ƐZƖRA 6 - WƖA TENIŊ

Wombii-la Daarus pa

¹ Ŋɩɩ nɛ kuoro Daarus pa wombiiŋ, ba gbilli kuoroo tenniŋ dɩ-biliŋ kala Babɩlɔŋ lɛ.

² Ba na teŋ kʋbala Ɛkɩbatana tabalɩŋ sɩ hɛ Midia tinteeŋ lɛ, dɩ ba ŋmʋnsɛ wɩaa deemba hɛ ʋ lɛ. Wɩalɩŋ nɛ ŋ-la:

³ Kuoro Siirus sɩ dii kuoruŋ ʋ jɩ-bumbuŋ lɛ nɛ ʋ pa wombiiŋ dɩ ba wasa saa Wɩa dɩɩ-bal-la Jerusalɛm lɛ, dɩ ʋ ŋaa lee ba sɩ jaŋ ŋɩŋaa Wɩɩsʋlʋŋ. Má bil ʋ gentine, dɩa-la leŋiŋ jaŋ ŋaa naakieliŋ mahɩŋ banɛsɛ arɩ fii, dɩ ʋ jalɩŋ ma ŋaa naakieliŋ mahɩŋ banɛsɛ arɩ fii.

⁴ Má kɛŋ tabɩɩ-jalaa saa jebii-naasɩŋ batori, a joŋ doloo daŋ bala a pɛ. Chɩŋ-la kala ma sɩ ŋmobo maga ma lɩɩsɛ kuori dɩa dʋa tʋɔŋ nɛ a tiŋ.

⁵ Wɩa dɩa sɛlɩmɛ arɩ hɔpʋla tɩntɩnnɩ kɩalɩŋ Nebukadineza fa sɩ paa Wɩa dɩɩ-bal-la tʋɔŋ Jerusalɛm lɛ, a kaa kɔ Babɩlɔŋ, ʋ maga ma mɩɩra paaba a kaa mʋ bil ba dɩpɩnɩŋ Wɩa dɩɩ-bal-la tʋɔŋ Jerusalɛm lɛ. Ba maga ba mʋ pɩŋ ba dɩpɩnɩŋ nɛ Wɩa dɩa lɛ.

⁶ Lɛɛlɛ, ŋ-na Tatenai sɩ ŋaa Yufireti wɩɩjʋʋlʋŋ dɩɩrɩŋ tinteeŋ nɩhɩaŋ, Sɛta-Bozenai arɩ ma tɩntɩnnɩ-hɩasɩ-la dɔnsʋŋ sɩɩ beŋ tintee-la, má lɩɩsɛ ma nɩsɩŋ Wɩa dɩɩ-bal-la tɩntɩŋŋaa lɛ.

⁷ Má sɩ́ ma niiŋ joŋo hɛ Wɩa dɩɩ-bal-la tɩntɩŋŋaa lɛ. Má leŋ dɩ nɩɩ-la sɩɩ beŋ Juu tɩŋŋaa arɩ Juu tɩŋŋaa nɩhɩasɩŋ wasa saa Wɩa dɩa-la dɩ ʋ chɩŋ ʋ dɩchɩnɩŋ.

⁸ Mɩ bɩraa pɩ ma wombiiŋ daha dɩ ma pɛ Juu tɩŋŋaa nɩhɩasɩ-la lɛ dɩ ba wasa saa Wɩa dɩɩ-bal-la. Chɩŋ-la kala ba sɩ jaŋ ŋmoo, ʋ maga ma lɩɩsɛ lampooba-la ba sɩ laa Yufireti wɩɩjʋʋlʋŋ dɩɩrɩŋ tinteeŋ nɩaa teeŋ a hɛ kuori dɩa dʋa tʋɔŋ a tiŋ ʋ kala, dɩ tɩntɩmɩɩ-la sɩ́ birigu.

⁹ Kʋŋkala ba sɩɩ chɛ: nɛ-bel-pɔrɔɔ, pie-belliŋ, pie-bel-biisiŋ ba sɩ jaŋ kaa ŋaa kʋnyɩgaa Wɩɩsʋlʋŋ a pɩ Wɩa sɩ hɛ ʋ jaŋ lɛ, mɩaa, yɩsɩŋ, girep nɛnɛɛ sɩnɩŋ arɩ nʋʋŋ. Kɩaa deemba Wɩɩsʋllɩ sɩpaalaaraa sɩ hɛ Jerusalɛm lɛ sɩ jaŋ chɩchɛ, ʋ maga dɩ ma pɩba nɛ tapʋlɩɩ kala, a sɩ́ ba vɔŋ.

¹⁰ Dɩ ŋɩɩ leŋ dɩ ba wuo ŋaa Wɩɩsʋlʋŋ sɩɩ tɔrɛ Wɩa sɩ hɛ ʋ jaŋ lɛ tʋɔŋ, aŋ sʋl Wɩa pɩ mɩ-na kuoro arɩ mɩ hambolibiisiŋ dɩ wɩaa vɛŋ woruŋ pɩla.

¹¹ Mɩ bɩraa pɩ wombiiŋ, arɩ nʋʋkala nɛ kɛŋ niiŋ deeŋ bɩrɩmɛ, ʋ maga ba lɩɩsɛ ʋ dɩa doluŋ dɔŋɔ, a saa dol-la niiŋ dɔŋɔ, a joŋ nɩɩ-la tɔɔ gɩrɩgɛ ʋ lɛ, aŋ kɛŋ ʋ dɩa-la bɩrɩmɛ pupuluŋ.

¹² A leŋ dɩ Wɩa sɩ leŋe ʋ yɩrɩŋ hɛ lee-la, yuo kuoru na-kala koo nʋʋ na-kala sɩɩ chɛ dɩ ʋ kɛŋ wombiiŋ deeŋ bɩrɩmɛ koo a chei Wɩa dɩɩ-balɩŋ deeŋ sɩ hɛ Jerusalɛm lɛ. Mɩ-na Daarus nɛ pa wombiiŋ deeŋ. Nʋʋkala maga ʋ to wombiiŋ deeŋ arɩ sɩɩfɩɛsɩŋ.

Ba saa Wɩa dɩɩ-bal-la dɛrɛ a joŋo hɛ Wɩa nɩsɩŋ lɛ

¹³ A tɩŋ wombii-la kuoro Daarus sɩ pa wɩaa, Tatenai sɩ ŋaa Yufireti wɩɩjʋʋlʋŋ dɩɩrɩŋ tinteeŋ nɩhɩaŋ arɩ Sɛta-Bozenai arɩ nɩalɩŋ sɩɩ tɩgɛ ba lɛ ŋaa wɩalɩŋ kuoro sɩ daga teŋ-la tʋɔŋ arɩ sɩɩfɩɛsɩŋ.

¹⁴ Ŋɩɩ nɛ Juu tɩŋŋaa nɩhɩasɩ-la bɩra sɩsaa dɩa-la. Bʋa-la lɛ Wɩa wʋlaabʋllaa Hagaɩ arɩ Zɛkarɩya sɩ ŋaa Ido doho nʋʋ fa bʋl wɩaa nyaasɛ ba nyuŋ nɛ woruŋ. Ŋɩɩ nɛ ba saa Wɩa dɩɩ-bal-la dɛrɛ arɩ Iziral tɩŋŋaa Wɩa sɩ bʋl ŋɩɩ, arɩ Pɛsɩa tinteeŋ kuoroo deemba Siirus, Daarus arɩ Atazɛzɛs ma sɩ pa wombiiŋ ŋɩɩ.

¹⁵ Ba saa Wɩa dɩɩ-bal-la dɛrɛ chɛnɛ-la ba sɩɩ yɩrɛ Ada tapʋlaa batori chɛɛŋ nɛ, dɩ Daarus ma sɩ dii kuoruŋ, ʋ jɩ-dʋ lɛ nɛ ŋɩɩ.

¹⁶ Ŋɩɩ nɛ Iziral tɩŋŋaa, Wɩɩsʋllɩ sɩpaalaaraa, Levi doho nɩaa arɩ nɩkaana-la kala sɩ lɩɩ yoŋ-baga kɔ, kala gbieli arɩ tʋɔtɔrʋŋ a joŋ Wɩa dɩa-la hɛ Wɩa nɩsɩŋ lɛ.

¹⁷ Ba sɩɩ chɛ ba joŋ Wɩa dɩa-la hɛ Wɩa nɩsɩŋ lɛ, ba kpʋ nɛ-belliŋ zɔlɔ nɛ, pie-belliŋ ma zɔɔ-balɩa, pie-bel-pɔrɔɔ ma zɔɔ-banɛsɛ a ŋaa Wɩɩsʋlʋŋ. Ba kpʋ gbuŋgbogusuŋ fii arɩ balɩa nɛ a ŋaa Iziral tɩŋŋaa kala wʋbɔŋŋɔɔ joŋo chɛnɩŋ Wɩɩsʋlʋŋ, gbuŋgbogu bala kala chɩŋ Iziral doho doho-la dɔŋɔ nyuŋ.

¹⁸ Ŋɩɩ nɛ ba kɛŋ Wɩɩsʋllɩ sɩpaalaaraa arɩ Levi doho nɩaa kaa kpaa kpaa ba tɩtɩŋ Wɩa tɩntɩŋŋaa Jerusalɛm lɛ, arɩ teŋ-la Mosis sɩ ŋmʋnsa bil sɩ dagɛ ŋɩɩ.

Dɩɩsɩŋ kiele bal gbiele

¹⁹ Chɛŋ-bumbuŋ tʋɔŋ tapʋlaa fii arɩ banɛsɛ chɛɛŋ, nɩalɩŋ sɩ lɩɩ yoŋ-baga kɔ gbieli dɩɩsɩŋ kiele bal gbiele-la.

²⁰ Wɩɩsʋllɩ sɩpaalaaraa arɩ Levi doho nɩaa fa pɩɩsɛ ba disiniŋ ta nɛ aŋ ŋaa nɩzɔmɔ Wɩa wombiiŋ lɛ. Ŋɩɩ nɛ Levi doho nɩaa kpʋ ba tɩtɩa dɩɩsɩŋ kiele bal pie-bie, a kpʋ nɩalɩŋ kala sɩ lɩɩ yoŋ-baga kɔ, arɩ ba naambiiriŋ Wɩɩsʋllɩ sɩpaalaaraa ma dɩɩsɩŋ kiele bal pie-biisiŋ.

²¹ Ŋɩɩ nɛ Iziral tɩmma-la sɩ lɩɩ yoŋ-baga kɔ chaŋ nammɩa-la, a pɛ nɩalɩŋ kala ma sɩ lɩɩsɛ ba tɩtɩa disiŋ wɩalɩŋ nɩalɩŋ sɩ bɩ Wɩa ka to sɩɩ ŋaa lɛ, a ŋaa siri dɩ ba to Iziral tɩŋŋaa Wɩa.

²² Ba gbieli gbiele-la ba sɩ yie gbieli a dii boroboro sɩ bɩ sɩbʋrʋŋ kɛnɛ tapʋlaa balɩpɛ nɛ arɩ tʋɔtɔrʋŋ, bɛɛ wɩaa La TƖƖNA leŋe tʋɔtɔrʋŋ vɔgɛba nɛ, ʋ sɩ kɛŋ Asiiria kuoro tʋɔŋ bɩrɩmɛ ʋ pɛ ba lɛ ba saa Iziral tɩŋŋaa Wɩa dɩɩ-balɩŋ.