MOSIS KƐŊ IZIRAL TƖŊŊAA LƖƖ 36 - WƖA TENIŊ

¹ Bɛzalɛl arɩ Oholiab arɩ nɩalɩŋ kala La TƖƖNA sɩ joŋ tɩntɩŋ-dosunuŋ kala tɩmɩŋ jɩma pa dɩ ba wuo tɩŋ ʋ dɩ-zɔŋ-la tɩntɩŋŋaa, maga dɩ ba tɩŋ arɩ La TƖƖNA sɩ dagɛ ŋɩɩ nɛ.”

² Ŋɩɩ nɛ Mosis yɩrɛ Bɛzalɛl arɩ Oholiab arɩ nɩalɩŋ kala La TƖƖNA sɩ joŋ tɩntɩŋŋaa jɩma pa arɩ nɩalɩŋ kala sɩ cho dɩ ba tɩŋ tɩntɩmɩɩ-la, ba kɔ dɩ ba tɩŋ.

³ Ba kɔ a laa kɩalɩŋ kala Iziral tɩŋŋaa sɩ kaa kʋ pɩ Mosis dɩ ba kaa tɩŋ Wɩa dɩ-zɔŋ-la tɩntɩŋŋaa. Ka ba ha kɛŋ ba tʋɔtɔrɛ Wɩɩsʋlʋŋ kɩaa kʋkɔ chʋchʋɔ na-kala.

⁴ Ŋɩɩ nɛ nɩalɩŋ kala sɩ kɛŋ jɩma aa tɩŋ Wɩa dɩ-zɔŋ-la tɩntɩŋŋaa leŋ ba tɩntɩŋŋaa,

⁵ aŋ bʋla pɩ Mosis, “Kɩalɩŋ nɩalɩŋ sɩ kaa kɔ dɩ la kaa tɩŋ tɩntɩmɩɩ-la La TƖƖNA sɩ dagɛla, ba yʋga kieli nɛ.”

⁶ Ŋɩɩ nɛ Mosis leŋ ba heeli ba dɩhɔnʋŋ arɩ nʋʋkala bɩra sɩ́ kʋŋ kaa kʋ pɩ La TƖƖNA a mʋʋ tɩgɛ Wɩa dɩ-zɔŋ-la tɩntɩŋŋaa lɛ. Ŋɩɩ nɛ ba pɔ dɩ nɩalɩŋ bɩra sɩ́ kɩalɩŋ kaa kɔ,

⁷ bɛɛ wɩaa kɩalɩŋ ba sɩ kaa kɔ paala yʋga kɩɩ tɩntɩmɩɩ-la nɛ.

Wɩa dɩ-zɔŋ-la

⁸ Nɩalɩŋ tʋɔŋ, gɔgɔɔ kɛŋ ŋmɛŋ-tʋlaa, ŋmɛŋ-diibelimbine, ŋmɛŋ-vachalɩŋ arɩ ŋmɛŋ-fɩaŋ a yuo gɛrɩpɛɛŋ a yɛrɛ patɩɩsamba fii a sʋa kɩaa hɛ ba lɛ ba nagɛ Wɩa tɩndaaraa a kɛŋ kɩŋkɛnsɩŋ. Ba kɛŋ patɩɩsamba-la ŋaa Wɩa dɩ-zɔŋ-la.

⁹ Ba yɛrɛ patɩɩsamba-la ba kala magɛ dɔŋɔ nɛ, kʋŋkala duomuŋ ŋaa yaadɩ fii arɩ banɛsɛ, jalɩŋ ma ŋaa yaadɩ balɩa.

¹⁰ Ba yɛrɛ patɩɩsamba-la banɔŋ a mɛrɛ dɔŋɔ lɛ, a yɛrɛ banɔŋ ma mɛrɛ dɔŋɔ lɛ.

¹¹ Ba kɛŋ ŋmɛŋ-diibelimbine a yɛrɛ jolluŋ a hɛ patɩɩsamba-la banɔŋ ba sɩ yɛrɛ mɛrɛ dɔŋɔ niipinee. Ba ŋaa ŋɩɩ tɩtɩa banɔŋ-la ma ba sɩ yɛrɛ mɛrɛ dɔŋɔ lɛ.

¹² Ba yɛrɛ ŋmɛŋ jolluŋ mahɩŋ balɩa arɩ fii a hɛ patɩɩsamba-la banɔŋ ba sɩ yɛrɛ mɛrɛ dɔŋɔ niipinee lɛ, a yɛrɛ mahɩŋ balɩa arɩ fii ma a hɛ banɔŋ-la ma ba sɩ yɛrɛ mɛrɛ dɔŋɔ niipinee lɛ. Ŋmɛŋ jollu-la chaasɛ dɔŋɔ.

¹³ Ŋɩɩ nɛ ba kɛŋ sɛlɩmɛ ŋaa kʋkaachɛbɛ kɛnɛɛ mahɩŋ balɩa arɩ fii a kɛŋ patɩɩsamba-la a vɔɔ mɛrɛ dɔŋɔ lɛ dɩ ba ŋaa kʋbala.

¹⁴ Ŋɩɩ nɛ ba kɛŋ bʋ-pʋnaa gɛrɩpɛɛŋ ŋaa patɩɩsamba fii arɩ kʋbala a kaa tɔ Wɩa dɩ-zɔŋ-la nyuŋ.

¹⁵ Patɩɩsamba-la fii arɩ kʋbala kala magɛ dɔŋɔ nɛ, ba duomuŋ ŋaa yaadɩ fii arɩ banɔŋ, ba jalɩŋ ma ŋaa yaadɩ balɩa.

¹⁶ Ba yɛrɛ patɩɩsamba-la banɔŋ mɛrɛ dɔŋɔ lɛ a bɩra joŋ balɩdʋ ma a yɛrɛ mɛrɛ dɔŋɔ lɛ.

¹⁷ Ba ŋaa ŋmɛŋ-jolluŋ mahɩŋ balɩa arɩ fii a hɛ patɩɩsamba-la banɔŋ ba sɩ joŋo mɛrɛ dɔŋɔ niipinee lɛ, a ŋaa mahɩŋ balɩa arɩ fii ma a hɛ balɩdʋ-la ma sɩ mɛrɛ dɔŋɔ niipinee lɛ.

¹⁸ Ba kɛŋ kɔlɩɩŋ ŋaa kʋkaachɛbɛ kɛnɛɛ mahɩŋ balɩa arɩ fii a hɛ patɩɩsamba-la lɛ a kaa kpere kɛŋ ʋ ŋaa kʋbala.

¹⁹ Ŋɩɩ nɛ ba kɛŋ pie-bel tenniŋ ba sɩ hɛ biriŋ ba fɩɛsɛ arɩ lɩɩ-nɛsɩŋ tenniŋ a ŋaa Wɩa dɩ-zɔŋ-la nyuŋ tɔlɔ.

²⁰ Sɔjaamɩŋ daasɩŋ sɩ tʋʋla nɛ ba kaa ŋaa Wɩa dɩ-zɔŋ-la daapɛsɩŋ.

²¹ Daa-pɛsɩ-la kʋŋkala duomuŋ ŋaa naakieliŋ bʋnɔŋ nɛ, jalɩŋ ma ŋaa naakieli-bala arɩ mʋa.

²² Daa-pɛsɩ-la kala ba sɩ kaa ŋaa Wɩa dɩ-zɔŋ-la kʋŋkala bʋbʋɔŋ kɛŋ kerikee balɩa nɛ a challɛ dɔŋɔ.

²³ Wɩa dɩ-zɔŋ-la wɩɩpɔsʋŋ nadiiŋ, ba ŋaa daapɛsɩŋ mara nɛ a hɛ.

²⁴ Ba kɛŋ hɔpʋla nɛ libi hɔ-taalɩsɩŋ sɩ kɛŋ bʋɔsʋŋ mahɩŋ balɩa, dɩ daasɩ-la wuo tʋʋ ba lɛ. Daapɛhɛ na-kala bʋbʋɔŋ kɛŋ balɩa,

²⁵ Wɩa dɩ-zɔŋ-la wɩɩpɔsʋŋ nagʋa ma ba ŋaa daapɛsɩŋ mara nɛ a hɛ,

²⁶ aŋ kɛŋ hɔpʋla libi hɔ-taalɩsɩŋ sɩ kɛŋ bʋɔsʋŋ kɩaa mahɩŋ balɩa, dɩ daapɛsɩ-la wuo tʋʋ ba lɛ. Daa-kala bʋbʋɔŋ kɛŋ hɔ-taalɩsɩ-la balɩa.

²⁷ Wɩa dɩ-zɔŋ-la wɩɩjʋʋlʋŋ dɩɩrɩŋ ba ŋaa daapɛsɩŋ balɩdʋ nɛ a hɛ.

²⁸ Wɩa dɩ-zɔŋ-la sɩpaaŋ gʋnaa lɛ daapɛsɩ-la ŋaa balɩa nɛ a mɛrɛ dɔŋɔ.

²⁹ Sɩpaaŋ gʋnaa deemba lɛ, ba ŋaa daapɛsɩ-la mɛrɛ dɔŋɔ nɛ a chɩŋ bʋbʋɔŋ a kaa jɩlaa yi nyuŋ a kala tʋʋ nenii-pɩrɩ-bala lɛ.

³⁰ Daa-pɛsɩ-la kala ŋaa chori nɛ, hɔpʋla ba sɩ kaa ŋaa hɔ-taalɩsɩ-la sɩ kɛŋ bʋɔsʋŋ daasɩ-la sɩ jaŋ tʋʋ ma ŋaa fii arɩ balɩdʋ, balɩa hɛ daa-kala bʋbʋɔŋ.

³¹ Ŋɩɩ nɛ ba kɛŋ sɔjaamɩŋ daaŋ ŋaa daa-doloo banɔŋ a hɛ Wɩa dɩ-zɔŋ-la sɛmɛ dɔŋɔ,

³² a ŋaa banɔŋ ma hɛ sɛmɛ dɔŋɔ, ka banɔŋ hɛ wɩɩjʋʋlʋŋ dɩɩrɩŋ daapɛsɩ-la nyuŋ Wɩa dɩ-zɔŋ-la sɩpaaŋ.

³³ Ŋɩɩ nɛ ba ŋaa tʋtʋɔbaanɩŋ daa-gɛsɩŋ, ʋ gɛsɛ daapɛsɩ-la nyuŋ a lɩɩ sɛmɛ dɔŋɔ a mʋ yi sɛmɛ dɔŋɔ.

³⁴ Ba kɛŋ sɛlɩmɛ nɛ taarɛ daapɛsɩ-la arɩ daa-dolo-la, aŋ libi nenii-pɩraa arɩ sɛlɩmɛ a chɛbɛ kɛŋ daa-dolo-la.

³⁵ Ba kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ nɛ a yɛrɛ patɩɩsaŋ, gɔgɔ sʋa kɩaa hɛ ba nagɛ Wɩa tɩndaaraa a kɛŋ kɩŋkɛnsɩŋ.

³⁶ Sɔjaamɩŋ daasɩŋ nɛ ba kaa ŋaa Wɩa dɩ-zɔŋ-la daaterigeba banɛsɛ a kɛŋ sɛlɩmɛ taarɛ, a kɛŋ sɛlɩmɛ ŋaa ba kʋkaachɛbɛ kɛnɛɛ, a kɛŋ hɔpʋla ŋaa hɔ-taalɩsɩ-la sɩ kɛŋ bʋɔsʋŋ daapɛsɩ-la sɩ jaŋ tʋʋ.

³⁷ Wɩa dɩ-zɔŋ-la boiŋ niiŋ ba kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ nɛ yɛrɛ patɩɩsaŋ a kɛrɛ. Nɩɩ-la sɩ jɩŋ gɛnnɩŋ sʋɔnʋŋ nɛ sʋa.

³⁸ Ba ŋaa daaterigeba ma banɔŋ arɩ ba kʋkaachɛbɛ kɛnɛɛ a kɛŋ sɛlɩmɛ taarɛ daasɩ-la nyuŋ arɩ bʋbʋɔŋ, aŋ kɛŋ kɔlɩɩŋ ŋaa hɔ-taalɩsɩ-la sɩ kɛŋ bʋɔsʋŋ, dɩ daasɩ-la tʋʋ ba lɛ.