MOSIS KƐŊ IZIRAL TƖŊŊAA LƖƖ 34 - WƖA TENIŊ

Wɩa niiriŋ tabɩɩ-taalɩ falaa

¹ Ŋɩɩ nɛ La TƖƖNA bʋla pɩ Mosis, “Yɛrɛ lɩɩsɛ tabɩɩ-taalaa balɩa dɩ ba nagɛ bumbuŋ kɩalɩŋ ŋ sɩ joŋo lo yɛrɛ, mɩ jaŋ tuuri wɩalɩŋ tɩtɩa fa sɩ hɛ bumbuŋ kɩalɩŋ lɛ a hɛ ba lɛ.

² Ŋaa siri chʋchʋɔŋ a kʋ jɩl peel-la ba sɩɩ yɩrɛ Sɩnaɩ nyuŋ, a kɛŋ ŋ tɩtɩa kɔ mɩ teeŋ nɩmɛ.

³ Nʋʋkala bɩ maga dɩ ʋ to ŋ harɩŋ kɔ koo nʋʋkala paala bɩ maga dɩ ʋ kʋ jɩl peel-la nyuŋ. Pʋsʋŋ ma paala bɩ maga dɩ ba kɔ peel-la bʋbʋɔŋ a dii yaŋ.”

⁴ Ŋɩɩ nɛ Mosis yɛrɛ lɩɩsɛ tabɩɩ-taalɩa-la balɩa ba nagɛ bumbuŋ kɩalɩŋ. Ʋ koriba a kaa jɩl peel-la nyuŋ chʋchʋɔ-fɩɛla arɩ La TƖƖNA sɩ dagʋ ŋɩɩ.

⁵ Ŋɩɩ nɛ La TƖƖNA to duoŋ-bɩlɩmbaanɩŋ lɛ a kʋ tuu ʋ teeŋ peel-la nyuŋ aŋ heeli dɩ ʋ yɩrɩŋ nɛ “La TƖƖNA.”

⁶ Ŋɩɩ nɛ ʋ to Mosis sɩpaaŋ bal aŋ bʋl, “Mɩ nɛ ma TƖƖNA, mɩ nɛ ma TƖƖNA, mɩ nɛ ŋaa Wɩa-la sɩɩ fá nɩaa nenige. Mɩ nɛ ŋaa Wɩa-la nɩaa sɩ jaŋ wuo jʋʋ mɩ lahɔrɩmɔ, mɩ baanɩŋ bɩ lɩma lɩma ka sii, a cho nɩaa kɩŋkɛŋ a kɛŋ wʋtɩtɩɩ,

⁷ a cho nɩaa arɩ ba doho doho bʋɩba, a joŋ nɩaa wʋbɔŋŋɔɔ arɩ ba wʋcheelee aa chɛba. Ama mɩ bɩ nɩalɩŋ sɩ ŋaa wɩaa chei ka leŋ pɛɩ, mɩ yie dɔgɩsɛ biiriŋ arɩ ba ma biiriŋ arɩ biiri-la ma nihee a tɩŋ ba nyɩmmaba wʋbɔŋŋɔɔ wɩaa.”

⁸ Ŋɩɩ nɛ Mosis guu tuu kpirimi aŋ chʋɔlɛ La TƖƖNA.

⁹ Ʋ sɩ, “Ou mɩ Tɩɩna, dɩ ŋ tʋɔŋ nɛ tɔrɛ mɩ nyuŋ, mɩɩ sʋlʋŋ laa la sɩpaaŋ a kɛnla mʋ. Nɩalɩŋ ŋaa tʋɔ-dol tɩmma nɛ. Ama joŋ la wʋbɔŋŋɔɔ arɩ la wʋcheelee chɛla, aŋ jonla dɩ la ŋaa ŋ nɩaa.”

¹⁰ Ŋɩɩ nɛ La TƖƖNA bʋl, “Mɩɩ bil niiŋ nɛ mɩ dɩŋ pɛgɛ. Ŋ nɩaa kala sɩpaaŋ, mɩ jaŋ ŋaa wʋmagɩlaa ha sɩ bɩ ŋaa aŋ ka tintee kala lɛ koo dʋnɩa kala lɛ. Ma dɩ nɩalɩŋ sɩɩ jʋʋ jaŋ na ŋɩɩ mɩ-na ma TƖƖNA sɩ jaŋ to ŋ lɛ a tɩŋ tɩntɩŋ-duoruŋ.

¹¹ Ma to wɩalɩŋ mɩ sɩ dagɩŋ jɩnɩŋ, mɩ jaŋ kiri Amɔrɩ tɩŋŋaa, Kɛnaŋ tɩŋŋaa, Hiti tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa ta ma teeŋ.

¹² Má pʋpɔ ma dɩ nɩalɩŋ sɩ hɛ tintee-la lɛ ma sɩɩ mʋ sɩ́ nii pɛ. Dɩ ma nɛ ŋaa ŋɩɩ, ba jaŋ to ŋɩɩ lɛ a bɛrɛ kɛmma.

¹³ Ama má giri ba vʋɩyaa korunuŋ a yɛrɛ ba tɔŋŋɔɔ tabɩa-la aŋ pɛ keri ba vene-la ba sɩɩ yɩrɛ Asɩra daasɩ-la lo.

¹⁴ Má pʋpɔ dɩ ma sɩ́ vene kala zil. Mɩ-na ma TƖƖNA yɩrɩŋ nɛ yarɩ-bieri Tɩɩna, mɩ bɩ hadɔrʋŋ ka chɛ.

¹⁵ Má pʋpɔ ma dɩ nɩalɩŋ sɩ hɛ tintee-la lɛ sɩ́ nii kala pɛ, dɩ ŋɩɩ dee, dɩ ba nɛ ŋaa ba wʋchɔrʋmɔɔ a kpʋ pʋsʋŋ pɩpɩ ba tɔŋŋɔɔ a dɩdɛnnɛba, ba jaŋ yɩrɛma dɩ ma kʋ pɛ dii ba kʋdiile-la.

¹⁶ Dɩ ma nɛ jaa ba toloo dɔnsʋŋ ma, a pɩ ma biiriŋ, tolie-la jaŋ ŋaa ba wʋchɔrʋmɔ-la a lɛrɛ ma biiriŋ dɩ ba ma mʋ a tuto ba tɔmɔ-la.

¹⁷ Má pʋpɔ ma sɩ́ hɔɔŋ kaa libi tɔŋ-kala a pɩ ma tɩtɩa.

¹⁸ Má gbigbieli gbiele-la ma sɩ yie dii boroboro sɩ bɩ sɩbʋrʋŋ kɛnɛ. Tapʋlaa balɩpɛ ma jaŋ dii boroboro sɩ bɩ sɩbʋrʋŋ kɛnɛ arɩ mɩ sɩ dagɩŋ ŋɩɩ. Ma ŋɩŋaa wɩɩŋ deeŋ chɛnɛ-la ba sɩɩ yɩrɛ Abib tʋɔŋ, bɛɛ wɩaa ʋ tʋɔŋ nɛ ma lɩɩ Ijipiti tinteeŋ lɛ.

¹⁹ Ma hambolibii bumbumba kala jaŋ ŋaa mɩ kɩaa, a pɛ ma pʋŋ doho na-kala bii-bumbuŋ sɩ ŋaa bele lɛ.

²⁰ Má kɛŋ pie-bie a time laa ma kakumo kala bii-bumbumba. Ama dɩ ma nɛ bɩ time laa, ŋɩɩ-na see ma kɛŋ ʋ baŋŋaa mɩlɩma bori. Má time laa ma hambolibii bumbumba kala. Nʋʋkala bɩ maga dɩ ʋ kɔ mɩ teeŋ arɩ na-hɩllɩŋ.

²¹ Ma jaŋ tɩŋ ma tɩntɩŋŋaa tapʋlaa balɩdʋ, ama tapʋl-pɛɛmɩŋ chɛɛŋ ʋ maga dɩ ma wiesi, dɩ ʋ nɛ paala ŋaa pɛrɩŋ bʋa lɛ koo kɩaa ŋaanɩŋ bʋa lɛ ma.

²² Má gbigbieli gbiele-la ma sɩ yie kʋŋ ma baga mɛmpɛ-falaa aa gbieli, arɩ gbiele-la ma sɩ yie gbieli jɩna dɩdɛrɩŋ dɩ ma nɛ ŋaa ma baga kɩaa dɛrɛ.

²³ Jɩna tʋɔŋ ʋ maga dɩ Iziral tɩŋŋaa baalaa kala kɔ mɩ-na ma TƖƖNA Wɩɩjarɩbakɔ sɩpaaŋ naansɩɩŋ butori, mɩ nɛ ŋaa Iziral tɩŋŋaa Wɩa.

²⁴ Mɩ jaŋ kiri tinteyee ta ma sɩpaaŋ aŋ kɛŋ ma tinteeŋ jallɛ. Nʋʋkala bɩ jaŋ wuo gɩrɩma laaʋ, dɩ ma nɩɩ kɔ mɩ-na ma TƖƖNA Wɩa sɩpaaŋ jɩna na-kala naansɩɩŋ butori.

²⁵ Dɩ ma nɛ kpʋ pʋna-kala a chɩchɛ dɩ ma joŋ chalɩŋ pɩmɛ, má pɔ dɩ ma sɩ́ kʋdiil na-kala sɩ kɛŋ sɩbʋrʋŋ pɛ kaa kɔ. Má sɩ́ leŋe dɩɩsɩŋ kiele bal gbiele kʋdiilee chɩna chʋa.

²⁶ Má kɛŋ ma baga kʋfalaa sɩ zɔmɔ woruŋ a kaa kʋ pɩ mɩ-na ma TƖƖNA Wɩa. Ma pɔ má sɩ́ bʋʋ-bie koo pie-bie chɔ ʋ naaŋ yɩlɩŋ lɛ.”

²⁷ Ŋɩɩ nɛ La TƖƖNA bʋla pɩ Mosis, “Ŋmʋnsɛ wɩaa deemba bil, bɛɛ wɩaa ba nɛ mɩ kaa bil niiŋ mɩ dɩŋ arɩ Iziral tɩŋŋaa pɛgɛ.”

²⁸ Mosis fa hɛ La TƖƖNA teeŋ wɩɩhɛyɛ arɩ tɩtaŋɩŋ tapʋlaa mahɩŋ balɩa nɛ. Ʋ bɩ kʋŋ die ʋ bɩ lɩɩ ma nyʋa. Ŋɩɩ nɛ ʋ tuuri wɩalɩŋ Wɩa sɩ kaa bil nii-la ʋ dɩ ba pɛgɛ a hɛ tabɩɩ-taalɩa-la lɛ, Wɩa sɩ bil niiri-la fii.

Mosis sɩaa ka tʋl

²⁹ Mosis sɩ lɩɩ peel-la ba sɩɩ yɩrɛ Sɩnaɩ nyuŋ kʋ tuu a kori tabɩɩ-taalɩa-la balɩa, ʋ fa bɩ jɩŋ dɩ ʋ sɩaa ka tʋl nɛ a tɩŋ ʋ dɩ La TƖƖNA sɩ bʋl wɩaa ŋɩɩ.

³⁰ Arɔŋ arɩ Iziral tɩŋŋaa kala sɩ na Mosis sɩaa ka tʋl ŋɩɩ, fawʋllʋŋ kɛmba, ba bɩ chɛ dɩ ba kpagʋ.

³¹ Ŋɩɩ nɛ Mosis yɩrɛba, Arɔŋ arɩ nɩalɩŋ sɩpaalaaraa mɩɩra kɔ Mosis teeŋ, ʋ bʋl wɩaa pɩba.

³² Ŋɩɩ harɩŋ nɛ Iziral tɩŋŋaa kala kɔ ʋ teeŋ ʋ dagɛba niiri-la kala La TƖƖNA sɩ joŋo pʋ Sɩnaɩ peel-la nyuŋ.

³³ Mosis sɩ bʋl wɩalɩŋ pɩba dɛrɛ, ʋ joŋ nyu-bɛlɛ a tɔ ʋ sɩaa.

³⁴ Ama bʋa na-kala dɩ ʋ nɩɩ mʋ La TƖƖNA sɩpaaŋ dɩ ba bʋl wɩaa, ʋ yie kɛŋ nyu-bɛlɛ-la suri nɛ, see dɩ ʋ bɩra kʋ lɩɩ. Ʋ sɩ yie kʋ lɩɩ a bʋl wɩalɩŋ La TƖƖNA sɩ bʋla pʋ a pɩ Iziral tɩŋŋaa,

³⁵ ba yie na arɩ ʋ sɩaa ka tʋl. Mosis yie bɩra joŋ nyu-bɛlɛ-la a tɔ ʋ sɩaa, see dɩ ʋʋ chɛ ʋ mʋ La TƖƖNA sɩpaaŋ ʋ kaa suri.