ƐZƖKƖƐL 20 - WƖA TENIŊ

Iziral tɩŋŋaa vɩa Wɩa niiŋ

¹ La fa sɩ hɛ yoŋ-baga lɛ jɩsɩŋ balɩpɛ, chɛŋ-nɔŋ tʋɔŋ tapʋl-fii chɛɛŋ, Iziral tɩŋŋaa sɩpaalaaraa dɔnsʋŋ sii kɔ mɩ teeŋ dɩ ba pɩɛsɛ La TƖƖNA na wɩɩ-la ʋ sɩɩ chɛ. Ŋɩɩ nɛ ba kʋ hɔŋ mɩ sɩpaaŋ.

² Ŋɩɩ nɛ La TƖƖNA bʋl wɩaa pɩmɛ, ʋ sɩ:

³ “Nuhuobiiŋ, bʋla pɩ Iziral sɩpaalaara-la, ‘Wɩɩ-la mɩ-na ma TƖƖNA Wɩɩjarɩbakɔ sɩ pɩɛsa nɛ ŋ-la: Ma kɔ dɩ ma pɩɛsɛmɛ a na wɩaa nɛɛ? Mɩ-na ma TƖƖNA Wɩɩjarɩbakɔ ŋmɩɛsa, mɩ bɩ jaŋ leŋ dɩ ma pɩɛsɛmɛ na wɩɩkala.’

⁴ Nuhuobiiŋ, ŋ jaŋ diiba sarɩyaa? Ŋɩɩ-na liisiba a mʋ tɩgɛ wʋkɩsɩa-la ba naabalɩmaba sɩ ŋaa lɛ.

⁵ Bʋla pɩba: Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Tapʋlɩɩ-la mɩ sɩ lɩɩsɛ ba-na Iziral tɩŋŋaa, mɩ fa chaasa ŋmɩɛsa pɩ ba-na Jekɔb doho nɩaa nɛ aŋ kɛŋ mɩ tɩtɩa dagɛba Ijipiti tinteeŋ lɛ. Mɩ fa ŋmɩɛsa pɩba a bʋl, ‘Mɩ nɛ ma TƖƖNA Wɩa.’

⁶ Tapʋlɩɩ-la mɩ ŋmɩɛsa pɩba arɩ mɩ jaŋ kɛmba lɩɩ Ijipiti tinteeŋ lɛ a kaa kɔ tintee-la mɩ sɩ chɛ bil ba lɛ, tintee-la sɩ sɩma a kɛŋ kɩaa woruŋ. Ʋ nɛ zɔmɔ kɩɩ tintee kala.”

⁷ Mɩ fa bɩra bʋla pɩba, “Má kʋŋkala joŋ tɔŋŋɔɔ sɩ ŋaa disiŋ kɩa ma sɩ cho ta, má sɩ́ Ijipiti tɩŋŋaa tɔŋŋɔɔ to a ŋaa disiniŋ hɛ ma tɩtɩa lɛ. Mɩ nɛ ma TƖƖNA Wɩa.

⁸ Ama ba vɩa mɩ niiŋ nɛ a bɩ jegile nɩɩ mɩ teeŋ. Ba bɩ tɔmɔ-la sɩ ŋaa disiŋ kɩa ka ba choba joŋo ta, ba bɩra bɩ Ijipiti tɩŋŋaa tɔŋŋɔɔ ma leŋe. Ŋɩɩ nɛ mɩ sɩ mɩ jaŋ na baanɩŋ ba nyuŋ a ŋaa baaŋ wɩaa ba lɛ Ijipiti tintee-la lɛ.

⁹ Ama a tɩŋ mɩ yɩrɩŋ wɩaa, mɩ fa ŋaa wɩɩ-la sɩ jaŋ leŋ dɩ mɩ yɩrɩŋ sɩ́ chei nɛ, dɩ tinteye-la nɩaa tʋɔŋ ba sɩ guolo na, nɩalɩŋ tʋɔŋ mɩ sɩ kɛŋ mɩ tɩtɩa dagɛ Iziral tɩŋŋaa aŋ kɛmba kaa lɩɩ Ijipiti tinteeŋ lɛ.

¹⁰ Ŋɩɩ wɩaa mɩ fa kɛmba kaa lɩɩ Ijipiti tinteeŋ lɛ a kɛmba kaa jʋʋ tintee-hɩlɩŋ.

¹¹ Mɩ fa joŋ mɩ wɩaa dagɛba nɛ a leŋ ba jɩŋ mɩ wombie-la mɩ sɩ bile dɩ ba tuto. Dɩ nʋʋ nɛ sɛɩba a kɛmba tɩtɩŋ, ʋ jaŋ kɛŋ mɩɩsɩŋ.

¹² Mɩ fa bɩra joŋ mɩ chɛ-wiesii-la ma pɩba nɛ dɩ ba tuto. Ʋ ŋaa magɩl a hɛ mɩ dɩ ba pɛgɛ, dɩ ŋɩɩ leŋ dɩ ba jɩŋ arɩ mɩ nɛ ba TƖƖNA sɩ leŋe ba bɩ disiniŋ kɛnɛ.

¹³ Ama Iziral tɩŋŋaa fa ha vɩa mɩ niiŋ nɛ tintee-hɩlɩɩ-la lɛ. Ba fa vɩa mɩ wombie-la mɩ sɩ bile dɩ ba tuto arɩ wɩalɩŋ mɩ sɩ dagɛba nɛ, wɩalɩŋ nʋʋ sɩ jaŋ to a kɛŋ mɩɩsɩŋ. Ba fa chaasa chei mɩ chɛ-wiesii-la nɛ. Ŋɩɩ nɛ mɩ sɩ mɩ jaŋ faasa na baanɩŋ ba nyuŋ a cheiba tintee-hɩlɩŋ lɛ.

¹⁴ Ama a tɩŋ mɩ yɩrɩŋ wɩaa, mɩ fa ŋaa wɩɩ-la sɩ jaŋ leŋ dɩ mɩ yɩrɩŋ sɩ́ chei nɛ tinteye-la nɩaa sɩpaaŋ, nɩalɩŋ sɩɩ beŋ ka mɩ kɛŋ Iziral tɩŋŋaa kaa lɩɩ Ijipiti tinteeŋ lɛ.

¹⁵ Mɩ fa bɩra ŋmɩɛsa pɩba tintee-hɩlɩŋ lɛ, arɩ mɩ bɩ jaŋ kɛmba kaa jʋʋ tintee-la mɩ fa sɩ sɩ mɩ jaŋ joŋo pɩba, tintee-la sɩ sɩma a kɛŋ kɩaa woruŋ. Ʋ nɛ zɔmɔ kɩɩ tintee kala.

¹⁶ Mɩ fa bʋl ŋɩɩ pɩba a tɩŋ ba sɩ vɩa mɩ wombie-la mɩ sɩ bile dɩ ba tuto arɩ wɩalɩŋ mɩ sɩ dagɛba nɛ. Ba fa chei mɩ chɛ-wiesii-la nɛ aŋ tuto ba tɔŋŋɔɔ.

¹⁷ Ama mɩ fa ha fá ba nenige nɛ a bɩ ba cheye koo a kpʋba tintee-hɩlɩɩ-la lɛ.

¹⁸ Tintee-hɩlɩɩ-la lɛ, mɩ fa bʋla pɩ ba biiriŋ, ‘Má pɔ ma sɩ́ ma nyɩmmaba wʋdagaa to koo a to ba wombiee koo a to ba tɔmɔ-la a ŋaa disiniŋ hɛ ma tɩtɩa lɛ.

¹⁹ Mɩ nɛ ma TƖƖNA Wɩa, má to mɩ niiŋ wɩalɩŋ mɩ sɩ dagɛma, a fɩɛlɛ ma sɩaa to mɩ wombie-la mɩ sɩ bile dɩ ma tuto.

²⁰ Má to mɩ chɛ-wiesii-la, ʋ ŋaa tapʋl-zɔŋ nɛ, dɩ ŋɩɩ ŋaa magɩl a hɛ mɩ dɩ ma pɛgɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA Wɩa.

²¹ Ama biiri-la ma fa vɩa mɩ niiŋ nɛ: Ba bɩ mɩ wombiee arɩ mɩ niiŋ wɩalɩŋ dɔnsʋŋ mɩ fa sɩ dagɛba to, wɩalɩŋ nʋʋ sɩ jaŋ to a kɛŋ mɩɩsɩŋ. Ba fa chaasa chei mɩ chɛ-wiesii-la nɛ. Ŋɩɩ nɛ mɩ fa sɩ mɩ jaŋ faasa na baanɩŋ ba nyuŋ a cheiba tintee-hɩlɩŋ lɛ.

²² Ama a tɩŋ mɩ yɩrɩŋ wɩaa, mɩ fa kɛŋ mɩ tɩtɩa nɛ dɩ mɩ sɩ́ wɩɩ ŋaa sɩ jaŋ leŋ dɩ mɩ yɩrɩŋ chei tinteye-la nɩaa sɩpaaŋ, nɩalɩŋ fa sɩɩ beŋ ka mɩ kɛŋ Iziral tɩŋŋaa kaa lɩɩ Ijipiti tinteeŋ lɛ.

²³ Mɩ fa chaasa ŋmɩɛsa pɩ Iziral tɩŋŋaa nɛ tintee-hɩlɩɩ-la lɛ, arɩ mɩ jaŋ kɛmba kaa pɩsa hɛ tintee-wogusuŋ lɛ,

²⁴ bɛɛ wɩaa ba bɩ mɩ wombie-la mɩ sɩ bile to. Ba fa vɩa wɩalɩŋ mɩ sɩ daga nɛ aŋ chei mɩ chɛ-wiesii-la, a kpʋkpaarɛ tɔmɔ-la tɩtɩa ba naabalɩmaba fa sɩɩ kpaarʋ.

²⁵ Ŋɩɩ nɛ mɩ fa jomba hɛ wɩalɩŋ sɩ bɩ zɔŋ arɩ wombie-la ba sɩ jaŋ to a sɩ́ mɩɩsɩŋ kɛŋ lɛ.

²⁶ Mɩ leŋe ba kɛsɛ ba hambolibii bumbumba fa sɩ maga dɩ ba joŋo pɩmɛ nɛ a kpʋ nyɩga pɩ vesiŋ a chei ba tɩtɩa. Mɩ fa ŋaa ŋɩɩ dɩ mɩ joŋ fawʋllʋŋ kɩŋkɛŋ nɛ hɛ ba lɛ dɩ ba jɩŋ arɩ mɩ nɛ ba TƖƖNA.’

²⁷ Ŋɩɩ wɩaa, nuhuobiiŋ, bʋla pɩ Iziral tɩŋŋaa, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Wombii-la dɔŋɔ ba naabalɩmaba fa sɩ to a tʋʋsɛ mɩ joŋŋoo nɛ ba sɩ vɩamɛ.

²⁸ Bʋa-la lɛ mɩ sɩ kɛmba kʋ jʋʋ tintee-la mɩ fa sɩ hɛ niiŋ arɩ mɩ jaŋ joŋo pɩba, dɩ ba nɛ na dundolo kala koo tɩɩ-lugu kala nɩmɛ, ba yie kpʋkpaarɛ vʋɩyaa nɩmɛ nɛ. Ba yie joŋ kɩaa pɩpɩba, a nyɩnyɩgɛ kʋsʋɔrʋsʋŋ sʋɔra sɩ sɩma a ŋaa kʋnyʋalaa pɩpɩba a ŋaa mɩ baanɩŋ sii.

²⁹ Ŋɩɩ nɛ mɩ pɩɛsɛba: Vesiŋ dɩ-kpaarɩ-la ŋaa bɛɛ kʋŋ nɛ ma mʋmʋ nɩmɛ?’ (Lee-la yɩrɩŋ nɛ Bama, ba yɩrɩŋ nɛ ha ŋɩɩ arɩ jɩnɩŋ kala, ʋ bʋbʋɔŋ nɛ ‘vesiŋ dɩ-kpaarɩŋ’.)

La TƖƖNA jaŋ dii Iziral tɩŋŋaa sarɩya aŋ kɛmba mɩɩra kɔ ba tinteeŋ

³⁰ Ŋɩɩ wɩaa, bʋla pɩ Iziral tɩŋŋaa, ‘Wɩɩ-la mɩ-na ma TƖƖNA Wɩɩjarɩbakɔ sɩ pɩɛsa nɛ ŋ-la: Ma ma jaŋ cho dɩ ma ŋaa disiniŋ hɛ ma tɩtɩa lɛ arɩ ma naabalɩmaba fa sɩ kpaarɛ ba tɔŋŋɔɔ sɩ ŋaa disiŋ kɩa a kɛŋ disiniŋ ŋɩɩ?

³¹ Dɩ ma nɛ kɛsɛ ma hambolibii bumbumba fa sɩ maga dɩ ma joŋo pɩmɛ, a kpʋ a nyɩga pɩpɩ vesiŋ, ʋ ŋɩɩ kala ŋaa disiniŋ nɛ ma ŋaa hɩhɛ ma tɩtɩa lɛ a kaa kɔ arɩ jɩnɩŋ. Iziral tɩmma, ʋ maga dɩ mɩ leŋ ma pɩɛsɛmɛ na wɩɩ nɛɛ? Mɩ-na ma TƖƖNA Wɩɩjarɩbakɔ ŋmɩɛsa, mɩ bɩ jaŋ leŋ dɩ ma pɩɛsɛmɛ na wɩɩkala.’

³² Ma sɩ, ‘La ma cho la nagɛ tinteye-la dɔnsʋŋ nɩaa nɛ, nɩalɩŋ sɩ hɛ dʋnɩa lɛ a kpʋkpaarɛ tɩɩsɩŋ arɩ tabɩaa.’ Ama wɩɩ-la ma sɩ bɩɩna bɩ jaŋ kɔ dɩ ʋ ŋaa.

³³ Mɩ-na ma TƖƖNA Wɩɩjarɩbakɔ ŋmɩɛsa: Mɩ jaŋ na baanɩŋ a bemma arɩ mɩ dol-balɩŋ.

³⁴ Mɩ jaŋ na baanɩŋ a kɛmma lɩɩ tinteye-la arɩ tinteye-la kala lɛ mɩ sɩ kɛmma pɩsa hɛ a kʋ hɛ dɔŋɔ. Mɩ jaŋ kɛmma kʋ lɩɩ arɩ mɩ dol-balɩŋ.

³⁵ Mɩ jaŋ kɛmma kɔ tintee-hɩlɩɩ-la tinteyee sɩ gollo chu, dɩ la joŋ sɩaa chaasɛ dɔŋɔ dɩ mɩ dɔgɩsɛma.

³⁶ Mɩ fa sɩ dɔgɩsɛ ma naabalɩmaba Ijipiti tintee-hɩlɩŋ lɛ ŋɩɩ, ŋɩɩ nɛ mɩ jaŋ dɔgɩsɛ ma ma. Mɩ-na ma TƖƖNA Wɩɩjarɩbakɔ nɛ bʋla.

³⁷ Mɩ jaŋ leŋ dɩ ma kʋŋkala to nii-la sɩ hɛ mɩ dɩ ma pɛgɛ.

³⁸ Mɩ jaŋ tʋɔsɛ ma tʋɔŋ nɩalɩŋ sɩ vɩamɛ aŋ ŋaa wʋbɔŋŋɔɔ. Mɩ jaŋ kɛmba kaa lɩɩ tinteye-la ba sɩ hɔnɔ lɛ, ama mɩ bɩ jaŋ leŋ dɩ ba jʋʋ Iziral tinteeŋ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

³⁹ Ma-na Iziral tɩmma, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Má-na kʋŋkala mʋ a kpʋkpaarɛ ma tɔŋŋɔɔ. Ama mɩ bʋlaa pɩma, ʋ ŋɩɩ harɩŋ ma jaŋ to mɩ niiŋ, ma bɩra bɩ jaŋ joŋ kɩaa kpʋkpaarɛ vʋɩyaa a chei mɩ yɩrɩ-zɔŋ-la.

⁴⁰ Mɩ-na ma TƖƖNA Wɩɩjarɩbakɔ nɛ bʋla, dɩ tapʋlɩɩ-la nɛ yie, nʋʋkala sɩ hɛ Iziral lɛ jaŋ chʋɔlɛmɛ Zaayɔŋ peel-la nyuŋ, mɩ peel-la sɩ hɛ Jerusalɛm lɛ a bɩ disiniŋ kɛnɛ. Mɩ jaŋ bɩra kɛmma a yɩrɛ mɩ nɩaa. Nɩmɛ nɛ mɩ jaŋ laa ma Wɩɩsʋlʋŋ kɩaa arɩ ma Wɩɩsʋlʋŋ pʋsʋ-la kala sɩ bɩ disiniŋ kɛnɛ.

⁴¹ Dɩ mɩ nɛ kɛmma mɩɩra lɩɩ lere-la ma sɩ pɩsa hɛ lɛɛlɛ a kʋ hɛ dɔŋɔ, mɩ tʋɔŋ jaŋ tɔrɛ ma nyuŋ, arɩ mɩ tʋɔŋ sɩ tɔrɛ pʋsʋ-la ma sɩ yie kpʋ nyɩga pɩmɛ ba sʋɔra sɩŋ mɩ teeŋ ŋɩɩ. Mɩ jaŋ dagɛ arɩ mɩ bɩ disiniŋ kɛnɛ ma tʋɔŋ dɩ tinteyee nɩaa kala na.

⁴² Dɩ mɩ nɛ kɛmma mɩɩra kɔ Iziral tinteeŋ, lee-la mɩ fa sɩ chaasa ŋmɩɛsɛ arɩ mɩ jaŋ joŋo pɩ ma naabalɩmaba, ŋɩɩ nɛ ma jaŋ jɩŋ arɩ mɩ nɛ ma TƖƖNA.

⁴³ Nɩmɛ nɛ ma jaŋ liisi wɩalɩŋ kala ma fa sɩ ŋaa a joŋ disiniŋ hɛ ma tɩtɩa lɛ, dɩ ma tʋɔŋ lɩɩ ma tɩtɩa a tɩŋ wʋbɔmɔ-la kala ma sɩ ŋaa wɩaa.

⁴⁴ Ŋɩɩ nɛ ma jaŋ jɩŋ arɩ mɩ nɛ ma TƖƖNA: Dɩ mɩ nɛ tɩŋ mɩ yɩrɩŋ wɩaa a kɛmma woruŋ, a bɩ ma nɩbɔŋ wʋŋaalaa arɩ wʋbɔmɔ-la ma Iziral tɩŋŋaa sɩ ŋaa chɩmɩŋ joŋo tiŋ ma lɛ. Mɩ-na ma TƖƖNA Wɩɩjarɩbakɔ nɛ bʋla.”

Wɩalɩŋ Ɛzɩkɩɛl sɩ bʋla Wɩa doluŋ lɛ a hɛ nɩalɩŋ sɩ hɛ wɩɩpɔsʋŋ nadiiŋ dɩɩrɩŋ lɛ

⁴⁵ La TƖƖNA fa bʋl wɩaa pɩmɛ, ʋ sɩ:

⁴⁶ “Nuhuobiiŋ, joŋ ŋ sɩaa chaasɛ wɩɩpɔsʋŋ nadiiŋ dɩɩrɩŋ, bʋl wɩaa mɩ doluŋ lɛ a hɛ wɩɩpɔsʋŋ na-dii-la lɛ, a bʋla hɛ duu-la sɩ hɛ wɩɩpɔsʋŋ nadiiŋ dɩɩrɩŋ tinteeŋ lɛ.

⁴⁷ Bʋla pɩ wɩɩpɔsʋŋ nadiiŋ duu-la, ‘Jegile nɩɩ wɩɩ-la mɩ-na ma TƖƖNA sɩ bʋla. Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩɩ chɛ dɩ mɩ nyɩgɩŋ nɛ. Nyiniŋ jaŋ dii ŋ tɩɩsɩŋ kala, tɩɩ-laarɩŋ arɩ tɩɩ-hɩlaa. Kʋŋkala bɩ jaŋ wuo dɩsɛ nyiŋgel-la. Ʋ jaŋ lieri kʋŋ na-kala sɩ hɛ wɩɩpɔsʋŋ nadiiŋ a kaa mʋ wɩɩpɔsʋŋ nagʋa.

⁴⁸ Nʋʋkala jaŋ na dɩ mɩ-na ma TƖƖNA nɛ nyɩga, nʋʋ bɩ jaŋ wuo dɩsʋ.’ ”

⁴⁹ Ŋɩɩ nɛ mɩ bʋl, “Ou, La TƖƖNA Wɩɩjarɩbakɔ, baa bʋl mɩ wɩaa nɛ, ba sɩ, ‘Namagaba dee ʋ ta mɩmagɛɛ?’ ”