HOSIA 9 - WƖA TENIŊ

Hosia dagɛ ŋɩɩ Wɩa sɩ jaŋ dɔgɩsɛ Iziral nɩaa

¹ Iziral tɩmma, má sɩ́ jʋɔsʋ, a sɩ́ gbielu a nagɛ tinteyee dɔnsʋŋ nɩaa sɩɩ ŋaa ŋɩɩ, bɛɛ wɩaa ma bɩ wʋtɩtɩɩ kɛnɛ ma Wɩa teeŋ aŋ mɩɩra gɔllɔɔ kpaarɛ vesiŋ aa chɛ dɩ ma kʋpɛrɛɛ faasa wasɛ.

² Mɩaa jaŋ tuo ma tahɩŋ lɛ dɩ nɩaa dii, girep nɛnɛɛ sɩnɩŋ ma jaŋ tuo sɩnɩŋ dɩ-chagaa lɛ dɩ nɩaa nyʋa.

³ Ba bɩ jaŋ pɛsɛ hɔŋ La TƖƖNA tintee-la lɛ. Efirem jaŋ mɩɩra mʋ Ijipiti tinteeŋ, dɩ ba kɛsɛba kaa mʋ Asiiria tinteeŋ dɩ ba dii kʋdiile-la sɩ kɛŋ disiniŋ Wɩa teeŋ.

⁴ Ba bɩ jaŋ na wombiiŋ nɩmɛ a kɛŋ sɩnɩŋ ŋaa kʋnyʋalaa Wɩɩsʋlʋŋ a pɩ La TƖƖNA. Pʋsʋ-la ba sɩ jaŋ kpʋ a ŋaa Wɩɩsʋlʋŋ ma bɩ jaŋ tɔrɛ ʋ tʋɔŋ. Ba Wɩɩsʋlʋŋ kɩaa jaŋ nagɛ nɩalɩŋ sɩɩ yel yoho kʋdiilee, nɩalɩŋ kala sɩ diiba jaŋ kɛŋ disiniŋ. Kʋdiilee deemba jaŋ ŋaa ba tɩtɩa kɩaa, ba bɩ jaŋ wuo kɛmba jʋʋ La TƖƖNA dɩɩ-balɩŋ.

⁵ Wʋbɛɛ nɛ ma jaŋ ŋaa ma gbielee tapʋlʋŋ, tapʋlɩa-la ma sɩ yie gbieli a zizil La TƖƖNA?

⁶ Dɩ ba nɛ paala foro fá ba bɩ ba kpʋa ma, Ijipiti nɩaa-na jaŋ dɛrɛba, dɩ ba hugiba lee-la ba sɩɩ yɩrɛ Memfis Ijipiti tinteeŋ lɛ. Lere-la ba sɩ bil ba warɩpʋla jaŋ lugi a bɩrɩmɛ tiiŋ aŋ ka dɩ sɔsʋŋ ma nyʋ tɔ ba dɩɩsɩŋ.

⁷ Bʋa-la lɛ Wɩa sɩ jaŋ dɔgɩsɛ Iziral tɩŋŋaa ka kɔ nɛ, tapʋlɩɩ-la ba sɩ jaŋ na hɛɛŋ kpaga nɛ. Ma Iziral tɩŋŋaa jɩŋ wɩɩŋ deeŋ nɛ. Ma wʋbɔŋŋɔɔ yʋga nɛ kɩŋkɛŋ, ma chaasa tɛrɛ nɛ woruŋ, a joŋ Wɩa wʋlaabʋlla arɩ ʋ ŋaa nɩyaarɩ nɛ, nɩɩ-la Wɩa dɩma-la sɩ hɛ ʋ lɛ arɩ ʋ ŋaa nyɩnyɛ tɩɩna nɛ.

⁸ Wɩa wʋlaabʋlla nɛ chɩŋ Wɩa naasɩŋ lɛ a bibeŋ Iziral tɩŋŋaa, ka ba ha hɛ bɛrɩsɩŋ ʋ wombiee kala lɛ, tɛrɩsɩŋ ma yʋgɛ ʋ Wɩa dɩa lɛ.

⁹ Ba wɩɩŋ nɛ wʋbɔŋŋɔɔ ŋaanɩŋ, a nagɛ bʋa-la ba sɩ hɛ Gɩbɩa lɛ. Wɩa jaŋ liise yi ba nɩbɔŋ wɩalɩŋ lɛ, a dɔgɩsɛba a tɩŋ ba wʋbɔmɔ-la wɩaa.

¹⁰ La TƖƖNA sɩ, “Mɩ fa sɩ na Iziral, ʋ nagɛ nʋʋ sɩ na girep nɛnɩŋ nɛ tintee-hɩlɩŋ lɛ. Mɩ fa sɩ na ba naabalɩmaba, ʋ nagɛ nʋʋ sɩ na tutogi-nambɩl folluŋ tutogo lɛ nɛ. Ama ba sɩ kʋ yi peel-la ba sɩɩ yɩrɛ Baal Pio, ba joŋ ba tɩtɩa pɩ baal vene-la nɛ a ŋaa hɩɩsɛ wɩaa, a kʋ ŋaa nɩtɔɔnɩ a nagɛ vene-la ba sɩ cho.

¹¹ Ŋɩɩ wɩaa Efirem nɩaa tʋla jaŋ lɛl a nagɛ diibie sɩ file viiri. Ba haalaa bɩ jaŋ lʋlʋl, ba bɩ jaŋ cheŋ chalɩŋ, ba bɩ jaŋ kɛŋ luoruŋ.

¹² Dɩ ba nɛ paala dɩɛsɛ ba biiriŋ ma, mɩ jaŋ leŋ dɩ ba sʋʋ, ba kʋŋ bɩ jaŋ ka. Hɛɛŋ jaŋ jʋʋba dɩ mɩ nɛ mɩɩrɛ ba harɩŋ.

¹³ Mɩ na dɩ Efirem nagɛ taŋ-la ba sɩɩ yɩrɛ Taaya nɛ a chɩŋ lee sɩ zɔmɔ. Ama Efirem nɩaa kɛsɛ ba biiriŋ lɩɩ pa dɩ ba kpʋ nɛ.”

¹⁴ La TƖƖNA, wʋbɛɛ nɛ mɩ jaŋ bʋl ŋ joŋo hɛ ba lɛ? Joŋ lʋla-la ba sɩ jaŋ kɛŋ a chei biiriŋ tɩta arɩ yɩla-la sɩ bɩ yɩl lɩɩŋ kɛnɛ a pɩba.

¹⁵ La TƖƖNA sɩ, “Ba suomi ba nɩbɔŋ wɩaa kala Gɩlɩgal lɛ nɛ, nɩmɛ nɛ mɩ chɩna bɛrɛba. Wʋbɔmɔ-la ba sɩɩ ŋaa wɩaa, mɩ jaŋ kiriba ta mɩ tinteeŋ lɛ. Mɩ bɩra bɩ jaŋ choba, ba sɩpaalaaraa kala vɩa mɩ niiŋ nɛ.

¹⁶ Efirem nɩaa nagɛ tɩa sɩ ŋmaama nɛ ʋ naapoloo hɩl, ʋ bɩ nɛŋ kala kɛnɛ. Dɩ ba nɛ paala lʋl biiriŋ yʋgɛ a choba ma, mɩ jaŋ kpʋ ba kala.”

¹⁷ Mɩ Wɩa jaŋ vɩaba ta, a tɩŋ ba sɩ bɩ ʋ niiŋ ka to wɩaa. Ba jaŋ ŋaa nɩa sɩ gɔllɔɔ baarɛ tinteyee lɛ.