MOSIS KƐŊ IZIRAL TƖŊŊAA LƖƖ 17 - WƖA TENIŊ

Lɩɩŋ lɩɩ bʋŋ lɛ

¹ Ŋɩɩ nɛ Iziral tɩŋŋaa kala lɩɩ tintee-hɩlɩɩ-la ba sɩɩ yɩrɛ Sɩŋ a vɛŋ aŋ pɛ hɔnɔ wiesi ŋɩɩ halɩɩ arɩ La TƖƖNA sɩ dagɛba ŋɩɩ. Ba mʋ hɔŋ lee-la ba sɩɩ yɩrɛ Refidim lɛ, ama lɩɩŋ fa tuo lee-la dɩ nɩalɩŋ nyʋa.

² Ŋɩɩ nɛ ba ŋaa goŋ Mosis teeŋ a bʋl, “Pɩla lɩɩŋ dɩ la nyʋa.” Ŋɩɩ nɛ Mosis bʋl, “Bɛɛ nɛ tɩɩ ma ŋɩŋaa goŋ mɩ nyuŋ? Bɛɛ nɛ tɩɩ maa magɩsɛ La TƖƖNA?”

³ Lɩɩ-nyʋasʋŋ sɩ faasa kɛŋ nɩalɩŋ ŋɩɩ, ba ha gʋgʋrɩmɛ wɩaa Mosis teeŋ. Ba sɩ, “Bɛɛ nɛ tɩɩ ŋ kɛnla kaa kʋ lɩɩ Ijipiti tinteeŋ lɛ, dɩ ŋ leŋ lɩɩnyʋasʋŋ kpʋ la dɩ la biiriŋ arɩ la pʋsʋŋ kala dɩ la sʋʋ?”

⁴ Ŋɩɩ nɛ Mosis bunso pɩ La TƖƖNA a bʋl, “Bɛɛ nɛ mɩ jaŋ ŋaa pɩ nɩaa deemba? Ba paala ŋaa siri nɛ dɩ ba yagɛmɛ kpʋ arɩ tabɩaa.”

⁵ Ŋɩɩ nɛ La TƖƖNA bʋla pɩ Mosis, “Sii laa nɩalɩŋ sɩpaaŋ mʋ a pɛ kɛŋ Iziral tɩŋŋaa kʋhɩasɩŋ a joŋ ŋ dantɩga-la ŋ sɩ kaa ŋmoo Naayɩl fuo-la a kori.

⁶ Mɩ jaŋ gbɛrɩŋ peel-la ba sɩɩ yɩrɛ Sɩnaɩ bʋŋ-la bʋbʋɔŋ. Dɩ ŋ nɛ ŋmoo bʋŋ-la arɩ ŋ dantɩga-la, lɩɩŋ jaŋ kʋ lɩɩ dɩ nɩalɩŋ nyʋa.” Ŋɩɩ nɛ Mosis ŋaa ŋɩɩ Iziral tɩŋŋaa kʋhɩasɩŋ sɩpaaŋ.

⁷ Ʋ hɛ lee-la yɩrɩŋ Masa arɩ Mɛrɩba a tɩŋ Iziral tɩŋŋaa sɩ ŋaa goŋ-la a magɩsɛ La TƖƖNA a bʋl, “La TƖƖNA hɛ la teeŋ nɛ koo ʋ tuo nɛ?”

Ba yuo dii Amalɛk tɩŋŋaa

⁸ Ŋɩɩ nɛ Amalɛk tɩŋŋaa sii kɔ dɩ ba yuo Iziral tɩŋŋaa Refidim lɛ.

⁹ Ŋɩɩ nɛ Mosis bʋla pɩ Josua, “Tʋɔsɛ baala-la dɔnsʋŋ dɩ ma mʋ yuo Amalɛk tɩmma-la. Mɩ chie jaŋ chɩŋ peeliŋ nyuŋ a kori Wɩa dantɩga-la.”

¹⁰ Ŋɩɩ nɛ Josua ŋaa ŋɩɩ Mosis sɩ dagʋ ba yuo Amalɛk tɩmma-la, ka Mosis arɩ Arɔŋ arɩ Huu jɩl peel-la nyuŋ.

¹¹ Mosis kɛŋ ʋ nɩsaa je. Ʋ sɩ ŋaa ŋɩɩ, Iziral tɩŋŋaa yuo didii Amalɛk tɩŋŋaa, ama dɩ Mosis nɩsaa nɛ kʋ tuu, Amalɛk tɩŋŋaa ma yie yuo didiiba nɛ.

¹² Mosis nɩsaa sɩ kʋ yʋɔrɛ, ba joŋ tabɩɩŋ bil, ʋ hɔŋ ʋ nyuŋ. Ka Arɔŋ arɩ Huu kɛŋ Mosis nɩsaa je, Arɔŋ chɩŋ sɛmɛ dɔŋɔ, Huu ma chɩŋ sɛmɛ dɔŋɔ. Ba kɛŋ Mosis nɩsaa je a chɩŋ ŋɩɩ halɩɩ wɩa tuu jʋʋ.

¹³ Ŋɩɩ nɛ Josua arɩ ʋ nɩaa yuo dii Amalɛk tɩmma-la.

¹⁴ Ŋɩɩ nɛ La TƖƖNA bʋla pɩ Mosis, “Ŋmʋnsɛ wɩɩŋ deeŋ hɛ teniŋ tʋɔŋ dɩ ʋ ŋaa wɩɩ ma sɩ jaŋ vɛnɛɛ liisi a leŋ dɩ Josua nɩɩʋ, arɩ mɩ jaŋ chei Amalɛk dɩ ʋ yɩrɩŋ lɛl dʋnɩa kala lɛ.”

¹⁵ Ŋɩɩ nɛ Mosis saa Wɩɩsʋllɩ koruŋ a hɛ ʋ yɩrɩŋ, ‘La TƖƖNA nɛ ŋaa mɩ jɔnjɔŋ (Jehova nissi)’.

¹⁶ Ʋ sɩ, “Mɩ joŋ mɩ yɩɛlaa hɛ La TƖƖNA lɛ nɛ. Ʋ jaŋ yuyuo Amalɛk tɩŋŋaa doho na-kala a kaa mʋ wuu.”