ƐZƖRA 3 - WƖA TENIŊ

Ba wasa saa Wɩɩsʋllɩ koruŋ

¹ Jɩna tʋɔŋ chɛŋ-pɛɩ sɩ kʋʋ yi dɩ Iziral tɩŋŋaa hɔŋ ba tasɩŋ lɛ, ŋɩɩ nɛ nɩalɩŋ kala kʋ hilimi Jerusalɛm lɛ arɩ nii-bala.

² Ŋɩɩ nɛ Jozadak nanʋala Jesua arɩ ʋ tɩntɩnnɩ dɔnsʋŋ sɩ ŋaa Wɩɩsʋllɩ sɩpaalaara arɩ Zerubabɛl sɩ ŋaa Sɩalɩtɩɛl nanʋala arɩ ʋ naambiiriŋ suomo sɩsaa Iziral tɩŋŋaa Wɩɩsʋllɩ koruŋ dɩ ba kaa ŋaa kʋnyɩgaa Wɩɩsʋlʋŋ, arɩ wombie-la Wɩa tɩntɩnna Mosis sɩ ŋmʋnsa bil dɩ la tuto sɩ dagɛ ŋɩɩ.

³ Arɩ ba fa sɩɩ fá nɩalɩŋ sɩ golliba ma kala, ba saa Wɩɩsʋlʋŋ koru-la nɛ ʋ gentine tɩtɩa lɛ, a ŋaa kʋnyɩgaa Wɩɩsʋlʋŋ ʋ lɛ a pɩ La TƖƖNA, chʋchʋɔŋ arɩ dɩdaanɩŋ kala.

⁴ Ŋɩɩ nɛ ba gbieli lɛŋŋɛɛ gbiele, a chɛ kʋnyɩgaa Wɩɩsʋlʋŋ kɩalɩŋ kala sɩ maga dɩ ba chɛ tapʋlɩɩ na-kala arɩ ŋɩɩ ba sɩ ŋmʋnsa bil.

⁵ Ʋ ŋɩɩ harɩŋ lɛ, ba joŋ kʋnyɩgaa Wɩɩsʋlʋŋ kɩalɩŋ ba sɩ maga dɩ baa nyɩgɛ bʋa na-kala, chɛŋ-falɩŋ Wɩɩsʋlʋŋ kɩaa arɩ Wɩɩsʋlʋŋ kɩalɩŋ kala ba sɩ yie ŋaa La TƖƖNA gbielee lɛ, a saa pɛ tʋɔtɔrɛ Wɩɩsʋlʋŋ kɩalɩŋ ba sɩ kaa kʋ pɩ La TƖƖNA lɛ.

⁶ Chɛŋ-pɛɩ tʋɔŋ tapʋl-bumbuŋ lɛ nɛ ba suomo ŋaa kʋnyɩgaa Wɩɩsʋlʋŋ a pɩ La TƖƖNA, arɩ ba fa ha bɩ La TƖƖNA dɩɩ-bal-la gentine bile ma kala.

Ba suomi Wɩa dɩɩ-bal-la wasa saanɩŋ

⁷ Ŋɩɩ nɛ ba joŋ moribiee pɩ dɩɩ-saaraa arɩ kapɩntaba, a joŋ kʋdiilee, kʋnyʋalaa arɩ nʋʋŋ pɩ Sɩdɔŋ arɩ Taaya tɩŋŋaa dɩ ba kɛŋ kuolu doloo duori mʋgʋ-balɩŋ a lɩɩ Lɛbanɔŋ a kɔ Jopa, arɩ Pɛsɩa tinteeŋ kuoro Siirus sɩ dagɛ ŋɩɩ.

⁸ Ba sɩ mʋ Wɩa dɩa leriŋ Jerusalɛm lɛ, jɩ-lɩa tʋɔŋ chɛŋ-lɩa lɛ, Sɩalɩtɩɛl nanʋala Zerubabɛl, Jozadak nanʋala Jesua, arɩ ba naambiiriŋ kala (Wɩɩsʋllɩ sɩpaalaaraa, Levi doho nɩaa arɩ nɩalɩŋ kala sɩ lɩɩ yoŋ-baga kɔ Jerusalɛm) suomi tɩntɩmɩɩ-la. Ŋɩɩ nɛ ba lɩɩsɛ Levi doho nɩaa sɩ yi jɩsɩŋ mara a kaa mʋ, dɩ ba beŋ dɩ ba saa La TƖƖNA dɩa-la.

⁹ Jesua arɩ ʋ hambolibiisiŋ arɩ ʋ naambiiriŋ, a pɛ Kadɩmɩɛl arɩ ʋ hambolibiisiŋ lɛ (Hodavia doho nɩaa nɛ ŋɩɩ), a bɩra pɛ Hɛnadad hambolibiisiŋ arɩ ʋ nihee arɩ ba ma naambiiriŋ lɛ, ba kala ŋaa Levi doho nɩaa nɛ. Ba kala pɛ a bibeŋ nɩalɩŋ sɩɩ saa Wɩa dɩa-la nɛ.

¹⁰ Dɩɩ-saara-la sɩ bil La TƖƖNA dɩɩ-bal-la gentine, Wɩɩsʋllɩ sɩpaalaaraa laalɛ ba tɩntɩnnɩ-gɛnnɩŋ, a kori nyilliŋ. Levi doho nɩaa (Asaf hambolibiisiŋ) ma kori buguloo, ba chɩŋ ba dɩchɩnaa dɩ ba dɛnnɛ La TƖƖNA, arɩ Iziral tɩŋŋaa kuoro Devit sɩ dagɛ ŋɩɩ.

¹¹ Ŋɩɩ nɛ ba yɩɩ yɩɩlaa a dɛnnɛ La TƖƖNA a lɔllʋ a bʋl, “La TƖƖNA wɩaa zɔmɔ, ʋ sɩ cho Iziral tɩŋŋaa ŋɩɩ bɩ dɛrɛ.” Ŋɩɩ nɛ nɩalɩŋ kala faasa ŋaa goŋ a dɛnnɛ La TƖƖNA, a tɩŋ ba sɩ bil La TƖƖNA dɩɩ-bal-la gentine.

¹² Ama, Wɩɩsʋllɩ sɩpaalaara nɩ-bɩnɩa-la jesiŋ, Levi doho nɩaa arɩ dɩa dɩa nɩhɩasɩŋ fa sɩ na bumbuŋ Wɩa dɩɩ-bal-la, ŋmoo niiŋ ba sɩ na lɛɛlɛ Wɩa dɩɩ-bal-la gentine ba sɩ bile, ka nɩaa dɔnsʋŋ-na ŋaa goŋ a jʋjʋɔsɛ.

¹³ Nʋʋkala fa bɩ wuo jɩŋ tʋɔtɔrɛ goŋ-la arɩ yele-la bʋa, bɛɛ wɩaa nɩalɩŋ fa chaasa ŋaa goŋ nɛ. Dɩ ŋ nɛ hɛ dɩ-bolii ma, ŋ jaŋ nɩɩ goŋ-la.