MOSIS KƐŊ IZIRAL TƖŊŊAA LƖƖ 31 - WƖA TENIŊ

Bɛzalɛl arɩ Oholiab

¹ Ŋɩɩ nɛ La TƖƖNA bʋla pɩ Mosis,

² “Bee na, mɩ lɩɩsɛ Uri nanʋala Bɛzalɛl nɛ, Huu sɩ ŋaa Juda doho nʋʋ nihiŋ.

³ Mɩ joŋ mɩ Dɩma hɛ ʋ lɛ nɛ, dɩ ʋ kɛŋ jɩma, doluŋ, wʋjɩmɩŋ a jɩŋ nɩsɩŋ tɩntɩmɩɩ kala,

⁴ dɩ ʋ wuo kɛŋ jɩma-la a kɛŋ sɛlɩmɛ, hɔpʋla arɩ kɔlɩɩŋ a kaa libi kɩaa,

⁵ dɩ ʋ jɩŋ tabɩaa yɛrɩŋ arɩ ba kaa tɩmɩŋ, a jɩŋ daasɩŋ tɩntɩŋŋaa a wuo tɩŋ gɔgɩ tɩntɩmɩɩ kala.

⁶ Mɩ bɩra lɩɩsɛ Ahɩsama nanʋala Oholiab sɩ lɩɩ Daŋ doho nɩaa tʋɔŋ ma nɛ, dɩ ʋ pɛ Bɛzalɛl lɛ. Mɩ joŋ wʋjɩmɩŋ a pɩ gɔgɩa-la nɛ, dɩ ba wuo ŋaa kɩalɩŋ kala mɩ sɩ dagɩŋ dɩ ŋ ŋaa.

⁷ Ba jaŋ ŋaa lɛbɩ-la lɛ mɩ sɩ yie kɔ Iziral tɩŋŋaa teeŋ arɩ ʋ kpɩɛraa kala, mɩ niiriŋ daga-la arɩ ʋ nii-tɔlɔ,

⁸ teebʋl-la arɩ ʋ nyuŋ tɩntɩnnɩ kɩaa, a kɛŋ sɛlɩmɛ sɩ chaasa zɔŋ a ŋaa chaaŋ daaŋ arɩ ʋ nyuŋ kpɩɛraa, a ŋaa koru-la lɛ ba sɩ jaŋ nyɩnyɩgɛ kʋsʋɔrʋsʋŋ,

⁹ a ŋaa koru-la lɛ ba sɩ jaŋ nyɩnyɩgɛ kʋnyɩgaa Wɩɩsʋlʋŋ arɩ ʋ nyuŋ tɩntɩnnɩ kɩaa, a pɛ taasɩ-gbaŋ-bal-la arɩ kʋ-la nyuŋ ʋ sɩ jaŋ chɩŋ.

¹⁰ Ba jaŋ yɛrɛ Wɩa tɩntɩnnɩ gɛnnɩ-la sɩ kɛŋ yɩrɩŋ, kɩalɩŋ Arɔŋ arɩ ʋ hambolibiisiŋ sɩ jaŋ laalɛ a ŋaa Wɩɩsʋllɩ sɩpaalaaraa,

¹¹ a ŋaa Wɩɩsʋllɩ nʋʋŋ arɩ kʋsʋɔrʋsʋ-la sʋɔra sɩ sɩma ba sɩ jaŋ nyɩnyɩgɛ Wɩa dɩ-zɔŋ-la tʋɔŋ Wɩa dɩ-zɔmʋŋ. Ʋ maga dɩ ba ŋaaba ŋɩɩ arɩ mɩ sɩ dagɩŋ.”

Chɛ-wiesii-la

¹² Ŋɩɩ nɛ La TƖƖNA bʋla pɩ Mosis,

¹³ “Bʋla pɩ Iziral tɩŋŋaa dɩ ba to chɛ-wiesii-la woruŋ. Ʋ nɛ jaŋ ŋaa wɩɩ sɩ chɩŋ mɩ dɩ ma arɩ ma doho nɩaa kala pɛgɛ, dɩ ma jɩŋ arɩ mɩ nɛ ŋaa ma TƖƖNA, Nɩɩ-la sɩ leŋe ma ŋaa tʋɔpʋl tɩmma.

¹⁴ Má to chɛ-wiesii-la woruŋ, bɛɛ wɩaa ʋ ŋaa tapʋl-zɔŋ nɛ a pɩma. Nɩɩ-la kala sɩ bɩ ʋ to maga dɩ ma kpʋʋ nɛ. Koo dɩ nɩɩ-la kala nɛ tɩŋ tɩntɩmɩɩ tapʋlɩɩ-la, ʋ maga dɩ ma lɩɩsʋ ta nɛ ʋ nɩaa tʋɔŋ.

¹⁵ Ʋ maga dɩ ma joŋ tapʋlaa balɩdʋ a tɩŋ ma tɩntɩŋŋaa, ama tapʋl-pɛɩ nɛ ŋaa chɛ-wiesii-la. Ʋ ŋaa chɛ-zɔŋ nɛ a pɩ mɩ-na ma TƖƖNA. Dɩ nʋʋ nɛ tɩŋ tɩntɩŋŋaa chɛɛ-la, ʋ maga dɩ má kpʋʋ nɛ.

¹⁶ Ŋɩɩ wɩaa, Iziral tɩŋŋaa doho kala maga dɩ ba tuto chɛ-wiesii-la nɛ, a gbieli a liliisi ʋ wɩaa, dɩ ʋ ŋaa nii sɩ hɛ mɩ dɩ ba pɛgɛ a kaa mʋ wuu.

¹⁷ Ʋ jaŋ ŋaa wɩɩ a pɩŋ mɩ dɩ Iziral tɩŋŋaa pɛgɛ a kaa mʋ wuu, bɛɛ wɩaa tapʋlaa balɩdʋ nɛ mɩ-na Wɩa joŋo ŋaa wɩa-nyuŋ arɩ tinteeŋ. Tapʋl-pɛɩ mɩ bɩ tɩma, mɩ wiese nɛ.”

¹⁸ La TƖƖNA sɩ bʋl wɩaa pɩ Mosis Sɩnaɩ peel-la nyuŋ a dɛrɛ, ʋ joŋ tabɩɩ-taalɩa-la balɩa lɛ ʋ sɩ ŋmʋnsɛ ʋ niiŋ wɩaa hɛ a pɩ Mosis.