MOSIS KƐŊ IZIRAL TƖŊŊAA LƖƖ 38 - WƖA TENIŊ

Kʋnyɩgaa Wɩɩsʋlʋŋ koruŋ

¹ Ŋɩɩ nɛ ba kɛŋ sɔjaamɩŋ daaŋ a ŋaa kʋnyɩgaa Wɩɩsʋlʋŋ koruŋ. Ʋ kɛŋ gʋnaa banɛsɛ, ba kala magɛ dɔŋɔ. Ʋ duomuŋ ŋaa naakieliŋ bʋlɩa arɩ kpaa magɛ dɔŋɔ, ʋ jalɩŋ ma magɛ ŋɩɩ tɩtɩa. Ka ʋ leŋiŋ ŋaa naakieli-bala arɩ kpaa magɛ dɔŋɔ.

² Ba kɛŋ daa-la tɩtɩa nɛ a ŋaa nyilliŋ banɛsɛ a hɛ koru-la gʋnaa lɛ, a joŋ kɔlɩɩŋ taara tɔ ba kala.

³ Ŋɩɩ nɛ ba kɛŋ kɔlɩɩŋ a ŋaa koru-la nyuŋ tɩntɩnnɩ kɩaa, tʋɔrʋŋ puposuŋ, safʋlba, kʋmɩsɩrɩ gbansɩŋ, lɛsɩ-la sɩ kɛŋ kerikee ba kaa lɩɩsɛ nammɩa, arɩ nʋʋ-hala.

⁴ Ŋɩɩ nɛ ba kɛŋ kɔlɩɩŋ libi kʋŋ ʋ kɛŋ bʋɔsʋŋ a nagɛ nanchɛbɩrɩ kʋa a joŋo tagɩlɛ Wɩɩsʋllɩ koru-la tʋɔŋ ʋ jɩla magɛ tʋtʋɔbaanɩŋ.

⁵ Ŋɩɩ nɛ ba kɛŋ kɔlɩɩŋ a libi nenii-pɩraa banɛsɛ a hɛ kʋ-la sɩ kɛŋ bʋɔsʋŋ a nagɛ nanchɛbɩrɩ kʋa gʋna-la banɛsɛ lɛ, dɩ daaterigeba-la tʋʋ ba lɛ.

⁶ Sɔjaamɩŋ daasɩŋ nɛ ba kaa ŋaa daaterigeba-la a kɛŋ kɔlɩɩŋ taara tɔ ba kala.

⁷ Ŋɩɩ nɛ ba joŋ daaterigeba-la a tʋʋ nenii-pɩra-la banɛsɛ sɩ hɛ kʋ-la lɛ koru-la sɛsɩŋ, ba kɛŋ ba lɛ aa joŋ Wɩɩsʋlʋŋ koru-la. Daborusuŋ nɛ ba kaa ŋaa koru-la, ʋ tʋɔŋ kɛŋ bʋa.

Kɔlɩɩŋ taasɩ-gbaŋ-bal-la

⁸ Ba kɛŋ kɔlɩɩŋ beenantɩrɛba-la haala-la sɩɩ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ sɩ kaa kɔ nɛ, a ŋaa taasɩ-gbaŋ-bal-la arɩ kʋ-la nyuŋ ʋ sɩɩ chɩŋ.

Lɩga-la sɩ golli Wɩa dɩ-zɔŋ-la

⁹ Ŋɩɩ nɛ ba lɩgɛ lɩga a golli Wɩa dɩ-zɔŋ-la. Ʋ wɩɩpɔsʋŋ nadiiŋ duomuŋ ŋaa naakieliŋ mahɩŋ balɩa arɩ fii, a kɛŋ gɛrɩpɛ fʋfʋlʋŋ a yɛrɛ patɩɩsamba a kɛrɛ,

¹⁰ aŋ ŋaa daapɛsɩŋ mara a kɛŋ kɔlɩɩŋ libi hɔ-taalɩsɩŋ ma sɩ kɛŋ bʋɔsʋŋ mara, a bɩra kɛŋ hɔpʋla libi kʋkaachɛbɛ-kɛnɛɛ arɩ lere-la patɩɩsamba-la ŋmɛsɩŋ sɩ jaŋ vɔɔ.

¹¹ Wɩɩpɔsʋŋ nagʋa sɛmɛ-la ma ŋɩɩ tɩtɩa nɛ ba ŋaa.

¹² Wɩɩjʋʋlʋŋ dɩɩrɩŋ jalɩŋ ma ŋaa naakieliŋ mara arɩ banɔŋ nɛ a kɛŋ patɩɩsamba, daapɛsɩŋ ma ŋaa fii, hɔɔtaalɩ-la sɩ kɛŋ bʋɔsʋŋ ma ŋaa fii, arɩ hɔpʋla kʋkaachɛbɛ kɛnɛɛ arɩ lere-la patɩɩsamba-la ŋmɛsɩŋ sɩ jaŋ vɔɔ.

¹³ Wɩɩpɔsʋŋ dɩɩrɩŋ ma jalɩŋ ŋaa naakieliŋ mara arɩ banɔŋ nɛ.

¹⁴ Patɩɩsamba-la sɩ kɛrɛ boiŋ niiŋ sɛmɛ dɔŋɔ duomuŋ ŋaa yaadɩ balɩpɛ arɩ kpaa magɛ dɔŋɔ nɛ. Daa-pɛsɩŋ ma ŋaa batori, hɔ-taalɩsɩ-la nyuŋ daapɛsɩ-la sɩ jaŋ chɩŋ ma ŋaa batori.

¹⁵ Boiŋ niiŋ sɛmɛ dɔŋɔ ma sɩɩ jʋʋ lɩga-la patɩɩsamba duomuŋ ŋaa naakieliŋ balɩpɛ arɩ kpaa magɛ dɔŋɔ nɛ. Daa-pɛsɩŋ ŋaa batori, kɔlɩɩŋ hɔ-taalɩsɩ-la sɩ kɛŋ bʋɔsʋŋ ma ŋaa batori.

¹⁶ Patɩɩsamba-la kala sɩ golli lɩga-la, ba kɛŋ gɛrɩpɛ fʋfʋlʋŋ nɛ yɛrɛ a sʋa.

¹⁷ Kɔlɩɩŋ nɛ ba kaa libi hɔ-taalɩsɩ-la sɩ kɛŋ bʋɔsʋŋ daapɛsɩ-la tʋʋ, a kɛŋ hɔpʋla libi kʋkaachɛbɛ-kɛnɛɛ arɩ lere-la ŋmɛsɩŋ sɩ jaŋ vɔɔ a hɛ daapɛsɩ-la lɛ, aŋ kɛŋ hɔpʋla taarɛ ba nyusuŋ. Daa-pɛsɩ-la kala sɩ hɛ lɩga-la lɛ, hɔpʋla nɛ ba kaa ŋaa lere-la ŋmɛsɩŋ sɩ jaŋ vɔɔ.

¹⁸ Patɩɩsaŋ-la sɩ kɛrɛ lɩga-la boiŋ niiŋ, ba kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a kaa yɛrɛ a sʋa. Gɛrɩ-sʋara nɛ sʋa. Ʋ duomuŋ ŋaa yaadɩ fii, ʋ jalɩŋ ma ŋaa yaadɩ balɩa arɩ kpaa magɛ dɔŋɔ, a nagɛ lɩga-la patɩɩsamba.

¹⁹ Daa-pɛsɩŋ ŋaa banɛsɛ, kɔlɩɩŋ hɔ-taalɩsɩ-la sɩ kɛŋ bʋɔsʋŋ ma ŋaa banɛsɛ. Hɔpʋla nɛ ba kaa ŋaa kʋkaachɛbɛ kɛnɛɛ arɩ lere-la ŋmɛsɩŋ sɩɩ vɔɔ, a kɛŋ hɔpʋla taarɛ ba nyusuŋ.

²⁰ Daa-pɛ-biisi-la kala sɩ golli Wɩa dɩ-zɔŋ-la arɩ lɩga-la, kɔlɩɩŋ nɛ ba kaa ŋaa.

Kɩalɩŋ ba sɩ kaa ŋaa Wɩa dɩ-zɔŋ-la

²¹ Kɩalɩŋ kala ba sɩ kaa ŋaa Wɩa dɩ-zɔŋ-la, lee-la Wɩa niiriŋ daga sɩ hɛ nɛ ŋɩɩ. Mosis leŋe Levi doho nɩaa nɛ dɩɩsɛ. Arɔŋ sɩ ŋaa Wɩɩsʋllɩ sɩpaalaara nanʋala Ɩtama nɛ fa ŋmʋnsɛ kɩalɩŋ kala ba sɩ dɩɩsa a bil.

²² Uri nanʋala Bɛzalɛl, Huu sɩ ŋaa ʋ nihiŋ a ŋaa Juda doho nʋʋ nɛ ŋaa kɩalɩŋ kala La TƖƖNA sɩ dagɛ Mosis,

²³ ʋ dɩ Ahɩsama nanʋala Oholiab sɩ ŋaa Daŋ doho nʋʋ. Oholiab fa ŋaa nɩsɩŋ tɩntɩnnɩ gɔgɔ nɛ a kɛŋ jɩma, a jɩŋ kɩaa kpɩɛrɩŋ, a jɩŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ kaa tɩmɩŋ wɩɩkala.

²⁴ Sɛlɩmɛ-la kala ba sɩ kaa kʋ ŋaa Wɩɩsʋlʋŋ a pɩ La TƖƖNA, dɩ ba laa kaa tɩŋ Wɩa dɩ-zɔŋ-la tɩntɩŋŋaa yuŋuŋ ŋaa kilo bʋɩ nɛ, arɩ ŋɩɩ ba sɩɩ magɩsɛ Wɩa dɩa lɛ.

²⁵ Bʋa-la lɛ ba sɩɩ dɩɩsɛ Iziral tɩŋŋaa ba sɩ tiŋ warɩpʋla-la yuŋuŋ ma ŋaa kilo bʋɩ batori arɩ zɔɔ-banɛsɛ arɩ mara arɩ fii nɛ, arɩ ŋɩɩ ba sɩɩ magɩsɛ Wɩa dɩa lɛ.

²⁶ Nʋʋkala ba fa sɩ dɩɩsa, ʋ time magɛ ŋɩɩ ba sɩɩ tiŋ Wɩa dɩa lɛ nɛ, baala-la kala sɩ yi jɩsɩŋ mara koo a kieli, fa ŋaa nɩaa bʋɩ zɔɔ-balɩdʋ arɩ batori arɩ zɔɔ-banɔŋ arɩ mahɩŋ balɩa arɩ fii nɛ.

²⁷ Hɔpʋla yuŋuŋ fa ŋaa kilo bʋɩ batori arɩ zɔɔ-banɛsɛ nɛ ba kaa libi hɔ-taalɩsɩŋ sɩ kɛŋ bʋɔsʋŋ zɔlɔ, ba nyuŋ nɛ Wɩa dɩ-zɔŋ-la daapɛsɩŋ arɩ patɩɩsaŋ-la sɩ hɛ tʋɔŋ daapɛsɩŋ kala chɩŋ, hɔ-taalɩ-bala kala yuŋuŋ ŋaa kilo mara arɩ fii arɩ banɛsɛ.

²⁸ Ba kɛŋ hɔpʋla yuŋuŋ sɩ ŋaa kilo mara arɩ fii nɛ kaa ŋaa kʋkaachɛbɛ kɛnɛɛ a hɛ daapɛsɩ-la lɛ, a taara tɔ ba nyusuŋ aŋ ŋaa lere-la patɩɩsamba ŋmɛsɩŋ sɩ jaŋ vɔɔ.

²⁹ Kɔlɩɩ-la ba sɩ kaa kʋ ŋaa Wɩɩsʋlʋŋ pɩ La TƖƖNA yuŋuŋ fa ŋaa kilo bʋɩ balɩa arɩ zɔɔ-banɛsɛ arɩ mara arɩ banɔŋ nɛ.

³⁰ Ŋɩɩ nɛ ba kɛŋ kɔlɩɩ-la a libi lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ hɔ-taalɩsɩŋ, aŋ kɛŋ ʋ tɩtɩa libi Wɩɩsʋllɩ koru-la arɩ ʋ tʋɔŋ hɔ-taala-la sɩ kɛŋ bʋɔsʋŋ a nagɛ nanchɛbɩrɩ kʋa arɩ koru-la nyuŋ tɩntɩnnɩ kɩaa.

³¹ Kɔlɩɩ-la tɩtɩa nɛ ba kaa libi hɔ-taalɩsɩ-la kala sɩ golli Wɩa dɩ-zɔŋ-la lɩga arɩ ʋ boiŋ niiŋ hɔ-taalɩsɩŋ, a pɛ Wɩa dɩ-zɔŋ-la daapɛ-biisiŋ arɩ lɩga-la daapɛ-biisiŋ lɛ.