ƐZƖRA 5 - WƖA TENIŊ

Tatenai sɩ ŋmʋnsɛ teŋ-la pɩ Daarus

¹ Bʋa-la dɩ Wɩa wʋlaabʋllaa balɩa Hagaɩ arɩ Zɛkarɩya sɩ ŋaa Ido doho nʋʋ bʋl wɩaa Iziral tɩŋŋaa Wɩa doluŋ lɛ a pɩ Juu tɩmma-la sɩ hɛ Juda arɩ Jerusalɛm lɛ.

² Ŋɩɩ nɛ Sɩalɩtɩɛl nanʋala Jerubabɛl arɩ Jozadak nanʋala Jesua sii dɩ ba wasa saa Wɩa dɩɩ-bal-la sɩ hɛ Jerusalɛm lɛ. Wɩa wʋlaabʋlla-la ma fa hɛ nɩmɛ a pɩpɛ ba lɛ.

³ Bʋa-la lɛ, Tatenai sɩ ŋaa Yufireti wɩɩjʋʋlʋŋ dɩɩrɩŋ tinteeŋ nɩhɩaŋ arɩ Sɛta-Bozenai arɩ nɩalɩŋ sɩɩ tɩgɛ ba lɛ mʋ ba teeŋ a pɩɛsɛba, “Kʋbɛɛ nɛ pɩma wombiiŋ dɩ ma kʋ wasa saa Wɩa dɩɩ-balɩŋ deeŋ, dɩ ʋ jebiiŋ chɩŋ?”

⁴ Ba bɩra pɩɛsɛba, “Nɩalɩŋ sɩɩ saa dɩa-la yɩraa nɛ bɛɛ?”

⁵ Ama ba Wɩa sɩaa fa pɛ ba lɛ nɛ, a bibeŋ Juu tɩŋŋaa nɩhɩasɩŋ, ba bɩ wuo giriba dɩa-la saanɩŋ lɛ see bʋa-la lɛ ba sɩ ŋmʋnsɛ teniŋ a pɩ Daarus ʋ ma bɩra ŋmʋnsɛ teniŋ pɩba.

⁶ Tatenai sɩ ŋaa Yufireti wɩɩjʋʋlʋŋ dɩɩrɩŋ tinteeŋ nɩhɩaŋ arɩ Sɛta-Bozenai arɩ nɩalɩŋ sɩɩ tɩgɛ ba lɛ sɩ ŋmʋnsɛ teŋ-la pɩ kuoro Daarus nɛ ŋ-la.

⁷ Wɩɩ-la ba sɩ ŋmʋnsa nɛ ŋ-la, “Kuoro Daarus, laa chʋɔlʋŋ woruŋ.

⁸ Kuoro, laa chɛ dɩ ŋ jɩŋ arɩ la mʋ Juda tinteeŋ sɛmɛ dɔŋɔ nɛ, lee-la ba sɩɩ saa Wɩɩ-balɩŋ dɩɩ-bal-la. Nɩalɩŋ kɛŋ tabɩaa sɩ jalɩa nɛ a sɩsaa a joŋ doloo hɩhɛ jebiee lɛ. Ba fɩɛsɛ sɩɩŋ nɛ a tɩtɩŋ tɩntɩmɩɩ-la ʋ mʋmʋ sɩpaaŋ arɩ ba sɩ dagɛ ŋɩɩ.

⁹ La pɩɛsɛ ba nɩhɩasɩŋ nɛ, ‘Kʋbɛɛ nɛ pɩma wombiiŋ dɩ ma wasa saa Wɩa dɩɩ-bal-la dɩ ʋ jebiee chɩŋ?’

¹⁰ La bɩra pɩɛsɛba ba yɩraa, dɩ la wuo ŋmʋnsɛ ba nɩhɩasɩŋ yɩraa bil dɩ ŋ jɩmba.

¹¹ Wɩɩ-la ba sɩ bʋla pɩla nɛ ŋ-la: ‘La ŋaa Wɩa sɩ ŋaa wɩa-nyuŋ arɩ tinteeŋ tɩntɩnnaa nɛ, la wasaa saa Wɩa dɩɩ-bal-la ba sɩ saa faafaa kala nɛ, dɩa-la Iziral tɩŋŋaa kuoru-bal kʋbala fa sɩ saa dɛrɛ.

¹² Ama a tɩŋ la naabalɩmaba sɩ ŋaa Wɩa sɩ hɛ ʋ jaŋ lɛ baanɩŋ sii wɩaa, ʋ jomba hɛ Nebukadineza sɩ ŋaa Chalɩdɩ tɩɩna a ŋaa Babɩlɔŋ kuoro nɩsɩŋ lɛ, ʋ chei Wɩa dɩɩ-balɩŋ aŋ kɛsɛ nɩalɩŋ kaa mʋ Babɩlɔŋ

¹³ Ama Siirus sɩ dii Babɩlɔŋ kuoruŋ ʋ jɩ-bumbuŋ lɛ nɛ, ʋ pa wombiiŋ dɩ ba wasa saa Wɩa dɩa deeŋ.

¹⁴ Ʋ paa Wɩa dɩɩ-bal-la tʋɔŋ sɛlɩmɛ arɩ hɔpʋla kɩalɩŋ Nebukadineza sɩ paa Jerusalɛm lɛ a kaa mʋ Babɩlɔŋ a joŋo bil ʋ vene dɩa lɛ. Ŋɩɩ nɛ kuoro Siirus joŋ kɩalɩŋ pɩ baal kʋbala ba sɩɩ yɩrɛ Sɛsɩbaza ʋ sɩ lɩɩsa ʋ ŋaa Juda nɩaa nɩhɩaŋ.’

¹⁵ Ŋɩɩ nɛ aŋ bʋla pʋ, ‘Laa kɩaa deemba kaa mʋ bil Wɩa dɩɩ-bal-la sɩ hɛ Jerusalɛm lɛ, aŋ wasa saa Wɩa dɩa-la dɩ ʋ chɩŋ ʋ dɩchɩnɩŋ.’

¹⁶ Ŋɩɩ nɛ Sɛsɩbaza kɔ a bil Wɩa dɩɩ-bal-la gentine Jerusalɛm lɛ. A lɩɩ tapʋlɩɩ-la a kaa kɔ, ba haa saa dɩa-la nɛ, ba ha bɩ dɛrɛ.

¹⁷ Kuoro dɩ ŋ tʋɔŋ nɛ tɔrɔ, leŋ dɩ ba gbilli kuoroo tenniŋ tʋɔŋ, Babɩlɔŋ lɛ, a na dɩ kuoro Siirus sɛnɛ pa wombiiŋ nɛ dɩ ba wasa saa Wɩa dɩa-la Jerusalɛm lɛ. Kuoro, ŋɩɩ harɩŋ leŋ dɩ la jɩŋ wɩɩ-la ŋ sɩ kɛnɛ a mʋ tɩgɛ wɩɩŋ deeŋ lɛ.”