HAGAƖ 2 - WƖA TENIŊ

Wɩa hɛ niiŋ arɩ ʋ tʋla jaŋ hɛ ʋ dɩɩ-falɩŋ lɛ

¹ Chɛŋ-pɛɩ tʋɔŋ tapʋlaa mara arɩ kʋbala chɛɛŋ, La TƖƖNA to ʋ wʋlaabʋlla Hagaɩ lɛ a bʋl wɩaa. Ʋ sɩ,

² “Bʋl wɩaa pɩ Sɩalɩtɩɛl nanʋala Zerubabɛl, nɩɩ-la sɩɩ beŋ Juda tinteeŋ arɩ Jehozadak nanʋala Josua ma sɩ ŋaa Wɩɩsʋllɩ sɩpaalaaraa nɩhɩaŋ arɩ nɩkaana-la. Pɩɛsɛba,

³ ‘Ma nɩaa deemba sɩ ka tʋɔŋ, kʋbɛɛ nɛ fa hɛ nɩmɛ a na dɩɩ-balɩŋ deeŋ faafaa tʋla? Ɛɛ nɛ ʋ nagɛ ma teeŋ lɛɛlɛ? Ma bɩ ʋ na dɩ ʋ nagɛ kʋpɛɩ?’ ”

⁴ La TƖƖNA bɩra sɩ, “Zerubabɛl, kɛŋ bɔɩ-duoŋ a tɩŋ, Jehozadak nanʋala Josua ma sɩ ŋaa Wɩɩsʋllɩ sɩpaalaaraa nɩhɩaŋ, ŋ ma kɛŋ bɔɩ-duoŋ a tɩŋ. Ma nɩkaana-la kala sɩ hɛ tintee-la lɛ, má ma kɛŋ bɔɩ-duoŋ a tɩŋ. Mɩ hɛ ma teeŋ nɛ, mɩ-na ma TƖƖNA doluŋ kala Tɩɩna nɛ bʋla.

⁵ Wɩɩ-la mɩ sɩ hɛ niiŋ mɩ dɩ ma pɛgɛ a bʋl nɛ ŋɩɩ bʋa-la lɛ ma sɩ lɩɩ Ijipiti tinteeŋ lɛ. Mɩ ha hɛ ma teeŋ nɛ, má sɩ́ fawʋllʋŋ fá.”

⁶ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Ʋ bɩ jaŋ dieni, ka dɩ mɩ bɩra kɛŋ wɩa-nyuŋ arɩ tinteeŋ, mʋgʋ-balɩŋ arɩ tintee-hɩlɩŋ kala jigisi.

⁷ Mɩ jaŋ kɛŋ tinteyee kala jigisi, ŋɩɩ lɛ nɛ tinteyee nɩaa jaŋ kɛŋ dʋa-la ba sɩ cho woruŋ kaa kɔ, dɩ mɩ laa su mɩ dɩɩ-balɩŋ deeŋ. Mɩ jaŋ leŋ dɩ mɩ tʋla su mɩ dɩɩ-balɩŋ deeŋ. Mɩ-na ma TƖƖNA doluŋ kala Tɩɩna nɛ bʋla.

⁸ Hɔpʋla ŋaa mɩ kʋŋ nɛ, sɛlɩmɛ ma ŋaa mɩ kʋŋ. Mɩ-na ma TƖƖNA doluŋ kala Tɩɩna nɛ bʋla.

⁹ Tʋla-la dɩɩ-balɩŋ deeŋ sɩ jaŋ kɛŋ nɛ jaŋ yʋga kɩɩ ʋ faafaa tʋla ʋ fa sɩ kɛnɛ. Mɩ jaŋ leŋ dɩ leriŋ deeŋ kɛŋ fɩɛlɩŋ. Mɩ-na ma TƖƖNA doluŋ kala Tɩɩna nɛ bʋla.”

La TƖƖNA ŋaa wʋzɔŋŋɔɔ pɩ nɩalɩŋ fa sɩ kɛŋ disiniŋ

¹⁰ Daarus sɩ dii Pɛsɩa tinteeŋ kuoru-balɩŋ, ʋ jɩ-lɩa chɛŋ-nibi tapʋlaa mara arɩ banɛsɛ chɛɛŋ, La TƖƖNA bɩra bʋl wɩaa pɩ ʋ wʋlaabʋlla Hagaɩ.

¹¹ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Pɩɛsɛ Wɩɩsʋllɩ sɩpaalaaraa wɩalɩŋ wombii-la ba sɩ bile dɩ ba tuto sɩ daga:

¹² Dɩ nʋʋ nɛ joŋ nammɩa ba sɩ joŋo hɛ Wɩa nɩsɩŋ lɛ a hɛ ʋ gɛrɩŋ lɛ a kaa kpeŋ, dɩ gɛrɩ-la nɛ digi boroboro koo dɩsɩŋ, tɩɩnɛnɛɛ sɩnɩŋ, nʋʋŋ koo kʋdiilii dɔŋ, ba jaŋ bɩrɩmɛ kɩaa ba sɩ joŋo hɛ Wɩa nɩsɩŋ lɛɛ?” Wɩɩsʋllɩ sɩpaalaaraa bʋl, “Aɩ.”

¹³ Ŋɩɩ nɛ Hagaɩ bɩra pɩɛsɛ, “Dɩ nʋʋ nɛ digi sʋʋŋ a kɛŋ disiniŋ, aŋ digi kɩaa deemba kʋŋ, ŋɩɩ jaŋ leŋ dɩ ba kɛŋ disiniŋ?” Wɩɩsʋllɩ sɩpaalaaraa bʋl, “Oo, ba jaŋ kɛŋ disiniŋ.”

¹⁴ Hagaɩ bɩra bʋl, “La TƖƖNA sɩ, ‘ŋɩɩ tɩtɩa nɛ mɩ na dɩ tinteeŋ deeŋ nɩaa naga, wɩɩ na-kala ba sɩɩ ŋaa arɩ kʋŋ na-kala ba sɩ joŋoo sʋl Wɩɩsʋlʋŋ kɛŋ disiniŋ nɛ.

¹⁵ Má chɩŋ tapʋlʋŋ deeŋ lɛ a fɩɛlɛ ma sɩaa a bɩɩnɛ woruŋ na, wɩaa fa sɩ nagɛ ŋɩɩ bʋa-la lɛ ma sɩ suomo dɩ ma bil mɩ-na ma TƖƖNA dɩɩ-balɩŋ gentine a wasa paa saa.

¹⁶ Dɩ nʋʋ nɛ fa mʋ mɩɩ-chaha sɩ chʋara a bɩɩnɛ ʋ jaŋ ŋmoo na bɔtɔ balɩa, ʋ yie ŋmoo na bɔtɔ kʋbala dʋndʋŋ nɛ. Dɩ nʋʋ nɛ fa mʋ lee-la ba sɩɩ chagɛ tɩɩnɛnɛɛ sɩnɩŋ ma a bɩɩnɛ ʋ jaŋ na sɩnɩŋ galaŋ mara arɩ balɩa, ʋ yie mɩɩra na galaŋ nibi dʋndʋŋ nɛ.

¹⁷ Mɩ joŋ saga arɩ dayalɩbɩŋ arɩ duoŋ-tabɩaa a hɛ ma kʋduuloo lɛ a leŋ ba chei, ka ma ha bɩ bɩrɩma kɔ mɩ teeŋ a tomi. Mɩ-na ma TƖƖNA nɛ bʋla.

¹⁸ Má chɩŋ tapʋlʋŋ deeŋ sɩ ŋaa chɛŋ-nibi tapʋlaa mara arɩ banɛsɛ jɩnɩŋ, a fɩɛlɛ ma sɩaa a bɩɩnɛ woruŋ na tapʋlɩɩ-la ma sɩ bil mɩ-na ma TƖƖNA dɩɩ-bal-la gentine. Má fɩɛlɛ ma sɩaa a bɩɩnɛ woruŋ na:

¹⁹ Kʋdoho nɛ ka vire tʋɔŋ? A kaa kɔ lɛɛlɛ, girep tɩɩsɩŋ arɩ tutogusuŋ, tɩa-la nɛnɛɛ sɩ nagɛ kampoi nɛnɛɛ arɩ nʋʋŋ tɩɩsɩŋ bɩ nɛŋ kala nɛnɛ. Ama a chɩŋ jɩnɩŋ a kaa mʋ, mɩ jaŋ pɛ ma lɛ.’ ”

Zerubabɛl nɛ ŋaa nenii-pɩrɩ-la La TƖƖNA sɩ kaa magɩlɛ kɩaa

²⁰ Chɛnɛ-la tapʋlaa mara arɩ banɛsɛ chɛɛŋ nɛ La TƖƖNA bɩra bʋl wɩaa pɩ Hagaɩ lɩamɩŋ lɛ.

²¹ Ʋ sɩ, “Bʋla pɩ Zerubabɛl, nɩɩ-la sɩɩ beŋ Juda tinteeŋ, mɩ jaŋ kɛŋ wɩa-nyuŋ arɩ tinteeŋ jigisi.

²² Mɩ jaŋ kɛŋ kuoru kpasɩnɩŋ wuro chu, a chei dol-la ba sɩ kaa bibeŋ tintee-wogusu-la. Mɩ jaŋ kiri laalɩŋ janɩŋ torukoba arɩ nɩalɩŋ sɩ kɛmba vɩvɛŋ, janɩŋ jaŋ sʋʋ dɩ nɩalɩŋ sɩɩ jɩlba gʋra kpʋ dɔŋɔ.”

²³ La TƖƖNA doluŋ kala Tɩɩna sɩ, “Tapʋlɩɩ-la mɩ jaŋ joŋ ŋ-na mɩ tɩntɩnna Zerubabɛl sɩ ŋaa Sɩalɩtɩɛl nanʋala, a leŋ dɩ ŋ nagɛ mɩ nenii-pɩrɩŋ mɩ sɩ kaa mɩmagɩlɛ kɩaa, bɛɛ wɩaa mɩ nɛ lɩɩsɩŋ. Mɩ-na ma TƖƖNA doluŋ kala Tɩɩna nɛ bʋla.”