ƐZƖKƖƐL 10 - WƖA TENIŊ

La TƖƖNA tʋla lɩɩ ʋ dɩɩ-balɩŋ lɛ

¹ Ŋɩɩ nɛ mɩ beŋ a na kʋŋ kʋbala sɩ nagɛ kuoru kpasa ba sɩ kɛŋ tabɩɩ kʋbala sɩ nagɛ diibelimbine aŋ tʋtʋl ŋaa, dɩ ʋ chɩŋ kʋ-la sɩ nagɛ wɩa-nyuŋ a chugili kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ nyuŋ, ma nyuŋ.

² La TƖƖNA bʋla pɩ baal-la sɩ laalɛ gɛrɩpɛ fʋfʋlʋŋ gɛrɩŋ, “Jʋʋ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ bʋbʋɔŋ gɩrɩŋgɩrɩmba-la pɛgɛ, a chaanɛ nyiŋ-halaa su ŋ nɩsaa. Joŋ nyiŋ-hala-la a yuo jaasɛ taŋ-la kala lɛ.” Ŋɩɩ nɛ mɩ bibenu ka ʋ jʋʋ.

³ Kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ fa chɩŋ Wɩa dɩɩ-bal-la wɩɩpɔsʋŋ nadiiŋ dɩɩrɩŋ nɛ ka baal-la jʋʋ. Ŋɩɩ nɛ duoŋ-bɩlɩmbaanɩŋ kʋ tɔ tʋɔŋ kaala-la kala.

⁴ Ŋɩɩ nɛ La TƖƖNA tʋla sii kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ nyuŋ a mʋ chɩŋ La TƖƖNA dɩɩ-bal-la boiŋ nii-jʋʋlʋŋ lɛ. Duoŋ-bɩlɩmbaaŋ-la tuu su Wɩa dɩɩ-bal-la, La TƖƖNA tʋla su kaala-la kala.

⁵ Kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ, ba kɩŋkɛnsɩ-la faa dɔŋ nɛ a nagɛ Wɩɩjarɩbakɔ yikoro, dɩ ŋ nɛ paala hɛ Wɩa dɩɩ-bal-la harɩŋ kaala-la tʋɔŋ ma, ŋ haa nɩɩ ba dɔmɔ nɛ.

⁶ La TƖƖNA sɩ bʋla pɩ baal-la sɩ laalɛ gɛrɩpɛ fʋfʋlʋŋ gɛrɩŋ dɩ ʋ jʋʋ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ bʋbʋɔŋ a chaanɛ nyiniŋ gɩrɩŋgɩrɩmba-la sɛmɛ, baal-la jʋʋ a chɩŋ gɩrɩŋgɩrɩŋ sɛmɛ.

⁷ Ŋɩɩ nɛ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ dɔŋɔ joŋ ʋ nɩsɩŋ hɛ nyiŋ-la sɩ hɛ ba pɛgɛ tʋɔŋ a chaanɛ nyiŋ-halaa hɛ baal-la sɩ laalɛ gɛrɩpɛ fʋfʋlʋŋ gɛrɩŋ nɩsaa lɛ. Baal-la laa nyiŋ-hala-la a kaa lɩɩ.

⁸ Kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ bʋbʋɔŋ, nɩsaa nɛ fa hɛ nɩmɛ a nagɛ nuhuobiine nɩsaa.

⁹ Mɩ beŋ a na gɩrɩŋgɩrɩmba banɛsɛ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ kʋbala kala sɛmɛ lɛ. Gɩrɩŋgɩrɩmba-la faa tʋl nɛ woruŋ a nagɛ tabɩɩ-tʋlɩɩ kʋbala ba sɩɩ yɩrɛ kirisola.

¹⁰ Gɩrɩŋgɩrɩmba-la banɛsɛ kala fa nagɛ dɔŋɔ nɛ, a gɩrɩgɛ dɔŋɔ lɛ.

¹¹ Dɩ ba nɩɩ vɛŋ, ba jaŋ wuo mʋ sɛmɛ na-kala. Lee kala kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ sɩɩ mʋ, gɩrɩŋgɩrɩmba-la ma yie chaasa nɩmɛ nɛ. Lee kala ba sɩɩ chɛ ba mʋ, ba yie mʋmʋ nɛ, ba bɩ bɩrɩmɛ.

¹² Ba yaraa kala, ba harɩŋ, ba nɩsaa, ba kɩŋkɛnsɩŋ arɩ gɩrɩŋgɩrɩmba-la kala fa kɛŋ sɩaa nɛ.

¹³ Mɩ nɩɩ yikoro sɩ yɩrɛ gɩrɩŋgɩrɩmba-la: “Gɩrɩŋgɩrɩmba sɩɩ villu.”

¹⁴ Kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ fa kɛŋ sɩaa nɛ ba sɛsɩŋ banɛsɛ kala lɛ. Sɛmɛ dɔŋɔ sɩaa nagɛ nɛ-bele sɩaa nɛ, sɛmɛ dɔŋɔ sɩaa nagɛ nuhuobiine sɩaa, sɛmɛ dɔŋɔ ma sɩaa nagɛ naachigiŋ sɩaa, ka sɛmɛ dɔŋɔ ma sɩaa nagɛ kachuuŋ sɩaa.

¹⁵ Kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ sii jɩl wɩa-nyuŋ, kɩalɩŋ sɩ weye mɩ fa sɩ na Keba fuo-la sɛmɛ nɛ ŋɩɩ.

¹⁶ Dɩ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ nɛ vɛnɛ, gɩrɩŋgɩrɩmba-la sɩ hɛ ba sɛsɩŋ lɛ ma yie vɛŋ nɛ. Dɩ kɩalɩŋ nɛ kɛŋ ba kɩŋkɛnsɩŋ jɛrɛ dɩ ba sii jɩl wɩa-nyuŋ, gɩrɩŋgɩrɩmba-la ha yie mɛrɛ ba sɛsɩŋ lɛ nɛ.

¹⁷ Dɩ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ nɛ chɩna, gɩrɩŋgɩrɩmba-la ma yie chɩŋ nɛ, dɩ ba nɛ sie, ba ma yie sii to nɛ, bɛɛ wɩaa kɩalɩŋ sɩ weye dɩma fa hɛ gɩrɩŋgɩrɩmba-la lɛ nɛ.

¹⁸ La TƖƖNA tʋla-la bɩra sii ʋ dɩɩ-bal-la boiŋ nii-jʋʋlʋŋ lɛ a kʋ chuguli kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ nyuŋ.

¹⁹ Mɩ bibeŋ, ka kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ kɛŋ ba kɩŋkɛnsɩŋ jɛrɛ a sii jɩl wɩa-nyuŋ, gɩrɩŋgɩrɩmba-la ma tuto. Ba mʋ chɩŋ La TƖƖNA dɩɩ-bal-la wɩɩpɔsʋŋ dɩɩrɩŋ boi-baalɩŋ lɛ, Iziral tɩŋŋaa Wɩa tʋla ma mʋ chuguli ba nyuŋ.

²⁰ Kɩaa deemba sɩ weye nɛ mɩ fa na Iziral tɩŋŋaa Wɩa bʋbʋɔŋ ŋɩɩ, Keba fuo-la sɛmɛ. Ŋɩɩ nɛ mɩ jɩŋ arɩ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ nɛ ŋɩɩ.

²¹ Ba kʋŋkala kɛŋ sɩaa nɛ ba sɛsɩŋ banɛsɛ la lɛ, kɩŋkɛnsɩŋ ma banɛsɛ, ka kɩaa hɛ kɩŋkɛnsɩ-la bʋbʋɔŋ a nagɛ nuhuobiine nɩsaa.

²² Ba sɩaa fa nagɛ kɩalɩŋ mɩ sɩ na Keba fuo-la sɛmɛ nɛ. Ba faa vɛŋ nɛ tegi tegi.