MOSIS KƐŊ IZIRAL TƖŊŊAA LƖƖ 2 - WƖA TENIŊ

Ba lʋl Mosis

¹ Bʋa kʋbala lɛ, Levi doho nɩaa baal kʋbala nɛ jaa Levi doho nɩaa tolo.

² Tolo-la kɛŋ luoruŋ a lʋl hambolibie. Ʋ sɩ na dɩ bile zɔmɔ, ʋ joŋu faa chɛnsɩŋ batori.

³ Ama ʋ sɩ na dɩ ʋ bɩra bɩ bile wuo kaa faa, ʋ joŋ sime a taarɛ ʋ tʋɔŋ arɩ keliŋ, a joŋ bile hɛ a kɛŋ kʋa tɔ a kaa mʋ fuo-la ba sɩɩ yɩrɛ Naayɩl niiŋ, a joŋo faa yaŋ tʋɔŋ.

⁴ Bii-mulo-la dɩhaala mʋ chɩŋ dɩ-bolii aŋ bibeŋ dɩ ʋ na wɩɩ-la sɩ jaŋ ŋaa bile lɛ.

⁵ Ŋɩɩ nɛ Ijipiti tinteeŋ kuoro tolo tuu fuo-la dɩ ʋ fo lɩɩŋ, ka ʋ ketiee gʋgɔllɛ fuo-la niiŋ. Ijipiti tinteeŋ kuoro tolo-la sɩ na sime-la fuo-la niiŋ yaŋ tʋɔŋ, ʋ tɩŋ ʋ ketie-la dɔŋɔ dɩ ʋ mʋ joŋ sime-la kɔ.

⁶ Ʋ kaa kɔ kuoro tolo-la suri dɩ bie hɛ sime-la tʋɔŋ a yiyel. Ŋɩɩ nɛ bile nisusuŋ kɛnʋ ʋ bʋl, “Hiburu tɩmma-la dɔŋɔ bie nɛ ŋ-la.”

⁷ Ŋɩɩ nɛ bile dɩhaal-la sɩ chɩna bibeŋ pɩɛsɛ Ijipiti tinteeŋ kuoro tolo-la, “Mɩ mʋ yɩrɛ Hiburu tɩŋŋaa haala-la dɔŋɔ kɔ dɩ ʋ beŋ bile pɩŋ?”

⁸ Ŋɩɩ nɛ Ijipiti tinteeŋ kuoro tolo sɛɩ arɩ ʋ mʋ kɛŋ Hiburu tɩŋŋaa haala-la dɔŋɔ kɔ. Ŋɩɩ nɛ tolo-la mʋ yɩrɛ bile naaŋ tɩtɩa ʋ kɔ.

⁹ Ijipiti tinteeŋ kuoro tolo-la bʋla pɩ haal-la, “Laa bie deeŋ a dɩɛsa pɩmɛ, ka dɩ mɩ timiŋ.” Ŋɩɩ nɛ bile naaŋ laa bile a kaa mʋ dɩa a dɩɛsʋ.

¹⁰ Bile sɩ kʋ waa mʋa, ʋ kaa mʋ pɩ Ijipiti tinteeŋ kuoro tolo. Ʋ laa ʋ ŋaa ʋ bie, ʋ hɛ ʋ yɩrɩŋ Mosis, aŋ bʋl, “Mɩ lɩɩsʋ lɩɩŋ tʋɔŋ nɛ.”

Mosis fá mʋ Midiaŋ

¹¹ Mosis sɩ kʋ waa dɛrɛ, tapʋlɩɩ kʋbala ʋ sii mʋ lee-la ʋ naambiiriŋ sɩ hɛ, a na tɩntɩŋ-duoru-la ba sɩɩ tɩŋ. Ʋ na dɩ Ijipiti tɩmma-la dɔŋɔ ka ŋmoo ʋ naambiiri-la dɔŋɔ.

¹² Ŋɩɩ nɛ ʋ daasɛ leriŋ kala dɩ nʋʋkala bɩ kpaga, ʋ ŋmoo Ijipiti tɩɩna-la a kpʋ a joŋo hugi hagɩlɩ-bumbugulo lɛ.

¹³ Ʋ taŋ sɩ pʋla, ʋ lɩɩ a na Hiburu tɩŋŋaa balɩa ka yuo dɔŋɔ. Ŋɩɩ nɛ ʋ pɩɛsɛ nɩɩ-la kɩaa sɩ bɩ sɩŋ, “Bɛɛ nɛ tɩɩ ŋ ŋmuŋmoo ŋ naambie?”

¹⁴ Ŋɩɩ nɛ baal-la pɩɛsʋ, “Kʋbɛɛ nɛ lɩɩsɩŋ dɩ ŋ bibenla a laa la wɩaa jɩjɩŋ? Ŋ bɩɩnɛ dɩ ŋ kpʋmɛ arɩ ŋ sɩ kpʋ Ijipiti tɩɩna-la ŋɩɩ nɛɛ?” Ŋɩɩ nɛ fawʋllʋŋ kɛŋ Mosis, ʋ bʋl, “Wɩɩ-la mɩ sɩ ŋaa, nɩaa jɩma nɛ.”

¹⁵ Ijipiti tinteeŋ kuoro sɩ nɩa dɩ Mosis kpʋ Ijipiti tɩɩna, ʋ chɩchɛ dɩ ʋ kpʋʋ. Ŋɩɩ nɛ Mosis fá mʋ Midiaŋ tinteeŋ, a mʋ hɔŋ viliŋ sɛmɛ.

¹⁶ Midiaŋ tinteeŋ lɛ, nɩɩ-la sɩ ŋaa Wɩɩsʋllɩ sɩpaalaara hɛ nɩmɛ, dɩ ʋ kɛŋ toloo balɩpɛ. Tolie-la kɔ dɩ ba ŋaa lɩɩŋ hɛ ba nyɩmma pʋsʋŋ lɩɩ-nyʋarɩ-kʋa lɛ a pɩ ba nyɩmma pʋsʋŋ.

¹⁷ Ŋɩɩ nɛ kʋdaaraa dɔnsʋŋ kʋ kiriba, ama Mosis bɩ sɛyɛ a sii pɛ tolie-la lɛ ba ŋaa lɩɩŋ a pɩ ba nyɩmma pʋsʋŋ.

¹⁸ Tolie-la sɩ mɩɩra mʋ ba nyɩmma Rɛwɛl teeŋ, ŋɩɩ nɛ ʋ pɩɛsɛba, “Bɛɛ nɛ tɩɩ jɩnɩŋ ma kɔ lɩma ŋ-la?” (Rɛwɛl yɩrɩŋ dɔŋɔ nɛ Jeturo.)

¹⁹ Ŋɩɩ nɛ ba bʋl, “Ijipiti tɩɩna nɛ laala ta kʋdaaraa nɩsɩŋ lɛ aŋ ŋaa lɩɩŋ pɩ la pʋsʋŋ.”

²⁰ Ŋɩɩ nɛ ba nyɩmma pɩɛsɛba, “Nɩɩ nɛ baal-la hɛ? Bɛɛ nɛ tɩɩ ma bɩ pɛ kɛnʋ kaa kɔ? Má mʋ yɩrʋ dɩ ʋ kʋ dii kɩaa.”

²¹ Ŋɩɩ nɛ ba yɩrɛ Mosis ʋ kɔ. Ʋ sɛɩ arɩ ʋ dɩ Jeturo jaŋ hɔŋ. Ŋɩɩ nɛ Jeturo joŋ ʋ tolo Zipora a pɩ Mosis ʋ jaa.

²² Zipora kɛŋ luoruŋ a lʋl hambolibie, Mosis hɛ bile yɩrɩŋ Gesom, aŋ bʋl, “Mɩ ŋaa nʋhʋɔrʋ nɛ tinteeŋ deeŋ lɛ.”

²³ Mosis hɛ Midiaŋ tinteeŋ lɛ ŋɩɩ nɛ halɩɩ, Ijipiti tinteeŋ kuoro kʋ sʋʋ, ka Iziral tɩŋŋaa ha ŋmuŋmoo niiŋ a tɩŋ yoŋ tɩntɩmɩa-la ba sɩɩ tɩŋ Ijipiti tinteeŋ lɛ. Ŋɩɩ nɛ Wɩa nɩɩ ba yele.

²⁴ Wɩa sɩ nɩɩ ba yele-la ŋɩɩ, ʋ liise yi nii-la ʋ sɩ hɛ ʋ dɩ Abɩraham, Aɩzɩk arɩ Jekɔb pɛgɛ.

²⁵ Wɩa na Iziral tɩŋŋaa hɛɛ-la, ba wɩaa chɩlʋ.