MOSIS KƐŊ IZIRAL TƖŊŊAA LƖƖ 32 - WƖA TENIŊ

Ba kɛŋ sɛlɩmɛ libi nɛ-bie

¹ Nɩalɩŋ sɩ na dɩ Mosis ka dienu peel-la nyuŋ ʋ bɩ kʋʋ tuu, ba sii mʋ golli Arɔŋ chu a bʋla pʋ, “Mɛ vesiŋ pɩla dɩ ba laa la sɩpaaŋ a kɛnla vɩvɛŋ. Mosis, nɩɩ-la sɩ kɛnla kaa kʋ lɩɩ Ijipiti tinteeŋ lɛ, la bɩ jɩŋ wɩɩ-la kala sɩ ŋaa ʋ lɛ.”

² Ŋɩɩ nɛ Arɔŋ bʋla pɩba, “Má chaarɛ ma haalaa, ma hambolibiisiŋ arɩ ma toloo sɛlɩmɛ dɩgɩlɩŋ-kpɛnsɩŋ kaa kʋ pɩmɛ.”

³ Ŋɩɩ nɛ nɩalɩŋ kala chaarɛ ba sɛlɩmɛ dɩgɩlɩŋ-kpɛnsɩ-la ba fa sɩ hɛ, a kaa mʋ pɩ Arɔŋ.

⁴ Ŋɩɩ nɛ ʋ laa kɩalɩŋ kala ba sɩ kaa kɔ, a kaa libi vene ʋ nagɛ nɛ-bie. Ŋɩɩ nɛ nɩalɩŋ bʋl, “Iziral tɩmma, vene-la sɩ kɛnla lɩɩ Ijipiti tinteeŋ kɔ nɛ ŋ-la.”

⁵ Arɔŋ sɩ na ŋɩɩ, ʋ saa Wɩɩsʋllɩ koruŋ vene-la sɩpaaŋ aŋ heele bʋl, “Chie la jaŋ gbieli a zil La TƖƖNA.”

⁶ Taŋ sɩ pʋla, ba sii chʋchʋɔ-fɩɛla a ŋaa kʋnyɩgaa Wɩɩsʋlʋŋ aŋ joŋ kɩaa dɔnsʋŋ ma ŋaa nii-magɛ dɔŋɔ Wɩɩsʋlʋŋ. Ŋɩɩ nɛ ba hɔnɔ dii kɩaa aŋ nyʋa aŋ sii gbigbieli aŋ ŋɩŋaa wʋlɩɩlɩŋ.

⁷ Ŋɩɩ nɛ La TƖƖNA bʋla pɩ Mosis, “Tuu lɩma, bɛɛ wɩaa nɩalɩŋ ŋ sɩ kaa lɩɩ Ijipiti tinteeŋ lɛ, ba chei ba tɩtɩa nɛ.

⁸ Ba daŋa vɩa wombii-la mɩ sɩ dagɛba nɛ, aŋ libi vene ʋ nagɛ nɛ-bie, ba kpʋ kɩaa pʋ aŋ zilu a bʋl, ‘Iziral tɩmma, vene-la sɩ kɛmma kaa kʋ lɩɩ Ijipiti tinteeŋ lɛ nɛ ŋ-la.’ ”

⁹ Ŋɩɩ nɛ La TƖƖNA bɩra bʋla pɩ Mosis, “Mɩ jɩŋ nɩaa deemba nɛ, ba ŋaa nyu-duo tɩmma nɛ.

¹⁰ Lɛɛlɛ mʋ aŋ lemmi, mɩ baanɩŋ sie nɛ woruŋ ba nyuŋ. Mɩ jaŋ cheiba, aŋ leŋ dɩ ŋ doho nɩaa pʋŋ a ŋaa tinteeŋ sɩ jaŋ kɛŋ yɩrɩ-balɩŋ.”

¹¹ Ŋɩɩ nɛ Mosis sʋl ʋ Tɩɩna Wɩa a bʋl, “Ou, mɩ Tɩɩna, bɛɛ nɛ tɩɩ ŋ na baanɩŋ a chɩchɛ dɩ ŋ chei nɩalɩŋ ŋ sɩ kaa kʋ lɩɩ Ijipiti tinteeŋ lɛ arɩ ŋ doluŋ?

¹² Ŋŋ chɛ dɩ Ijipiti tɩŋŋaa bʋl arɩ tʋɔbɔmʋŋ nɛ ŋ kaa kɛŋ ŋ nɩaa Iziral tɩŋŋaa lɩɩ dɩ ŋ kpʋba peelee tʋɔŋ, aŋ cheiba ta tinteeŋ kala lɛɛ? Leŋ dɩ ŋ baanɩŋ tuu tinteeŋ dɩ ŋ sɩ́ ŋ nɩaa chei ta.

¹³ Liisi ŋ tɩntɩnnaa Abɩraham, Aɩzɩk arɩ Jekɔb wɩaa. Ba nɛ ŋ kɛŋ ŋ tɩtɩa yɩrɩŋ kaa ŋmɩɛsa pa arɩ ŋ jaŋ leŋ dɩ ba doho nɩaa pʋŋ a nagɛ chɛnwʋlaa sɩ hɛ wɩa-nyuŋ, aŋ joŋ tinteeŋ deeŋ ma kala a pɩba dɩ ʋ ŋaa ba dɩ ba doho nɩaa kʋŋ a kaa mʋ wuu.”

¹⁴ Ŋɩɩ nɛ La TƖƖNA leŋ wʋbɔŋ-la ʋ fa sɩ bɩɩna dɩ ʋ joŋo ŋaa ʋ nɩaa lɛ.

¹⁵ Ŋɩɩ nɛ Mosis lɩɩ peel-la nyuŋ kʋ tuu a kori tabɩɩ-taalɩa-la balɩa lɛ Wɩa niiriŋ sɩ hɛ. Wɩa tuuri wɩalɩŋ hɛ ba sɛsɩŋ balɩa lɛ nɛ, sɩpaaŋ arɩ harɩŋ kala.

¹⁶ Wɩa nɛ ŋaa tabɩɩ-taalɩa-la, ʋ nɛ tuuri wɩalɩŋ ma hɛ ba lɛ.

¹⁷ Josua sɩ nɩa dɩ nɩalɩŋ ka ŋaa goŋ, ŋɩɩ nɛ ʋ bʋla pɩ Mosis, “Ʋ naga laalɩŋ nɛ sie la dɩhɔnʋŋ.”

¹⁸ Ŋɩɩ nɛ Mosis bʋl, “Goŋ-la bɩ laalɩyuori-diiri goŋ naga, ʋ bɩ yele ma ŋaa, ama ʋ nagɛ yɩɩlaa nɛ baa yɩɩ.”

¹⁹ Mosis sɩ kʋ kpagɛ ba dɩhɔnʋŋ, a na vene-la ba sɩ libe ʋ nagɛ nɛ-bie arɩ gʋala, ʋ baanɩŋ faasa sii. Ʋ joŋ tabɩɩ-taalɩa-la ʋ sɩ koro lo peel-la bʋbʋɔŋ ba kala yɛrɛ.

²⁰ Ŋɩɩ nɛ Mosis mʋ joŋ vene-la ba sɩ libe ʋ nagɛ nɛ-bie a hɛ nyiniŋ lɛ ʋ dii, ʋ lɩɩsɛ a nɔŋ ʋ bii a nagɛ munuŋ. Ʋ paa a hɛ lɩɩŋ lɛ a leŋ Iziral tɩŋŋaa kala nyʋa.

²¹ Ŋɩɩ nɛ Mosis pɩɛsɛ Arɔŋ, “Bɛɛ nɛ nɩaa deemba ŋaa ŋ lɛ, ŋ lɛrɛ wʋbɔŋ-balɩŋ deeŋ kʋ hɛ ba lɛ?”

²² Arɔŋ sɩ, “Mɩ kʋhɩaŋ, sɩ́ baanɩŋ na, ŋ jɩŋ ŋɩɩ nɩaa deemba sɩ cho wʋbɔŋŋɔɔ nɛ.

²³ Ba bʋla pɩmɛ, ‘Mɛ vesiŋ pɩla dɩ ba laa la sɩpaaŋ a kɛnla vɩvɛŋ, Mosis-la sɩ kɛnla lɩɩ Ijipiti tinteeŋ lɛ, la bɩ jɩŋ wɩɩ-la kala sɩ ŋaa ʋ lɛ.’

²⁴ Ŋɩɩ nɛ mɩ bʋla pɩba, ‘Nɩɩ-la kala sɩ kɛŋ sɛlɩmɛ kʋŋ, ʋ lɩɩsa kaa kʋ pɩmɛ.’ Ba kaa kɔ mɩ joŋo hɛ nyiniŋ lɛ a libi vene deeŋ sɩ nagɛ nɛ-bie.”

²⁵ Ŋɩɩ nɛ Mosis na arɩ nɩalɩŋ hoso, Arɔŋ ma leŋ ba yeŋŋi a ŋaa mɔmɩa ba dʋndɔŋŋɔɔ teeŋ.

²⁶ Mosis chɩŋ ba dɩhɔnʋŋ boiŋ niiŋ aŋ bʋl, “Nɩɩ-la kala sɩ jaŋ to La TƖƖNA harɩŋ, ʋ kɔ mɩ teeŋ.” Ŋɩɩ nɛ Levi doho nɩaa kala mʋ ʋ teeŋ.

²⁷ Mosis bʋla pɩba, “Ŋ-la nɛ Iziral tɩŋŋaa Wɩa bʋl, ‘Má paa ma tokobiee a chɩŋ ma dɩhɔnʋŋ boiŋ deeŋ lɛ a kpʋ ma naambiiriŋ, ma nandɔsʋŋ arɩ ma dɔnsʋŋ tɩŋŋaa a mʋ yi boiŋ nii-la dɔŋɔ.’ ”

²⁸ Ŋɩɩ nɛ Levi doho nɩalɩŋ ŋaa ŋɩɩ Mosis sɩ bʋla, a kpʋ nɩaa bʋɩ batori tapʋlɩɩ-la.

²⁹ Ŋɩɩ nɛ Mosis bʋl, “Jɩnɩŋ ma joŋ ma tɩtɩa pɩ La TƖƖNA nɛ, ʋ pɛ ma lɛ nɛ a tɩŋ ma sɩ na baanɩŋ ma biiriŋ arɩ ma naambiiriŋ nyuŋ ba sɩ vɩa La TƖƖNA, ma kpʋba.”

³⁰ Taŋ sɩ pʋla, Mosis bʋla pɩ nɩalɩŋ sɩ ka, “Ma ŋaa wʋbɔŋ bal nɛ, ama lɛɛlɛ mɩ jaŋ mʋ La TƖƖNA teeŋ a sʋlʋ, kapo, ʋ jaŋ joŋ ma wʋbɔŋ-la chɛma.”

³¹ Ŋɩɩ nɛ Mosis mɩɩra mʋ La TƖƖNA teeŋ a bʋl, “Ou, nɩaa deemba ŋaa wʋbɔŋ-bal nɛ, ba kɛŋ sɛlɩmɛ nɛ libi vene pɩ ba tɩtɩa.

³² Ama lɛɛlɛ mɩɩ sʋlʋŋ, joŋ ba wʋbɔŋ-la chɛba, dɩ ŋɩɩ dee, lɩɩsɛ mɩ yɩrɩŋ ta ŋ teŋ-la tʋɔŋ ŋ sɩ ŋmʋnsɛ ŋ nɩaa yɩraa hɛ.”

³³ Ŋɩɩ nɛ La TƖƖNA bʋla pɩ Mosis, “Nɩɩ-la kala sɩ ŋaa wʋbɔmʋŋ mɩ teeŋ, ʋ yɩrɩŋ nɛ mɩ jaŋ lɩɩsa ta mɩ teniŋ tʋɔŋ.

³⁴ Ŋɩɩ wɩaa, mʋ a kɛŋ nɩalɩŋ mʋ lee-la wɩaa mɩ sɩ bʋla pɩŋ, mɩ tɩndaara jaŋ laa ma sɩpaaŋ. Ama dɩ bʋa-la nɛ kʋ yi a magɛ dɩ mɩ dɔgɩsɛba a tɩŋ ba wʋbɔŋ-la wɩaa, mɩ jaŋ dɔgɩsɛba.”

³⁵ Ŋɩɩ nɛ La TƖƖNA joŋ nyanyal-bɔŋ a hɛ nɩalɩŋ lɛ a tɩŋ ba sɩ leŋe Arɔŋ mɛ vene-la sɩ nagɛ nɛ-bie pɩba arɩ ŋɩɩ ba sɩ zil vene-la.