MOSIS KƐŊ IZIRAL TƖŊŊAA LƖƖ 25 - WƖA TENIŊ

Wɩɩsʋlʋŋ kɩalɩŋ ba sɩ jaŋ kaa mʋ Wɩa dɩ-zɔŋ-la

¹ La TƖƖNA bʋla pɩ Mosis,

² “Bʋla pɩ Iziral tɩŋŋaa dɩ ba kɛŋ kɩaa kʋ ŋaa Wɩɩsʋlʋŋ pɩmɛ, laa kʋ-la kala nʋʋkala sɩ cho dɩ ʋ joŋo pɩmɛ.

³ Wɩɩsʋllɩ kɩalɩŋ ŋ sɩ jaŋ laa ba teeŋ nɛ ŋ-la: sɛlɩmɛ, hɔpʋla arɩ kɔlɩɩŋ,

⁴ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ, gɛrɩpɛ fʋfʋlʋŋ, bʋ-pʋnaa,

⁵ pie-bel tenniŋ ba sɩ hɛ biriŋ ʋ fɩɛsɛ, lɩɩ-nɛŋ tenniŋ arɩ sɔjaamɩŋ daaŋ,

⁶ chaanaa nʋʋŋ, arɩ tegisi-la ba sɩ jaŋ kaa ŋaa Wɩɩsʋllɩ nʋʋŋ arɩ tegisi-la ba sɩ jaŋ kaa ŋaa kʋsʋɔrʋsʋŋ sʋɔra sɩ sɩma,

⁷ tabɩɩ-tʋlaa ba sɩɩ yɩrɛ ɔnɩs arɩ tabɩɩ-zɔŋŋɔɔ dɔnsʋŋ ba sɩ jaŋ joŋo hɛ gɛrɩ-laala-daŋɩɩ-la arɩ bɔɩ-tɔɔrɩ gɛrɩ-la lɛ.

⁸ Leŋ dɩ nɩalɩŋ ŋaa lee sɩ zɔmɔ pɩmɛ, dɩ mɩ hɛ ba tʋɔŋ.

⁹ Ŋaa mɩ dɩ-zɔŋ-la arɩ ʋ tʋɔŋ kpɩɛraa kala dɩ ba nagɛ ŋɩɩ tɩtɩa mɩ sɩ jaŋ dagɩŋ.

Wɩa niiriŋ daga

¹⁰ Kɛŋ sɔjaamɩŋ daaŋ ŋaa Wɩa niiriŋ daga, dɩ ʋ duomuŋ ŋaa naakieli-bala arɩ mʋa, dɩ ʋ jalɩŋ ma ŋaa naakieliŋ kpaa magɛ dɔŋɔ arɩ mʋa, dɩ ʋ leŋiŋ ma ŋaa naakieliŋ kpaa magɛ dɔŋɔ arɩ mʋa.

¹¹ Kɛŋ sɛlɩmɛ sɩ chaasa zɔŋ a taarɛ ʋ tʋɔŋ arɩ ʋ harɩŋ kala aŋ kɛŋ ʋ tɩtɩa mɛ golli.

¹² Kɛŋ sɛlɩmɛ libi nenii-pɩraa banɛsɛ, a joŋo hɛ naasɩŋ banɛsɛ-la sɩ hɛ ʋ bʋbʋɔŋ lɛ. Balɩa jaŋ hɛ sɛmɛ dɔŋɔ, dɩ balɩa ma hɛ sɛmɛ dɔŋɔ.

¹³ Keri sɔjaamɩŋ daaterigeba, a kɛŋ sɛlɩmɛ taarɛba.

¹⁴ Joŋ daaterigeba-la tʋʋ nenii-pɩra-la sɩ hɛ daga-la sɛsɩŋ lɛ dɩ ba kɛŋ ba lɛ aa joŋ daga-la.

¹⁵ Daaterigeba-la jaŋ tʋʋ daga-la nenii-pɩra-la lɛ. Ʋ bɩ maga dɩ ba kɛmba lɩɩsɛ.

¹⁶ Mɩ jaŋ joŋ tabɩɩ-taalɩa-la balɩa lɛ mɩ sɩ ŋmʋnsɛ mɩ niiŋ wɩalɩŋ hɛ a pɩŋ dɩ ŋ jomba hɛ daga-la tʋɔŋ.

¹⁷ Kɛŋ sɛlɩmɛ sɩ chaasa zɔŋ ŋaa daga-la nii-tɔlɔ, dɩ ʋ duomuŋ ŋaa naakieli-bala arɩ mʋa, dɩ ʋ jalɩŋ ma ŋaa naakieliŋ kpaa magɛ dɔŋɔ arɩ mʋa.

¹⁸ Kɛŋ sɛlɩmɛ sɩ chaasa zɔŋ libi kɩaa balɩa dɩ ba nagɛ Wɩa tɩndaaraa a kɛŋ kɩŋkɛnsɩŋ dɩ ba chɩŋ daga-la nii-tɔlɔ nyuŋ.

¹⁹ Kʋ-la ŋ sɩ kaa libi daga-la nii-tɔlɔ tɩtɩa nɛ maga dɩ ŋ kaa libi kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ. Dɔŋɔ jaŋ chɩŋ sɛmɛ dɔŋɔ, dɩ dɔŋɔ ma chɩŋ sɛmɛ dɔŋɔ.

²⁰ Kɩalɩŋ ŋ sɩ jaŋ libi dɩ ba nagɛ Wɩa tɩndaaraa a kɛŋ kɩŋkɛnsɩŋ, maga dɩ ba kɩŋkɛnsɩŋ jɛrɛ a tɔ daga-la nii-tɔlɔ, ka ba sɩaa chaasɛ dɔŋɔ a bibeŋ daga-la nii-tɔlɔ.

²¹ Joŋ mɩ niiŋ wɩalɩŋ mɩ sɩ ŋmʋnsa hɛ tabɩɩ-taalɩa-la balɩa lɛ a pɩŋ a hɛ daga-la tʋɔŋ a joŋ daga-la nii-tɔlɔ tɔ.

²² Nɩmɛ nɛ mɩ jaŋ kɔ ŋ teeŋ, mɩ jaŋ hɛ kɩalɩŋ balɩa-la sɩ nagɛ Wɩa tɩndaaraa a kɛŋ kɩŋkɛnsɩŋ pɛgɛ daga-la nyuŋ. Nɩmɛ nɛ mɩ jaŋ dagɩŋ wɩalɩŋ kala ŋ sɩ jaŋ bʋla pɩ Iziral tɩŋŋaa dɩ ba tuto.

Wɩa dɩ-zɔŋ-la teebʋl

²³ Kɛŋ sɔjaamɩŋ daaŋ ŋaa teebʋl, dɩ ʋ duomuŋ ŋaa naakieli-bala, dɩ ʋ jalɩŋ ma ŋaa naakieliŋ kpaa magɛ dɔŋɔ, dɩ ʋ leŋiŋ ŋaa naakieliŋ kpaa magɛ dɔŋɔ arɩ mʋa.

²⁴ Kɛŋ sɛlɩmɛ sɩ chaasa zɔŋ taarɛ ʋ kala aŋ kɛŋ sɛlɩmɛ mɛ giriŋ a golli.

²⁵ Ŋaa giriŋ dɩ ʋ jalɩŋ magɛ nachala a golli teebʋl-la, a kɛŋ sɛlɩmɛ biere golli.

²⁶ Kɛŋ sɛlɩmɛ libi nenii-pɩraa banɛsɛ a joŋo hɛ teebʋl-la gʋnaa lɛ naasɩŋ leree.

²⁷ Nenii-pɩra-la maga dɩ ba hɛ a kpagɛ giri-la nɛ a chaga kɛŋ daaterigeba-la ba sɩ kaa jujoŋ teebʋl-la.

²⁸ Keri sɔjaamɩŋ daasɩŋ a kaa ŋaa daaterigeba-la a joŋ sɛlɩmɛ taara tɔ ba kala. Daasɩ-la lɛ nɛ ba jaŋ kɛŋ a jujoŋ teebʋl-la.

²⁹ Kɛŋ sɛlɩmɛ sɩ chaasa zɔŋ ŋaa teebʋl-la nyuŋ pɩrataba, dasɔsʋŋ, tagɩsɩŋ arɩ gbansɩŋ ba sɩ jaŋ kaa ta lɩɩŋ.

³⁰ Má joŋ boroboro-la ma sɩ jaŋ kaa ŋaa Wɩɩsʋlʋŋ pɩpɩmɛ a daŋ teebʋl-la nyuŋ dɩ ʋ chɩŋ mɩ sɩpaaŋ bʋa na-kala.

Chaaŋ daaŋ

³¹ Kɛŋ sɛlɩmɛ sɩ chaasa zɔŋ libi chaanaa sɩɩ daŋ kʋ-la nyuŋ, ʋ bʋbʋɔ-chala arɩ ʋ kerikee kala. Ʋ nyʋnyʋalʋ-la sɩ nagɛ tɩɩ-lugoo arɩ tɩɩfɩɩlaa sɩ pɔsɔ dɩ ba kala mɛrɛ dɔŋɔ a ŋaa kʋbala.

³² Chaaŋ daaŋ-la nyuŋ maga dɩ ʋ kɛŋ kerikee balɩdʋ, dɩ batori hɛ sɛmɛ dɔŋɔ, dɩ batori ma hɛ sɛmɛ dɔŋɔ.

³³ Chaaŋ daa-la kerikee balɩdʋ-la lɛ, libi nyʋnyʋalʋsʋŋ balɩdʋ dɩ ba nagɛ fʋfʋlʋŋ nɛnɛɛ sɩ pɔsɛ. Keriki kala kɛŋ nyʋnyʋala, dɩ batori hɛ sɛmɛ dɔŋɔ, dɩ batori ma hɛ sɛmɛ dɔŋɔ.

³⁴ Chaaŋ daa-la nyuŋ kpɩɛraa maga dɩ ba nagɛ fʋfʋlʋŋ fɩɩlaa sɩ lugo aŋ pɔsɛ nɛ, ba kɩaa banɛsɛ.

³⁵ Kɩalɩŋ sɩ nagɛ tɩɩfɩɩlaa sɩ lugo aŋ pɔsɛ kʋbala kala maga dɩ ʋ hɛ kerike-la balɩdʋ sɩ hɛ chaaŋ daaŋ lɛ nɛ, kerikee balɩa na-kala pɛgɛ maga dɩ dɔŋɔ hɛ nɩmɛ.

³⁶ Kerike-la arɩ kɩalɩŋ sɩ nagɛ tɩɩ-fɩɩlɩŋ sɩ lugo, sɛlɩmɛ sɩ chaasa zɔŋ nɛ maga dɩ ŋ kaa libi, dɩ ba kala nagɛ dɔŋɔ.

³⁷ Libi chaanaa balɩpɛ, a joŋo sagɛ kerike-la nyuŋ dɩ ba pʋlʋmʋŋ chaanɛ ʋ sɩpaaŋ.

³⁸ Kɛŋ sɛlɩmɛ sɩ chaasa zɔŋ libi kʋ-la lɛ ŋ sɩ jaŋ joŋ chaaŋ-ŋmɛnɩŋ hɛ a mɩlɩma ta ʋ tutuu aŋ jɩjɩl.

³⁹ Magɩsɛ sɛlɩmɛ sɩ chaasa zɔŋ dɩ ʋ yuŋuŋ ŋaa kilo mara arɩ fii arɩ banɔŋ a kaa libi chaaŋ daaŋ arɩ ʋ tɩntɩnnɩ kɩaa kala.

⁴⁰ Libi kɩalɩŋ dɩ ba nagɛ ŋɩɩ mɩ sɩ dagɩŋ peel-la nyuŋ.