ƐZƖKƖƐL 3 - WƖA TENIŊ

¹ Ŋɩɩ nɛ La TƖƖNA fa bʋla pɩmɛ, “Nuhuobiiŋ, laa teniŋ deeŋ chaŋ, aŋ mʋ bʋl mɩ wɩaa pɩ Iziral tɩŋŋaa.”

² Ŋɩɩ nɛ mɩ kɛŋ mɩ niiŋ suri, ʋ joŋ teŋ-la hɛ mɩ chaŋ.

³ Ʋ bʋla pɩmɛ, “Nuhuobiiŋ, chaŋ teniŋ deeŋ mɩ sɩ joŋo pɩŋ a vɔgɛ.” Ŋɩɩ nɛ mɩ chaŋ teŋ-la ʋ sɩŋ woruŋ a nagɛ tʋʋŋ.

⁴ Ŋɩɩ nɛ ʋ bʋla pɩmɛ, “Nuhuobiiŋ, mʋ Iziral tɩŋŋaa teeŋ a bʋl mɩ wɩaa a pɩba.

⁵ Mɩ bɩŋ tɩma dɩ ŋ mʋ nɩa yikoro sɩ kpere koo a hɛɩ teeŋ, Iziral tɩŋŋaa teeŋ nɛ mɩ tɩmɩŋ.

⁶ Mɩ bɩŋ tɩma tintee-bal nɩaa yikoro sɩ kpere koo a hɛɩ teeŋ, nɩalɩŋ wʋbʋlʋŋ ŋ sɩ bɩ nɩɩ. Dɩ mɩ nɛ fa paala tɩmɩŋ ba teeŋ ma, ba jaŋ jegile nɩɩ ŋ teeŋ.

⁷ Ama Iziral tɩŋŋaa bɩ jaŋ jegile nɩɩ ŋ teeŋ, bɛɛ wɩaa ba bɩ chɛ dɩ ba jegile nɩɩ mɩ teeŋ. Iziral tɩŋŋaa kala ŋaa nyu-duo tɩmma arɩ tʋɔ-dol tɩmma nɛ.

⁸ Ama, mɩ jaŋ leŋ dɩ ŋ ma kɛŋ tʋɔ-doluŋ arɩ nyuduoŋ a nagɛba.

⁹ Mɩ jaŋ leŋ dɩ ŋ nyuŋ dol a nagɛ tabɩɩŋ, a paala dol a kɩɩ chʋrʋbʋɩŋ. Sɩ́ ba fá, a sɩ́ leŋe dɩ ŋ bɔyɛ joŋ ba lɛ, arɩ ba sɩ ŋaa nɩa sɩ vɩa mɩ niiŋ ma.”

¹⁰ Ŋɩɩ nɛ ʋ bʋla pɩmɛ, “Nuhuobiiŋ, jegili woruŋ, aŋ joŋ wɩalɩŋ kala mɩ sɩ bʋlaa pɩŋ a hɛ ŋ nyuŋ lɛ.

¹¹ Lɛɛlɛ mʋ ŋ naambiiri-la sɩ hɛ yoŋ-baga lɛ teeŋ a bʋl wɩalɩŋ mɩ-na ba TƖƖNA Wɩɩjarɩbakɔ sɩ bʋla a pɩba. Bʋla pɩba, dɩ ba jegile nɩɩ koo ba bɩ jegile nɩɩ.”

¹² Ŋɩɩ nɛ Wɩa Dɩma jommi je, ka mɩ nɩɩ dɔmɔ kʋbala sɩ yʋga mɩ harɩŋ yikoro bʋl, má dɛnnɛ La TƖƖNA yɩrɩ-balɩŋ ʋ dɩjʋʋlʋŋ.

¹³ Dɔmɔ-la fa ŋaa kɩalɩŋ sɩ weye kɩŋkɛnsɩŋ sɩɩ tɩɩgɛ dɔŋɔ dɔmɔ nɛ, gɩrɩŋgɩrɩmba-la ma sɩ hɛ ba sɛsɩŋ dʋdɔŋ. Dɔmɔ-la fa yʋga nɛ woruŋ.

¹⁴ Wɩa Dɩma-la jommi je a kaa viiri, ka Wɩa doluŋ chaasa hɛ mɩ lɛ, mɩ tʋɔŋ chei, mɩ baanɩŋ sii.

¹⁵ Ŋɩɩ nɛ mɩ kɔ nɩalɩŋ sɩ hɛ yoŋ-baga lɛ teeŋ, lee-la ba sɩɩ yɩrɛ Tɛl Abib, a kpagɛ Keba fuo-la. Mɩ kʋ hɛ ba teeŋ tapʋlaa balɩpɛ. Wɩɩ-la sɩ ŋaa mɩ lɛ paala kperimi.

Ɛzɩkɩɛl nɛ jaŋ pʋpɔ Iziral tɩŋŋaa

¹⁶ Tapʋlaa balɩpɛ-la chɛ-dɛrɩŋ, La TƖƖNA bʋl wɩaa pɩmɛ:

¹⁷ “Nuhuobiiŋ, mɩ leŋe ŋ nɛ ŋaa nɩɩ-la sɩ pɔ leriŋ a bibeŋ Iziral tɩŋŋaa, ŋɩɩ wɩaa jegile nɩɩ wɩɩ-la mɩ sɩɩ bʋl aŋ mʋ kpʋrɩsɛ ba dɩgɩlaa.

¹⁸ Dɩ mɩ nɛ bʋla pɩ nɩbɔmʋŋ, ‘Ŋ jaŋ sʋʋ,’ ka dɩ ŋ vɩa dɩ ŋ kpʋrɩsɛ ʋ dɩgɩlaa dɩ ʋ leŋ wʋbɔŋŋɔɔ ŋaanɩŋ a laa ʋ mɩɩsɩŋ, ʋ jaŋ sʋʋ a tɩŋ ʋ wʋbɔmɔ-la wɩaa, dɩ ʋ nɛ saa sʋba, mɩ jaŋ tɩŋ ʋ sʋʋŋ wɩaa a kɛŋ ŋ baŋŋaa lɛ.

¹⁹ Ama dɩ ŋ nɛ kpʋrɩsɛ nɩbɔŋ-la dɩgɩlaa ka dɩ ʋ vɩa dɩ ʋ bɩrɩma lɩɩ ʋ wʋbɔmɔ-la lɛ, ʋ jaŋ sʋʋ, ama ŋ-na laa ŋ tɩtɩa nɛ.

²⁰ Dɩ tʋɔpʋl tɩɩna nɛ suomo ŋɩŋaa wʋbɔŋŋɔɔ, dɩ mɩ joŋ wɩaa kɛrɛ ʋ wombiiŋ, dɩ ŋ nɛ bɩ ʋ dɩgɩlaa kpʋrɩsa dɩ ʋ bɩrɩma lɩɩ, ʋ jaŋ sʋʋ. Ʋ jaŋ sʋʋ a tɩŋ ʋ wʋbɔmɔ-la wɩaa, mɩ bɩ jaŋ liisi ʋ wʋzɔmɔ-la ʋ sɩ ŋaa wɩaa. Dɩ ʋ nɛ saa sʋba, mɩ jaŋ tɩŋ ʋ sʋʋŋ wɩaa a kɛŋ ŋ baŋŋaa lɛ.

²¹ Ama dɩ ŋ nɛ kpʋrɩsɛ tʋɔpʋl tɩɩna-la dɩgɩlaa dɩ ʋ sɩ́ wʋbɔŋŋɔɔ ŋaa, ʋ nɩɩ a bɩ wʋbɔŋŋɔɔ ŋaa, ʋ jaŋ kɛŋ mɩɩsɩŋ, ŋ ma laa ŋ tɩtɩa nɛ ŋɩɩ.”

²² La TƖƖNA doluŋ fa hɛ mɩ lɛ nɛ lee-la, ʋ bʋla pɩmɛ, “Sii tuu fuonaaŋ, mɩ jaŋ bʋl wɩaa pɩŋ nɩmɛ.”

²³ Ŋɩɩ nɛ mɩ sii a tuu fuonaa-la, nɩmɛ nɛ mɩ na La TƖƖNA tʋla arɩ mɩ fa sɩ laa sɩpaaŋ naʋ ŋɩɩ Keba fuo-la leriŋ, ŋɩɩ nɛ mɩ tuu tele chu.

²⁴ Wɩa Dɩma-la kʋ jʋʋmɛ a kɛmmɛ chʋʋla kɩɩ mɩ naasɩŋ nyuŋ. Ŋɩɩ nɛ ʋ bʋla pɩmɛ, “Mʋ a tɔ ŋ tɩtɩa hɛ ŋ dɩa lɛ.

²⁵ Ama ŋ-na nuhuobiiŋ, ba jaŋ vɔbʋŋ arɩ ŋmɛsɩŋ a bil dɩ ŋ sɩ́ wuo lɩɩ nɩaa tʋɔŋ.

²⁶ Mɩ jaŋ leŋ dɩ ŋ nandelimiŋ jɩla mɛrɛ ŋ tilimiŋ lɛ, dɩ ŋ sɩ́ wuo kpʋrɩsɛ ba dɩgɩlaa, bɛɛ wɩaa ba ŋaa nɩa sɩ vɩa mɩ niiŋ nɛ.

²⁷ Ama dɩ bʋa dɔŋ nɛ kʋ yi, mɩ jaŋ bʋl wɩaa pɩŋ, a bɩra suri ŋ niiŋ dɩ ŋ wuo bʋbʋl wɩaa, a bʋl wɩalɩŋ mɩ-na ba TƖƖNA Wɩɩjarɩbakɔ sɩ bʋla a pɩba. Nɩalɩŋ dɔnsʋŋ jaŋ jegile nɩɩ, ama dɔnsʋŋ ma bɩ jaŋ jegile nɩɩ, bɛɛ wɩaa ba ŋaa nɩa sɩ vɩa mɩ niiŋ nɛ.”