ƐZƖKƖƐL 32 - WƖA TENIŊ

Ba ta jembiiŋ pɩ Ijipiti tinteeŋ kuoro

¹ La fa sɩ hɛ yoŋ-baga lɛ jɩ-fii arɩ balɩa tʋɔŋ chɛŋ-fii arɩ balɩa tapʋl bumbuŋ lɛ, La TƖƖNA bʋl wɩaa pɩmɛ, ʋ sɩ,

² “Nuhuobiiŋ, ta jembiiŋ pɩ Ijipiti tinteeŋ kuoro a bʋla pʋ, ‘Ŋ nagɛ naachigiŋ nɛ tinteye-la tʋɔŋ, ŋ nagɛ lɩɩŋ tʋɔŋ peribanyeŋŋu nɛ a puŋŋi lɩɩŋ bɩbal, a kɛŋ ŋ naasɩŋ faasa vuugi lɩɩ-la, ʋ kala ŋaa gbʋna gbʋna.’ ”

³ “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Dɩ tinteyee nɩaa nɛ yʋga a kʋ hɛ dɔŋɔ, mɩ jaŋ yuo mɩ jóŋ a kɛnɩŋ kaa kʋ lɩɩ bil fuoŋ niiŋ.

⁴ Mɩ jaŋ joŋuŋ yuo ta dɩ ŋ pɩŋ tintee-jaala lɛ. Mɩ jaŋ leŋ dɩ zaaraa arɩ baga kɩaa kala diiŋ.

⁵ Mɩ jaŋ kɛŋ ŋ nammɩa jɛrɛ peelee nyusuŋ aŋ leŋ dɩ ŋ haŋgbelee su fuonaasɩŋ.

⁶ Ŋ chalɩŋ jaŋ pɛllɛ su tinteeŋ, a lɩɩ peelee nyusuŋ a kʋ tuu su fuonaa luŋoo.

⁷ Dɩ mɩ nɛ cheyiŋ dɛrɛ, mɩ jaŋ leŋ dɩ wɩa-nyuŋ kala biri dɩ chɛnwʋlaa sɩ́ wuo chaanɛ. Mɩ jaŋ leŋ dɩ duoŋ-bɩlɩmbaanɩŋ tɔ wɩɩpɔsʋŋ, aŋ leŋ dɩ chɛnɛ ma sɩ́ wuo chaanɛ.

⁸ Mɩ jaŋ dɩsɛ wɩa-nyuŋ pʋlʋŋ kala, aŋ leŋ ŋ tinteeŋ kala biri. Mɩ-na ma TƖƖNA Wɩɩjarɩbakɔ nɛ bʋla.

⁹ Tintee-daŋ nɩaa ŋ ha sɩ bɩ jɩŋ jaŋ hirigi, dɩ mɩ nɛ leŋe ba nɩɩ ŋɩɩ mɩ sɩ cheyiŋ.

¹⁰ Mɩ jaŋ leŋ dɩ ŋ wɩaa kperi tintee daŋ, dɩ mɩ nɛ kɛŋ mɩ tokobiiŋ viisi ba nyusuŋ, fawʋllʋŋ jaŋ kɛŋ ba kuoroo dɩ ba chichel. Tapʋlɩɩ-la ŋ sɩ jaŋ tel, ba kʋŋkala jaŋ chichel bʋa na-kala lɛ a tɩŋ ʋ mɩɩsɩŋ wɩaa.

¹¹ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: ‘Babɩlɔŋ kuoro jaŋ kʋ yuo ŋ-na Ijipiti kuoro.

¹² Mɩ jaŋ leŋ tintee-wogusuŋ laalɩyuoroo sɩ dolie a faasa bɔŋ kʋ kpʋ ŋ nɩaa kala. Ba jaŋ chei kʋŋ na-kala ŋ sɩ kaa ŋmuŋmoo bɔyɛ arɩ ŋ nɩaa kala.

¹³ Mɩ jaŋ kpʋ ŋ pʋsʋŋ kala sɩ hɛ fuoŋ niiŋ, nuhuobiiŋ koo pʋna jaŋ tuo sɩ jaŋ kɛŋ lɩɩ-la vuugi.

¹⁴ Mɩ jaŋ leŋ dɩ lɩɩrɩ-la fɩɛla pɩŋ, dɩ fuonaasɩŋ lɩɩŋ ma pɩpɛllɛ a nagɛ nʋʋŋ. Mɩ-na ma TƖƖNA Wɩɩjarɩbakɔ nɛ bʋla.

¹⁵ Dɩ mɩ nɛ chei Ijipiti tinteeŋ a leŋ dɩ ʋ pɩŋ hoi, a kpʋ nʋʋkala sɩ hɛ lee-la, ŋɩɩ nɛ ba jaŋ jɩŋ arɩ mɩ nɛ ba TƖƖNA.

¹⁶ Jembii-la ba sɩ jaŋ ta pʋ nɛ ŋɩɩ. Tintee-wogusuŋ haalaa jaŋ laa jembiiŋ deeŋ a yele hɛ pɩ Ijipiti tinteeŋ kuoro arɩ ʋ nɩaa kala sɩ sʋba. Mɩ-na ma TƖƖNA Wɩɩjarɩbakɔ nɛ bʋla.’ ”

¹⁷ La fa sɩ hɛ yoŋ-baga lɛ jɩ-fii arɩ balɩa, chɛŋ-bumbuŋ tapʋl-fii arɩ banɔŋ chɛɛŋ, La TƖƖNA bʋl wɩaa pɩmɛ, ʋ sɩ:

¹⁸ “Nuhuobiiŋ, yel a pɩ Ijipiti tɩŋŋaa nɩ-daŋ-la kala sɩ jaŋ tuu bʋa a pɛ tintee-duoruŋ nɩalɩŋ sɩ tuu bʋa lɛ.

¹⁹ Bʋla pɩba, ‘Ma bɩɩna ma nɛ zɔmɔ kɩɩ nʋʋkala? Má mʋ a pɛ nɩalɩŋ sɩ bɩ Wɩa ka to lɛ.’

²⁰ Ba jaŋ sʋʋ a pɛ nɩalɩŋ ba sɩ kpʋa laalɩŋ lɛ. Ba lɩɩsɛ tokobiiŋ nɛ, dɩ ba kpʋ ʋ nɩ-daŋ-la kala.

²¹ Sɩpaalaarɩ-duoru-la ba sɩ kpʋa laalɩŋ lɛ ba hɛ lɛlɛɛ-jaŋ lɛ, jaŋ bʋl ŋ-la a mʋ tɩgɛ Ijipiti tɩŋŋaa arɩ nɩalɩŋ sɩ kʋ pɛ Ijipiti tɩmma-la lɛ: ‘Ba kɔ lɛlɛɛ-jaŋ nɛ a pɛ nɩalɩŋ sɩ bɩ Wɩa ka to lɛ, nɩalɩŋ ba sɩ kpʋa laalɩŋ lɛ.’

²² Asiiria arɩ ʋ laalɩyuoroo kala hɛ lɛlɛɛ-jaŋ, ba vaamaa gollu. Ba kpʋ ba kala laalɩŋ lɛ nɛ.

²³ Ba vaamaa hɛ lɛlɛɛ-jaŋ dɩ-luŋii lɛ nɛ. Asiiria laalɩyuoroo kala nɛ ba kpʋ laalɩŋ lɛ, ba vaamaa golli ʋ vaamɩŋ. Nɩalɩŋ sɩ joŋ fawʋllʋŋ hɛ tinteeŋ nɩaa lɛ, ba kala nɛ ba kpʋ laalɩŋ lɛ.

²⁴ Ba hugi Elam ma nɩmɛ nɛ ʋ laalɩyuoroo vaamaa gollu. Ba kpʋ ba kala laalɩŋ lɛ nɛ. Nɩalɩŋ kala sɩ joŋ fawʋllʋŋ hɛ tinteeŋ nɩaa lɛ aŋ bɩ Wɩa jɩŋ kala sʋba nɛ, a mʋ lɛlɛɛ-jaŋ. Ba dii hɩɩsɩŋ nɛ a mʋ pɛ nɩalɩŋ sɩ hɛ lɛlɛɛ-jaŋ lɛ.

²⁵ Ba bil bɔsɔ nɛ a pɩ Elam nɩalɩŋ ba sɩ kpʋa tʋɔŋ, ʋ nɩ-daŋ-la kala vaamaa golli ʋ vaamɩŋ. Ba kala ŋaa nɩa sɩ bɩ Wɩa ka to nɛ. Ba kpʋ ba kala laalɩŋ lɛ nɛ, bɛɛ wɩaa ba joŋ fawʋllʋŋ hɛ tinteeŋ nɩaa lɛ nɛ. Ama lɛɛlɛ ba sʋba nɛ a kɛŋ ba hɩɩsɩŋ mʋ pɛ nɩalɩŋ ba sɩ kpʋa lɛ, nɩalɩŋ sɩ hɛ lɛlɛɛ-jaŋ.

²⁶ Mɛsɛk arɩ Tubal kala hɛ nɩmɛ nɛ, ba laalɩyuoru daŋ-la vaamaa golliba. Nɩaa deemba kala fa ŋaa nɩa sɩ bɩ Wɩa ka to nɛ. Ba kpʋ ba kala laalɩŋ lɛ nɛ a tɩŋ ba sɩ joŋ fawʋllʋŋ hɛ tinteeŋ nɩaa lɛ wɩaa.

²⁷ Ba fa bɩ ba-na hugo arɩ zile a nagɛ laalɩyuori babiibala-la dɔnsʋŋ sɩ laa sɩpaaŋ sʋʋ. Ba nyɩgɩla nɛ a mʋ lɛlɩŋ a pɩna yelli ba tokobiee, ka ba hɔɔtaalɩ-la laalɩyuori sɩ kaa kɛrɛɛ laa bayuori hɛŋŋɛɛ ma dandaŋ ba nyuŋ. Nɩaa deemba fa ŋaa laalɩyuori babiibala nɛ a joŋ fawʋllʋŋ hɛ tinteeŋ nɩaa lɛ.

²⁸ Ŋ-la nɛ ba jaŋ chɔŋ Ijipiti tɩŋŋaa dɩ ba pɩna guoli nɩalɩŋ sɩ bɩ Wɩa ka to ba sɩ kpʋa laalɩŋ lɛ.

²⁹ Ɛdɔm arɩ ʋ kuoro arɩ ʋ sɩpaalaaraa kala nɛ hɛ nɩmɛ. Ba fa ŋaa laalɩyuori-duori nɛ, ama lɛɛlɛ ba hɛ lɛlɛɛ-jaŋ, ba dɩ nɩalɩŋ sɩ bɩ Wɩa ka to ba sɩ kpʋa laalɩŋ lɛ.

³⁰ Sɩpaalaara-la kala sɩ hɛ wɩɩpɔsʋŋ nagʋa arɩ Sɩdɔŋ tɩŋŋaa hɛ nɩmɛ. Ba doluŋ fa leŋe fawʋllʋŋ kɛŋ nɩaa nɛ, ama lɛɛlɛ ba sʋba nɛ arɩ hɩɩsɩŋ, a mʋ pɛ nɩalɩŋ ba sɩ kpʋa laalɩŋ lɛ, nɩalɩŋ sɩ bɩ Wɩa ka to. Ba ma pɛ dii hɩɩsɩ-la nɩalɩŋ sɩ mʋ lɛlɛɛ-jaŋ sɩ die nɛ.

³¹ Dɩ Ijipiti tinteeŋ kuoro arɩ ʋ laalɩyuoroo kala nɛ mʋ na nɩaa deemba ba sɩ kpʋa laalɩŋ lɛ, ba tʋɔŋ jaŋ pɩŋ dɩ-bala. Mɩ-na ma TƖƖNA Wɩɩjarɩbakɔ nɛ bʋla.

³² Mɩ leŋe Ijipiti tinteeŋ kuoro joŋ fawʋllʋŋ a hɛ tinteeŋ nɩaa lɛ nɛ, ama ba jaŋ kpʋ ʋ dɩ ʋ laalɩyuoroo kala dɩ ba mʋ pɛ nɩalɩŋ sɩ bɩ Wɩa ka to ba sɩ kpʋa laalɩŋ lɛ. Mɩ-na ma TƖƖNA Wɩɩjarɩbakɔ nɛ bʋla.”