MOSIS KƐŊ IZIRAL TƖŊŊAA LƖƖ 40 - WƖA TENIŊ

Ŋɩɩ ba sɩ jaŋ hɛ Wɩa dɩ-zɔŋ-la

¹ Ŋɩɩ nɛ La TƖƖNA bʋla pɩ Mosis,

² “Chɛŋ-bumbuŋ tapʋl-bumbuŋ lɛ, pɛ mɩ-na Wɩa dɩ-zɔŋ-la, lɛbɩ-la lɛ mɩ sɩ yie kɔ Iziral tɩŋŋaa teeŋ.

³ Joŋ mɩ niiriŋ daga-la a bil mɩ dɩ-zɔŋ-la tʋɔŋ a kɛŋ patɩɩsaŋ kɛrɛ.

⁴ Kɛŋ teebʋl-la ma kʋ jʋʋ, a joŋ ʋ nyuŋ tɩntɩnnɩ kɩaa daŋ, a joŋ chaaŋ-daaŋ ma kʋ jʋʋ. Joŋ chaana-la sagɛ ʋ nyuŋ.

⁵ Joŋ Wɩɩsʋllɩ koru-la ba sɩ kɛŋ sɛlɩmɛ ŋaa aa nyɩgɛ kʋsʋɔrʋsʋŋ ʋ nyuŋ a bil patɩɩsaŋ-la sɩ kɛrɛ mɩ niiriŋ daga-la sɩpaaŋ, aŋ joŋ mɩ-na Wɩa dɩ-zɔŋ-la boiŋ niiŋ patɩɩsaŋ a kɛrɛ.

⁶ Joŋ kʋnyɩgaa Wɩɩsʋllɩ koruŋ a bile kpagɛ mɩ dɩ-zɔŋ-la boiŋ niiŋ.

⁷ Joŋ taasɩ-gbaŋ-bal-la a bil Wɩɩsʋlʋŋ koru-la arɩ mɩ dɩ-zɔŋ-la pɛgɛ a ŋaa lɩɩŋ hɛ.

⁸ Lɩgɛ lɩga a golli mɩ dɩ-zɔŋ-la a kɛŋ patɩɩsaŋ kɛrɛ lɩga-la boiŋ niiŋ.

⁹ Joŋ Wɩɩsʋllɩ nʋʋŋ taa mɩ dɩ-zɔŋ-la arɩ ʋ kpɩɛraa kala dɩ ba chaasa ŋaa kʋzɔmɔ.

¹⁰ Joŋ Wɩɩsʋllɩ nʋʋŋ taa kʋnyɩgaa Wɩɩsʋlʋŋ koru-la arɩ ʋ nyuŋ tɩntɩnnɩ kɩaa dɩ ba chaasa ŋaa kʋzɔmɔ mɩ teeŋ.

¹¹ Joŋ Wɩɩsʋllɩ nʋʋŋ a taa taasɩ-gbaŋ-bal-la arɩ kʋ-la nyuŋ ʋ sɩ saga dɩ ba ŋaa mɩ-na ma TƖƖNA kʋzɔmɔ.

¹² Kɛŋ Arɔŋ arɩ ʋ hambolibiisiŋ kaa kɔ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ a foba lɩɩŋ.

¹³ Joŋ mɩ tɩntɩnnɩ gɛnnɩ-la a laalɛ Arɔŋ, a joŋ Wɩɩsʋllɩ nʋʋŋ tɩsʋ dɩ ʋ ŋaa mɩ Wɩɩsʋllɩ sɩpaalaarʋ.

¹⁴ Kɛŋ ʋ hambolibiisiŋ ma kɔ a paa gɛrɩ-pʋl-duduosu-la laalɛba.

¹⁵ Joŋ Wɩɩsʋllɩ nʋʋ-la tɩsɛba arɩ ŋ sɩ joŋo tɩsɛ ba nyɩmma ŋɩɩ, dɩ ba ŋaa Wɩɩsʋllɩ sɩpaalaaraa. Wɩɩsʋllɩ nʋʋ-la ŋ sɩ joŋo tɩsɛba jaŋ leŋ dɩ ba nɛ ŋaa doho-la nɩaa sɩ jaŋ ŋaa Wɩɩsʋllɩ sɩpaalaaraa a kaa mʋ wuu.”

¹⁶ Ŋɩɩ nɛ Mosis ŋaa wɩalɩŋ kala La TƖƖNA sɩ dagʋ.

¹⁷ Ba pɛ Wɩa dɩ-zɔŋ-la jɩ-lɩa tʋɔŋ chɛŋ-bumbuŋ tapʋl-bumbuŋ chɛɛŋ nɛ.

¹⁸ Mosis sɩ pɛ Wɩa dɩ-zɔŋ-la dɛrɛ, ʋ joŋ hɔ-taalɩsɩ-la bil ba dɩ-pɩnaa a joŋ daapɛsɩ-la tʋʋ ba lɛ, a paa daa-gɛsɛɛ gɛsɛ, a paa daaterigeba-la ma pɛ.

¹⁹ Ŋɩɩ nɛ ʋ joŋ gɛrɩpɛyɛ-la a tɔ Wɩa dɩ-zɔŋ-la a joŋ ʋ nyuŋ tɔlɔ ma tɔ, arɩ La TƖƖNA sɩ dagʋ ŋɩɩ.

²⁰ Ŋɩɩ nɛ Mosis joŋ tabɩɩ-taalɩa-la lɛ Wɩa niiriŋ sɩ hɛ a hɛ daga-la tʋɔŋ, a joŋ daaterigeba-la a tʋʋ daga-la sɛsɩŋ a joŋ ʋ nii-tɔlɔ tɔ.

²¹ Ŋɩɩ nɛ ʋ joŋ daga-la lɛ Wɩa niiriŋ sɩ hɛ a kaa kʋ jʋʋ Wɩa dɩ-zɔŋ-la lee-la zɔmʋŋ sɩ bɩ magɩa kɛnɛ, a joŋ patɩɩsamba-la sɩ jaŋ kɛrɛ Wɩa niiriŋ daga-la a saga kɛrɛ daga-la, arɩ La TƖƖNA sɩ dagʋ ŋɩɩ.

²² Ŋɩɩ nɛ Mosis joŋ teebʋl-la ma jʋʋ Wɩa dɩ-zɔŋ-la dɩ-zɔmʋŋ, a joŋo bil wɩɩpɔsʋŋ nagʋa,

²³ a joŋ boroboro-la daŋ teebʋl nyuŋ La TƖƖNA sɩpaaŋ, arɩ ŋɩɩ La TƖƖNA sɩ dagʋ.

²⁴ Ŋɩɩ nɛ ʋ joŋ chaaŋ daaŋ a kaa kʋ jʋʋ bil lɛbɩ-la lɛ La TƖƖNA sɩ yie kɔ Iziral tɩŋŋaa teeŋ tʋɔŋ a chaasɛ teebʋl-la Wɩa dɩ-zɔŋ-la wɩɩpɔsʋŋ nadiiŋ dɩɩrɩŋ,

²⁵ a nyɩgɛ chaana-la La TƖƖNA sɩpaaŋ, arɩ La TƖƖNA sɩ dagʋ ŋɩɩ.

²⁶ Ŋɩɩ nɛ Mosis joŋ Wɩɩsʋllɩ koru-la ba sɩ kɛŋ sɛlɩmɛ ŋaa aa nyɩgɛ kʋsʋɔrʋsʋŋ a kʋ jʋʋ bil lɛbɩ-la lɛ Tɩɩna sɩ yie kɔ Iziral tɩŋŋaa teeŋ patɩɩsaŋ-la sɩpaaŋ,

²⁷ aa nyɩgɛ kʋsʋɔrʋsʋŋ sʋɔra sɩ sɩma ʋ nyuŋ, arɩ ŋɩɩ La TƖƖNA sɩ dagʋ.

²⁸ Ŋɩɩ nɛ ʋ joŋ patɩɩsaŋ-la sɩɩ kɛrɛ Wɩa dɩ-zɔŋ-la boiŋ niiŋ a saga kɛrɛ.

²⁹ Ʋ bɩra joŋ kʋnyɩgaa Wɩɩsʋlʋŋ koruŋ a bile kpagɛ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ, a sʋl kʋnyɩgaa Wɩɩsʋlʋŋ arɩ mɩaa Wɩɩsʋlʋŋ ʋ nyuŋ, arɩ La TƖƖNA sɩ dagʋ ŋɩɩ.

³⁰ Ŋɩɩ nɛ ʋ joŋ taasɩ-gbaŋ-bal-la a bil lɛbɩ-la lɛ La TƖƖNA sɩ yie kɔ Iziral tɩŋŋaa teeŋ arɩ Wɩɩsʋllɩ koru-la pɛgɛ a ŋaa lɩɩŋ hɛ ba kaa sʋsɔŋ ba tɩtɩa.

³¹ Mosis arɩ Arɔŋ arɩ ʋ hambolibiisiŋ kɛŋ taasɩ-gbaŋa-la tʋɔŋ lɩɩŋ sʋsɔŋ ba nɩsaa arɩ ba naasɩŋ.

³² Bʋa na-kala lɛ dɩ ba nɛ jʋʋ lɛbɩ-la tʋɔŋ La TƖƖNA sɩ yie kɔ Iziral tɩŋŋaa teeŋ koo dɩ ba nɛ mʋ koru-la leriŋ, ba yie sɔŋ ba nɩsaa arɩ ba naasɩŋ nɛ, arɩ La TƖƖNA sɩ dagɛ Mosis ŋɩɩ.

³³ Ŋɩɩ nɛ Mosis lɩgɛ lɩga a golli Wɩa dɩ-zɔŋ-la arɩ kʋnyɩgaa Wɩɩsʋlʋŋ koru-la, a joŋ lɩga-la boiŋ niiŋ patɩɩsaŋ a saga kɛrɛ. Ŋ-la nɛ Mosis tɩŋ tɩntɩmɩɩ-la dɛrɛ.

La TƖƖNA tʋla

³⁴ Ŋɩɩ nɛ duoŋ-bɩlɩmbaanɩŋ kʋ tɔ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ. La TƖƖNA tʋla su Wɩa dɩ-zɔŋ-la kala.

³⁵ Mosis bɩ lɛbɩ-la lɛ La Tɩɩna sɩ yie kɔ Iziral tɩŋŋaa teeŋ wuo jʋʋ, bɛɛ wɩaa duoŋ-bɩlɩmbaaŋ-la kʋ tɔ ʋ kala nɛ, La TƖƖNA tʋla-la ma su Wɩa dɩ-zɔŋ-la.

³⁶ Wombii-la kala Iziral tɩŋŋaa sɩ vɛnɛ, bʋa na-kala dɩ duoŋ-bɩlɩmbaaŋ-la nɛ kʋ sii Wɩa dɩ-zɔŋ-la nyuŋ, ba yie sii lee-la ba sɩ hɔnɔ nɛ a bɩra vɩvɛŋ.

³⁷ Ama dɩ duoŋ-bɩlɩmbaaŋ-la nɛ bɩ Wɩa dɩ-zɔŋ-la nyuŋ sie, ba bɩ vɛŋ, see tapʋlɩɩ-la ʋ sɩ sie.

³⁸ La TƖƖNA duoŋ-bɩlɩmbaaŋ-la fa yie hɛ Wɩa dɩ-zɔŋ-la nyuŋ nɛ wɩɩhɛyɛ, tɩtaŋɩŋ ma ʋ hɛ nɩmɛ a chol nyiniŋ a pɩ Iziral tɩŋŋaa, bʋa-la kala lɛ ba fa sɩɩ vɛŋ wombiiŋ.