MOSIS KƐŊ IZIRAL TƖŊŊAA LƖƖ 26 - WƖA TENIŊ

Wɩa dɩ-zɔŋ-la

¹ Kɛŋ patɩɩsamba fii ba sɩ kɛŋ gɛrɩpɛ fʋfʋlʋŋ, ŋmɛŋ-diibelimbine, ŋmɛŋ-vachalɩŋ arɩ ŋmɛŋ-fɩaŋ yuo. Leŋ dɩ gɔgɔ sʋa kɩaa sɩ nagɛ Wɩa tɩndaaraa a kɛŋ kɩŋkɛnsɩŋ a hɛ patɩɩsamba-la lɛ a ŋaa Wɩa dɩ-zɔŋ-la.

² Patɩɩsamba-la kala maga dɩ ba magɛ dɔŋɔ nɛ, dɩ ba duomuŋ ŋaa yaadɩ fii arɩ banɛsɛ, dɩ ba jalɩŋ ma ŋaa yaadɩ balɩa.

³ Yɛrɛ patɩɩsamba-la banɔŋ mɛrɛ dɔŋɔ nii-duduosuŋ dɩɩrɩŋ, a yɛrɛ banɔŋ ma mɛrɛ dɔŋɔ.

⁴ Kɛŋ ŋmɛŋ-diibelimbine, a yɛrɛ jolluŋ a mɛrɛ patɩɩsamba-la banɔŋ ŋ sɩ yɛrɛ mɛrɛ dɔŋɔ niipinee lɛ, a yɛrɛ dɔnsʋŋ ma mɛrɛ banɔŋ-la ma ŋ sɩ yɛrɛ mɛrɛ dɔŋɔ niipinee lɛ.

⁵ Yɛrɛ jolluŋ mahɩŋ balɩa arɩ fii a hɛ patɩɩsamba-la banɔŋ sɩ mɛrɛ dɔŋɔ lɛ, a yɛrɛ magɛ ŋɩɩ tɩtɩa ma mɛrɛ banɔŋ-la kʋkaanaa lɛ, dɩ ba chaasɛ dɔŋɔ.

⁶ Kɛŋ sɛlɩmɛ libi kʋkaachɛbɛ kɛnɛɛ mahɩŋ balɩa arɩ fii, a kaa chɛbɛ kɛŋ patɩɩsamba-la kala hɛ dɔŋɔ dɩ ba wuo gollo chu Wɩa dɩ-zɔŋ-la dɩ ʋ ŋaa kʋbala.

⁷ Kɛŋ bʋ-pʋnaa sʋa patɩɩsamba fii arɩ kʋbala a tɔ Wɩa dɩ-zɔŋ-la nyuŋ.

⁸ Patɩɩsamba-la fii arɩ kʋbala kala maga dɩ ba magɛ dɔŋɔ nɛ, dɩ ba duomuŋ ŋaa yaadɩ fii arɩ banɔŋ, ka ba jalɩŋ ma ŋaa yaadɩ balɩa.

⁹ Yɛrɛ patɩɩsamba-la banɔŋ mɛrɛ dɔŋɔ dɩ ba ŋaa kʋbala. Kɛŋ kʋkaanaa balɩdʋ-la ma yɛrɛ mɛrɛ dɔŋɔ aŋ kɛŋ patɩɩsaŋ-du-la kaa kpeŋ bʋlɩa a kaa kɛrɛ Wɩa dɩ-zɔŋ-la sɩpaaŋ boiŋ niiŋ.

¹⁰ Yɛrɛ jolluŋ mahɩŋ balɩa arɩ fii a hɛ patɩɩsamba-la banɔŋ ŋ sɩ yɛrɛ mɛrɛ dɔŋɔ niipinee lɛ, aŋ yɛrɛ mahɩŋ balɩa arɩ fii ma hɛ dɔŋɔ niipinee lɛ dɩ ba challɛ dɔŋɔ.

¹¹ Kɛŋ kɔlɩɩŋ ŋaa kʋkaachɛbɛ-kɛnɛɛ mahɩŋ balɩa arɩ fii a kɛŋ jollu-la kaa vɔɔ kʋkaachɛbɛ-kɛnɩa-la lɛ dɩ ba nagɛ kʋbala a tɔ.

¹² Patɩɩsamba-la kʋkaanɩŋ sɩ ka, leŋ dɩ ʋ kiele tuu tɔ Wɩa dɩ-zɔŋ-la harɩŋ.

¹³ Leŋ dɩ bʋ-pʋnaa patɩɩsamba-la kiele tuu Wɩa dɩ-zɔŋ-la sɛsɩŋ naakieliŋ kpaa magɛ dɔŋɔ. Ba nɛ jaŋ kɛrɛ Wɩa dɩ-zɔŋ-la sɛmɛ na-kala.

¹⁴ Hɛ biriŋ pie-tenniŋ lɛ dɩ ʋ fɩɛsɛ, aŋ joŋ lɩɩ-nɛsɩŋ tenniŋ a tɔ Wɩa dɩ-zɔŋ-la nyuŋ a joŋ pie-tenni-la tɔ daŋ.

¹⁵ Kɛŋ sɔjaamɩŋ daasɩŋ sɩ tʋʋla a ŋaa Wɩa dɩ-zɔŋ-la.

¹⁶ Daa-pɛhɛ kala duomuŋ jaŋ ŋaa naakieliŋ bʋnɔŋ, dɩ ʋ jalɩŋ ma ŋaa naakieli-bala arɩ mʋa.

¹⁷ Higi Wɩa dɩ-zɔŋ-la daapɛsɩŋ kala bʋbʋɔŋ dɩ ba kɛŋ kerikee balɩa a challɛ dɔŋɔ.

¹⁸ Ŋaa daapɛsɩŋ mara dɩ ba hɛ Wɩa dɩ-zɔŋ-la wɩɩpɔsʋŋ nadiiŋ.

¹⁹ Kɛŋ hɔpʋla libi hɔ-taalɩsɩŋ mahɩŋ balɩa dɩ ba kɛŋ bʋɔsʋŋ a hɛ daapɛsɩ-la mara bʋbʋɔŋ. Daa na-kala bʋbʋɔŋ jaŋ kɛŋ hɔ-taalɩsɩ-la balɩa.

²⁰ Ŋaa daapɛsɩŋ mara a hɛ Wɩa dɩ-zɔŋ-la wɩɩpɔsʋŋ nagʋa ma.

²¹ Kɛŋ hɔpʋla libi hɔ-taalɩsɩŋ mahɩŋ balɩa dɩ ba kɛŋ bʋɔsʋŋ a hɛ daapɛsɩ-la ma bʋbʋɔŋ lɛ. Daa na-kala bʋbʋɔŋ jaŋ kɛŋ hɔ-taalɩsɩŋ balɩa.

²² Wɩa dɩ-zɔŋ-la wɩɩjʋʋlʋŋ ma jaŋ kɛŋ daapɛsɩŋ balɩdʋ.

²³ Wɩa dɩ-zɔŋ-la gʋnaa jaŋ kɛŋ daapɛsɩŋ balɩa balɩa.

²⁴ Gʋna-la daapɛsɩŋ maga dɩ ba ŋaa daa-kparaa nɛ a lɩɩ bʋbʋɔŋ a kaa jɩlaa yi nyuŋ dɩ nenii-pɩrɩ-bala tʋʋ ba kala lɛ.

²⁵ Daa-pɛsɩ-la kala sɩ hɛ gʋna-la lɛ maga dɩ ba ŋaa chori nɛ, dɩ hɔpʋla hɔ-taalɩsɩ-la ma sɩ kɛŋ bʋɔsʋŋ ŋaa fii arɩ balɩdʋ. Daa na-kala bʋbʋɔŋ jaŋ kɛŋ hɔ-taalɩsɩ-la balɩa.

²⁶ Keri sɔjaamɩŋ daasɩŋ fii arɩ banɔŋ a kaa ŋaa Wɩa dɩ-zɔŋ-la daa-gɛsɛɛ, dɩ banɔŋ hɛ Wɩa dɩ-zɔŋ-la wɩɩjʋʋlʋŋ nagʋa,

²⁷ dɩ banɔŋ ma hɛ wɩɩpɔsʋŋ nadiiŋ, ka banɔŋ ma hɛ wɩɩjʋʋlʋŋ Wɩa dɩ-zɔŋ-la sɩpaaŋ.

²⁸ Tʋtʋɔbaanɩŋ daa-gɛsɩŋ maga dɩ ʋ chɩŋ Wɩa dɩ-zɔŋ-la sɛmɛ dɔŋɔ lɛ a mʋ yi sɛmɛ dɔŋɔ.

²⁹ Kɛŋ sɛlɩmɛ taarɛ daapɛsɩ-la kala, aŋ ŋaa sɛlɩmɛ nenii-pɩraa a hɛ daapɛsɩ-la lɛ. Ba lɛ nɛ daa-gɛsɩa-la jaŋ tʋʋ. Kɛŋ sɛlɩmɛ taara tɔ daa-gɛsɩa-la ma.

³⁰ Ŋaa Wɩa dɩ-zɔŋ-la dɩ ʋ nagɛ ŋɩɩ mɩ sɩ dagɩŋ peel-la nyuŋ.

³¹ Kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a yuo patɩɩsaŋ a leŋ dɩ nʋʋ sɩ jɩŋ kɩaa sʋɔnʋŋ woruŋ sʋa kɩaa sɩ nagɛ Wɩa tɩndaaraa a kɛŋ kɩŋkɛnsɩŋ a hɛ ʋ lɛ.

³² Kɛŋ sɔjaamɩŋ daaŋ ŋaa daapɛsɩŋ banɛsɛ a kɛŋ sɛlɩmɛ taarɛ ba kala. Ŋaa ba kʋkaachɛbɛ-kɛnɛɛ ma arɩ sɛlɩmɛ, aŋ kɛŋ hɔpʋla ŋaa hɔ-taalɩsɩŋ dɩ ba kɛŋ bʋɔsʋŋ, dɩ daasɩ-la chɩŋ ba nyuŋ aŋ joŋ patɩɩsaŋ-la sagɛ.

³³ Patɩɩsaŋ-la maga dɩ ʋ sagɛ kʋkaachɛbɛ-kɛnɩa-la lɛ nɛ, a kɛŋ Wɩa dɩ-zɔmʋŋ arɩ Wɩa dɩ-zɔŋ-la, lee-la zɔmʋŋ sɩ bɩ magɩa kɛnɛ kaa kpaa. Dɩ ŋ joŋ Wɩa niiriŋ daga-la jʋʋ bil Wɩa dɩ-zɔŋ-la lee-la zɔmʋŋ sɩ bɩ magɩa kɛnɛ patɩɩsaŋ-la harɩŋ.

³⁴ Joŋ Wɩa niiriŋ daga-la nii-tɔlɔ tɔ.

³⁵ Joŋ teebʋl-la bil Wɩa dɩ-zɔŋ-la tʋɔŋ Wɩa dɩ-zɔmʋŋ wɩɩpɔsʋŋ nagʋa dɩɩrɩŋ, aŋ joŋ chaaŋ daaŋ a bil wɩɩpɔsʋŋ nadiiŋ dɩɩrɩŋ dɩ ba chɩna challɛ dɔŋɔ.

³⁶ Leŋ nɩɩ-la sɩ jɩŋ gɛnnɩŋ sʋɔnʋŋ kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a yɛrɛ patɩɩsaŋ a sʋa kɩaa hɛ ʋ lɛ, a joŋo kɛrɛ Wɩa dɩ-zɔŋ-la boiŋ niiŋ.

³⁷ Kɛŋ sɔjaamɩŋ daaŋ ŋaa daapɛsɩŋ banɔŋ, a kɛŋ sɛlɩmɛ taara tɔ a kɛŋ sɛlɩmɛ ŋaa kʋkaachɛbɛ-kɛnɛɛ, dɩ patɩɩsaŋ sagɛ ba lɛ. Kɛŋ kɔlɩɩŋ ŋaa hɔ-taalɩsɩŋ banɔŋ dɩ daapɛsɩ-la chɩŋ ba nyuŋ.