ƐZƖKƖƐL 41 - WƖA TENIŊ

¹ Ŋɩɩ nɛ baal-la kɛmmɛ kʋ jʋʋ Wɩa dɩɩ-bal-la tʋɔŋ dɩ-balɩŋ tɩtɩa, a magɩsɛ ʋ jebie-la sɩ hɛ boiŋ niiŋ, sɛmɛ na-kala barɩmɩŋ ŋaa naakieliŋ butori.

² Boiŋ nii-la jalɩŋ fa ŋaa naakieliŋ bʋnɔŋ nɛ, ʋ sɛsɩŋ jeyee ma barɩmɩŋ ŋaa naakieliŋ bʋlɩa arɩ kpaa magɛ dɔŋɔ. Ŋɩɩ nɛ ʋ magɩsɛ Wɩa dɩɩ-bal-la dɩɩ-balɩŋ, ʋ duomuŋ ŋaa naakieliŋ mara, ʋ jalɩŋ ma ŋaa naakieliŋ fii.

³ Ŋɩɩ nɛ ʋ jʋʋ Wɩa dɩa-la sɩpaaŋ dɩa, a magɩsɛ jebie-la sɩ hɛ ʋ boiŋ niiŋ, ba kʋŋkala ŋaa naakieli bala. Boiŋ nii-la ma jalɩŋ ŋaa naakieliŋ butori, ʋ sɛsɩŋ jebiee ma jalɩŋ ŋaa naakieliŋ butori arɩ kpaa magɛ dɔŋɔ.

⁴ Ʋ magɩsɛ Wɩa dɩɩ-bal-la sɩpaaŋ dɩa-la duomuŋ, ʋ ŋaa naakieliŋ fii. Ʋ jalɩŋ ma ŋaa naakieliŋ fii, a tɩgɛ dɩɩ-bal-la lɛ. Ŋɩɩ nɛ ʋ bʋla pɩmɛ, “Leriŋ deeŋ nɛ ŋaa lee-la zɔmʋŋ sɩ bɩ magɩa kɛnɛ.”

⁵ Ŋɩɩ nɛ baal-la magɩsɛ Wɩa dɩɩ-bal-la jeeŋ, ʋ barɩmɩŋ ŋaa naakieliŋ butori. Dɩɩ-biisiŋ ma nɛ ba fa saa golli Wɩa dɩɩ-bal-la sɛsɩŋ kala, ba kʋŋkala jalɩŋ ŋaa naakieliŋ bʋlɩa.

⁶ Dɩɩsɩ-la fa sugili dɔŋɔ butori nɛ, sugilo na-kala kɛŋ dɩɩsɩŋ mara arɩ fii. Wɩa dɩɩ-bal-la jeeŋ lɛ, jebiee fa keese lɩɩ nɛ a golli, dɩ sɛsɩŋ dɩɩsɩ-la wuo daŋ ba nyuŋ, aŋ sɩ́ mʋ mɛrɛ Wɩa dɩɩ-bal-la jeeŋ lɛ.

⁷ Dɩɩsɩ-la kala fa sɩ golli Wɩa dɩɩ-bal-la jɩla a jalla pɩpɛ nɛ. Ba fa saa dɩɩsɩ-la ba lɩɩ aŋ ka pɩpɩ dɔŋɔ nɛ. Dɩ ŋ nɩɩ jɩl nyuŋ, dɩɩsɩ-la yie jalla pɩpɛ nɛ. Ba fa hɛ lusuŋ-chol-sɩaa nɛ, a chɩŋ bʋbʋɔŋ dɩa lɛ a to tʋtʋɔbaanɩŋ dɩa a jɩlaa yagɛ nyuŋ.

⁸ Mɩ na dɩ ba saa Wɩa dɩɩ-bal-la gentine ʋ sii je nɛ a golli. Ʋ gentine-la nyuŋ nɛ sɛsɩŋ dɩɩsɩ-la ma chɩŋ. Ʋ leŋiŋ fa ŋaa naakieliŋ butori nɛ.

⁹ Sɛsɩŋ dɩɩsɩ-la ma harɩŋ jeeŋ barɩmɩŋ fa ŋaa naakieliŋ bʋlɩa arɩ kpaa magɛ dɔŋɔ nɛ. Wuol-la sɩ hɛ Wɩa dɩɩ-bal-la sɛsɩŋ dɩɩsɩ-la

¹⁰ arɩ Wɩɩsʋllɩ sɩpaalaaraa dɩɩsɩŋ pɛgɛ, ʋ jalɩŋ fa ŋaa naakieliŋ fii nɛ a golli Wɩa dɩɩ-bal-la kala.

¹¹ Wuol-la sɩ hɛ dɩɩsɩ-la pɛgɛ lɛ, boiŋ-niiree nɛ fa hɛ nɩmɛ a jʋjʋʋ sɛsɩŋ dɩɩsɩ-la. Dɔŋɔ hɛ wɩɩpɔsʋŋ nagʋa dɩɩrɩŋ, dɔŋɔ ma hɛ wɩɩpɔsʋŋ nadiiŋ dɩɩrɩŋ. Jenaa-la sɩ mʋ tɩgɛ wuol-la lɛ barɩmɩŋ ŋaa naakieliŋ bʋlɩa arɩ kpaa magɛ dɔŋɔ nɛ a golli.

¹² Dɩa kʋbala nɛ fa chɩna chaasɛ Wɩa dɩɩ-bal-la kaala a hɛ wɩɩjʋʋlʋŋ dɩɩrɩŋ, ʋ duomuŋ fa ŋaa naakieliŋ mahɩŋ balɩa arɩ banɔŋ nɛ, ʋ jalɩŋ ma ŋaa naakieliŋ mara arɩ fii arɩ banɔŋ. Ʋ jeeŋ barɩmɩŋ ma ŋaa naakieliŋ bʋlɩa arɩ kpaa magɛ dɔŋɔ nɛ a golli.

¹³ Baal-la magɩsɛ Wɩa dɩɩ-bal-la duomuŋ. Ʋ ŋaa naakieliŋ mahɩŋ balɩa arɩ fii. Wɩa dɩɩ-bal-la kaala arɩ dɩa-la sɩ hɛ wɩɩjʋʋlʋŋ dɩɩrɩŋ arɩ ʋ jeyee ma kala duomuŋ ŋaa naakieliŋ mahɩŋ balɩa arɩ fii nɛ.

¹⁴ Wɩa dɩɩ-bal-la wɩɩpɔsʋŋ dɩɩrɩŋ kaala arɩ dɩa-la sɩpaaŋ wuoluŋ, ʋ jalɩŋ ŋaa naakieliŋ mahɩŋ balɩa arɩ fii nɛ.

¹⁵ Ŋɩɩ nɛ ʋ magɩsɛ dɩa-la sɩ hɛ wɩɩjʋʋlʋŋ dɩɩrɩŋ arɩ ʋ keesee balɩa sɩ hɛ ʋ sɛsɩŋ, ba kala duomuŋ ŋaa naakieliŋ mahɩŋ balɩa arɩ fii nɛ. Wɩa dɩɩ-bal-la tʋɔŋ dɩ-balɩŋ, ʋ sɩpaaŋ dɩa arɩ zawʋra-la sɩ chaasɛ kaala-la,

¹⁶ a pɛ boiŋ-nii-jʋʋlʋŋ, tokoroba-la arɩ keese-la batori sɩ golliba, ba fa kɛŋ daborusuŋ nɛ tɔ ba kala, a chɩŋ tinteeŋ a jɩlaa yagɛ tokoroba lɛ. Tokoroba-la kala fa tɔ nɛ.

¹⁷ Wɩa dɩɩ-bal-la tʋɔŋ jeyee lɛ, a chɩŋ tinteeŋ a kaa jɩlaa yi borusuŋ nyuŋ,

¹⁸ ba fa tuuri kɩaa sɩ nagɛ Wɩa tɩndaaraa a kɛŋ kɩŋkɛnsɩŋ arɩ abɛ tɩɩsɩŋ nɛ a hɛ. Ba ŋaa kɩaa deemba ba chagɩsɛ dɔŋɔ lɛ nɛ. Kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ kʋŋkala fa kɛŋ sɛsɩŋ balɩa nɛ.

¹⁹ Sɛmɛ dɔŋɔ sɩaa nagɛ nuhuobiine sɩaa a chaasɛ abɛ tɩa sɛmɛ dɔŋɔ, sɛmɛ dɔŋɔ ma sɩaa nagɛ naachigiŋ sɩaa a ma chaasɛ abɛ tɩa sɛmɛ dɔŋɔ. Kɩalɩŋ fa nagɛ ŋɩɩ nɛ a golli Wɩa dɩɩ-bal-la tʋɔŋ kala.

²⁰ A chɩŋ tinteeŋ a kaa jɩlaa yi borusuŋ nyuŋ, ba fa tuuri kɩaa sɩ nagɛ Wɩa tɩndaaraa a kɛŋ kɩŋkɛnsɩŋ arɩ abɛ tɩɩsɩŋ nɛ a hɛ Wɩa dɩ-zɔŋ-la harɩŋ jeeŋ lɛ.

²¹ Wɩa dɩɩ-bal-la dɩ-balɩŋ boro-daaŋ kɛŋ sɛsɩŋ banɛsɛ nɛ, kʋ-la fa sɩ hɛ Wɩa dɩɩ-bal-la lee-la zɔmʋŋ sɩ bɩ magɩa kɛnɛ ma nagɛ ŋɩɩ tɩtɩa nɛ.

²² Wɩɩsʋlʋŋ koruŋ ma ba sɩ kɛŋ daaŋ ŋaa ma fa hɛ dɩa-la tʋɔŋ, a chɩŋ Wɩa dɩɩ-bal-la lee-la zɔmʋŋ sɩ bɩ magɩa kɛnɛ sɩpaaŋ. Ʋ leŋiŋ ŋaa naakieli bala arɩ kpaa magɛ dɔŋɔ nɛ, ʋ jalɩŋ ma ŋaa naakieli bala. Ʋ gʋnaa, ʋ bʋbʋɔ-chala arɩ ʋ sɛsɩŋ kala fa ŋaa daaŋ nɛ. Baal-la bʋla pɩmɛ, “Teebʋl-la sɩ chɩŋ la TƖƖNA sɩpaaŋ nɛ ŋ-la.”

²³ Wɩa dɩɩ-bal-la tʋɔŋ dɩ-zɔmʋŋ arɩ lee-la zɔmʋŋ sɩ bɩ magɩa kɛnɛ kala borusuŋ ŋaa boru-kparaa nɛ.

²⁴ Borusu-la ŋaa boru-kparaa nɛ, balɩa suro mʋmʋ sɛmɛ dɔŋɔ, balɩa ma suro mʋmʋ sɛmɛ dɔŋɔ.

²⁵ Borusu-la lɛ, ba saa kɩaa sɩ nagɛ Wɩa tɩndaaraa nɛ a kɛŋ kɩŋkɛnsɩŋ a hɛ a pɛ abɛ tɩɩsɩŋ lɛ. Ba nagɛ kɩalɩŋ sɩ hɛ jeye-la lɛ nɛ. Zawʋra-la sɩpaaŋ dɩɩrɩŋ, ba kɛŋ daaŋ ŋaa kʋŋ nɛ ʋ keese tɔ.

²⁶ Zawʋra-la sɛsɩŋ jeyee lɛ, tokoroba nɛ hɛ nɩmɛ, ka ba saa abɛ tɩɩsɩŋ a hɛ jeye-la sɛsɩŋ kala lɛ. Dɩɩ-biisi-la sɩ golli Wɩa dɩɩ-bal-la sɛsɩŋ lɛ, ba kɛŋ daaŋ ŋaa kʋŋ nɛ a keese tɔ ba kala.