MOSIS KƐŊ IZIRAL TƖŊŊAA LƖƖ 29 - WƖA TENIŊ

Ŋɩɩ ba sɩ jaŋ to a joŋ Wɩɩsʋllɩ sɩpaalaaraa hɛ Wɩa nɩsɩŋ lɛ

¹ Ŋ-la nɛ maga dɩ ŋ to a joŋ Arɔŋ arɩ ʋ hambolibiisiŋ hɛ mɩ-na Wɩa nɩsɩŋ lɛ dɩ ba ŋaa mɩ Wɩɩsʋllɩ sɩpaalaaraa. Kɛŋ nɛ-bel-pɔrʋŋ arɩ pie-belliŋ balɩa sɩ bɩ nyɔɔ kala kɛnɛ.

² Kɛŋ mɛmpɛ munuŋ sɩ bɩɩ nʋgʋgʋ a sɩ́ sɩbʋrʋŋ hɛ a wasɛ boroboro, a kɛŋ nʋʋŋ buu dɔnsʋŋ ma a wasɛ muŋ-gulumoo, aŋ wasɛ boroboro pɛrɛ pɛrɛ biisiŋ ma a ŋaa nʋʋŋ taa.

³ Jomba kala hɛ sime tʋɔŋ, a pɛ kɛŋ nɛ-bel-pɔrʋ-la arɩ pie-belli-la balɩa a kaa kɔ.

⁴ Kɛŋ Arɔŋ arɩ ʋ hambolibiisiŋ kaa kɔ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ a ŋaa lɩɩŋ foba.

⁵ Paa Wɩa tɩntɩnnɩ gɛnnɩ-la a joŋ gɛrɩ pʋl-duduoŋ-la a laalɛ Arɔŋ, a joŋ gɛrɩ duduoŋ-la sɩ nagɛ diibelimbine a tuu yi naasolluŋ a laala daŋ, a bɩra joŋ gɛrɩ-laala-daŋɩɩ-la arɩ bɔɩ-tɔɔrɩ gɛrɩŋ a laala pɛ a kɛŋ gɛrɩ-laala-daŋɩɩ-la gɛrɩpɛ-lɩɛɛ biisiŋ gɔgɔ sɩ sʋa a vɔɔ mɛrɛ.

⁶ Joŋ nyu-bɛlɛ a bɛ ʋ nyuŋ a joŋ ŋ sɩ kɛŋ sɛlɩmɛ libi pɩrata-la sɩ ŋaa La TƖƖNA kʋa a mɛrɛ nyu-bɛlɛ-la lɛ Arɔŋ tile lɛ.

⁷ Joŋ Wɩɩsʋllɩ nʋʋŋ a bɩsa hɛ ʋ nyuŋ lɛ.

⁸ Kɛŋ Arɔŋ hambolibiisiŋ ma kʋ lɩɩ a paa gɛrɩ-pʋl-duduosi-la a laalɛba,

⁹ a paa nyunchuuluŋ chuba, aŋ paa gɛrɩpɛlɩɛɛ biisiŋ a vɔɔ Arɔŋ arɩ ʋ hambolibiisiŋ tɩnsɩŋ. Dɩ ŋ nɛ ŋaa ŋɩɩ mɩ sɩ dagɩŋ, ŋ joŋ Arɔŋ arɩ ʋ hambolibiisiŋ hɛ mɩ-na Wɩa nɩsɩŋ lɛ nɛ. Ba dɩ ba doho nɩaa nɛ jaŋ ŋaa Wɩɩsʋllɩ sɩpaalaaraa a kaa mʋ wuu.

¹⁰ Kɛŋ nɛ-bele-la kaa kɔ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ boiŋ niiŋ a leŋ dɩ Arɔŋ arɩ ʋ hambolibiisiŋ joŋ ba nɩsaa daŋ nɛŋ-la nyuŋ lɛ.

¹¹ Kpʋ nɛŋ-la mɩ-na ma TƖƖNA sɩpaaŋ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ boiŋ niiŋ.

¹² Ŋaa nɛŋ-la chalɩŋ a kɛŋ ŋ neniiŋ tagɛ a hɛ koru-la nyilliŋ lɛ aŋ joŋ kʋkaanɩŋ bɩsa ta koru-la bʋbʋɔŋ.

¹³ Kʋɔrɛ nʋʋ-la kala sɩ tɔ nɛŋ-la tʋɔŋ kɩaa, arɩ kɩalɩŋ sɩ tɔ chʋɩŋ a chaarɛ chʋchɔ-biee arɩ nʋʋ-la sɩ tɔba a nyɩgɛ ba kala koru-la nyuŋ.

¹⁴ Ama nɛŋ-la nammɩa, ʋ teniŋ arɩ ʋ tʋɔŋ kɩaa maga dɩ ŋ kɛmba lɩɩ ma dɩhɔnʋŋ harɩŋ a nyɩgɛ, ʋ ŋaa wʋbɔŋŋɔɔ joŋo chɛnɩŋ Wɩɩsʋlɩɩ nɛ.

¹⁵ Kɛŋ pie-belli-la dɔŋɔ a leŋ dɩ Arɔŋ arɩ ʋ hambolibiisiŋ joŋ ba nɩsaa daŋ ʋ nyuŋ lɛ.

¹⁶ Kpʋ pie-bele-la a chaga laa ʋ chalɩŋ a joŋo mɩsɛ koru-la sɛsɩŋ kala.

¹⁷ Kɛŋ piesu-la keri muno muno a chɛsɛ ʋ tʋɔŋ kɩaa arɩ naasɩŋ a joŋ ba dɩ ʋ nyuŋ a pɛ nammɩa-la kala ŋ sɩ kere lɛ a hɛ dɔŋɔ.

¹⁸ Joŋ piesu-la kala nyɩgɛ koru-la nyuŋ a pɩ mɩ-na ma TƖƖNA, ʋ ŋaa kʋnyɩgaa Wɩɩsʋlɩɩ nɛ. Ba sʋɔra sɩma nɛ a pɩ mɩ-na ma TƖƖNA.

¹⁹ Kɛŋ pie-bel-kaaŋ-la a leŋ dɩ Arɔŋ arɩ ʋ hambolibiisiŋ joŋ ba nɩsaa daŋ ʋ nyuŋ lɛ.

²⁰ Kpʋ piesu-la a chaga laa ʋ chalɩŋ a taga lagɛ Arɔŋ arɩ ʋ hambolibiisiŋ nadiiŋ dɩgɩlɩŋ pɩpaarɩŋ lɛ, ba nadiiŋ nenii-baalaa arɩ ba nadiiŋ naanii-baalaa aŋ joŋ chal-la mɩsɛ koru-la sɛsɩŋ kala.

²¹ Paa chal-la dɔnsʋŋ koru-la nyuŋ arɩ Wɩɩsʋllɩ nʋʋŋ a mɩsa hɛ Arɔŋ arɩ ʋ hambolibiisiŋ arɩ ba gɛnnɩŋ lɛ. Dɩ ŋ nɛ ŋaa ŋɩɩ, ŋ jomba hɛ mɩ nɩsɩŋ lɛ nɛ.

²² Kʋɔrɛ piesu-la nʋʋŋ, nʋʋ-la sɩ tɔ dokeliŋ arɩ nʋʋ-la sɩ tɔ tʋɔŋ kɩaa arɩ kɩalɩŋ sɩ tɔ chʋɩŋ arɩ nʋʋ-la sɩ tɔ chʋchɔ-biee arɩ nʋʋ-la sɩ tɔba, a lɩɩsɛ nadiiŋ huiŋ pɛ. Piesu-la ba sɩ kaa wasɛ wɩaa a joŋ Arɔŋ arɩ ʋ hambolibiisiŋ a hɛ mɩ-na Wɩa nɩsɩŋ lɛ nɛ ŋɩɩ.

²³ Kʋdiile-la sɩ hɛ sime tʋɔŋ a chɩŋ mɩ-na ma TƖƖNA sɩpaaŋ a bɩ sɩbʋrʋŋ kɛnɛ, lɩɩsɛ boroboro kʋbala, muŋ-guluŋ bala arɩ boroboro pɛrɛ pɛrɛ biisi-la ma kʋbala.

²⁴ Joŋ kʋdiile-la hɛ Arɔŋ arɩ ʋ hambolibiisiŋ nɩsaa lɛ dɩ ba kaa je a zaarɛ. Ŋɩɩ ŋaa Wɩɩsʋlɩɩ nɛ mɩ-na ma TƖƖNA teeŋ.

²⁵ Laa kɩalɩŋ ba nɩsaa lɛ a joŋo pɛ kʋnyɩgaa Wɩɩsʋlʋŋ kɩaa lɛ ŋ sɩ jaŋ nyɩga pɩ mɩ-na ma TƖƖNA a nyɩgɛba kala koru-la nyuŋ. Ba sʋɔra sɩma nɛ a pɩ mɩ-na ma TƖƖNA.

²⁶ Piesu-la ŋ sɩ kaa wasɛ wɩaa a joŋ Arɔŋ hɛ mɩ nɩsɩŋ lɛ, keri ʋ bɔyɛ a kaa je a zaarɛ a ŋaa Wɩɩsʋlʋŋ mɩ-na ma TƖƖNA teeŋ. Ŋ toruŋ nɛ ŋɩɩ.

²⁷ Piesu-la ŋ sɩ kaa wasɛ wɩaa a joŋ Arɔŋ arɩ ʋ hambolibiisiŋ hɛ mɩ nɩsɩŋ lɛ dɩ ba tɩtɩŋ mɩ tɩntɩŋŋaa, yɩl-la ba sɩ kaa je zaarɛ a pɛ hui-la ba sɩ lɩɩsa lɛ, ba ŋaa Arɔŋ arɩ ʋ hambolibiisiŋ toruŋ nɛ, joŋo hɛ mɩ-na Wɩa nɩsɩŋ lɛ.

²⁸ Iziral tɩŋŋaa maga dɩ ba joŋ kpaalɩŋ deeŋ nɛ a pɩ Arɔŋ arɩ ʋ hambolibiisiŋ bʋa na-kala a lɩɩ ba nii-magɛ dɔŋɔ Wɩɩsʋlʋŋ kɩaa tʋɔŋ. Kpaal-la sɩ maga dɩ ba joŋo pɩ mɩ-na ma TƖƖNA nɛ ŋɩɩ.

²⁹ Wɩa tɩntɩnnɩ gɛnnɩ-la Arɔŋ sɩ yie laalɛ a ŋɩŋaa Wɩɩsʋlʋŋ jaŋ ŋaa ʋ dɩ ʋ doho nɩaa kala kɩaa. Dɩ ʋ nɛ sʋba, ba jaŋ joŋ gɛnnɩ-la laalɛ ʋ hambolibiisiŋ dɔŋɔ, a joŋ Wɩɩsʋllɩ nʋʋŋ tɩsʋ a joŋu hɛ mɩ nɩsɩŋ lɛ, dɩ ʋ ŋaa Wɩɩsʋllɩ sɩpaalaarɩ-hɩaŋ.

³⁰ Bile sɩ laa Arɔŋ nyuŋ dɩ ʋ jʋʋ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ a tɩŋ ʋ tɩntɩŋŋaa Wɩa dɩ-zɔŋ-la lɛ jaŋ laalɛ gɛnnɩ-la tapʋlaa balɩpɛ.

³¹ Joŋ pie-bele-la ŋ sɩ kaa wasɛ wɩaa a joŋ Arɔŋ arɩ ʋ hambolibiisiŋ hɛ mɩ nɩsɩŋ lɛ nammɩa chɔ lee sɩ ŋaa Wɩa dɩ-zɔŋ.

³² Arɔŋ arɩ ʋ hambolibiisiŋ jaŋ chaŋ nammɩa-la aŋ dii boroboroba-la sɩ hɛ sime-la tʋɔŋ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ boiŋ niiŋ.

³³ Ba jaŋ dii kɩalɩŋ ba sɩ kaa sʋl Wɩɩsʋlʋŋ a pɩɩsɛ ba wʋbɔŋŋɔɔ ta a wasɛ wɩaa a jomba hɛ mɩ nɩsɩŋ lɛ. Ba dʋndʋŋa nɛ jaŋ dii kɩalɩŋ, nɩwogo bɩ maga dɩ ʋ diiba, bɛɛ wɩaa ba ŋaa mɩ kʋzɔmɔ nɛ.

³⁴ Dɩ kʋdiile-la kʋŋkala nɛ chɩna dɩ taŋ pʋl, má bɩra sɩ́ dii, má joŋo nyɩgɛ, bɛɛ wɩaa ba ŋaa mɩ kʋzɔmɔ nɛ.

³⁵ Ŋaa wɩalɩŋ kala mɩ sɩ dagɩŋ dɩ ŋ ŋaa pɩ Arɔŋ arɩ ʋ hambolibiisiŋ. Joŋ tapʋlaa balɩpɛ a wasɛ wɩalɩŋ a jomba hɛ mɩ nɩsɩŋ lɛ dɩ ba ŋaa Wɩɩsʋllɩ sɩpaalaaraa.

³⁶ Tapʋlɩɩ na-kala kɛŋ nɛ-bele a sʋl wʋbɔŋŋɔɔ joŋo chɛnɩŋ Wɩɩsʋlʋŋ a pɩɩsɛ ba wʋbɔŋŋɔɔ ta. Pɩɩsɛ koru-la disiniŋ ta aŋ joŋ Wɩɩsʋllɩ nʋʋŋ taaʋ a wasʋ.

³⁷ Kɛŋ tapʋlaa balɩpɛ a pɩɩsɛ koru-la disiniŋ ta a joŋo hɛ mɩ nɩsɩŋ lɛ. Koru-la jaŋ zɔŋ mɩ sɩaa lɛ. Dɩ kʋŋkala nɛ digi koru-la, ʋ ma jaŋ ŋaa kʋzɔŋ mɩ sɩaa lɛ.

³⁸ Tapʋlɩɩ na-kala ŋ jaŋ kɛŋ pie-biisiŋ balɩa sɩ yi jɩna a kaa kʋ kpʋ pɩmɛ koru-la nyuŋ.

³⁹ Kpʋ dɔŋɔ chʋchʋɔŋ aŋ kpʋ dɔŋɔ ma wɩɩ-mul-jʋʋlʋŋ.

⁴⁰ Pie-bie-la ŋ sɩ jaŋ laa sɩpaaŋ kpʋ chʋchʋɔŋ, magɩsɛ munuŋ sɩ bɩɩ nʋgʋgʋ gbaŋa kpaa magɛ dɔŋɔ, a joŋ nʋʋŋ sɩ bɩ disiniŋ kɛnɛ lonnuŋ balɩa, a joŋ tɩɩnɛnɛɛ sɩnɩŋ ma lonnuŋ balɩa. Joŋ ba kala guoli dɔŋɔ a ŋaa kʋnyʋalaa Wɩɩsʋlʋŋ.

⁴¹ Pie-bii-lɩa-la ma ŋ sɩ jaŋ kpʋ wɩɩ-mul-jʋʋlʋŋ ŋ jaŋ magɩsɛ munuŋ, nʋʋŋ arɩ tɩɩnɛnɛɛ sɩnɩŋ ŋɩɩ tɩtɩa ŋ sɩ magɩsa chʋchʋɔŋ pie-bii-la lɛ a nyɩgɛ. Ba sʋɔra sɩma nɛ a pɩ mɩ-na ma TƖƖNA.

⁴² Ŋ dɩ ŋ doho nɩaa jaŋ vɛnɛɛ sʋl kʋnyɩgaa Wɩɩsʋlʋŋ deeŋ nɛ lɛbɩ-la lɛ mɩ-na ma Tɩɩna sɩ yie kɔ Iziral tɩŋŋaa teeŋ boiŋ niiŋ. Lee-la nɛ mɩ jaŋ kɔ ŋ teeŋ a bʋl wɩaa pɩŋ.

⁴³ Nɩmɛ nɛ mɩ jaŋ kɔ Iziral tɩŋŋaa ma teeŋ, mɩ tʋla jaŋ chaanɛ lee-la kala dɩ ʋ zɔŋ.

⁴⁴ Mɩ jaŋ wasɛ lɛbɩ-la lɛ mɩ sɩ yie kɔ Iziral tɩŋŋaa teeŋ arɩ koru-la aŋ wasɛ Arɔŋ arɩ ʋ hambolibiisiŋ a lɩɩsɛba dɩ ba ŋaa Wɩɩsʋllɩ sɩpaalaaraa.

⁴⁵ Mɩ jaŋ hɛ Iziral tɩŋŋaa teeŋ a ŋaa ba Wɩa.

⁴⁶ Ŋɩɩ nɛ ba jaŋ jɩŋ arɩ mɩ nɛ ŋaa ba TƖƖNA Wɩa sɩ kɛmba kʋ lɩɩ Ijipiti tinteeŋ lɛ dɩ mɩ hɛ ba tʋɔŋ. Mɩ nɛ ŋaa ba TƖƖNA Wɩa.