MOSIS KƐŊ IZIRAL TƖŊŊAA LƖƖ 3 - WƖA TENIŊ

Mosis na tɩɩ-pʋgʋŋ sɩɩ dii nyiniŋ

¹ Ŋɩɩ nɛ Mosis dɩdaa ʋ hɩɩlɩ-baala Jeturo pʋsʋŋ. Jeturo nɛ ŋaa Wɩɩsʋllɩ sɩpaalaara Midiaŋ lɛ. Mosis daa pʋsʋ-la a mʋ kieli tintee-hɩlɩɩ-la a mʋ yi Wɩa peel-la ba sɩɩ yɩrɛ Sɩnaɩ.

² Nɩmɛ nɛ Wɩa tɩndaara kɛŋ ʋ tɩtɩa kʋ dagʋ tɩɩ-pugubie sɩ chol nyiŋgeliŋ tʋɔŋ. Mosis na dɩ tɩɩ-pugu-la chol nyiniŋ, ama nyiŋ-la bɩ tɩɩ-pugubie-la ka dii.

³ Ŋɩɩ nɛ Mosis sɩ, “Mɩ jaŋ mʋ kpagɛ a na wʋkpuŋkpere deeŋ, wɩɩ-la sɩ tɩɩ nyiŋ-la chol aŋ bɩ tɩɩ-pugubie-la ka dii.”

⁴ La TƖƖNA sɩ na dɩ Mosis kʋ kpagɛ dɩ ʋ na wɩɩ-la sɩɩ ŋaa, Wɩa hɛ tɩɩ-pugubie-la lɛ nɛ aŋ yɩrʋ, “Mosis, Mosis.” Ŋɩɩ nɛ Mosis sɛɩ aŋ bʋl, “Na mɩ nɛ ŋ-la.”

⁵ Ŋɩɩ nɛ Wɩa bʋla pʋ, “Chɩna magɛ ŋɩɩ, pʋpɔ ŋ bɩra sɩ́ sʋrɩsa kʋ kpagɛ. Chaarɛ ŋ nɛntɛŋŋɛɛ, bɛɛ wɩaa tintee-la lɛ ŋ sɩ chɩna ŋaa Wɩa lee nɛ.”

⁶ Ŋɩɩ nɛ La TƖƖNA bɩra bʋl, “Mɩ nɛ ŋaa ŋ naabalɩmaba Abɩraham, Aɩzɩk arɩ Jekɔb Wɩa.” Mosis sɩ nɩɩ wɩaa deemba, ʋ kɛŋ ʋ sɩaa kaa faa, bɛɛ wɩaa fawʋllʋŋ kɛnʋ nɛ, ʋ bɩ cho dɩ ʋ beŋ Wɩa.

⁷ Ŋɩɩ nɛ La TƖƖNA bʋl, “Mɩ na mɩ nɩaa sɩ faasa na hɛɛŋ ŋɩɩ nɛ Ijipiti tinteeŋ lɛ. Mɩ nɩɩ ba bunso nɛ a mʋ tɩgɛ ŋɩɩ nɩalɩŋ sɩ chaasaa dɔgɩsɛba lɛ. Hɛɛ-la ba sɩɩ na wɩaa chɩl mɩ nɛ.

⁸ Ŋɩɩ nɛ mɩ kʋ tuu dɩ mɩ laaba ta Ijipiti tɩmma-la nɩsɩŋ lɛ, a lɩɩsɛba tintee-la lɛ a kaa mʋ tintee-la sɩ zɔmɔ a kɛŋ kʋdiilee aŋ pɛ jal ma. Mɩ jaŋ joŋ Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa tinteyee a pɩba.

⁹ Mɩ nɩɩ Iziral tɩŋŋaa bunso nɛ a na dɔgɩsɩna-la ma, Ijipiti tɩŋŋaa sɩɩ dɔgɩsɛba.

¹⁰ Ŋɩɩ wɩaa mʋ, mɩɩ tɩmɩŋ nɛ Ijipiti tinteeŋ kuoro teeŋ, dɩ ŋ kɛŋ mɩ nɩaa kʋ lɩɩ Ijipiti tinteeŋ lɛ.”

¹¹ Ŋɩɩ nɛ Mosis pɩɛsɛ Wɩa, “Kʋbɛɛ nɛ ka mɩ dɩ mɩ mʋ Ijipiti tinteeŋ kuoro sɩpaaŋ a wuo kɛŋ Iziral tɩŋŋaa kaa lɩɩ Ijipiti tinteeŋ lɛ?”

¹² Ŋɩɩ nɛ Wɩa bʋl, “Mɩ jaŋ chɩŋ ŋ harɩŋ. Dɩ ŋ nɛ kɛŋ Iziral tɩmma-la kaa kɔ peeliŋ deeŋ nyuŋ dɩ ba chʋɔlɛmɛ daha, ŋɩɩ nɛ jaŋ dagɛ arɩ mɩ-na Wɩa nɛ tɩmɩŋ.”

¹³ Ŋɩɩ nɛ Mosis pɩɛsɛ Wɩa, “Ka dɩ mɩ nɛ mʋ Iziral tɩŋŋaa teeŋ a bʋla pɩba, ‘Ma nyɩmmaba Wɩa nɛ tɩmmɛ ma teeŋ,’ dɩ ba pɩɛsɛmɛ, ‘Ʋ yɩrɩŋ nɛ bɛɛ?’ Bɛɛ nɛ mɩ jaŋ bʋla pɩba?”

¹⁴ Ŋɩɩ nɛ Wɩa bʋla pɩ Mosis, “MƖ NƐ ŊAA NƖƖ-LA MƖ SƖ ŊAA. Bʋl ŋ-la pɩ Iziral tɩŋŋaa, MƖ-NA NƖƖ-LA MƖ SƖ ŊAA nɛ tɩmmɛ ma teeŋ.”

¹⁵ Ŋɩɩ nɛ Wɩa bɩra bʋla pɩ Mosis, “Mʋ bʋla pɩ Iziral tɩŋŋaa, mɩ-na ma TƖƖNA, ma naabalɩmaba Abɩraham, Aɩzɩk arɩ Jekɔb Wɩa nɛ tɩmmɛ ma teeŋ. Mɩ yɩrɩŋ nɛ ma TƖƖNA. Ŋɩɩ nɛ ma doho nɩaa jaŋ yɩyɩrɛmɛ a kaa mʋ wuu.

¹⁶ Mʋ a yɩrɛ Iziral nɩhɩasɩŋ kala a hilimi a bʋla pɩba, ‘Ma TƖƖNA Wɩa sɩ ŋaa ma naabalɩma Abɩraham, Aɩzɩk arɩ Jekɔb Wɩa nɛ kɛŋ ʋ tɩtɩa kʋ dagɛmɛ a bʋl: Mɩ na ma nɛ, a na ba sɩɩ ŋaama ŋɩɩ Ijipiti tinteeŋ lɛ.

¹⁷ Ŋɩɩ nɛ mɩ sɩ mɩ jaŋ lɩɩsɛma hɛɛŋ deeŋ lɛ Ijipiti tinteeŋ lɛ a kɛmma mʋ Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa tinteeŋ, tintee-la sɩ sɩma a kɛŋ kɩaa woruŋ.’

¹⁸ Dɩ ŋ nɛ bʋl ŋ-la, Iziral nɩhɩasɩ-la jaŋ jegile nɩɩ ŋ teeŋ. Ŋ dɩ ba jaŋ mʋ Ijipiti tinteeŋ kuoro teeŋ a bʋla pʋ, ‘La TƖƖNA Iziral tɩŋŋaa Wɩa kɛŋ ʋ tɩtɩa a dagɛla nɛ. Leŋ dɩ la vɛŋ wombiiŋ tapʋlaa batori a jʋʋ tintee-hɩlɩŋ tʋɔŋ a kpʋ pʋsʋŋ a ŋaa Wɩɩsʋlʋŋ pɩ La TƖƖNA Wɩa.’

¹⁹ Ama mɩ jɩma arɩ Ijipiti tinteeŋ kuoro bɩ jaŋ sɛɩ, see dɩ doluŋ nɛ diiu.

²⁰ Mɩ jaŋ joŋ mɩ doluŋ a fʋgɛ Ijipiti tɩŋŋaa, a ŋaa wʋmagɩlaa Ijipiti tinteeŋ lɛ. Ŋɩɩ harɩŋ, ʋ jaŋ leŋ dɩ ma mʋ.

²¹ Mɩ jaŋ leŋ dɩ Ijipiti tɩŋŋaa zilma, dɩ ma nɩɩ lɩɩ, dɩ ma sɩ́ na-hɩllɩŋ kaa mʋ.

²² Iziral tɩŋŋaa haal kala jaŋ mʋ Ijipiti tɩŋŋaa haala-la sɩ jʋʋ kpɩkpagɛba dɩɩsɩŋ arɩ haala-la sɩ hɛ ba dɩɩsɩŋ lɛ a pɩɛsa laa sɛlɩmɛ arɩ hɔpʋla kɩaa arɩ gɛnnɩŋ a joŋo laalɛ ba hambolibiisiŋ arɩ ba hantolibiisiŋ. Ŋɩɩ nɛ ma jaŋ ŋaa a laa Ijipiti tɩŋŋaa dʋa kaa viiri.”