛ bɩ wiese kɛnɛ, ʋ bɩ wei. Nɩɩ-la saa sɩ laa Wɩa wɩaa dii aŋ bɩ wʋzɔŋŋɔɔ ŋaa pɩpɛ, ʋ tɩɩna ma nagɛ ŋɩɩ nɛ. Ʋ laa diine-la ŋaa pɛɩ nɛ.