ƐZƖRA 7 - WƖA TENIŊ

Ɛzɩra kɔ Jerusalɛm

¹ Wɩaa deemba kala harɩŋ, Pɛsɩa tinteeŋ kuoro Atazɛzɛs kuoruŋ bʋa lɛ, baal kʋbala nɛ fa hɛ nɩmɛ baa yɩrɛ Ɛzɩra. Ɛzɩra nyɩmma nɛ fa Sɛraaya, a ŋaa Azarɩa ma nihiŋ. Ʋ doho nɩaa dɔnsʋŋ ma nɛ: Hɩlɩkaaya,

² Salum, Zadɔk, Ahitub,

³ Amarɩa, Azarɩa, Mɛrayɔf,

⁴ Zɛrahɩa, Uzi, Buki,

⁵ Abɩsʋa, Finihas, Elieza arɩ Arɔŋ sɩ ŋaa Wɩɩsʋllɩ sɩpaalaaraa nɩhɩaŋ.

⁶ Ɛzɩra deeŋ lɩɩ Babɩlɔŋ nɛ a kɔ Jerusalɛm. Ʋ faa dagɛ nɩaa nɛ, a jɩŋ wombie-la La TƖƖNA, Iziral tɩŋŋaa Wɩa sɩ joŋo dagɛ Mosis ʋ ŋmʋnsa bil dɩ la tuto woruŋ. Kuoro fa pʋ kʋŋkala ʋ sɩ pɩɛsaa chɛ nɛ, bɛɛ wɩaa, ʋ Tɩɩna Wɩa fa chɩŋ ʋ harɩŋ nɛ.

⁷ Atazɛzɛs sɩ dii kuoruŋ ʋ jɩsɩŋ balɩpɛ tʋɔŋ nɛ, Iziral tɩŋŋaa dɔnsʋŋ, a pɛ Wɩɩsʋllɩ sɩpaalaaraa, Levi doho nɩaa, yɩɩlɩ yɩɩraa, boi-pɔɔrɔɔ arɩ Wɩa dɩɩ-bal-la tɩntɩnnaa to Ɛzɩra harɩŋ kɔ Jerusalɛm.

⁸ Ɛzɩra kʋ yi Jerusalɛm Atazɛzɛs sɩ dii kuoruŋ ʋ jɩ-pɛɩ tʋɔŋ chɛŋ-nɔŋ lɛ nɛ.

⁹ Ʋ fa lɩɩ Babɩlɔŋ lɛ a suomi ʋ wombiiŋ deeŋ vɛnɩŋ, chɛŋ-bumbuŋ tapʋl-bumbuŋ lɛ nɛ, a kʋ yi Jerusalɛm chɛŋ-nɔŋ tapʋl-bumbuŋ, bɛɛ wɩaa ʋ Wɩa naduo-la fa daŋ ʋ lɛ nɛ.

¹⁰ Ɛzɩra fa joŋ ʋ tɩtɩa hɛ La TƖƖNA wombie-la lɛ nɛ, a gʋgʋnnɛba, a tuto ba, a dɩdagɛ Iziral tɩŋŋaa niiri-la arɩ wombie-la kala.

Kuoro Atazɛzɛs ŋmʋnsɛ teniŋ pɩ Ɛzɩra

¹¹ Teŋ-la kuoro Atazɛzɛs sɩ ŋmʋnsa joŋ dɔŋɔ pɩ Ɛzɩra nɛ ŋ-la. Ɛzɩra fa ŋaa Wɩɩsʋllɩ sɩpaalaarʋ nɛ, a dɩdagɛ nɩaa, a jɩŋ La TƖƖNA, Iziral tɩŋŋaa Wɩa wʋdagaa arɩ ʋ niiriŋ woruŋ:

¹² Mɩ-na Atazɛzɛs sɩ ŋaa kuoroo kala kuoro nɛ ŋmʋnsɛ teniŋ deeŋ aa pɩ ŋ-na Ɛzɩra sɩ ŋaa Wɩɩsʋllɩ sɩpaalaara, aŋ pɛ bɩra ŋaa nʋʋ sɩɩ dagɛ nɩaa Wɩa sɩ hɛ ʋ jaŋ lɛ wombiee. Mɩɩ chʋɔlʋŋ.

¹³ Mɩ pa wombiiŋ arɩ Iziral tɩmma-la sɩ hɛ mɩ tinteeŋ lɛ kʋŋkala, a pɛ Wɩɩsʋllɩ sɩpaalaaraa arɩ Levi doho nɩaa lɛ sɩ cho dɩ ba mʋ Jerusalɛm, jaŋ wuo mʋ.

¹⁴ Mɩ-na kuoro arɩ mɩ nɩaa balɩpɛ-la sɩ bʋl wɩaa a chɩchagɩlɛmɛ tɩmɩŋ nɛ dɩ ŋ mʋ a beŋ Juda arɩ Jerusalɛm a na ŋɩɩ nɩaa sɩɩ to Wɩa wombie-la ba sɩ joŋo hɛ ŋ nɩsɩŋ lɛ.

¹⁵ Ʋ bɩra maga dɩ ŋ pɛ paa hɔpʋla arɩ sɛlɩmɛ-la mɩ-na kuoro arɩ nɩalɩŋ sɩ bʋl wɩaa chɩchagɩlɛmɛ sɩ joŋo pɩ Iziral tɩŋŋaa Wɩa la tʋɔtɔrʋŋ lɛ, ʋ dɩjʋʋlʋŋ hɛ Jerusalɛm lɛ nɛ.

¹⁶ Ŋ maga dɩ ŋ paa warɩpʋla arɩ sɛlɩmɛ-la kala ŋ sɩ laa Babɩlɔŋ lɛ, arɩ Wɩɩsʋlʋŋ kɩalɩŋ Iziral tɩŋŋaa arɩ Wɩɩsʋllɩ sɩpaalaaraa sɩ joŋo pa ba tʋɔtɔrʋŋ lɛ dɩ ba kaa saa ba Wɩa dɩɩ-balɩŋ Jerusalɛm lɛ.

¹⁷ Kɛŋ moribiee deemba a yɔɔ nɛ-belliŋ, pie-belliŋ arɩ pie-bel-biisiŋ, a pɛ ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ kɩaa lɛ. Kpʋ kɩaa deemba a ŋaa Wɩɩsʋlʋŋ ŋ Wɩa dɩɩ-bal-la koruŋ nyuŋ Jerusalɛm lɛ.

¹⁸ Ŋ dɩ ŋ naambiiriŋ Juu tɩŋŋaa, jaŋ wuo kɛŋ warɩpʋla arɩ sɛlɩmɛ-la sɩ ka a ŋaa wɩɩ-la kala ma sɩ cho, arɩ wɩɩ-la sɩɩ tɔrɛ ma Wɩa tʋɔŋ.

¹⁹ Ʋ maga dɩ ŋ joŋ tɩntɩnnɩ kɩalɩŋ kala la sɩ joŋo pɩŋ a pɩ Wɩa Jerusalɛm lɛ, dɩ ba kaa tɩtɩŋ Wɩa dɩɩ-bal-la tɩntɩŋŋaa.

²⁰ Kʋŋkala ma ŋ ha sɩɩ chɛ dɩ ŋ kaa tɩŋ Wɩa dɩɩ-bal-la lɛ, ŋ jaŋ wuo lɩɩsɛ kuori dɩa dʋa tʋɔŋ.

²¹ Mɩ-na kuoro Atazɛzɛs bʋla pɩ tɩntɩnnɩ-hɩasɩ-la kala sɩɩ beŋ Yufireti wɩɩjʋʋlʋŋ dɩɩrɩŋ tinteeŋ dʋa arɩ ba pɩ Ɛzɩra sɩ ŋaa Wɩɩsʋllɩ sɩpaalaara, aŋ pɛ dɩdagɛ nɩaa Wɩa sɩ hɛ ʋ jaŋ lɛ wombiee kʋŋkala ʋ sɩ pɩɛsaa chɛ.

²² Ma jaŋ wuo pʋ kɩalɩŋ a mʋʋ magɛ hɔpʋla yuŋuŋ sɩ yi kilo bʋɩ batori arɩ zɔɔ-banɛsɛ, mɩaa ma yuŋuŋ sɩ yi kilo bʋɩ fii, girep nɛnɛɛ sɩnɩŋ lonnuŋ bʋɩ balɩa, olif nʋʋŋ ma lonnuŋ bʋɩ balɩa arɩ yɩsɩŋ ma magɛ ŋɩɩ kala ʋ sɩɩ chɛ.

²³ Ma maga ma fɩɛlɛ ma sɩaa a chɛ kɩalɩŋ kala Wɩa sɩ hɛ ʋ jaŋ lɛ sɩ daga dɩ ba kaa saa ʋ dɩɩ-bal-la nɛ, dɩ ʋ baanɩŋ sɩ́ mɩ nyuŋ koo nɩalɩŋ sɩ jaŋ to mɩ harɩŋ dii kuoruŋ nyuŋ sii.

²⁴ Ma bɩ wombii kɛnɛ dɩ ma laa lampoo nɩaa deemba teeŋ: Wɩɩsʋllɩ sɩpaalaaraa, Levi doho nɩaa, yɩɩlɩ yɩɩraa, boi-pɔɔrɔɔ, Wɩa dɩɩ-bal-la tɩntɩnnaa koo nʋʋ na-kala sɩɩ tɩŋ Wɩa dɩ-bal-la lɛ.

²⁵ Ŋ-na Ɛzɩra, kɛŋ wʋjɩmɩɩ-la Wɩa sɩ joŋo pɩŋ, a lɩɩsɛ tɩntɩnnɩ-hɩasɩŋ arɩ sarɩya diiree dɩ ba bibeŋ Yufireti wɩɩjʋʋlʋŋ dɩɩrɩŋ tinteeŋ nɩalɩŋ sɩɩ to ŋ Wɩa wombiee. Ʋ maga ŋ dagɛ nɩalɩŋ kala sɩ bɩ Wɩa wombie-la jɩŋ.

²⁶ Dɩ nʋʋkala nɛ bɩ ŋ Wɩa wombie-la koo kuoro wombiee to, ʋ maga ŋ guu dɔgɩsɛ tɩɩna nɛ. Ŋ jaŋ kpʋʋ, koo ŋ kiru ta ʋ lɩɩ tintee-la lɛ, koo ŋ kɛŋ ʋ dʋa kala laa koo ŋ kɛnʋ tɔ bɩnɩŋ dɩa.

Ɛzɩra dɛnnɛ Wɩa

²⁷ Ɛzɩra sɩ, “Má dɛnnɛ La TƖƖNA, la naabalɩmaba Wɩa. Ʋ leŋe kuoro zil ʋ dɩɩ-bal-la nɛ Jerusalɛm lɛ.

²⁸ Wɩa lahɔrɩmɔ lɛ, kuoro, ʋ nɩalɩŋ sɩ bʋl wɩaa chɩchagɩlʋ arɩ ʋ tɩntɩnnɩ-hɩasɩ-la kala sɩ ŋaa nɩduoruŋ tʋɔŋ tɔrɛ mɩ nyuŋ nɛ. Mɩ Wɩa pɩmɛ tʋɔ-doluŋ nɛ, mɩ wuo bʋl wɩaa pɩ Iziral tɩŋŋaa nyɩŋ-nɩaa nɩhɩasɩŋ jesiŋ ba to mɩ harɩŋ a mɩɩra mʋ Jerusalɛm.”