ƐZƖKƖƐL 31 - WƖA TENIŊ

Ba kɛŋ Ijipiti a magɩsɛ kuolu tɩa sɩ hɛ Lɛbanɔŋ lɛ

¹ La fa sɩ hɛ yoŋ-baga lɛ, jɩ-fii arɩ kʋbala tʋɔŋ chɛŋ-tori tapʋl-bumbuŋ lɛ, La TƖƖNA bʋla wɩaa pɩmɛ,

² ʋ sɩ, “Nuhuobiiŋ, bʋla pɩ Ijipiti tinteeŋ kuoro arɩ ʋ nɩaa: Ma kɛŋ doluŋ nɛ woruŋ! Nʋʋkala tuo a magɛma.

³ Bee na Asiiria, ʋ fa nagɛ kuolu tɩa sɩ hɛ Lɛbanɔŋ lɛ nɛ. Ʋ naakelee zɔŋ woruŋ, a lugo tɔ duu-la a jɩl wɩa-nyuŋ woruŋ, ʋ nyu-gbaŋa jɩla kieli tɩɩsɩ-la.

⁴ Lɩɩŋ fa hɛ nɩmɛ nɛ, a leŋ ʋ waa a duomi woruŋ. Lɩɩ-bul-sɩaa pɛllɛ gugolli ʋ gentine kala, a pɛllɛ mʋ jʋjʋʋ tɩɩsɩ-la kala sɩ hɛ duu-la lɛ.

⁵ Ŋɩɩ nɛ tɩa-la waa a kɩɩ tɩɩsɩ-la kala sɩ hɛ duu-la lɛ. Ʋ naakelee duomi aŋ barɩmɛ woruŋ a jɛrɛ a tɩŋ lɩɩŋ sɩ vɔgʋ wɩaa.

⁶ Diibiisiŋ kala saa ba dɛllɩŋ tɩa-la naakelee lɛ, bagɩlaa ma lʋl ba biiriŋ ʋ bʋbʋɔŋ. Tintee balaa kala hɛ ʋ fɩɛlɩŋ lɛ.

⁷ Ʋ fa chaasa zɔŋ nɛ woruŋ, a kɛŋ naakel-duduosuŋ, ʋ naapoloo ma tuu yi lɩɩ-jɩna lɛ.

⁸ Kuolu tɩɩsɩ-la kala fa sɩ hɛ Wɩa ŋmaŋkaa-la lɛ kʋŋkala bɩ ʋ maga. Tɩɩsɩ-la kala sɩ waa a kɛŋ naakel-duduosuŋ, ma kʋŋkala fa bɩ ʋ maga. Tɩa kala fa tuo Wɩa ŋmaŋkaa-la tʋɔŋ a zɔmɔ magʋ.

⁹ Mɩ leŋe ʋ zɔŋ nɛ a kɛŋ naakelee yʋgɛ. Tɩɩsɩ-la kala fa sɩ hɛ Ɛdɩŋ lɛ, Wɩa ŋmaŋkaa-la, yaraa faa bieri ʋ nyuŋ nɛ.

¹⁰ Lɛɛlɛ, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: A tɩŋ ʋ sɩ waa a kɩɩ tɩɩsɩ-la kala a jɩla tɩgɛ wɩa-nyuŋ ŋɩɩ, ʋ dɩdagɛ ʋ tɩtɩa.

¹¹ Mɩ joŋu hɛ tintee-wogusuŋ kuoro nɩsɩŋ lɛ, ʋ dɔgʋsʋ a tɩŋ ʋ wʋbɔŋŋɔɔ wɩaa. Mɩ vɩaʋ ta nɛ,

¹² tintee-wogusuŋ nɩaa sɩ faasa bɔŋ tinteyee kala tʋɔŋ kʋ keru lo ʋ pɩŋ nɩmɛ. Ʋ naakel-balaa arɩ kʋbiisiŋ kala bori a pɩŋ ba tinteeŋ peelee arɩ fuonaasɩŋ lɛ. Ba boro pɩŋ fuonaasɩŋ sɩ luŋie lɛ. Tinteye-la kala fa sɩ hɛ ʋ fɩɛlɩŋ lɛ fá viiri aŋ leŋu.

¹³ Diibiisiŋ togili naakele-la sɩ tele pɩŋ lɛ, bagɩlaa ma nʋɔsɛba bɩbal.

¹⁴ Ŋɩɩ wɩaa, a chɩŋ lɛɛlɛ a kaa mʋ, tɩa kala bɩra bɩ jaŋ waa a magɛ ŋɩɩ a jɩlaa tɩgɛ wɩa-nyuŋ, ʋ cho ʋ na lɩɩŋ a mɩmagɛ ɛɛ kala. Ba kala jaŋ sʋʋ a nagɛ nuhuobiinee sɩ yie sʋʋ ŋɩɩ a mʋ lɛlɛɛ-jaŋ.”

¹⁵ La TƖƖNA Wɩɩjarɩbakɔ bɩra sɩ: “Tapʋlɩɩ-la tɩa-la sɩ mʋ lɛlɛɛ-jaŋ, mɩ leŋe lɩɩŋ lɩɩ tinteeŋ nɛ a tɔʋ, a dɩdagɛ ʋ yoho yeliŋ. Mɩ tɔ fuonuŋ arɩ lɩɩ-libisiŋ nɛ dɩ ba sɩ́ pɛllʋ. A tɩŋ tɩa-la sɩ sʋba wɩaa, mɩ leŋe birimiŋ kʋ tɔ Lɛbanɔŋ peelee nɛ, a leŋ tɩɩsɩ-la kala sɩ hɛ duu-la lɛ sʋʋ.

¹⁶ Mɩ sɩ leŋe ʋ tele sʋʋ ŋɩɩ, ʋ dɔmɔ leŋe tinteyee nɩaa chel nɛ. Tɩɩsɩ-la kala sɩ hɛ Ɛdɩŋ lɛ arɩ Lɛbanɔŋ tɩɩ-zɔmɔ-la kala sɩ nyʋa lɩɩŋ vɔgɛ aŋ sʋʋ, ba tʋɔŋ tɔrɔ nɛ tɩa-la teliŋ lɛ.

¹⁷ Nɩalɩŋ ma fa sɩ hɔŋ ʋ fɩɛlɩŋ lɛ, tinteye-la kala fa sɩ pɛ ʋ lɛ, sʋba nɛ ʋ dɩ ba kala mʋ lɛlɛɛ-jaŋ a pɛ nɩalɩŋ ba sɩ kpʋa laalɩŋ lɛ.

¹⁸ Tɩa-la nɛ ŋaa Ijipiti tinteeŋ kuoro arɩ ʋ nɩaa kala. Tɩɩsɩ-la kala fa sɩ hɛ Ɛdɩŋ lɛ kʋŋ bɩ waa a kɛŋ yɩrɩŋ magʋ. Ama lɛɛlɛ, a nagɛ Ɛdɩŋ tɩɩsɩ-la sɩ sʋʋ ŋɩɩ, ʋ ma jaŋ sʋʋ a mʋ lɛlɛɛ-jaŋ a pɛ nɩalɩŋ sɩ bɩ Wɩa ka to ba sɩ kpʋa laalɩŋ lɛ. Mɩ-na ma TƖƖNA Wɩɩjarɩbakɔ nɛ bʋla.”