MOSIS KƐŊ IZIRAL TƖŊŊAA LƖƖ 8 - WƖA TENIŊ

Sɔrɔɔ su Ijipiti tinteeŋ kala

¹ Ŋɩɩ nɛ La TƖƖNA bʋla pɩ Mosis, “Mʋ Ijipiti tinteeŋ kuoro teeŋ a bʋla pʋ, ‘Leŋ dɩ mɩ nɩaa Iziral tɩŋŋaa mʋ a chʋɔlɛmɛ.

² Dɩ ŋ nɛ vɩa dɩ ŋ leŋ dɩ ba mʋ, mɩ jaŋ leŋ dɩ sɔrɔɔ kʋ su Ijipiti tinteeŋ kala.

³ Fuo-la ba sɩɩ yɩrɛ Naayɩl jaŋ su arɩ sɔrɔɔ, dɩ ba lɩɩ nɩmɛ a jʋʋ ŋ dɩa, ŋ dɩpɩnɩŋ, ŋ nɩhɩasɩŋ arɩ ŋ nɩaa kala dɩɩsɩŋ, ma tabʋʋnʋŋ arɩ ma nɔnnʋŋ kala.

⁴ Sɔrɔ-la jaŋ fɩla jɩla sagɛ ŋ lɛ, ŋ nɩhɩasɩŋ arɩ ŋ nɩaa kala lɛ.’ ”

⁵ Ŋɩɩ nɛ La TƖƖNA bʋla pɩ Mosis, “Bʋla pɩ Arɔŋ dɩ ʋ kɛŋ dantɩga-la ʋ sɩ koro a kaa zaarɛ fuonuŋ, fuonaasɩŋ arɩ pɩlaa kala sɩ hɛ Ijipiti tinteeŋ lɛ, a leŋ dɩ sɔrɔɔ lɩɩ su Ijipiti tinteeŋ kala.”

⁶ Ŋɩɩ nɛ Arɔŋ ŋaa ŋɩɩ La TƖƖNA sɩ dagʋ, sɔrɔɔ lɩɩ tɔ Ijipiti tinteeŋ kala.

⁷ Ŋɩɩ nɛ Ijipiti tinteeŋ chichiribee ma ŋaa ba chichiribiŋ, sɔrɔɔ kʋ lɩɩ.

⁸ Ijipiti tinteeŋ kuoro yɩrɛ Mosis arɩ Arɔŋ a bʋl, “Má sʋl La TƖƖNA dɩ ʋ leŋ dɩ sɔrɔ-la nyɩɩgɛ mɩ dɩ mɩ nɩaa tinteeŋ lɛ, ka dɩ mɩ leŋ dɩ ʋ nɩaa mʋ a kpʋ pʋsʋŋ a ŋaa Wɩɩsʋlʋŋ a dɛnnʋ.”

⁹ Ŋɩɩ nɛ Mosis bʋla pɩ Ijipiti tinteeŋ kuoro, “Mɩ joŋ wɩɩkala hɛ ŋ nɩsɩŋ lɛ nɛ dɩ ŋ dagɛ bʋa-la lɛ ŋ sɩ cho dɩ mɩ sʋl Wɩa pɩŋ, ŋ nɩhɩasɩŋ arɩ ŋ nɩaa dɩ sɔrɔ-la lɛl, a lɛl ma dɩɩsɩŋ ma lɛ, aŋ ka kɩalɩŋ sɩ hɛ Naayɩl fuo-la lɛ.”

¹⁰ Ŋɩɩ nɛ Ijipiti tinteeŋ kuoro bʋl, “Kʋ sʋl Wɩa pɩmɛ chie.” Ŋɩɩ nɛ Mosis bʋl, “Mɩ jaŋ ŋaa ŋɩɩ ŋ sɩ bʋla, dɩ ŋ wuo jɩŋ arɩ Wɩa dɔŋ kala tuo a magɛ La TƖƖNA Wɩa.

¹¹ Sɔrɔ-la jaŋ nyɩɩgɛ ŋ lɛ, a nyɩɩgɛ ma dɩɩsɩŋ lɛ, a nyɩɩgɛ ŋ tɩntɩnnaa lɛ arɩ ŋ nɩaa lɛ, aŋ hɛ Naayɩl fuo-la dʋndʋŋa lɛ.”

¹² Mosis arɩ Arɔŋ sɩ ta Ijipiti tinteeŋ kuoro aŋ lɩɩ, ŋɩɩ nɛ Mosis sʋl Wɩa a mʋ tɩgɛ sɔrɔ-la lɛ La TƖƖNA sɩ kaa kʋ hɛ Ijipiti tinteeŋ kuoro lɛ.

¹³ La TƖƖNA laa Mosis sʋla. Sɔrɔ-la kala sɩ hɛ ba dɩɩsɩŋ lɛ, kaalɩsɩŋ lɛ arɩ bagɩsɩŋ lɛ kala sʋʋ.

¹⁴ Ba hiesi sɔrɔ-la bil puguloo, ba sʋara su tintee-la kala.

¹⁵ Ama Ijipiti tinteeŋ kuoro sɩ na dɩ sɔrɔ-la sʋba ŋɩɩ, ʋ tʋɔŋ bɩra dol. Ʋ bɩ chɛ dɩ ʋ nɩɩ Mosis arɩ Arɔŋ teeŋ arɩ La TƖƖNA fa sɩ bʋl ŋɩɩ.

Dɩnsɩŋ su Ijipiti tinteeŋ

¹⁶ Ŋɩɩ nɛ La TƖƖNA bʋla pɩ Mosis, “Bʋla pɩ Arɔŋ dɩ ʋ kɛŋ ʋ dantɩga-la je a ŋmoo tinteeŋ dɩ kʋŋkɔlʋŋ sii a bɩrɩmɛ dɩnsɩŋ a su Ijipiti tinteeŋ kala.

¹⁷ Ba ŋaa ŋɩɩ La TƖƖNA sɩ daga, Arɔŋ kɛŋ ʋ dantɩga-la je a ŋmoo tinteeŋ kʋŋkɔlʋŋ sii a bɩrɩmɛ dɩnsɩŋ a dɩdɩŋ nuhuobiinee arɩ pʋsʋŋ kala, Ijipiti tinteeŋ kala su arɩ dɩnsɩŋ.

¹⁸ Ijipiti tinteeŋ chichiribee ma ŋaa ba chichiribi wɩaa dɩ ba ma leŋ dɩnsɩŋ lɩɩ, ama ba bɩ wuo ŋaa, ka dɩnsɩ-la dɩdɩŋ nuhuobiinee arɩ pʋsʋŋ kala.”

¹⁹ Ŋɩɩ nɛ chichiribe-la bʋla pɩ Ijipiti tinteeŋ kuoro, “Wɩa nɛ dagɛ ʋ doluŋ ŋɩɩ.” Ama Ijipiti tinteeŋ kuoro tʋɔŋ ha pɩrɛ ʋ bɩ jegile nɩɩ ba teeŋ, arɩ La TƖƖNA fa sɩ bʋl ŋɩɩ.

Nanchʋɔsʋŋ su Ijipiti tinteeŋ kala

²⁰ Ŋɩɩ nɛ La TƖƖNA bʋla pɩ Mosis, “Sii mʋ cheŋ Ijipiti tinteeŋ kuoro chʋchʋɔ-fɩɛla, bʋa-la lɛ ʋ sɩ yie mʋmʋ fuo-la leriŋ a bʋla pʋ, ‘Wɩɩ-la La TƖƖNA sɩ bʋla nɛ ŋ-la: Leŋ dɩ mɩ nɩaa mʋ a wuo dɛnnɛmɛ.

²¹ Dɩ ŋ nɛ vɩa, mɩ jaŋ leŋ dɩ nanchʋɔsʋŋ kʋ ju tɔŋ, a tɔ ŋ nɩhɩasɩŋ, a tɔ ŋ nɩaa a jʋʋ su ma dɩɩsɩŋ. Ijipiti tɩŋŋaa dɩɩsɩŋ arɩ ba tinteeŋ kala jaŋ su arɩ nanchʋɔsʋŋ.

²² Ama mɩ bɩ jaŋ leŋ dɩ nanchʋɔsʋŋ hɛ Goseŋ tinteeŋ lɛ, lee-la mɩ nɩaa sɩ hɛ, ŋ-la nɛ jaŋ leŋ dɩ ma jɩŋ arɩ mɩ-na ma TƖƖNA hɛ tinteeŋ deeŋ lɛ nɛ.

²³ Mɩ jaŋ leŋ dɩ ŋ jɩŋ mɩ nɩaa arɩ ŋ nɩaa pɛgɛ, chie nɛ wʋmagɩlɩŋ deeŋ jaŋ ŋaa.’ ”

²⁴ La TƖƖNA ŋaa ŋɩɩ ʋ sɩ daga, a leŋ nanchʋɔ-laalɩŋ kʋ su Ijipiti tinteeŋ kala, Ijipiti tinteeŋ kuoro dɩa arɩ ʋ nɩhɩasɩŋ dɩɩsɩŋ, a chei ba tinteeŋ.

²⁵ Ijipiti tinteeŋ kuoro yɩrɛ Mosis arɩ Arɔŋ a bʋla pɩba, “Má mʋ a kpʋ pʋsʋŋ a dɛnnɛ ma Wɩa tinteeŋ deeŋ lɛ.”

²⁶ Ŋɩɩ nɛ Mosis bʋl, “Ŋɩɩ bɩ jaŋ wuo ŋaa, dɩ la nɛ sɩ la kpʋ pʋsʋŋ a dɛnnɛ La TƖƖNA Wɩa Ijipiti nɩaa sɩɩŋ lɛ, la jaŋ chei ba kɩsɩŋ lɛ, dɩ ba yagɛla arɩ tabɩaa.

²⁷ Ʋ maga la vɛŋ tapʋlaa batori wombiiŋ nɛ a jʋʋ tintee-hɩlɩŋ tʋɔŋ, a mʋ kpʋ pʋsʋŋ a ŋaa Wɩɩsʋlʋŋ a pɩ La TƖƖNA Wɩa arɩ ʋ sɩ dagɛla ŋɩɩ.”

²⁸ Ŋɩɩ nɛ Ijipiti tinteeŋ kuoro bʋl, “Mɩ jaŋ leŋ dɩ ma mʋ a kpʋ pʋsʋŋ a ŋaa Wɩɩ-sʋla pɩ ma TƖƖNA tintee-hɩlɩŋ lɛ, ama má sɩ́ dɩ-bolii mʋ. Má pɛ sʋl Wɩa pɩmɛ.”

²⁹ Ŋɩɩ nɛ Mosis bʋla pɩ Ijipiti tinteeŋ kuoro, “Dɩ mɩ nɛ kʋ lɩɩ daha, mɩ jaŋ sʋl La TƖƖNA dɩ ʋ chie leŋ dɩ nanchʋɔsʋ-la nyɩɩgɛ ŋ lɛ, ŋ nɩhɩasɩŋ arɩ ŋ nɩaa kala teeŋ. Ama ŋ bɩra bɩ maga dɩ ŋ nyɩsɛla, a pɔ dɩ la sɩ́ mʋ kpʋ pʋsʋŋ a ŋaa Wɩɩsʋlʋŋ pɩ La TƖƖNA.”

³⁰ Mosis sii Ijipiti tinteeŋ kuoro teeŋ a mʋ sʋl La TƖƖNA.

³¹ Ŋɩɩ nɛ La TƖƖNA laa Mosis sʋla a leŋ nanchʋɔsʋ-la nyɩɩgɛ Ijipiti tinteeŋ kuoro lɛ, ʋ nɩhɩasɩŋ arɩ ʋ nɩaa kala teeŋ. Nanchʋɔ-bala ma bɩ ka.

³² Ama nanchʋɔsʋ-la sɩ mʋa, Ijipiti tinteeŋ kuoro tʋɔŋ bɩra dol, ʋ bɩ leŋe nɩalɩŋ mʋ.