MOSIS KƐŊ IZIRAL TƖŊŊAA LƖƖ 9 - WƖA TENIŊ

Pʋsʋŋ sʋba Ijipiti tinteeŋ lɛ

¹ Ŋɩɩ nɛ La TƖƖNA bʋla pɩ Mosis, “Mʋ Ijipiti tinteeŋ kuoro teeŋ a bʋla pʋ, ‘Wɩɩ-la mɩ-na ma TƖƖNA Iziral tɩŋŋaa Wɩa sɩ bʋla nɛ ŋ-la: Leŋ dɩ mɩ nɩaa mʋ a chʋɔlɛmɛ.

² Dɩ ŋ nɛ vɩa aŋ ha kɛmba kɩɩ,

³ mɩ-na ma TƖƖNA jaŋ joŋ nyanyalɩŋ hɛ ma pʋsʋ-la kala ma sɩɩ dɩɛsʋ lɛ: ma janɩŋ, ma kakusuŋ, ma bʋntaŋŋaba, ma nɛsɩŋ, ma piesee arɩ ma bʋʋnaa kala.

⁴ Ama mɩ-na ma TƖƖNA jaŋ kɛŋ Iziral tɩŋŋaa arɩ Ijipiti tɩŋŋaa pʋsʋŋ pɔrɛ dɔŋɔ lɛ, dɩ Iziral tɩŋŋaa pʋsʋŋ sɩ́ sʋʋ.’ ”

⁵ Ŋɩɩ nɛ La TƖƖNA hɛ tapʋlɩɩ-la a bʋl, “Chie nɛ mɩ jaŋ ŋaa wɩɩŋ deeŋ tinteeŋ deeŋ lɛ.”

⁶ Taŋ sɩ pʋla, La TƖƖNA ŋaa ŋɩɩ ʋ sɩ daga. Ŋɩɩ nɛ Ijipiti tɩŋŋaa pʋsʋŋ kala sʋʋ, ama Iziral tɩŋŋaa pʋŋ-bala ma bɩ sʋba.

⁷ Ŋɩɩ nɛ Ijipiti tinteeŋ kuoro pɩɛsa nɩɩ arɩ Iziral tɩŋŋaa pʋŋ-bala ma bɩ sʋba. Ama Ijipiti tinteeŋ kuoro tʋɔŋ ha pɩrɛ, ʋ bɩ chɛ dɩ Iziral tɩŋŋaa mʋ.

Mɔpʋllʋŋ ŋmɛrɛ Ijipiti tɩŋŋaa lɛ

⁸ Ŋɩɩ nɛ La TƖƖNA bʋla pɩ Mosis arɩ Arɔŋ, “Má ŋaa tʋɔrʋŋ tabʋʋŋ lɛ nɩsɩŋ sɩɩŋ, a kaa mʋ Ijipiti tinteeŋ kuoro sɩpaaŋ, dɩ Mosis joŋo yuo wɩa-nyuŋ.

⁹ Ʋ jaŋ bɩrɩmɛ kʋŋkɔlʋŋ Ijipiti tinteeŋ kala lɛ, dɩ mɔpʋllʋŋ ŋmɛrɛ nuhuobiinee arɩ pʋsʋŋ lɛ a yɛrɛ a ŋaa naawɩɩlaa.”

¹⁰ Ŋɩɩ nɛ ba ŋaa tʋɔrʋ-la tabʋʋŋ lɛ a kaa mʋ Ijipiti tinteeŋ kuoro sɩpaaŋ. Mosis joŋo yuo wɩa-nyuŋ, mɔpʋllʋŋ ŋmɛrɛ nuhuobiinee arɩ pʋsʋŋ kala lɛ a yɛrɛ a ŋaa naawɩɩlaa.

¹¹ Ijipiti tinteeŋ chichiribe-la bɩ wuo pagɩsɛ Mosis mɔpʋllʋ-la-na lɛ, bɛɛ wɩaa mɔpʋllʋ-la ŋmɛrɛ chichiribe-la kala lɛ nɛ a nagɛ Ijipiti tɩŋŋaa kala sɩ ŋmɛrɛ ŋɩɩ.

¹² Ama La TƖƖNA leŋ Ijipiti tinteeŋ kuoro tʋɔŋ pɩrɛ, ʋ bɩ jegile nɩɩ Mosis arɩ Arɔŋ teeŋ, arɩ La TƖƖNA fa sɩ bʋl ŋɩɩ.

Duoŋ-tabɩaa tel Ijipiti tinteeŋ lɛ

¹³ Ŋɩɩ nɛ La TƖƖNA bʋla pɩ Mosis, “Sii mʋ Ijipiti tinteeŋ kuoro teeŋ chʋchʋɔ-fɩɛla a chaasa bʋla pʋ, ‘Mɩ-na Iziral tɩŋŋaa Wɩa sɩ dɩ ŋ leŋ dɩ mɩ nɩaa mʋ a chʋɔlʋ.

¹⁴ Bʋa deeŋ-na lɛ dɩ ŋ nɛ vɩa, mɩ jaŋ joŋ mɩ nyanyal bɔŋŋɔɔ kala hɛ ŋ lɛ, ŋ nɩhɩasɩŋ arɩ ŋ nɩaa kala lɛ, dɩ ma jɩŋ arɩ nʋʋkala tuo a magɛmɛ dʋnɩa kala lɛ.

¹⁵ Mɩ kɛŋ doluŋ mɩ fa sɩ jaŋ joŋ nyanyal bɔŋŋɔɔ hɛ ŋ dɩ ŋ nɩaa kala lɛ dɩ ma nyɩɩgɛ tinteeŋ kala lɛ,

¹⁶ ama mɩ lemma nɛ, dɩ mɩ dagɛ mɩ doluŋ dɩ mɩ yɩrɩŋ yɩrɛ dʋnɩa sɛmɛ na-kala.

¹⁷ Ŋ ha kɛŋ ŋ tʋɔŋ nɛ a bɩ chɛ dɩ ŋ leŋ dɩ mɩ nɩaa mʋ,

¹⁸ a tɩŋ ŋɩɩ wɩaa, chie bʋa deeŋ lɛ mɩ jaŋ leŋ dɩ duoŋ-tabɩaa faasa tel Ijipiti tinteeŋ kala lɛ, dɩ ʋ ŋaa wɩɩ Ijipiti tɩŋŋaa ha sɩ bɩ na aŋ ka.

¹⁹ Bʋla pɩ nʋʋkala dɩ ba kiri ba pʋsʋŋ arɩ kʋŋ na-kala ba sɩ kɛnɛ dɩ-jalɩŋ a hɛ dɩɩsɩŋ lɛ, bɛɛ wɩaa duoŋ-tabɩaa jaŋ yagɛ nuhuobiinee arɩ pʋsʋ-la kala sɩ hɛ dɩ-jalɩŋ dɩ ba sʋʋ.’ ”

²⁰ Ijipiti tinteeŋ kuoro nɩhɩasɩ-la dɔnsʋŋ sɩɩ fá Wɩa sɩ nɩɩ wɩɩ-la La TƖƖNA sɩ bʋla, fawʋllʋŋ kɛmba, ba kiri ba yosuŋ arɩ ba pʋsʋŋ kala lɩma lɩma ba jʋʋ dɩɩsɩŋ.

²¹ Ama nɩalɩŋ sɩ bɩ wɩɩ-la La TƖƖNA sɩ bʋla kaa tɩŋ, leŋ ba yosuŋ arɩ ba pʋsʋŋ kala dɩ-jalɩŋ.

²² Ŋɩɩ nɛ La TƖƖNA bʋla pɩ Mosis, “Kɛŋ ŋ nɩsɩŋ je wɩa-nyuŋ, dɩ duoŋ-tabɩaa tel Ijipiti tinteeŋ kala lɛ, a yagɛ nɩaa, pʋsʋŋ arɩ kʋŋ na-kala sɩ nyʋ tinteeŋ lɛ.”

²³ Mosis sɩ kɛŋ ʋ dantɩga je wɩa-nyuŋ, La TƖƖNA leŋ taŋ lɩgɩsɛ, a kpɩa, duoŋ-tabɩaa tuu Ijipiti tinteeŋ lɛ.

²⁴ Duoŋ peliŋ faasa lulu, wʋdoho deeŋ ha bɩ Ijipiti tinteeŋ lɛ ŋaa aŋ ka.

²⁵ Ijipiti tinteeŋ lɛ duoŋ-tabɩaa tele tɔ kʋŋkala nɛ, pʋsʋŋ, nuhuobiinee arɩ kʋŋkala sɩ nyʋ tinteeŋ, tɩɩsɩŋ kala yuori.

²⁶ Iziral tɩŋŋaa sɩ hɛ tintee-la lɛ ba sɩɩ yɩrɛ Goseŋ dʋndʋŋa lɛ nɛ wɩɩŋ deeŋ bɩ ŋaa.

²⁷ Ŋɩɩ nɛ Ijipiti tinteeŋ kuoro tɩma yɩrɛ Mosis arɩ Arɔŋ a bʋla pɩba, “Bʋa deeŋ lɛ la ŋaa chei La TƖƖNA nɛ, La TƖƖNA kɩaa sɩma nɛ, mɩ dɩ mɩ nɩaa nɛ bɩ woruŋ ŋaa.

²⁸ Má sʋl La TƖƖNA pɩla, duoŋ-tabɩaa arɩ duoŋ kpɩa-na-la dɔgɩsɛla yʋgɛ nɛ. Mɩ jaŋ leŋ dɩ ma mʋ, ma bɩra bɩ maga dɩ ma hɛ daha.”

²⁹ Ŋɩɩ nɛ Mosis bʋla pɩ Ijipiti tinteeŋ kuoro, “Dɩ mɩ nɛ lɩɩ tabalɩŋ deeŋ tʋɔŋ, mɩ jaŋ sʋl La TƖƖNA dɩ duoŋ kpɩana-la arɩ duoŋ-tabɩa-la leŋ. Ŋɩɩ nɛ ŋ jaŋ jɩŋ arɩ La TƖƖNA nɛ tɩɩ tinteeŋ kala.

³⁰ Ama mɩ jɩma arɩ ŋ dɩ ŋ nɩhɩasɩŋ ha bɩ La TƖƖNA Wɩa ka fá.”

³¹ Bɔɔ doho kʋbala ba sɩ kaa ŋɩŋaa gɛrɩpɛɛŋ arɩ mɩaa kala chei, bɛɛ wɩaa bʋa-la lɛ dɩ mɩa-la lʋla, tɩa-la ma fɩɩlɛ.

³² Ama duoŋ-tabɩa-la bɩ mɛmpɛba cheye, bɛɛ wɩaa ba-na fa ha bɩ waa.

³³ Mosis sɩ sii Ijipiti tinteeŋ kuoro sɩpaaŋ a lɩɩ tabal-la lɛ ʋ sʋl La TƖƖNA, ŋɩɩ nɛ duoŋ-tabɩa-la arɩ duoŋ kpɩa-na-la arɩ duoŋ-la kala leŋ.

³⁴ Ijipiti tinteeŋ kuoro sɩ na dɩ duoŋ-tabɩa-la arɩ duoŋ kpɩa-na-la arɩ duoŋ-la leŋe, ʋ bɩra ŋɩŋaa wʋbɔŋŋɔɔ. Ʋ dɩ ʋ nɩhɩasɩŋ kala bɩra kɛŋ tʋɔ-doluŋ.

³⁵ Ijipiti tinteeŋ kuoro tʋɔŋ pɩrɛ ʋ vɩa dɩ ʋ leŋ dɩ Iziral tɩŋŋaa mʋ, arɩ La TƖƖNA fa sɩ bʋl ŋɩɩ pɩ Mosis.