ƐZƖRA 4 - WƖA TENIŊ

Nɩaa pɔ dɩ ba sɩ́ Wɩa dɩɩ-bal-la saa

¹ Juda arɩ Bɛnjamɩŋ dʋndɔŋŋɔɔ sɩ nɩa dɩ nɩalɩŋ sɩ lɩɩ yoŋ-baga kɔ wasaa saa La TƖƖNA, Iziral tɩŋŋaa Wɩa dɩɩ-bal-la,

² ŋɩɩ nɛ ba kɔ Zerubabɛl arɩ dɩa dɩa nɩhɩasɩŋ teeŋ a bʋl, “Má leŋ dɩ la pɛ ma lɛ a saa dɩa-la, bɛɛ wɩaa la ma nagɛ ma nɛ a chʋchʋɔlɛ Wɩa-la ma sɩɩ chʋɔlʋ. La ma kpʋ pʋsʋŋ pʋpʋ nɛ a lɩɩ bʋa-la lɛ Asiiria kuoro Ɛsahadɔŋ sɩ kɛnla kɔ daha.”

³ Ama Zerubabɛl, Jesua arɩ Iziral tɩŋŋaa dɩa dɩa nɩhɩasɩ-la nɩkaanaa bʋl, “Ma bɩ jaŋ wuo pɛ la lɛ dɩ la saa La TƖƖNA dɩɩ-bal-la. La dʋndʋŋa jaŋ saa dɩa-la a pɩ La TƖƖNA, Iziral tɩŋŋaa Wɩa, arɩ Pɛsɩa kuoro Siirus sɩ dagɛ la ŋɩɩ.”

⁴ Ŋɩɩ nɛ nɩalɩŋ sɩ hɔnɔ golliba ŋɩŋaa wɩaa dɩ Juda nɩaa nandaasɩŋ yʋɔrɛ, dɩ fawʋllʋŋ kɛmba dɩ ba sɩ wuo saa dɩa-la.

⁵ Ŋɩɩ nɛ ba joŋ moribiee pɩ nɩaa ka dɩ ba kʋ bʋl wɩaa a birigi wɩalɩŋ kala ba sɩ bɩɩna dɩ ba ŋaa, bʋa-la kala lɛ Siirus sɩ ŋaa Pɛsɩa tinteeŋ kuoro a kaa mʋ bʋa-la lɛ Daarus ma sɩ dii Pɛsɩa tinteeŋ kuoruŋ.

Zɛzɛs arɩ Atazɛzɛs kuoruŋ bʋa lɛ nɩalɩŋ sɩ pɔ dɩ ba sɩ́ Wɩa dɩɩ-bal-la saa

⁶ Bʋa-la lɛ Zɛzɛs sɩ buumo dii kuoruŋ, nɩalɩŋ sɩ hɔnɔ golliba bʋl wɩaa a joŋ cheeriŋ pɩpɩ Juda arɩ Jerusalɛm nɩaa.

⁷ Pɛsɩa kuoro Atazɛzɛs ma kuoruŋ bʋa lɛ, Bɩsɩlam, Mɛfɩrɛdaf, Tabɛɛl, arɩ nɩalɩŋ kala sɩɩ tɩgɛ ʋ lɛ ŋmʋnsɛ teniŋ pɩ Atazɛzɛs. Aramek yikoro nɛ ba fa kaa ŋmʋnsɛ teŋ-la, dɩ ba karɩmɛ a dagɛ ʋ bʋbʋɔŋ pɩ kuoro.

⁸ Rehum sɩ ŋaa laalɩyuoroo nɩhɩaŋ arɩ Sɩmɩsaɩ sɩ ŋaa nɩɩ-la sɩɩ ŋmʋnsɛ ba tenniŋ ŋmʋnsɛ teniŋ a chei Jerusalɛm nɩaa a pɩ kuoro Atazɛzɛs a bʋl:

⁹ Teniŋ deeŋ lɩɩ Rehum, laalɩyuoroo nɩhɩaŋ, Sɩmɩsaɩ sɩ ŋaa teŋ-ŋmʋnsʋra arɩ nɩalɩŋ sɩɩ tɩgɛ ba lɛ teeŋ nɛ, a pɛ Sarɩya diiree arɩ tɩntɩnnɩ-hɩasɩŋ sɩ lɩɩ Tiripolis, Pɛsɩa, Ɛrɛk arɩ Babɩlɔŋ, a pɛ Ɛlam tɩmma-la sɩ lɩɩ Susa,

¹⁰ arɩ nɩalɩŋ dɔnsʋŋ Asubanipal sɩ ŋaa nɩbal a kɛŋ yɩrɩŋ woruŋ sɩ kire ta ba mʋ hɔŋ Samarɩa tabalɩŋ lɛ arɩ Yufireti wɩɩjʋʋlʋŋ leree dɔnsʋŋ.

¹¹ Teŋ-la ba sɩ ŋmʋnsa tʋɔŋ wɩaa nɛ ŋ-la, “Kuoro Atazɛzɛs, la-na ŋ tɩntɩnnaa sɩ lɩɩ Yufireti wɩɩjʋʋlʋŋ dɩɩrɩŋ nɛ ŋmʋnsɛ teniŋ deeŋ a pɩpɩŋ:

¹² Kuoro, laa chɛ ŋ jɩŋ arɩ Juu tɩmma-la sɩ lɩɩ ŋ teeŋ a kɔ Jerusalɛm wasaa saa tabal-la nɩaa sɩ ŋaa nɩbɔmɔ aa vɩa kuoroo niiŋ nɛ. Ba wasaa saa jebie-la nɛ arɩ ba gentisiŋ.

¹³ Kuoro, ŋ bɩra maga dɩ ŋ jɩŋ dɩ ba nɛ saa tabalɩŋ deeŋ a wasɛ ʋ jebiee kala, ba bɩra bɩ jaŋ titiŋ lampooba. Dɩ ŋɩɩ nɛ ŋaa, ŋ lampoo moribiee jaŋ muuri.

¹⁴ A tɩŋ la sɩ maga dɩ la tutoŋ, a bɩ jaŋ wuo bibeŋ ka dɩ nɩaa ŋaa wɩaa lileeniŋ, ŋɩɩ nɛ tɩɩ laa pɩŋ duoso deeŋ,

¹⁵ dɩ ŋ leŋ dɩ ba beŋ ŋ naabalɩmaba tenniŋ tʋɔŋ. Dɩ ba nɛ bene, ŋ jaŋ na arɩ tabalɩŋ deeŋ nɩaa ŋaa nɩa sɩɩ vɩa kuoroo niiŋ nɛ, a wʋwalɩmɛ kuoroo arɩ tinteyee sɩpaalaaraa faafaa kala. Ŋɩɩ nɛ tɩɩ ba chei tabal-la ŋɩɩ.

¹⁶ Kuoro, laa chɛ ŋ jɩŋ, dɩ ba nɛ wasa saa tabalɩŋ deeŋ arɩ ʋ jebiee, ŋ bɩra bɩ jaŋ tɩɩ Yufireti wɩɩjʋʋlʋŋ dɩɩrɩŋ.”

¹⁷ Kuoro ma bʋl ŋ-la a pɩba: Laalɩyuoroo nɩhɩaŋ Rehum, Sɩmɩsaɩ sɩ ŋaa teŋ-ŋmʋnsʋra arɩ nɩalɩŋ kala sɩɩ tɩgɛ ba lɛ sɩ hɛ Samarɩa arɩ Yufireti wɩɩjʋʋlʋŋ leree dɔnsʋŋ, mɩɩ chʋɔlɛma.

¹⁸ “Teŋ-la ma sɩ ŋmʋnsa pɩla, ba karɩmʋ mɩ sɩpaaŋ, a kaa bɩrɩmɛ mɩ yikoro lɛ a pɩmɛ nɛ.

¹⁹ Mɩ pa wombiiŋ nɛ ba beŋ a na dɩ tabalɩŋ deeŋ nɩaa kɛŋ kuoroo yuyuo yuosuŋ nɛ faafaa kala, ba ŋaa nɩa sɩ bɩ kuoroo niiŋ ka sɛɩ nɛ a ŋaa yuo-hɛɛrɛɛ.

²⁰ Jerusalɛm fa kɛŋ kuori duoruŋ sɩɩ beŋ Yufireti wɩɩjʋʋlʋŋ dɩɩrɩŋ tinteeŋ kala, ba tiŋ lampooba pɩpɩba.

²¹ Lɛɛlɛ má bʋla pɩ nɩalɩŋ dɩ ba leŋ tɩntɩmɩɩ-la, dɩ ba sɩ wasa saa tabal-la see dɩ mɩ pɩba wombiiŋ.

²² Má pʋpɔ ma sɩ́ wɩɩŋ deeŋ vɩa. Bɛɛ nɛ tɩɩ ma jaŋ leŋ dɩ nɩaa deemba kanfugo pʋŋa pɩpɛ, a chichei kuoro tʋɔŋ?”

²³ Ba sɩ karɩmɛ kuoro Atazɛzɛs teŋ-la pɩ Rehum sɩ ŋaa laalɩyuoroo nɩhɩaŋ, Sɩmɩsaɩ sɩ ŋaa teŋ-ŋmʋnsʋra, arɩ nɩalɩŋ sɩɩ tɩgɛ ba lɛ, ba guu mʋ Juu tɩmma-la sɩ hɛ Jerusalɛm lɛ a kiriba ba leŋ tɩntɩmɩɩ-la.

²⁴ Bʋa deeŋ lɛ nɛ ba leŋ Wɩa dɩɩ-bal-la saanɩŋ a mʋ yi Daarus sɩ dii Pɛsɩa tinteeŋ kuoruŋ ʋ jɩ-lɩa lɛ.