HOSIA 12 - WƖA TENIŊ

¹ Efirem daa to peliŋ harɩŋ nɛ dɩ ʋ dɩɛsʋ, ʋ yie kire to peliŋ sɩ lɩɩ wɩɩpɔsʋŋ harɩŋ tapʋl-piliŋ kala, a nyɩnyɩɛ wɩaa kɩŋkɛŋ kɩŋkɛŋ a hɩhɛ yuosuŋ. Ʋ dɩ Asiiria tɩŋŋaa nɛ pɛ niiŋ a kɛŋ olif nʋʋŋ mʋ Ijipiti tinteeŋ.

² La TƖƖNA kɛŋ wɩɩ nɛ dɩ ʋ bʋla tɩgɛ Juda lɛ, ʋ jaŋ dɔgɩsɛ Jekɔb a tɩŋ ŋɩɩ ʋ sɩɩ ŋaa wɩaa, a joŋ ʋ wʋŋaalaa chɩmɩŋ tiŋ ʋ lɛ.

³ Ʋ naaŋ luoruŋ tʋɔŋ, ʋ kɛŋ ʋ naambie naatilimiŋ lɛ nɛ, ʋ sɩ waa baal, ʋ kɛŋ Wɩa loo.

⁴ Ʋ kɛŋ Wɩa tɩndaara loo, a loo dii, a yel a sʋlʋ dɩ ʋ pɛ ʋ lɛ. Jekɔb na Wɩa lee-la ba sɩɩ yɩrɛ Bɛtɛl, nɩmɛ nɛ Wɩa bʋl wɩaa ʋ teeŋ.

⁵ La TƖƖNA doluŋ kala Tɩɩna, ʋ yɩrɩŋ nɛ La TƖƖNA, nʋʋkala jɩŋ.

⁶ Ŋɩɩ wɩaa mɩɩra mʋ ŋ Wɩa teeŋ, a chou aŋ pɛ kɛŋ wʋtɩtɩɩ, a gbɛrɛ ŋ Wɩa bʋa na-kala.

⁷ Iziral tɩŋŋaa nagɛ bayalaa sɩ kɛŋ sanɩaba sɩ bɩ zɔŋ nɛ a mɩmagɩsɛ kɩaa, ba cho nɩaa gʋrʋŋ.

⁸ Efirem bigisi ʋ tɩtɩa lɛ a bʋl, “Mɩ kɛŋ kɩaa nɛ woruŋ, mɩ nɛ dʋa kɩalɩŋ. Mɩ kɛŋ dʋa-la ŋɩɩ nɛ, ka nʋʋ bɩ jaŋ wuo na dɩ mɩ chei wɩɩ koo dɩ mɩ ŋaa wʋbɔŋ.”

⁹ Wɩa sɩ, “Mɩ nɛ ma TƖƖNA Wɩa, mɩ nɛ kɛmma kaa kʋ lɩɩ Ijipiti tinteeŋ lɛ. Mɩ jaŋ bɩra leŋ dɩ ma jʋʋ lɛŋŋɛɛ a nagɛ ma lɛŋŋɛɛ gbiele tapʋlaa.

¹⁰ Mɩ bʋl wɩaa pɩ mɩ wʋlaabʋllaa nɛ a joŋ wɩaa yʋgɛ a dagɛba arɩ duosoo tʋɔŋ, a to ba lɛ a magɛ namagaba a pɩma.”

¹¹ Gɩlɩad ŋaa ta-bɔŋ nɛ, nɩalɩŋ sɩ hɛ ʋ lɛ ŋaa nɩtɔɔnʋ nɛ. Ba kɛŋ nɛ-belliŋ kpʋkpaarɛ vʋɩyaa nɛ Gɩlɩgal lɛ. Ba vʋɩ-kpaarɛ korunu-la jaŋ pɩŋ a nagɛ tabɩaa ba sɩ paa chʋɔrɛ baga lɛ.

¹² Jekɔb lɩɩ fá mʋ Siiria tinteeŋ, nɩmɛ nɛ Iziral tɩŋ tɩntɩŋŋaa ka dɩ ʋ laa haala, piesee nɛ ʋ daa aŋ laa haal-la.

¹³ La TƖƖNA tɩŋ ʋ wʋlaabʋlla nɛ ʋ kɛŋ Iziral tɩŋŋaa kʋ lɩɩ Ijipiti tinteeŋ lɛ, Wɩa wʋlaabʋllʋ-la lɛ nɛ ʋ to a beŋ ba nyuŋ.

¹⁴ Ama Efirem chaasa leŋ La TƖƖNA baanɩŋ sii nɛ ʋ nyuŋ. La TƖƖNA jaŋ leŋ dɩ nɩalɩŋ ʋ sɩ kpʋa cheeriŋ nyʋa ʋ nyuŋ lɛ. Ʋ jaŋ joŋ jomo-la ʋ sɩ tʋʋsʋ chɩmɩŋ timu.