MOSIS KƐŊ IZIRAL TƖŊŊAA LƖƖ 20 - WƖA TENIŊ

La TƖƖNA niiriŋ fii-la

¹ Ŋɩɩ nɛ Wɩa bʋl wɩaa deemba,

² “Mɩ-na nɛ ma TƖƖNA Wɩa. Mɩ nɛ kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.

³ Ma bɩ maga dɩ ma kɛŋ wɩa kala a pɛ mɩ-na Wɩa lɛ.

⁴ Ma pɔ má sɩ́ tɔŋ kala mɛ a pɩ ma tɩtɩa dɩ ʋ nagɛ wɩa-nyuŋ kʋŋ, koo tinteeŋ nyuŋ kʋŋ, koo lɩɩŋ tʋɔŋ kʋŋ.

⁵ Má pɔ dɩ ma sɩ́ ba sɩpaaŋ kpirimi koo a zilba arɩ ba ma ŋaa Wɩa nɛ. Mɩ nɛ ma TƖƖNA Wɩa, a ŋaa Wɩa sɩ kɛŋ hadɔrʋŋ. Nɩalɩŋ sɩ bɛrɛmɛ, mɩ jaŋ dɔgɩsɛba. Mɩ jaŋ dɔgɩsɛ biiriŋ arɩ nihee arɩ nihi-lɩɛrɛba a tɩŋ ba nyɩmmaba wʋbɔŋŋɔɔ wɩaa.

⁶ Ama nɩalɩŋ sɩ chomi a tuto mɩ niiriŋ, mɩ jaŋ dagɛ mɩ chonuŋ a pɩba arɩ ba biiriŋ arɩ ba nihee arɩ ba nihi-lɩɛrɛba a kaa mʋ wuu.

⁷ Ma pɔ má sɩ́ mɩ yɩrɩŋ yɩrʋ pɛɩ. Mɩ-na ma TƖƖNA Wɩa jaŋ dɔgɩsɛ nɩɩ-la kala sɩ yɩrɛ mɩ yɩrɩŋ pɛɩ.

⁸ Máa liisi chɛ-wiesii-la wɩaa dɩ ʋ ŋaa tapʋl-zɔŋ a pɩ mɩ-na ma TƖƖNA.

⁹ Má tɩŋ ma tɩntɩŋŋaa tapʋlaa balɩdʋ pɛgɛ.

¹⁰ Ama tapʋl-pɛɩ chɛɛŋ ŋaa chɛ-wiesii nɛ a pɩ mɩ-na ma TƖƖNA. Má sɩ́ tɩntɩmɩɩ kala tɩŋ, ma biiriŋ, ma nʋhʋɔraa, ma pʋsʋŋ arɩ ma dɩa tɩntɩnnaa kala, baalaa arɩ haalaa.

¹¹ Tapʋlaa balɩdʋ nɛ mɩ-na ma TƖƖNA joŋo ŋaa wɩa-nyuŋ arɩ tinteeŋ, mʋgʋ-balaa arɩ kɩalɩŋ kala sɩ hɛ ba lɛ, tapʋl-pɛɩ chɛɛŋ nɛ mɩ wiesi. Ŋɩɩ nɛ mɩ joŋ chɛ-wiesiŋ deeŋ a wasʋ, a leŋ ʋ ŋaa tapʋl-zɔŋ.

¹² Má zizil ma naamba arɩ ma nyɩmmaba, dɩ mɩ-na ma TƖƖNA leŋ dɩ ma mɩɩsɩŋ duomi tintee-la lɛ mɩ sɩ jaŋ joŋo pɩma.

¹³ Má pɔ dɩ ma sɩ́ nʋʋ kpʋ.

¹⁴ Má sɩ́ nʋʋ haal chɛ.

¹⁵ Má sɩ́ gaa.

¹⁶ Má pɔ dɩ ma sɩ́ wɩaa nyɩɛ a joŋ cheeriŋ pɩ ma dɔnsʋŋ tɩŋŋaa.

¹⁷ Má pɔ dɩ ma sɩ́ ma dɔnsʋŋ tɩŋŋaa kɩaa hɩɛnʋ: ba dɩɩsɩŋ, ba haalaa, ba dɩa tɩntɩnnaa baalaa koo haalaa, ba nɛsɩŋ koo ba kakusuŋ, koo kʋŋ na-kala ba sɩ kɛnɛ.”

¹⁸ Nɩalɩŋ sɩ na dɩ taŋ lɩgɩsa aŋ kpɩa a nɩɩ ba sɩ ŋmʋʋ nyile a na peel-la sɩ tɔ nyʋɔsʋŋ, fawʋllʋŋ kɛmba ba chichel. Ŋɩɩ nɛ ba sʋʋsa mʋ chɩŋ dɩ-bolii,

¹⁹ aŋ bʋla pɩ Mosis, “Ŋ tɩtɩa bʋl wɩaa pɩpɩla, la jaŋ jegile nɩɩ. Sɩ́ leŋe dɩ Wɩa nɛ bʋla pɩla, dɩ ŋɩɩ dee, la jaŋ sʋʋ.”

²⁰ Ŋɩɩ nɛ Mosis bʋla pɩba, “Má sɩ́ leŋe dɩ fawʋllʋŋ kɛmma, Wɩa kɔ dɩ ʋ magɩsɛma a na nɛ dɩ ma fɩfáʋ a sɩ́ wʋbɔŋ wɩaa ŋaa.”

²¹ Ŋɩɩ nɛ nɩalɩŋ chɩŋ dɩ-bolii, ka Mosis mʋ yi biriŋ lim-la tʋɔŋ Wɩa sɩ hɛ.

Vesiŋ arɩ korunuŋ

²² Ŋɩɩ nɛ La TƖƖNA bʋla pɩ Mosis, “Bʋla pɩ Iziral tɩŋŋaa: Ma tɩtɩa na mɩ sɩ lɩɩ wɩa-nyuŋ kʋ tuu bʋl wɩaa pɩma ŋɩɩ nɛ.

²³ Má pʋpɔ ma sɩ́ vene kala ŋaa a pɛ mɩ lɛ. Má pʋpɔ ma sɩ́ sɛlɩmɛ koo hɔpʋla kaa libi vene kala aa zilu.

²⁴ Má kɛŋ tɩɛrɩŋ saa Wɩɩsʋllɩ koruŋ pɩmɛ. Nɩmɛ nɛ ma jaŋ kɛŋ ma piesee, bʋʋnaa arɩ ma nɛsɩŋ kʋ ŋaa ma kʋnyɩgaa Wɩɩsʋlʋŋ arɩ ma nii-magɛ dɔŋɔ Wɩɩsʋlʋŋ pɩmɛ. Lee na-kala mɩ sɩ dagɛma dɩ ma dɩdɛnnɛmɛ, mɩ jaŋ kɔ lee-la a pɛ ma lɛ.

²⁵ Dɩ ma nɩɩ chɛ dɩ ma kɛŋ tabɩaa saa Wɩɩsʋllɩ koruŋ pɩmɛ, má sɩ́ tabɩa-la wasa ta. Dɩ ma nɛ kɛŋ ma tɩntɩnnɩ kʋŋkala chɩchɛ dɩ ma wasɛba, maa birisiba nɛ ŋɩɩ.

²⁶ Má sɩ́ lusuŋ-choluŋ hɛ a to jɩjɩl koru-la, dɩ ma nɛ ŋaa ŋɩɩ, ma jaŋ kɛŋ ma yarɩ-biree nyɩɩsɛ.