ƐZƖKƖƐL 30 - WƖA TENIŊ

Ba ta jembiiŋ a pɩ Ijipiti tɩŋŋaa

¹ La TƖƖNA bɩra bʋl wɩaa pɩmɛ,

² ʋ sɩ, “Nuhuobiiŋ, bʋl wɩaa mɩ doluŋ lɛ a bʋl, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: ‘Heele bʋl, tapʋl-bɔmʋŋ ka kɔ nɛ.’

³ Tapʋlɩɩ-la kpaga nɛ, La TƖƖNA tapʋlʋŋ kpaga nɛ. Tapʋlɩɩ-la duoŋ-bɩlɩmbaanaa jaŋ tɔ, dɩ wɩaa jʋʋ tinteyee nɩaa.

⁴ Nɩaa jaŋ kʋ yuo Ijipiti tɩŋŋaa, dɩ tʋɔ-cheeŋ yʋgɛ Kus tinteeŋ lɛ. Dɩ ba nɛ kpʋ nɩaa Ijipiti tinteeŋ lɛ, ba jaŋ paa ʋ dʋa kaa viiri, ka dɩ tintee-la pɩŋ jikpeeŋ.

⁵ Ba jaŋ kpʋ laalɩyuoro-la kala ba sɩ joŋ moribiee pa aŋ kaa lɩɩ tinteyee deemba kɔ: Kus, Puti, Lidiya, Arebia, Libiya, arɩ mɩ nɩaa Iziral tɩŋŋaa, a pɛ Ijipiti laalɩyuoroo lɛ.”

⁶ La TƖƖNA sɩ, “Nɩalɩŋ kala sɩ kʋ pɛ Ijipiti tɩŋŋaa lɛ jaŋ sʋʋ, dɩ dol-la Ijipiti tɩŋŋaa sɩ kaa kɛŋ babii-ballɩŋ kala ŋaa pɛɩ. A chɩŋ taŋ-la ba sɩɩ yɩrɛ Mɩgɩdɔl lɛ a kaa mʋ taŋ-la ba sɩɩ yɩrɛ Asɩwaŋ, laalɩŋ jaŋ kpʋ ba nɩaa. Mɩ-na ma TƖƖNA Wɩɩjarɩbakɔ nɛ bʋla.

⁷ Ba tinteeŋ nɛ jaŋ faasa pɩŋ hoi tinteye-la sɩ pɩŋ hoi lɛ tʋɔŋ, dɩ ba tabalaa ma pɩŋ jikpeeniŋ.

⁸ Dɩ mɩ nɛ joŋ nyiniŋ hɛ Ijipiti tinteeŋ lɛ, a kpʋ nɩalɩŋ kala sɩɩ pɛ ʋ lɛ, ŋɩɩ nɛ ba jaŋ jɩŋ arɩ mɩ nɛ ba TƖƖNA.

⁹ Tapʋlɩɩ-la mɩ sɩ jaŋ chei Ijipiti tɩŋŋaa, mɩ jaŋ tɩŋ nɩaa dɩ ba jʋʋ lɩɩŋ-daborusuŋ a mʋ fugisi Kus tɩŋŋaa, ba sɩ ta jɩa ŋɩɩ. Fawʋllʋŋ jaŋ kɛmba Ijipiti tapʋl cheyiŋ. Tapʋlɩɩ-la sɛnɛ ka kɔ nɛ.”

¹⁰ La TƖƖNA Wɩɩjarɩbakɔ bɩra sɩ, “Mɩ jaŋ to Babɩlɔŋ kuoro Nebukadineza lɛ a leŋ dɩ Ijipiti tɩŋŋaa laalɩyuori daŋ-la kala dɛrɛ.

¹¹ Ʋ dɩ ʋ laalɩyuoro-la sɩ faasa bɔŋ tinteyee kala tʋɔŋ jaŋ kʋ chei tintee-la. Ba jaŋ kʋ yuo Ijipiti tɩŋŋaa arɩ tokobiee, a kpʋ nɩaa su tintee-la kala.

¹² Mɩ jaŋ leŋ dɩ Naayɩl fuo-la lɩɩŋ hʋ, aŋ joŋ Ijipiti tɩŋŋaa hɛ nɩbɔŋŋɔɔ nɩsɩŋ lɛ. Tintee-wogusuŋ nɩaa jaŋ chei tintee-la. Mɩ-na ma TƖƖNA nɛ bʋla.”

¹³ La TƖƖNA Wɩɩjarɩbakɔ bɩra sɩ, “Mɩ jaŋ chei ba tɔŋŋɔɔ a leŋ dɩ vesiŋ sɩ hɛ taŋ-la ba sɩɩ yɩrɛ Memfis lɛ wɩaa dɛrɛ. Nʋʋkala jaŋ tuo sɩ jaŋ beŋ Ijipiti tinteeŋ, mɩ jaŋ leŋ dɩ fawʋllʋŋ kɛŋ nɩalɩŋ kala sɩ hɛ tintee-la lɛ.

¹⁴ Mɩ jaŋ leŋ dɩ Ijipiti tinteeŋ wɩɩpɔsʋŋ nadiiŋ dɩɩrɩŋ kala pɩŋ hoi, aŋ joŋ nyiniŋ hɛ tabal-la ba sɩɩ yɩrɛ Zʋaŋ sɩ hɛ wɩɩpɔsʋŋ nagʋa dɩɩrɩŋ, aŋ dɔgɩsɛ tabal-la ba sɩɩ yɩrɛ Tɛbɛs tɩŋŋaa ma woruŋ.

¹⁵ Mɩ jaŋ faasa na baanɩŋ taŋ-la ba sɩɩ yɩrɛ Pɛlʋsɩyʋm lɛ, Ijipiti tɩŋŋaa dɩ-duoŋ, aŋ chei Tɛbɛs tɩŋŋaa nɩ-daŋ-la kala.

¹⁶ Mɩ jaŋ leŋ dɩ nyiniŋ dii Ijipiti, dɩ Pɛlʋsɩyʋm nɩaa na hɛɛŋ woruŋ. Mɩ jaŋ ŋmoo Tɛbɛs lo. Memfis nɩaa ma jaŋ kɛŋ tʋɔ-cheeŋ bʋa na-kala.

¹⁷ Bapʋɔsɩa-la kala sɩ hɛ tasɩ-la ba sɩɩ yɩrɛ Heliopolis arɩ Bʋbasɩtɩs jaŋ sʋʋ laalɩŋ lɛ, ka dɩ ba kɛsɛ nɩkaana-la kaa mʋ yoŋ-baga.

¹⁸ Birimiŋ jaŋ hɛ Tapanhɛs lɛ dɩ mɩ nɛ chei Ijipiti doluŋ, a leŋ dɩ ba babii-ballɩŋ dɛrɛ. Duoŋ-bɩlɩmbaanaa jaŋ kʋ tɔ ʋ kala, dɩ ba kɛsɛ ba nɩaa ma kaa mʋ dɩ ba ŋaa yosi.

¹⁹ Dɩ mɩ nɛ dɔgɩsɛ Ijipiti tɩŋŋaa, ba jaŋ jɩŋ arɩ mɩ nɛ ba TƖƖNA.”

²⁰ La fa sɩ hɛ yoŋ-baga lɛ jɩ-fii arɩ kʋbala tʋɔŋ chɛŋ-bumbuŋ tapʋl-pɛɩ chɛɛŋ, La TƖƖNA bʋl wɩaa pɩmɛ,

²¹ ʋ sɩ, “Nuhuobiiŋ, mɩ bori Ijipiti tinteeŋ kuoro nɩsɩŋ nɛ. Nʋʋkala bɩ ʋ nɩsɩ-la vɔbɔ koo a joŋ na-boruŋ kʋa laasɛ sɩ jaŋ leŋ dɩ ʋ fɩɛlɛ, a bɩra kɛŋ doluŋ dɩ ʋ wuo kaa kori tokobiiŋ.

²² Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ chɩŋ Ijipiti tinteeŋ kuoro lɛ nɛ. Mɩ jaŋ bori ʋ nɩsaa, ʋ na-zɔŋ-la arɩ ʋ na-borii-la kala, dɩ tokobii-la lɩɩ ʋ nɩsɩŋ lɛ foro tel.

²³ Mɩ jaŋ kɛŋ Ijipiti tɩŋŋaa pɩsa hɛ tintee-wogusuŋ lɛ.

²⁴ Mɩ jaŋ leŋ dɩ Babɩlɔŋ kuoro nɩsɩŋ kɛŋ doluŋ, dɩ mɩ joŋ mɩ tokobiiŋ hɛ ʋ nɩsɩŋ lɛ. Ama mɩ jaŋ bori Ijipiti tinteeŋ kuoro nɩsaa, dɩ ʋ pɩna huhuuni Babɩlɔŋ kuoro sɩpaaŋ, a nagɛ nɩa sɩ bolimo a chɩchɛ dɩ ʋ sʋʋ.

²⁵ Mɩ jaŋ leŋ dɩ Babɩlɔŋ kuoro nɩsaa kɛŋ doluŋ, ka dɩ Ijipiti kuoro nɩsaa ŋaa gbɛlɛɛ. Mɩ jaŋ joŋ mɩ tokobiiŋ a hɛ Babɩlɔŋ kuoro nɩsɩŋ lɛ dɩ ʋ kaa je Ijipiti tinteeŋ lɛ. Ŋɩɩ nɛ ba jaŋ jɩŋ arɩ mɩ nɛ ba TƖƖNA.

²⁶ Mɩ jaŋ kɛŋ Ijipiti tɩŋŋaa pɩsa hɛ tintee-wogusuŋ lɛ. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”