ƐZƖRA 8 - WƖA TENIŊDɩa dɩa nɩhɩasɩ-la sɩ to Ɛzɩra harɩŋ a lɩɩ yoŋ-baga kɔ 1 Dɩa dɩa nɩhɩasɩ-la fa sɩ mʋ yoŋ-baga Babɩlɔŋ tinteeŋ lɛ aŋ mɩɩra to Ɛzɩra harɩŋ a kɔ Jerusalɛm bʋa-la lɛ Atazɛzɛs sɩ ŋaa kuoro nɛ ŋ-la: 2 Finihas doho nɩaa tʋɔŋ Gesom, Itama doho nɩaa tʋɔŋ Danɩɛl, Devit doho nɩaa tʋɔŋ Hatus sɩ ŋaa Sɛkanɩa nanʋala, 3 Parɔs ma doho nɩaa tʋɔŋ, Zɛkarɩya arɩ baalaa zɔlɔ arɩ mahɩŋ balɩa arɩ fii. 4 Pahaf-Mʋab doho nɩaa tʋɔŋ, Zɛrahɩa nanʋala Eliehonai arɩ baalaa zɔɔ-balɩa. 5 Zatu ma doho nɩaa tʋɔŋ, Jahazɩɛl nanʋala Sɛkanɩa arɩ baalaa zɔɔ-batori. 6 Adɩŋ ma doho nɩaa tʋɔŋ, Jonataŋ nanʋala Ɛbɛd arɩ baalaa mahɩŋ balɩa arɩ fii. 7 Ɛlam ma doho nɩaa tʋɔŋ, Atalɩa nanʋala Jesaaya arɩ baalaa mahɩŋ batori arɩ fii. 8 Sɛfatɩa doho nɩaa ma tʋɔŋ, Maakɩl nanʋala Zɛbadɩa arɩ baalaa mahɩŋ banɛsɛ. 9 Jʋab doho nɩaa ma tʋɔŋ, Jɛhɩɛl nanʋala Obadaaya arɩ baalaa zɔɔ-balɩa arɩ fii arɩ chori. 10 Banɩ doho nɩaa ma tʋɔŋ, Josifia nanʋala Sɛlɔmɩf arɩ baalaa zɔlɔ arɩ mahɩŋ batori. 11 Bɛbaɩ ma doho nɩaa tʋɔŋ, Bɛbaɩ nanʋala Zɛkarɩya arɩ baalaa mara arɩ chori. 12 Azigad ma doho nɩaa tʋɔŋ, Hakataŋ nanʋala Johanaŋ arɩ baalaa zɔlɔ arɩ fii. 13 Adonikam ma doho nɩaa tʋɔŋ, ba nɛ to harɩŋ kɔ, ba yɩraa nɛ, Ɛlɩfɛlɛt, Jɛyɛl arɩ Sɛmaaya a pɛ baalaa mahɩŋ batori lɛ. 14 Bɩgɩvaɩ doho nɩaa ma tʋɔŋ, Utai arɩ Zakɔ a pɛ baalaa mahɩŋ batori arɩ fii lɛ. Ba mɩɩra kɔ Jerusalɛm 15 Mɩ yɩrɛ nɩalɩŋ kala kʋ hilimi lɩɩ-libe kʋbala ba sɩ kpɛrɛ ʋ lɩɩŋ pɛllɛ mʋmʋ taŋ-la ba sɩɩ yɩrɛ Ahava dɩɩrɩŋ. La hɔŋ nɩmɛ tapʋlaa batori nɛ. Mɩ sɩ beŋ nɩalɩŋ arɩ Wɩɩsʋllɩ sɩpaalaaraa tʋɔŋ, mɩ bɩ Levi doho nʋʋkala na. 16 Ŋɩɩ nɛ mɩ tɩma yɩrɛ sɩpaalaaraa deemba nibi: Elieza, Arɩɛl, Sɛmaaya, Ɛlɩnataŋ, Jarɩb, Ɛlɩnataŋ, Netaŋ, Zɛkarɩya arɩ Mesulam, Joyarib arɩ Ɛlɩnataŋ. Nɩaa deemba kɛŋ wʋjɩmɩŋ nɛ woruŋ. 17 Ŋɩɩ nɛ mɩ tɩmba Ido sɩ ŋaa sɩpaalaarʋ Kasɩfɩa lɛ teeŋ. Mɩ bʋl wɩɩ-la ba sɩ jaŋ bʋla pɩ Ido arɩ ʋ tɩntɩnnɩ-dɔsʋŋ, Wɩa dɩɩ-balɩŋ tɩntɩnnaa, dɩ ba pɩla nɩaa sɩ jaŋ kʋ tɩtɩŋ la Wɩa dɩa lɛ. 18 A tɩŋ Wɩa naduo-la fa sɩ daŋ la lɛ wɩaa, ba pɩla Sɛrɛbɩa sɩ chaasa ŋaa baal, a ŋaa Levi doho nʋʋ, a lɩɩ Mali doho nɩaa tʋɔŋ. Ʋ hambolibiisiŋ arɩ ʋ naambiiriŋ fii arɩ chori ma to ʋ harɩŋ kɔ nɛ. 19 Ba fa leŋe Hasabɩa arɩ Jesaaya sɩ ŋaa Mɛrarɩ doho nɩaa ma kɔ nɛ, a pɛ ʋ naambiiriŋ arɩ ba biiriŋ lɛ, ba kala ŋaa baalaa mara. 20 Ba fa kɛŋ Wɩa dɩɩ-bal-la tɩntɩnnaa zɔɔ-balɩa arɩ mara ma nɛ kɔ. Devit arɩ tɩntɩnnɩ-hɩasɩŋ nɛ fa lɩɩsɛ nɩaa deemba dɩ ba pɩpɛ Levi doho nɩaa lɛ. Ba fa ŋmʋnsɛ nɩaa deemba kala yɩraa nɛ. 21 La sɩ hɛ Ahava lɩɩ-libe-la ba sɩ kpɛrɛ leriŋ, mɩ leŋ la vɔɔ niiŋ, dɩ la kɛŋ la tɩtɩa muuri la Wɩa sɩpaaŋ dɩ la dɩ la biiriŋ vɛŋ la wombiiŋ woruŋ arɩ la kɩaa kala. 22 Hɩɩsɩŋ fa kɛmmɛ nɛ mɩ sɩ jaŋ pɩɛsɛ kuoro dɩ ʋ pɩmɛ laalɩyuoroo arɩ ja-jɩllaa dɩ ba pɔla, dɩ dʋndɔŋŋɔɔ sɩ la wɩɩ ŋaa wombiiŋ lɛ, bɛɛ wɩaa la fa bʋla pɩ kuoro, “La Wɩa naduo-la daŋ nʋʋkala sɩɩ beŋ ʋ lɛ nɛ, ama ʋ yie chaasa na baanɩŋ nɛ nɩalɩŋ kala sɩ vɩaʋ nyuŋ.” 23 Ŋɩɩ nɛ la vɔɔ niiŋ aŋ sʋl la Wɩa a mʋ tɩgɛ la wombii-la vɛnɩŋ lɛ, ʋ laa la sʋla. 24 Ŋɩɩ nɛ mɩ lɩɩsɛ Wɩɩsʋllɩ sɩpaalaaraa fii arɩ balɩa: Sɛrɛbɩa, Hasabɩa arɩ ba naambiiriŋ fii. 25 Mɩ magɩsɛ hɔpʋla, sɛlɩmɛ arɩ tɩntɩnnɩ kɩalɩŋ kuoro, nɩalɩŋ sɩ bʋl wɩaa chɩchagɩlʋ, ʋ tɩntɩnnɩ-hɩasɩŋ arɩ kɩalɩŋ kala Iziral tɩmma-la sɩ joŋo pa dɩ ba kaa saa Wɩa dɩɩ-bal-la a pɩ ba. 26 Mɩ magɩsɛ hɔpʋla yuŋuŋ sɩ ŋaa kilo bʋɩ mara arɩ balɩa arɩ zɔlɔ, hɔpʋla tɩntɩnnɩ kɩaa ma yuŋuŋ ŋaa kilo bʋɩ batori arɩ zɔɔ-banɛsɛ, sɛlɩmɛ yuŋuŋ ma ŋaa kilo bʋɩ batori arɩ zɔɔ-banɛsɛ, 27 sɛlɩmɛ gbansɩŋ mara yallɩŋ sɩ ŋaa sɛlɩmɛ moribii-biiŋ bʋɩ, arɩ tɩntɩnnɩ kɩaa balɩa sɩ zɔmɔ ba sɩ kɛŋ kɔlɩɩŋ sɩ zɔmɔ a nagɛ sɛlɩmɛ a ŋaa. 28 Ŋɩɩ nɛ mɩ bʋla pɩba, “Mɩ joŋ ma dɩ kɩaa deemba kala hɛ La TƖƖNA nɩsɩŋ lɛ nɛ. Hɔpʋla-la arɩ sɛlɩmɛ-la ŋaa tʋɔtɔrɛ Wɩɩsʋllɩ kɩaa nɛ a pɩ La TƖƖNA, ma naabalɩmaba Wɩa. 29 Má pɔ kɩalɩŋ woruŋ a kɛmba mʋ La TƖƖNA dɩɩ-bal-la sɩ hɛ Jerusalɛm lɛ, a magɩsɛba chʋgʋsʋŋ dɩɩsɩ-la lɛ, Wɩɩsʋllɩ sɩpaalaaraa arɩ Levi doho nɩaa arɩ Iziral tɩŋŋaa dɩa dɩa nɩhɩasɩŋ sɩpaaŋ.” 30 Ŋɩɩ nɛ Wɩɩsʋllɩ sɩpaalaaraa arɩ Levi doho nɩaa laa hɔpʋla-la, sɛlɩmɛ arɩ Wɩa tɩntɩnnɩ kɩalɩŋ kala ba sɩ magɩsa dɩ ba kaa mʋ la Wɩa dɩɩ-bal-la sɩ hɛ Jerusalɛm lɛ. 31 Chɛŋ-bumbuŋ tapʋl fii arɩ balɩa chɛɛŋ nɛ la sii Ahava lɩɩ-libe-la ba sɩ kpɛrɛ leriŋ dɩ la mʋ Jerusalɛm. La Wɩa nɩsɩŋ fa daŋ la lɛ nɛ, a pɔla a lɩɩsɛla dʋndɔŋŋɔɔ lɛ arɩ gaara-la sɩɩ faa wombiiŋ lɛ. 32 Ŋɩɩ nɛ la mʋ yi Jerusalɛm, a wiesi nɩmɛ tapʋlaa batori. 33 Tapʋl nɛsɛ chɛɛŋ, la jʋʋ Wɩa dɩɩ-bal-la a magɩsɛ hɔpʋla arɩ sɛlɩmɛ-la a pɛ Wɩa tɩntɩnnɩ kɩalɩŋ lɛ a joŋo hɛ Yuria nanʋala Mɛrɛmɔf sɩ ŋaa Wɩɩsʋllɩ sɩpaalaarʋ nɩsɩŋ lɛ. Finihas nanʋala Elieza ma fa hɛ ʋ teeŋ nɛ, a pɛ Levi doho nɩaa Jesua sɩ ŋaa Jozabad nanʋala arɩ Binui nanʋala Nʋadɩa lɛ. 34 Ba fa dɩɩsɛ kɩalɩŋ kala nɛ a jɩŋ ba niiŋ arɩ ba yuŋuŋ a ŋmʋnsa bil. 35 Ŋɩɩ nɛ nɩalɩŋ sɩ lɩɩ yoŋ-baga kɔ kpʋ pʋsʋŋ a ŋaa kʋnyɩgaa Wɩɩsʋlʋŋ a pɩ Iziral tɩŋŋaa Wɩa: Nɛ-belliŋ fii arɩ balɩa, pie-belliŋ mahɩŋ banɛsɛ arɩ fii arɩ balɩdʋ, pie-bel-biisiŋ mahɩŋ batori arɩ fii arɩ balɩpɛ, aŋ kpʋ gbuŋgbogusuŋ ma fii arɩ balɩa a ŋaa wʋbɔŋŋɔɔ joŋo chɛnɩŋ Wɩɩsʋlʋŋ. Ba fa nyɩgɛ kɩaa deemba kala nɛ a pɩ La TƖƖNA. 36 Ŋɩɩ nɛ ba joŋ teŋ-la ma kuoro sɩ ŋmʋnsa a pɩ Yufireti wɩɩjʋʋlʋŋ dɩɩrɩŋ tinteeŋ nɩhɩasɩŋ arɩ ʋ tɩntɩnnɩ-hɩasɩŋ. Ŋɩɩ nɛ ba pɛ Iziral tɩmma-la lɛ arɩ kɩalɩŋ ba sɩ jaŋ kaa tɩŋ Wɩa dɩɩ-bal-la tɩntɩŋŋaa. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.