MOSIS KƐŊ IZIRAL TƖŊŊAA LƖƖ 7 - WƖA TENIŊ

¹ Ŋɩɩ nɛ La TƖƖNA bʋla pɩ Mosis, “Bee na, mɩ ŋaa ŋ nagɛ mɩ-na Wɩa nɛ Ijipiti tinteeŋ kuoro teeŋ, ka ŋ naambie Arɔŋ ŋaa ŋ wʋlaabʋlla.

² Ʋ maga dɩ ŋ bʋl wɩalɩŋ kala mɩ sɩ bʋla pɩŋ, dɩ ŋ naambie Arɔŋ ma laa bʋla pɩ Ijipiti tinteeŋ kuoro, dɩ ʋ leŋ dɩ Iziral tɩŋŋaa lɩɩ ʋ tinteeŋ lɛ.

³ Mɩ saa jaŋ leŋ dɩ Ijipiti tinteeŋ kuoro tʋɔŋ pɩrɛ, dɩ mɩ ŋaa wʋmagɩlaa arɩ wʋkpuŋkperisiŋ Ijipiti tinteeŋ lɛ.

⁴ A tɩŋ Ijipiti tinteeŋ kuoro sɩ bɩ jaŋ jegile nɩɩ ma teeŋ ŋɩɩ, mɩ jaŋ joŋ doluŋ a kɛŋ mɩ nɩaa Iziral tɩŋŋaa a lɩɩ Ijipiti tinteeŋ lɛ.

⁵ Ŋɩɩ nɛ Ijipiti tɩŋŋaa jaŋ jɩŋ arɩ mɩ nɛ ŋaa ba TƖƖNA, dɩ mɩ nɛ kɛŋ Iziral tɩŋŋaa lɩɩ ba tinteeŋ lɛ arɩ doluŋ.”

⁶ Ŋɩɩ nɛ Mosis arɩ Arɔŋ ŋaa wɩalɩŋ kala La TƖƖNA sɩ sɩ ba ŋaa.

⁷ Bʋa-la lɛ Mosis arɩ Arɔŋ sɩ mʋ Ijipiti tinteeŋ kuoro sɩpaaŋ, dɩ Mosis ŋaa jɩsɩŋ mahɩŋ banɛsɛ, ka Arɔŋ ma ŋaa jɩsɩŋ mahɩŋ banɛsɛ arɩ batori.

Arɔŋ dantɩga bɩrɩmɛ dɩmɩŋ

⁸ Ŋɩɩ nɛ La TƖƖNA bɩra bʋla pɩ Mosis arɩ Arɔŋ,

⁹ “Dɩ Ijipiti tinteeŋ kuoro nɛ bʋla arɩ ma ŋaa wʋmagɩl a dagɛ arɩ mɩ-na Wɩa nɛ tɩmma, bʋla pɩ Arɔŋ dɩ ʋ joŋ ʋ dantɩga-la lo Ijipiti tinteeŋ kuoro sɩpaaŋ, ʋ jaŋ bɩrɩmɛ dɩmɩŋ.”

¹⁰ Ŋɩɩ nɛ Mosis arɩ Arɔŋ mʋ Ijipiti tinteeŋ kuoro sɩpaaŋ a ŋaa wʋmagɩl-la Wɩa sɩ dagɛba. Arɔŋ joŋ ʋ dantɩga lo Ijipiti tinteeŋ kuoro arɩ ʋ nɩhɩasɩŋ sɩpaaŋ, ʋ bɩrɩmɛ dɩmɩŋ.

¹¹ Ŋɩɩ nɛ Ijipiti tinteeŋ kuoro yɩrɛ ʋ jaŋ wʋjɩnnaa, vʋgʋraa arɩ ba chichiribee kala, ba ma ŋaa ŋɩɩ tɩtɩa arɩ ba chichiribiŋ.

¹² Ŋɩɩ nɛ ba kʋŋkala joŋ ʋ dantɩga lo ʋ bɩrɩmɛ dɩmɩŋ. Ama Arɔŋ dɩmɩŋ paa ba dɩŋŋaa liŋ.

¹³ Ijipiti tinteeŋ kuoro tʋɔŋ ha pɩrɛ, ʋ bɩ Mosis arɩ Arɔŋ teeŋ jegile arɩ La TƖƖNA sɩ bʋl ŋɩɩ.

Chalɩŋ su Ijipiti tinteeŋ

¹⁴ Ŋɩɩ nɛ La TƖƖNA bʋla pɩ Mosis, “Ijipiti tinteeŋ kuoro tʋɔŋ ha pɩra nɛ. Ʋ vɩa dɩ ʋ pɩ Iziral tɩŋŋaa wombiiŋ dɩ ba mʋ nɛ.

¹⁵ Sii mʋ chemu chʋchʋɔ-fɩɛla fuo-la ba sɩɩ yɩrɛ Naayɩl niiŋ. Pɛ joŋ dantɩga-la sɩ bɩrɩmɛ dɩmɩŋ a kori.

¹⁶ Dɩ ŋ nɛ chemu, bʋla pʋ, ‘Iziral tɩŋŋaa Wɩa nɛ tɩmmɛ ŋ teeŋ dɩ mɩ bʋla pɩŋ: Leŋ dɩ mɩ nɩaa mʋ a chʋɔlɛmɛ tintee-hɩlɩŋ lɛ. Ama faafaa kala a kaa kɔ bʋa deeŋ lɛ ŋ bɩ jegile nɩɩ.

¹⁷ Wɩɩ-la mɩ-na ma TƖƖNA sɩ bʋla nɛ ŋ-la: Wʋmagɩlɩŋ deeŋ nɛ mɩ jaŋ ŋaa dɩ ŋ jɩŋ arɩ mɩ nɛ nʋʋkala Tɩɩna. Dantɩga deeŋ mɩ sɩ koro mɩ jaŋ joŋo ŋmoo fuo-la ba sɩɩ yɩrɛ Naayɩl lɩɩŋ dɩ ʋ bɩrɩmɛ chalɩŋ.

¹⁸ Chenfile-la kala sɩ hɛ fuo-la lɛ jaŋ sʋʋ, dɩ lɩɩ-la sʋsʋɔrɛ. Ijipiti tɩŋŋaa bɩ jaŋ wuo nyʋa lɩɩ-la.’ ”

¹⁹ Ŋɩɩ nɛ La TƖƖNA bʋla pɩ Mosis, “Bʋla pɩ Arɔŋ, dɩ ʋ kɛŋ dantɩga-la sɩ hɛ ʋ nɩsɩŋ lɛ a kaa liesi Ijipiti tinteeŋ fuonuŋ, vilee arɩ lee na-kala lɩɩŋ sɩ hɛ, ba kala jaŋ bɩrɩmɛ chalɩŋ. Chalɩŋ jaŋ hɛ Ijipiti tinteeŋ lee na-kala. Kɩalɩŋ kala ba sɩ kɛŋ daasɩŋ arɩ chʋrʋŋ ŋaa a hɩhɛ lɩɩŋ jaŋ su arɩ chalɩŋ.”

²⁰ Ŋɩɩ nɛ Mosis arɩ Arɔŋ ŋaa ŋɩɩ La TƖƖNA sɩ dagɛba. Arɔŋ kɛŋ ʋ dantɩga je Ijipiti tinteeŋ kuoro arɩ ʋ nɩhɩasɩŋ kala sɩpaaŋ aŋ ŋmoo fuo-la ba sɩɩ yɩrɛ Naayɩl lɩɩŋ, ʋ bɩrɩmɛ chalɩŋ.

²¹ Ŋɩɩ nɛ chenfile-la sɩ hɛ fuo-la lɛ sʋʋ, lɩɩ-la sʋsʋɔrɛ, Ijipiti tɩŋŋaa bɩ lɩɩ-la wuo nyʋa. Chalɩŋ su Ijipiti tinteeŋ kala.

²² Ijipiti tinteeŋ chichiribee ma ŋaa ŋɩɩ arɩ ba chichiribiŋ. Ŋɩɩ nɛ Ijipiti tinteeŋ kuoro tʋɔŋ wasa dol. Ʋ vɩa dɩ ʋ jegile Mosis arɩ Arɔŋ teeŋ arɩ La TƖƖNA sɩ bʋl ŋɩɩ.

²³ Wɩɩŋ deeŋ sɩ ŋaa ma kala, Ijipiti tinteeŋ kuoro bɩ jegile nɩɩ aŋ mɩɩra jʋʋ ʋ kuoru dɩa.

²⁴ Ŋɩɩ nɛ Ijipiti tɩŋŋaa gɔllɔ lu vilee Naayɩl fuo-la sɛmɛ a chɩchɛ lɩɩŋ ba nyʋa, bɛɛ wɩaa ba fa bɩ fuo-la lɩɩŋ wuo nyʋa.

²⁵ La TƖƖNA sɩ ŋaa Naayɩl fuo-la lɩɩŋ bɩrɩmɛ chalɩŋ ŋɩɩ, ʋ diene a yi tapʋlaa balɩpɛ nɛ.