MOSIS KƐŊ IZIRAL TƖŊŊAA LƖƖ 27 - WƖA TENIŊ

Kʋnyɩgaa Wɩɩsʋlʋŋ koruŋ

¹ Kɛŋ sɔjaamɩŋ daaŋ a ŋaa kʋnyɩgaa Wɩɩsʋlʋŋ koruŋ. Ʋ kɛŋ gʋnaa banɛsɛ dɩ ba kala magɛ dɔŋɔ, dɩ ʋ duomuŋ ŋaa naakieliŋ bʋlɩa arɩ kpaa magɛ dɔŋɔ, dɩ ʋ jalɩŋ ma magɛ ŋɩɩ tɩtɩa, ka ʋ leŋiŋ ŋaa naakieli-bala arɩ kpaa magɛ dɔŋɔ.

² Kɛŋ daa-la tɩtɩa ŋaa nyilliŋ banɛsɛ a hɛ gʋna-la lɛ. Kɛŋ kɔlɩɩŋ taara tɔ ba kala.

³ Kɛŋ kɔlɩɩŋ ŋaa koru-la nyuŋ tɩntɩnnɩ kɩaa deemba: tʋɔrʋŋ pupoiŋ, safʋlba, kʋmɩsɩrɩ gbansɩŋ, lɛsɩ-la ba sɩ kaa lɩɩsɛ nammɩa arɩ nʋʋ-hallɩŋ.

⁴ Kɛŋ kɔlɩɩŋ libi kʋŋ sɩ kɛŋ bʋɔsʋŋ a nagɛ nanchɛbɩrɩ kʋa, arɩ nenii-pɩraa banɛsɛ a hɛ ʋ gʋna-la banɛsɛ lɛ.

⁵ Joŋ kɔlɩɩŋ kʋ-la sɩ kɛŋ bʋɔsʋŋ a nagɛ nanchɛbɩrɩ kʋa a tagɩlɛ koru-la tʋɔŋ, dɩ ʋ jɩla yi ʋ tʋtʋɔbaanɩŋ.

⁶ Kɛŋ sɔjaamɩŋ daaŋ ŋaa koru-la daaterigeba a kɛŋ kɔlɩɩŋ taara tɔ ba kala.

⁷ Joŋ daaterigeba-la a hɛ nenii-pɩra-la sɩ hɛ koru-la sɛsɩŋ lɛ dɩ ba kaa jujoŋ.

⁸ Kɛŋ daborusuŋ nɛ ŋaa koru-la a leŋ dɩ ʋ tʋɔŋ kɛŋ bʋa arɩ ŋɩɩ mɩ sɩ dagɩŋ peel-la nyuŋ.

Lɩga-la sɩ golli Wɩa dɩ-zɔŋ-la

⁹ Ŋaa lɩga a golli Wɩa dɩ-zɔŋ-la. Wɩɩpɔsʋŋ nadiiŋ dɩɩrɩŋ duomuŋ jaŋ ŋaa naakieliŋ mahɩŋ balɩa arɩ fii, aŋ kɛŋ gɛrɩpɛ fʋfʋlʋŋ a ŋaa ʋ patɩɩsamba.

¹⁰ Daa-pɛsɩ-la lɛ patɩɩsamba-la sɩ jaŋ sagɛ maga dɩ ba ŋaa mara, dɩ hɔ-taalɩsɩ-la nyuŋ daapɛsɩ-la sɩ jaŋ chɩŋ ma ŋaa kɔlɩɩŋ hɔ-taalɩŋ mara a kɛŋ hɔpʋla ŋaa kʋkaachɛbɛ-kɛnɛɛ arɩ lere-la patɩɩsamba-la sɩ jaŋ vɔɔ.

¹¹ Ŋɩɩ tɩtɩa nɛ ŋ jaŋ ŋaa Wɩa dɩ-zɔŋ-la wɩɩpɔsʋŋ nagʋa dɩɩrɩŋ ma lɛ.

¹² Leŋ dɩ Wɩa dɩ-zɔŋ-la lɩga wɩɩjʋʋlʋŋ dɩɩrɩŋ duomuŋ ŋaa naakieliŋ mara arɩ banɔŋ a kɛŋ patɩɩsamba, dɩ ʋ daapɛsɩŋ ŋaa fii, dɩ ʋ hɔ-taalɩsɩŋ ma ŋaa fii.

¹³ Lɩga-la wɩɩpɔsʋŋ dɩɩrɩŋ ma duomuŋ jaŋ magɛ ŋɩɩ tɩtɩa.

¹⁴ Patɩɩsaŋ-la sɩ jaŋ kɛrɛ Wɩa dɩ-zɔŋ-la lɩga boiŋ niiŋ sɛmɛ dɔŋɔ duomuŋ maga dɩ ʋ ŋaa yaadɩ balɩpɛ arɩ kpaa magɛ dɔŋɔ. Dɩ ʋ daapɛsɩŋ ma ŋaa batori, dɩ ʋ hɔɔtaalɩsɩ-la nyuŋ daapɛsɩ-la sɩ jaŋ chɩŋ ma ŋaa batori.

¹⁵ Dɩ boiŋ niiŋ sɛmɛ dɔŋɔ ma patɩɩsaŋ, daapɛsɩŋ arɩ hɔɔtaalɩsɩ-la nyuŋ daapɛsɩ-la sɩ jaŋ chɩŋ ma magɛ ŋɩɩ tɩtɩa.

¹⁶ Leŋ dɩ gɔgɔ kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ, arɩ gɛrɩpɛ fʋfʋlʋŋ, a yɛrɛ Wɩa dɩ-zɔŋ-la lɩga boiŋ niiŋ patɩɩsaŋ a sʋa, dɩ ʋ duomuŋ ŋaa yaadɩ fii. Daa-pɛsɩ-la nyuŋ ʋ sɩ jaŋ sagɛ ma ŋaa banɛsɛ, dɩ hɔ-taalɩsɩ-la nyuŋ daapɛsɩ-la sɩ jaŋ chɩŋ ma ŋaa banɛsɛ.

¹⁷ Daa-pɛsɩ-la kala sɩ jaŋ golli Wɩa dɩ-zɔŋ-la lɩga maga dɩ ŋ kɛŋ hɔpʋla nɛ ŋaa lere-la ŋmɛsɩŋ sɩ jaŋ vɔɔ a hɛ ba nyusuŋ lɛ. Kɛŋ hɔpʋla tɩtɩa ŋaa kʋkaachɛbɛ-kɛnɛɛ, aŋ kɛŋ kɔlɩɩŋ libi hɔ-taalɩsɩ-la nyuŋ daapɛsɩ-la sɩ jaŋ chɩŋ.

¹⁸ Lɩga-la duomuŋ jaŋ ŋaa naakieliŋ mahɩŋ balɩa arɩ fii, dɩ ʋ jalɩŋ ma ŋaa naakieliŋ mara arɩ banɔŋ, dɩ ʋ leŋiŋ ma ŋaa naakieliŋ bʋlɩa arɩ kpaa magɛ dɔŋɔ, a chɩŋ kɔlɩɩŋ hɔ-taalɩsɩ-la lɛ daapɛsɩ-la sɩ chɩna a kaa jɩl gɛrɩpɛ fʋfʋlʋŋ patɩɩsaŋ-la dɩdɛrɩŋ.

¹⁹ Kɩalɩŋ kala ba sɩ jaŋ kaa tɩŋ Wɩa dɩ-zɔŋ-la tɩntɩŋŋaa arɩ daa-pɛ-biisi-la kala sɩ jaŋ kɛŋ lɩga-la arɩ lɛbɩ-la a kɩɩ maga dɩ ŋ kɛŋ kɔlɩɩŋ nɛ ŋaa.

Chaanaa nʋʋŋ

²⁰ Bʋla pɩ Iziral tɩŋŋaa dɩ ba kɛŋ nʋʋŋ sɩ bɩ disiniŋ kɛnɛ kɔ, dɩ ŋ hɛ chaanaa lɛ dɩ ba didii.

²¹ Lɛbɩ-la lɛ La TƖƖNA sɩ yie kɔ Iziral tɩŋŋaa teeŋ Wɩa dɩ-zɔŋ-la tʋɔŋ Wɩa dɩ-zɔmʋŋ, Arɔŋ arɩ ʋ hambiisiŋ maga dɩ ba nyɩgɛ chaanaa bil La TƖƖNA sɩpaaŋ dɩdaanɩŋ, dɩ ba didii a kaa mʋ chʋchʋɔŋ. Wɩɩŋ deeŋ ŋaa nii nɛ a pɩ Iziral tɩŋŋaa doho kala dɩ ba tuto bʋa na-kala.”