ƐZƖRA 9 - WƖA TENIŊ

Ɛzɩra chʋɔlɛ Wɩa a mʋ tɩgɛ nɩwogusuŋ jaanɩŋ lɛ

¹ La sɩ ŋaa wɩaa deemba kala harɩŋ, Iziral tɩŋŋaa sɩpaalaaraa kɔ mɩ teeŋ a bʋl, “Iziral tɩŋŋaa, a pɛ Wɩɩsʋllɩ sɩpaalaaraa arɩ Levi doho nɩaa lɛ bɩ ba tɩtɩa lɩɩsa wʋkɩsɩa-la nɩwogusu-la sɩ golliba sɩɩ ŋaa lɛ: Kɛnaŋ tɩŋŋaa, Hiti tɩŋŋaa, Pɛrɛs tɩŋŋaa, Jebus tɩŋŋaa, Amɔŋ tɩŋŋaa, Mʋab tɩŋŋaa, Ijipiti tɩŋŋaa arɩ Amɔrɩ tɩŋŋaa.

² Ba jaa nɩaa deemba toloo nɛ, aŋ jaa pɩ ba hambolibiisiŋ ma, a leŋ Wɩa nɩaa sɩ bɩ disiniŋ kɛnɛ guoli nɩwogusuŋ tʋɔŋ. Sɩpaalaaraa arɩ tɩntɩnnɩ-hɩasɩŋ nɛ paala laa sɩpaaŋ ŋaa wɩɩŋ deeŋ a chei.”

³ Mɩ-na Ɛzɩra sɩ nɩɩ wɩɩŋ deeŋ, mɩ kɛŋ mɩ gɛnnɩŋ kɩɛsɛ, a lɛrɛ mɩ nyu-pʋnaa arɩ tɔŋŋɔɔ churi aŋ hɔŋ a kala vɔgɛ arɩ tʋɔ-cheeŋ.

⁴ Ŋɩɩ nɛ nɩalɩŋ kala sɩɩ fá Wɩa kɔ mɩ teeŋ, a tɩŋ wʋbɔŋ-la nɩalɩŋ sɩ lɩɩ yoŋ-baga kɔ sɩ ŋaa wɩaa. Ka mɩ hɔŋ a kala vɔgɛ arɩ tʋɔ-cheeŋ a mʋ yi bʋa-la lɛ ba sɩɩ ŋaa dɩdaanɩŋ Wɩɩsʋlʋŋ.

⁵ Dɩdaanɩŋ Wɩɩsʋlʋŋ bʋa-la lɛ, mɩ sii lee-la mɩ fa sɩ hɔnɔ arɩ tʋɔ-cheeŋ, aŋ ha laalɛ gɛnnɩ-la mɩ sɩ kaa kɩɛsɛ. Ŋɩɩ nɛ mɩ tuu kpirimi mɩ naadʋsʋŋ nyuŋ a kɛŋ nɩsaa je mɩ Tɩɩna Wɩa teeŋ,

⁶ a sʋlʋ a bʋl, “Ou mɩ Wɩa, hɩɩsɩŋ kɛmmɛ nɛ arɩ mɩ sɩ jaŋ kɛŋ mɩ sɩaa je ŋ sɩpaaŋ, bɛɛ wɩaa la wʋbɔŋŋɔɔ chʋɔra nɛ a sii kɩɩ la nyusuŋ. La wʋcheelee paala jɩla yiyi wɩa-nyuŋ nɛ.

⁷ A chɩŋ la naabalɩmaba bʋa lɛ a kaa kɔ jɩnɩŋ, la wʋcheelee chaasa yʋgɛ nɛ woruŋ. A tɩŋ la wʋbɔŋŋɔɔ wɩaa nɛ tɩɩ ŋ joŋ la dɩ la kuoroo arɩ ŋ Wɩɩsʋllɩ sɩpaalaaraa hɛ tintee-wogusuŋ kuoroo nɩsɩŋ lɛ. Ba kpʋla, a laa la kɩaa, aŋ kɛsɛ la dɔnsʋŋ kaa mʋ tɔ bɩnɩŋ dɩa. La dii hɩɩsɩŋ nɛ woruŋ, arɩ jɩnɩmba la ha sɩɩ dii hɩɩsɩŋ ŋɩɩ.

⁸ Ama lɛɛlɛ, La TƖƖNA Wɩa, ŋ fá nisusuŋ a pɩla wiese mʋa nɛ, a leŋ la nɩaa baŋmɛnɛ ka a bɩ sʋba, ŋ pɩla leriŋ nɛ ŋ dɩa-la tʋɔŋ. Ŋ laala ta nɛ la fa sɩ ŋaa yosi lɛ a leŋ la na pʋlʋmʋŋ.

⁹ La fa ŋaa yosi ma nɛ, ama ŋ-na la Wɩa bɩ la vɩa ta la yoŋ-baga-la lɛ. Ŋ dagɛ ŋ zile pɩla nɛ a leŋ Pɛsɩa tinteeŋ kuoro cho la wɩaa, a leŋ la kɛŋ mɩɩsɩŋ dɩ la wasa saa ŋ dɩa-la a bɩrɩmɛ lere-la kala sɩ cheye, ŋ leŋe la Juda arɩ Jerusalɛm nɩaa hɔŋ nɛ wɩɩ bɩ la walɩmɛ.

¹⁰ Ama la Wɩa, wʋbɛɛ nɛ la jaŋ wuo bʋl wɩaa deemba kala harɩŋ lɛ? La bɩ wɩalɩŋ ŋ sɩ daga to,

¹¹ wɩalɩŋ ŋ sɩ to ŋ tɩntɩnnaa sɩ ŋaa ŋ wʋlaabʋllaa lɛ a dagɛla. Ba bʋla pɩla, ‘Tintee-la ma sɩɩ mʋ, ʋ nɩaa ŋaa disiniŋ a chei ʋ kala nɛ. Nɩalɩŋ sɩ hɛ nɩmɛ ŋaa wʋkɩsaa a leŋ ʋ kala kɛŋ disiniŋ nɛ.’

¹² Ŋɩɩ wɩaa, má sɩ́ ma toloo joŋo pɩ ba biiriŋ dɩ ba jaa, koo a jaa ba toloo a pɩ ma hambolibiisiŋ. Ma pʋpɔ má dɩ ba sɩ niiŋ pɛ a ŋaa nandɔsɛ, ka dɩ ma wuo kɛŋ doluŋ a dii tintee-la kʋzɔŋŋɔɔ aŋ ka pɩ ma biiriŋ dɩ ʋ ŋaa ba dʋa a kaa mʋ wuu.

¹³ Wɩalɩŋ kala sɩ ŋaa la lɛ, la wʋbɔŋŋɔɔ arɩ la wʋcheelee sɩ faasa yʋgɛ wɩaa nɛ tɩɩ. Ama ŋ-na la Wɩa, ŋ bɩ la dɔgɩsɔ a magɛ ŋɩɩ la wʋbɔŋŋɔɔ sɩ maga, aŋ leŋ la dɔnsʋŋ ka a bɩ sʋba.

¹⁴ Lɛɛlɛ, ʋ sɛnɛ bɩra magɛ dɩ la dɩ nɩaa deemba sɩɩ ŋaa wʋkɩsaa deemba jɩjaa dɔŋɔ ba toloo? Dɩ la nɛ ŋaa ŋɩɩ, ŋ bɩ jaŋ chaasa na baanɩŋ la nyuŋ a cheila dɩ la kʋbala ma bɩra sɩ kaa?

¹⁵ La TƖƖNA Iziral tɩŋŋaa Wɩa, ŋ ŋaa tʋɔpʋl Tɩɩna nɛ. Ŋ leŋe la dɔnsʋŋ ka nɛ a bɩ sʋba. La kɔ ŋ sɩpaaŋ nɛ arɩ la cheeriŋ, arɩ la sɩ jɩma arɩ la bɩ wombiiŋ kɛnɛ dɩ la kɔ ŋ sɩpaaŋ ma kala.”