MOSIS KƐŊ IZIRAL TƖŊŊAA LƖƖ 39 - WƖA TENIŊ

Wɩɩsʋllɩ sɩpaalaaraa gɛrɩ-laalaa

¹ Ba kɛŋ ŋmɛŋ-diibelimbine, ŋmɛŋ-vachalɩŋ arɩ ŋmɛŋ-fɩaŋ a yuo gɛnnɩ-la ba sɩ jaŋ laalɛ a tɩtɩŋ Wɩa dɩ-zɔŋ-la lɛ aŋ yuo dɔnsʋŋ ma sɩ zɔmɔ a kɛŋ yɩrɩŋ a pɩ Arɔŋ, arɩ La TƖƖNA sɩ dagɛ Mosis ŋɩɩ.

Gɛrɩ-laala-daŋɩŋ

² Ŋɩɩ nɛ ba kɛŋ ŋmɛŋ-sumunuŋ, ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a yɛrɛ gɛrɩ-laala-daŋɩŋ.

³ Gɔgɔ kɛŋ sɛlɩmɛ libi kʋtaalɩ-biisiŋ a kɩɛra lɩɩsɛ nyɩlaa a kɛŋ ŋmɛŋ-diibelimbine, ŋmɛŋ vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a sʋa mɛrɛ.

⁴ Ŋɩɩ nɛ ba yɛrɛ jolluŋ mɛrɛ gɛrɩ-laala-daŋɩɩ-la vaasɩŋ lɛ dɩ ba wuo kɛmba vɔɔ.

⁵ Ŋmɛsɩ-la tɩtɩa ba sɩ kaa yuo gɛrɩ-laala-daŋɩɩ-la nɛ ba kaa yuo ʋ gɛrɩpɛlɩɛɛ-bie a mɛrɛ ʋ lɛ arɩ La TƖƖNA sɩ dagɛ Mosis ŋɩɩ.

⁶ Ŋɩɩ nɛ ba kɛŋ sɛlɩmɛ libi kʋtaalɩsɩŋ sɩ kɛŋ bʋɔsʋŋ a paa tabɩɩ-tʋlɩa-la ba sɩɩ yɩrɛ ɔnɩs ba sɩ tuuri Iziral hambolibiisiŋ fii arɩ balɩa-la yɩraa hɛ a joŋo hɛ.

⁷ Ba joŋo mɛrɛ gɛrɩ-laala-daŋɩɩ-la vaasɩŋ lɛ, dɩ ŋɩɩ leŋ dɩ La TƖƖNA liliisi Iziral tɩŋŋaa wɩaa, arɩ ʋ sɩ dagɛ Mosis ŋɩɩ.

Bɔyɛ gɛrɩŋ

⁸ Ŋɩɩ nɛ gɔgɔɔ kɛŋ ŋmɛŋ-sumunuŋ, ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a yɛrɛ bɔɩ-tɔɔrɩ gɛrɩ-la arɩ ba sɩ yɛrɛ gɛrɩ-laala-daŋɩɩ-la ŋɩɩ.

⁹ Bɔɩ-tɔɔrɩ gɛrɩ-la kɛŋ gʋnaa banɛsɛ nɛ, ʋ duomuŋ arɩ ʋ jalɩŋ kala ŋaa vama ba kaa kpeŋ bʋlɩa.

¹⁰ Ŋɩɩ nɛ ba joŋ tabɩɩ-zɔŋŋɔɔ mɛrɛ naaderee banɛsɛ gɛrɩ-la lɛ. Naaderi bumbuŋ tabɩaa yɩraa nɛ ŋ-la: ‘rubi’ a ŋaa tabɩɩ-fɩaŋ, ‘topas’ a ma ŋaa tabɩɩ-sumunuŋ arɩ ‘bɛrɛl’ a ma ŋaa tabɩɩ-jɔgɩlɩɩŋ.

¹¹ Naaderi-lɩa tabɩaa yɩraa nɛ ŋ-la: ‘takʋa’ a ŋaa diibelimbine, ‘safɩya’ a ma ŋaa tabɩɩŋ sɩ faasa nagɛ diibelimbine arɩ ‘amɛral’ a ma ŋaa tabɩɩ-jɔgɩlɩɩŋ sɩ faasa biri.

¹² Naaderi-tori tabɩaa yɩraa nɛ ŋ-la: ‘jasɩŋ’ a ŋaa tabɩɩ-diibelimbine, agɛtɩ a ma ŋaa tabɩɩ-tʋlʋŋ arɩ ‘amɛtɩs’ a ma nagɛ diibelimbine.

¹³ Naaderi nɛsɛ ma tabɩaa yɩraa nɛ ŋ-la: ‘kirisola’ a ŋaa tabɩɩ-sumunuŋ sɩɩ tʋl, ‘ɔnɩs’ a ma ŋaa tabɩɩ-jɔgɩlɩɩŋ sɩɩ tʋl arɩ ‘jasɩpa’ a ma ŋaa tabɩɩŋ sɩ fɩɛsa aŋ pɛ nagɛ sumunuŋ, ba fa jomba a hɛ ba sɩ kɛŋ sɛlɩmɛ libi kʋtaala-la ʋ kɛŋ bʋɔsʋŋ lɛ nɛ.

¹⁴ Tabɩa-la fa ŋaa fii arɩ balɩa nɛ, ba tuuri Jekɔb hambolibiisi-la fii arɩ balɩa yɩraa hɛ. Tabɩɩ na-kala chɩŋ doho kala nyuŋ lɛ.

¹⁵ Bɔɩ-tɔɔrɩ gɛrɩ-la lɛ ba kɛŋ sɛlɩmɛ sɩ chaasa zɔŋ nɛ a libi chɔrʋmɔɔ sɩ nagɛ ŋmɛsɩŋ a hɛ.

¹⁶ Ba kɛŋ sɛlɩmɛ nɛ a libi kʋtaalaa sɩ kɛŋ bʋɔsʋŋ, a libi sɛlɩmɛ nenii-pɩraa balɩa a hɛ, a joŋo vɔɔ mɛrɛ bɔɩ-tɔɔrɩ gɛrɩ-la niipinee balɩa lɛ.

¹⁷ Ŋɩɩ nɛ ba joŋ sɛlɩmɛ chɔrʋmɔ-la a vɔɔ mɛrɛ nenii-pɩra-la balɩa sɩ hɛ bɔɩ-tɔɔrɩ gɛrɩ-la lɛ,

¹⁸ aŋ kɛŋ sɛlɩmɛ chɔrʋmɔ-la jɩla vɔɔ mɛrɛ gɛrɩ-laala-daŋɩɩ-la vaasɩŋ jolluŋ lɛ, sɩpaaŋ dɩɩrɩŋ.

¹⁹ Ŋɩɩ nɛ ba kɛŋ sɛlɩmɛ libi nenii-pɩraa balɩa a joŋo vɔɔ mɛrɛ bɔɩ-tɔɔrɩ gɛrɩ-la sɩɩ-bɔŋŋɔɔ niipinee balɩa-la sɩ tɩgɛ gɛrɩ-laala-daŋɩɩ-la lɛ.

²⁰ Ŋɩɩ nɛ ba bɩra libi sɛlɩmɛ nenii-pɩraa balɩa a mɛrɛ gɛrɩ-laala-daŋɩɩ-la tɩŋa dɩɩrɩŋ a kpagɛ gɛrɩ-laala-daŋɩɩ-la gɛrɩpɛlɩɛɛ-bie.

²¹ Ba kɛŋ nenii-pɩra-la sɩ hɛ bɔɩ-tɔɔrɩ gɛrɩ-la lɛ a vɔɔ mɛrɛ nenii-pɩra-la sɩ hɛ gɛrɩ-laala-daŋɩɩ-la lɛ arɩ ŋmɛŋ-diibelimbine a kaa tuu vɔɔ mɛrɛ gɛrɩpɛlɩɛɛ-bie-la lɛ, dɩ bɔɩ-tɔɔrɩ gɛrɩ-la sɩ́ sʋrʋsʋ aŋ ka gɛrɩ-laala-daŋɩɩ-la, arɩ La TƖƖNA sɩ dagɛ Mosis ŋɩɩ.

Wɩɩsʋllɩ sɩpaalaaraa gɛnnɩŋ dɔnsʋŋ

²² Ŋɩɩ nɛ gɔgɔ kɛŋ gɛrɩpɛ diibelimbine a yɛrɛ gɛrɩ-duduoŋ sɩ tuu magɛ naachɩgɩsɩŋ.

²³ Ba hɛ gɛrɩ-la baŋŋaa tʋtʋɔbaanɩŋ a sʋa golli dɩ ʋ sɩ́ kɩɛsʋ.

²⁴ Ŋɩɩ nɛ ba kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a yɛrɛ kʋgulogulo-biisiŋ a hɛ gɛrɩ-la bʋbʋɔŋ niipiniŋ lɛ a golli,

²⁵ aŋ kɛŋ sɛlɩmɛ sɩ chaasa zɔŋ ŋaa bimbelimee a hɛ kʋgulogulo-biisi-la sɩ nagɛ kampoi nɛnɛɛ pɛgɩsɩŋ a golli.

²⁶ Bimbelime-la arɩ kʋgulogulo-biisi-la chagɩsɛ a golli gɛrɩ-la ba sɩ jaŋ laalɛ a tɩtɩŋ Wɩa dɩa tɩntɩŋŋaa niipiniŋ lɛ, arɩ La TƖƖNA sɩ dagɛ Mosis ŋɩɩ.

²⁷ Ŋɩɩ nɛ gɛrɩ-yɛrɩ-gɔgɔ kɛŋ gɛrɩpɛ fʋfʋlʋŋ a yɛrɛ gɛrɩ-pʋl-duduoŋ sɩ tuu magɛ naachɛyɛɛ a pɩ Arɔŋ arɩ ʋ hambolibiisiŋ.

²⁸ Ba kɛŋ gɛrɩpɛ-la tɩtɩa nɛ a yɛrɛ nyu-bɛlɛ, nyunchuuluŋ arɩ kpuŋkpel-kuu-biisiŋ ba sɩ jaŋ vɔɔ hɛ tʋɔŋ.

²⁹ Ba bɩra kɛŋ gɛrɩpɛ fʋfʋlʋŋ, ŋmɛŋ-vachalɩŋ, ŋmɛŋ-diibelimbine arɩ ŋmɛŋ-fɩaŋ a sʋa gɛrɩpɛlɩɛɛ-bie, arɩ La TƖƖNA sɩ dagɛ Mosis ŋɩɩ.

³⁰ Ŋɩɩ nɛ ba kɛŋ sɛlɩmɛ sɩ chaasa zɔŋ libi pɩrata a tuuro hɛ ʋ lɛ: “Ʋ ŋaa La TƖƖNA kʋzɔŋ nɛ.”

³¹ Ŋɩɩ nɛ ba kɛŋ ŋmɛŋ-diibelimbine a vɔbʋ mɛrɛ nyu-bɛlɛ-la lɛ, arɩ La TƖƖNA sɩ dagɛ Mosis ŋɩɩ.

Mosis beŋ Wɩa dɩ-zɔŋ-la ba sɩ ŋaa

³² Ba tɩŋ Wɩa dɩ-zɔŋ-la, lɛbɩ-la lɛ La TƖƖNA sɩ yie kɔ Iziral tɩŋŋaa teeŋ tɩntɩŋŋaa kala dɛrɛ. Iziral tɩŋŋaa ŋaa wɩalɩŋ kala La TƖƖNA sɩ dagɛ Mosis.

³³ Ŋɩɩ nɛ ba kɛŋ Wɩa dɩ-zɔŋ-la, ʋ nyuŋ tɔlɔ, ʋ kpɩɛraa, ʋ kʋkaachɛbɛ kɛnɛɛ, ʋ daapɛsɩŋ, ʋ daa-gɛsɛɛ, ʋ daaterigeba arɩ ʋ hɔ-taalɩsɩŋ kala kaa kɔ Mosis teeŋ,

³⁴ a pɛ pie-tenni-la ba sɩ hɛ biriŋ ba fɩɛsɛ, lɩɩ-nɛsɩŋ tenniŋ, arɩ patɩɩsaŋ-la sɩɩ kɛrɛ Wɩa dɩ-zɔŋ-la tʋɔŋ,

³⁵ a pɛ Wɩa niiriŋ daga arɩ ʋ daaterigeba arɩ ʋ nii-tɔlɔ,

³⁶ teebʋl-la arɩ ʋ nyuŋ tɩntɩnnɩ kɩaa arɩ kʋdiile-la sɩɩ chɩŋ La TƖƖNA sɩpaaŋ,

³⁷ a pɛ ba sɩ kɛŋ sɛlɩmɛ sɩ chaasa zɔŋ libi chaaŋ-daaŋ, arɩ ʋ chaanaa arɩ ʋ nyuŋ kɩaa arɩ chaana-la nʋʋŋ,

³⁸ a pɛ Wɩɩsʋlʋŋ koru-la ba sɩ kɛŋ sɛlɩmɛ ŋaa, Wɩɩsʋllɩ nʋʋŋ, kʋsʋɔrʋsʋŋ sʋɔra sɩ sɩma arɩ patɩɩsamba-la sɩ kɛrɛ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ,

³⁹ a pɛ koru-la ba sɩ kɛŋ kɔlɩɩŋ ŋaa arɩ ʋ tʋɔŋ kʋ-la sɩ nagɛ nanchɛbɩrɩ kʋa, ʋ daaterigeba, ʋ nyuŋ tɩntɩnnɩ kɩaa, taasɩ-gbaŋ-bal-la arɩ kʋ-la nyuŋ ʋ sɩɩ chɩŋ,

⁴⁰ lɩga-la patɩɩsamba arɩ ʋ daapɛsɩŋ, ʋ hɔ-taalɩsɩŋ, ʋ boiŋ niiŋ patɩɩsaŋ, ʋ ŋmɛsɩŋ arɩ ʋ daapɛ-biisiŋ. Wɩa dɩ-zɔŋ-la, lɛbɩ-la lɛ La TƖƖNA sɩ yie kɔ Iziral tɩŋŋaa teeŋ kpɩɛraa kala,

⁴¹ arɩ gɛnnɩ-la ba sɩ jaŋ laalɛ a tɩtɩŋ Wɩa dɩa tɩntɩŋŋaa, kɩalɩŋ Arɔŋ sɩ jaŋ laalɛ a ŋaa Wɩɩsʋllɩ sɩpaalaara arɩ kɩalɩŋ ʋ hambolibiisiŋ sɩ jaŋ laalɛ a tɩtɩŋ Wɩɩsʋllɩ sɩpaalaaraa tɩntɩŋŋaa.

⁴² Ŋɩɩ nɛ Iziral tɩŋŋaa ŋaa wɩalɩŋ kala La TƖƖNA sɩ dagɛ Mosis.

⁴³ Mosis beŋ tɩntɩmɩɩ-la kala a na dɩ ba tɩŋ ŋɩɩ La TƖƖNA sɩ dagʋ, ŋɩɩ nɛ ʋ sʋl Wɩa pɩba.