ƐZƖRA 1 - WƖA TENIŊ

Siirus pɛ Iziral tɩŋŋaa lɛ ba lɩɩ yoŋ-baga lɛ

¹ Siirus fa sɩ dii Pɛsɩa tinteeŋ kuoruŋ ʋ jɩ-bumbuŋ lɛ, La TƖƖNA sɩɩ chɛ dɩ ʋ leŋ dɩ wɩɩ-la ʋ sɩ to Jɛrɩmaaya lɛ bʋl kʋ ŋaa wʋtɩtɩɩ, ʋ digi Pɛsɩa tinteeŋ kuoro Siirus tʋɔŋ nɛ, ʋ ŋaa ba ŋmʋnsɛ heele deeŋ a pɩ ʋ tinteeŋ nɩaa kala:

² Ʋ sɩ, “Wɩɩ-la mɩ-na Pɛsɩa tinteeŋ kuoro Siirus sɩɩ bʋl nɛ ŋ-la: La TƖƖNA Wɩa sɩ hɛ ʋ jaŋ lɛ joŋ dʋnɩa tinteyee kala pɩmɛ nɛ. Ʋ lɩɩsɛmɛ nɛ dɩ mɩ saa ʋ dɩɩ-balɩŋ pʋ Jerusalɛm sɩ hɛ Juda tinteeŋ lɛ.

³ Dɩ ʋ nɩaa kʋŋ nɛ hɛ ma tʋɔŋ, a leŋ dɩ ʋ Wɩa hɛ ʋ teeŋ, dɩ ʋ mʋ Jerusalɛm sɩ hɛ Juda tinteeŋ lɛ a saa La TƖƖNA, Iziral tɩŋŋaa Wɩa, Wɩa-la sɩ hɛ Jerusalɛm lɛ, dɩɩ-balɩŋ.

⁴ Dɩ Wɩa nɩalɩŋ kʋŋkala sɩ hɛ yoŋ-baga lɛ nɩɩ chɛ pɛnɩŋ dɩ ʋ mɩɩra mʋ Jerusalɛm, ʋ dɩ nɩalɩŋ sɩ hɔnɔ hɛ dɔŋɔ maga ba pɛ ʋ lɛ a chɛ kɩaa deemba pʋ dɩ ʋ kaa mʋ saa Wɩa dɩɩ-bal-la Jerusalɛm lɛ: Hɔpʋla, sɛlɩmɛ, kʋdiilee, pʋsʋŋ arɩ tʋɔtɔrɛ Wɩɩsʋlʋŋ kɩaa.”

⁵ Ŋɩɩ nɛ Juda arɩ Bɛnjamɩŋ dɩa dɩa nɩhɩasɩŋ, Wɩɩsʋllɩ sɩpaalaaraa arɩ Levi doho nɩaa, nɩalɩŋ tʋɔŋ Wɩa sɩ dige kɛŋ ba tɩtɩa dɔŋɔ dɩ ba mʋ saa La TƖƖNA dɩɩ-bal-la Jerusalɛm lɛ.

⁶ Ba dɩ nɩalɩŋ sɩ hɔnɔ hɛ dɔŋɔ pɛ ba lɛ arɩ hɔpʋla arɩ sɛlɩmɛ, kʋdiilee arɩ pʋsʋŋ, kɩaa sɩ kɛŋ yuŋuŋ a pɛ tʋɔtɔrɛ Wɩɩsʋlʋŋ kɩaa lɛ.

⁷ Ŋɩɩ nɛ kuoro Siirus leŋ ba paa La TƖƖNA dɩɩ-bal-la kɩalɩŋ kuoro Nebukadineza fa sɩ paa Jerusalɛm lɛ a kaa mʋ bil ʋ vesiŋ dɩa lɛ a kaa kʋ lɩɩ.

⁸ Ʋ joŋ kɩaa deemba hɛ Mɩfɩrɛdaf nɩsɩŋ lɛ nɛ, nɩɩ-la sɩɩ bil ʋ moribiee, ʋ dɩɩsɛba a joŋo pɩ Sɛsɩbaza sɩ ŋaa Juda tinteeŋ nɩaa sɩpaalaara.

⁹ Kɩalɩŋ ʋ sɩ dɩɩsa nɛ ŋ-la: sɛlɩmɛ gbansɩŋ mara arɩ fii, hɔpʋla gbansɩŋ bʋɩ, hɔpʋla gbansɩŋ ba sɩ kaa nyɩnyɩgɛ kʋsʋɔrʋsʋŋ mara arɩ nibi,

¹⁰ sɛlɩmɛ gbaŋ-biisiŋ mara arɩ fii, hɔpʋla gbaŋ-biisiŋ zɔɔ-banɛsɛ arɩ fii a pɛ tɩntɩnnɩ kɩaa dɔnsʋŋ ma sɩ ŋaa bʋɩ lɛ.

¹¹ Kɩalɩŋ kala fa ŋaa sɛlɩmɛ arɩ hɔpʋla kɩaa bʋɩ banɔŋ arɩ zɔɔ-banɛsɛ nɛ. Bʋa-la lɛ Sɛsɩbaza arɩ nɩalɩŋ sɩ lɩɩ yoŋ-baga Babɩlɔŋ lɛ a mʋmʋ Jerusalɛm nɛ, ʋ pɛ kɛŋ kɩaa deemba mʋ.