MOSIS KƐŊ IZIRAL TƖŊŊAA LƖƖ 30 - WƖA TENIŊ

Koru-la nyuŋ ba sɩ jaŋ nyɩnyɩgɛ kʋsʋɔrʋsʋŋ

¹ Kɛŋ sɔjaamɩŋ daaŋ a ŋaa Wɩɩsʋllɩ koruŋ dɩ ba nyɩnyɩgɛ kʋsʋɔrʋsʋŋ nɩmɛ.

² Leŋ dɩ ʋ kɛŋ gʋnaa banɛsɛ dɩ ba kala magɛ dɔŋɔ. Ʋ duomuŋ jaŋ ŋaa naakieliŋ kpaa magɛ dɔŋɔ, dɩ ʋ jalɩŋ ma ŋaa naakieliŋ kpaa magɛ dɔŋɔ, ka ʋ leŋiŋ ŋaa naakieli-bala, dɩ nyilliŋ hɛ gʋna-la lɛ.

³ Kɛŋ sɛlɩmɛ sɩ chaasa zɔŋ taara tɔ ʋ nyuŋ arɩ ʋ sɛsɩŋ kala arɩ nyilli-la, aŋ kɛŋ sɛlɩmɛ-la mɛ giriŋ golli koru-la kala.

⁴ Libi sɛlɩmɛ nenii-pɩraa banɛsɛ hɛ giri-la bʋbʋɔŋ dɩ sɛmɛ na-kala kɛŋ balɩa, dɩ ba nɛ chagɛ daaterigeba-la ba sɩ jaŋ kaa jujoŋ koru-la a kɩɩ.

⁵ Kɛŋ sɔjaamɩŋ daaŋ a ŋaa daaterigeba-la ba sɩ jaŋ kaa jujoŋ koru-la a kɛŋ sɛlɩmɛ taara tɔ ba kala.

⁶ Joŋ koru-la bil Wɩa dɩ-zɔŋ-la tʋɔŋ, patɩɩsaŋ-la sɩ kɛŋ Wɩa dɩ-zɔmʋŋ arɩ lee-la zɔmʋŋ sɩ bɩ magɩa kɛnɛ kaa kpaa, joŋo bil ʋ sɩpaaŋ. Patɩɩsaŋ-la harɩŋ nɛ Wɩa niiriŋ daga-la arɩ ʋ nii-tɔlɔ hɛ, nɩmɛ nɛ mɩ jaŋ kʋ chemiŋ.

⁷ Chʋchʋɔ na-kala dɩ Arɔŋ nɛ mʋa dɩ ʋ dɩsɛ chaanaa, ʋ maga dɩ ʋ nyɩgɛ kʋsʋɔrʋsʋŋ sʋɔra sɩ sɩma nɛ koru-la nyuŋ.

⁸ Dɩ ʋ nɛ bɩra mʋa dɩ ʋ nyɩgɛ chaana-la wɩɩ-mul-jʋʋlʋŋ, ʋ maga dɩ ʋ bɩra nyɩgɛ kʋsʋɔrʋsʋŋ nɛ, dɩ ba didii bʋa na-kala La TƖƖNA sɩpaaŋ a kaa mʋmʋ wuu ba doho kala lɛ.

⁹ Pɔ dɩ ŋ sɩ́ kʋsʋɔrʋ wogo nyɩgɛ koru-la nyuŋ, a sɩ́ kʋnyɩgaa Wɩɩsʋlʋŋ kɩaa koo mɩaa Wɩɩsʋlʋŋ kɩaa ma nyɩgʋ koru-la nyuŋ. Pɔ ŋ sɩ́ kʋnyʋalaa Wɩɩsʋlʋŋ kɩaa bɩsa wurisi koru-la.

¹⁰ Jɩna na-kala tʋɔŋ Arɔŋ maga dɩ ʋ kɛŋ wʋbɔŋŋɔɔ joŋo chɛnɩŋ Wɩɩsʋlʋŋ pʋna chalɩŋ nɛ a taa koruŋ nyilliŋ a pɩɩsɛ ʋ disiniŋ ta a pɩ ʋ doho nɩaa kala sɩ jaŋ to harɩŋ kɔ, bɛɛ wɩaa koru-la ŋaa mɩ-na ma TƖƖNA kʋŋ sɩ chaasa bɩ disiniŋ kɛnɛ nɛ.”

Moribie-la Iziral tɩŋŋaa sɩ jaŋ tiŋ a laa ba mɩɩsɩŋ

¹¹ Ŋɩɩ nɛ La TƖƖNA bʋla pɩ Mosis,

¹² “Dɩ ŋ nɩɩ dɩɩsɛ Iziral tɩŋŋaa, ʋ maga dɩ ŋ leŋ dɩ ba kʋŋkala kɛŋ kʋŋ nɛ kaa kʋ time pɩ La TƖƖNA a laa ʋ mɩɩsɩŋ bʋa-la lɛ ba sɩɩ dɩɩsʋ, dɩ wʋbɔŋ kala sɩ́ kʋ jʋʋba, bʋa-la lɛ ba sɩɩ dɩɩsɛba.

¹³ Nʋʋkala ba sɩ jaŋ dɩɩsɛ maga dɩ ʋ tiŋ warɩpʋla magɛ ŋɩɩ ba sɩɩ tiŋ Wɩa dɩa lɛ kpaa magɛ dɔŋɔ. Nʋʋkala maga dɩ ʋ tiŋ moribii-la a pɩmɛ nɛ.

¹⁴ Nʋʋ na-kala sɩ yi jɩsɩŋ mara koo a kieli jɩsɩŋ mara ba dɩɩsʋ maga dɩ ʋ tiŋ moribiiŋ deeŋ nɛ a pɩmɛ.

¹⁵ Summoo arɩ kɩaa tɩŋŋaa kala maga dɩ ba time magɛ dɔŋɔ nɛ a pɩ mɩ-na ma TƖƖNA a laa ba mɩɩsɩŋ.

¹⁶ Laa moribie-la Iziral tɩŋŋaa sɩ kaa kɔ dɩ ba time laa ba mɩɩsɩŋ a kaa wʋwasɛ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ. Ʋ jaŋ ŋaa wɩɩ dɩ Iziral tɩŋŋaa vɛnɛ ŋaa pɩpɩmɛ.”

Taasɩ-gbaŋ-bal-la lɛ ba sɩ jaŋ sʋsɔŋ ba tɩtɩa

¹⁷ Ŋɩɩ nɛ La TƖƖNA bʋla pɩ Mosis,

¹⁸ “Kɛŋ kɔlɩɩŋ ŋaa taasɩ-gbaŋ-balɩŋ arɩ kʋ-la nyuŋ ʋ sɩ jaŋ chɩchɩŋ, dɩ ba kaa sʋsɔŋ nɩsaa. Joŋ taasɩ-gbaŋa-la arɩ kʋ-la nyuŋ ʋ sɩ jaŋ chɩŋ a bil lɛbɩ-la lɛ mɩ sɩ yie kɔ Iziral tɩŋŋaa teeŋ arɩ koru-la pɛgɛ a ŋaa lɩɩŋ hɛ.

¹⁹ Arɔŋ arɩ ʋ hambolibiisiŋ jaŋ sʋsɔŋ ba nɩsaa arɩ ba naasɩŋ ʋ lɛ.

²⁰ Bʋa na-kala dɩ ba nɩɩ jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ, koo dɩ ba nɩɩ mʋ koru-la teeŋ, dɩ ba nyɩgɛ Wɩɩsʋlʋŋ kɩaa pɩmɛ, ba jaŋ sɔŋ ba tɩtɩa arɩ lɩɩŋ dɩ ŋɩɩ leŋ ba sɩ́ sʋʋ.

²¹ Ʋ maga dɩ ba sɔŋ ba nɩsaa arɩ ba naasɩŋ nɛ, dɩ ŋɩɩ leŋ dɩ ba sɩ́ sʋʋ, wɩɩŋ deeŋ maga dɩ ʋ ŋaa wɩɩ nɛ Arɔŋ arɩ ʋ doho nɩaa sɩ jaŋ vɛnɛ ŋɩŋaa a kaa mʋ wuu.”

Wɩa nʋʋ tɩsɩŋ

²² Ŋɩɩ nɛ La TƖƖNA bʋla pɩ Mosis,

²³ “Joŋ tegisiŋ deemba: tɩɩ-kel-zɔŋ-la ba sɩɩ yɩrɛ ‘Mɛɛ’ lɩɩŋ yuŋuŋ sɩ ŋaa kilo balɩdʋ arɩ tʋlaalɩɩ-la ba sɩɩ yɩrɛ ‘Sɩnamɔŋ’ yuŋuŋ sɩ ŋaa kilo batori, arɩ suori daaŋ ma yuŋuŋ sɩ ŋaa kilo batori,

²⁴ arɩ tɩa-la ba sɩɩ yɩrɛ Kaasɩa lɩɩŋ yuŋuŋ sɩ ŋaa kilo balɩdʋ, a pɛ olif nʋʋŋ galaŋ kʋbala lɛ.

²⁵ Joŋ kɩaa deemba guoli dɔŋɔ a ŋaa Wɩɩsʋllɩ nʋʋŋ dɩ ʋ sʋɔra sɩŋ. Leŋ dɩ nɩalɩŋ sɩ jɩŋ nʋʋŋ ŋaanɩŋ ŋaa. Ʋ jaŋ ŋaa Wɩɩsʋllɩ nʋʋ-zɔŋ mɩ teeŋ.

²⁶ Nʋʋŋ deeŋ nɛ ŋ jaŋ kaa ta lɛbɩ-la lɛ mɩ sɩ yie kɔ Iziral tɩŋŋaa teeŋ, arɩ mɩ niiriŋ daga-la lɛ,

²⁷ a pɛ teebʋl-la arɩ ʋ nyuŋ kpɩɛraa lɛ, a pɛ kʋ-la nyuŋ ba sɩ joŋ chaanaa dɩdaŋ arɩ ʋ nyuŋ kpɩɛraa arɩ koru-la lɛ ba sɩ nyɩgɛ kʋsʋɔrʋsʋŋ a pɩpɩmɛ,

²⁸ arɩ kʋnyɩgaa Wɩɩsʋlʋŋ koruŋ arɩ ʋ nyuŋ kpɩɛraa kala, a pɛ taasɩ-gbaŋ-bal-la arɩ kʋ-la nyuŋ ʋ sɩ chɩna.

²⁹ Dɩ ŋ nɛ ŋaa ŋɩɩ, ba jaŋ chaasa ŋaa kɩaa sɩ bɩ disiniŋ kɛnɛ mɩ teeŋ. Dɩ kʋŋkala nɛ digi kɩaa deemba, ʋ ma jaŋ ŋaa kʋŋ sɩ bɩ disiniŋ kɛnɛ.

³⁰ Kɛŋ nʋʋ-la tɩsɛ Arɔŋ arɩ ʋ hambolibiisiŋ a wasɛba dɩ ba ŋaa mɩ Wɩɩsʋllɩ sɩpaalaaraa.

³¹ Bʋla pɩ Iziral tɩŋŋaa, ‘Nʋʋŋ deeŋ nɛ jaŋ ŋaa Wɩɩsʋllɩ nʋʋ-la sɩ bɩ disiniŋ kɛnɛ mɩ teeŋ, ma doho kala lɛ.

³² Sɩ́ nʋʋŋ deeŋ joŋo tɩsɛ nɩwogo sɩ bɩ mɩ tɩntɩnnʋ ŋaa, a pʋpɔ ŋ sɩ́ ŋɩɩ ŋ sɩ to ŋaa nʋʋŋ deeŋ ma to a ŋaa ʋ dɔŋɔ. Nʋʋ-la bɩ disiniŋ kɛnɛ, ʋ maga dɩ ma joŋu arɩ ʋ bɩ disiniŋ kɛnɛ.

³³ Nɩɩ-la kala sɩ jaŋ chɛbɛ ŋaa nʋʋŋ deeŋ doho, koo nɩɩ-la kala sɩ jaŋ joŋ nʋʋŋ deeŋ a tɩsɛ nʋʋ sɩ bɩ mɩ Wɩɩsʋllɩ sɩpaalaara ŋaa, ʋ maga ba keru ta ʋ nɩaa tʋɔŋ.’ ”

Kʋsʋɔrʋsʋŋ

³⁴ Ŋɩɩ nɛ La TƖƖNA bɩra bʋla pɩ Mosis, “Joŋ kʋsʋɔrɩ-sɩŋŋaa deemba: tɩɩkel zɔŋŋɔɔ ba sɩɩ yɩrɛ gam-rɩsɩŋ, onika, galɩbanʋm arɩ tɩɩkel zɔŋ ba sɩɩ yɩrɛ fɩraŋkɩsɛŋ dɩ ba kala magɛ dɔŋɔ.

³⁵ Joŋ kɩaa deemba kala guoli dɔŋɔ lɛ a ŋaa tɩɩkel sʋɔrɩ-sɩŋŋaa. Leŋ dɩ nɩalɩŋ sɩ jɩŋ tʋlaalɩɩ ŋaanɩŋ ŋaa. Sɩ́ leŋe dɩ ʋ kɛŋ disiniŋ, hɛ yɩsɩŋ dɩ ʋ ŋaa kʋzɔŋ mɩ sɩaa lɛ.

³⁶ Nɔŋ kɩalɩŋ dɔnsʋŋ dɩ ba bɩɩ nʋgʋgʋ, dɩ ŋ joŋo bil mɩ niiriŋ daga-la sɩ hɛ lɛbɩ-la lɛ mɩ sɩ yie kɔ Iziral tɩŋŋaa teeŋ sɩpaaŋ. Nɩmɛ nɛ mɩ jaŋ kʋ chemiŋ. Ʋ maga dɩ kɩalɩŋ chaasa ŋaa kɩaa sɩ bɩ disiniŋ kɛnɛ ma teeŋ.

³⁷ Má pɔ ma sɩ́ ŋɩɩ ma sɩ to a ŋaa tʋlaalɩɩ deeŋ to a ŋaa tʋlaalɩɩ dɔŋ kala a pɩ ma tɩtɩa. Má joŋu dɩ ʋ ŋaa kʋŋ sɩ bɩ disiniŋ kɛnɛ a pɩ La TƖƖNA.

³⁸ Nɩɩ-la kala sɩ jaŋ chɛbɛ ŋaa tʋlaalɩɩ deeŋ doho a pɩ ʋ tɩtɩa, ʋ maga dɩ ma lɩɩsʋ ta ʋ nɩaa tʋɔŋ.”