MOSIS KƐŊ IZIRAL TƖŊŊAA LƖƖ 16 - WƖA TENIŊLa TƖƖNA pɩ Iziral tɩŋŋaa ‘Mana’ arɩ jɩmpɩrɩwɩɩba 1 Ŋɩɩ nɛ Iziral tɩŋŋaa kala sii Elim lɛ a mʋ tintee-hɩlɩɩ kʋbala baa yɩrɛ Sɩŋ, a hɛ Elim arɩ Sɩnaɩ pɛgɛ. Ba sɩ lɩɩ Ijipiti tinteeŋ lɛ, ʋ chɛŋ-lɩa tapʋlaa fii arɩ banɔŋ harɩŋ nɛ ŋɩɩ. 2 Ba sɩ hɛ tintee-hɩlɩɩ-la lɛ, Iziral tɩŋŋaa kala gʋgʋrɩmɛ wɩaa Mosis arɩ Arɔŋ teeŋ. 3 Ŋɩɩ nɛ Iziral tɩŋŋaa bʋla pɩ Mosis arɩ Arɔŋ, “Dɩ la nɛ fa sʋba La TƖƖNA nɩsɩŋ lɛ Ijipiti tinteeŋ lɛ, ʋ nɛ kpɩa. Lee-la, la fa yie hɔŋ nɛ a chaŋ nammɩa aŋ dii kʋdiile-la kala la sɩɩ chɛ a vɔgɛ, aŋ ka lɛɛlɛ ma kɛnla kʋ lɩɩ tintee-hɩlɩŋ deeŋ lɛ dɩ la nɩ-daŋ deeŋ kala sʋʋ arɩ losuŋ.” 4 Ŋɩɩ nɛ La TƖƖNA bʋla pɩ Mosis, “Mɩ jaŋ leŋ dɩ kʋdiilee lɩɩ wɩa-nyuŋ kʋ tuu a pɩma a nagɛ duonuŋ sɩ yie lɩɩ wɩa-nyuŋ kʋʋ tuu ŋɩɩ. Tapʋlɩɩ na-kala nɩalɩŋ jaŋ lɩɩ paa ba sɩ jaŋ wuo dii magɛ ŋɩɩ. Mɩɩ chɛ dɩ mɩ magɩsɛba a na ba jaŋ to wɩalɩŋ mɩ sɩ dagɛba koo ba bɩ jaŋ to. 5 Dɩ ʋ nɛ kʋ yi tapʋl-dʋ chɛɛŋ, ba jaŋ lɩɩ paa kʋdiile-la a magɛ ŋɩɩ ba sɩ yie vɛnɛɛ paa naansɩɩŋ bʋlɩa.” 6 Ŋɩɩ nɛ Mosis arɩ Arɔŋ bʋla pɩ Iziral tɩŋŋaa kala, “Jɩnɩŋ dɩdaanɩŋ ma jaŋ jɩŋ arɩ La TƖƖNA nɛ kɛmma lɩɩ Ijipiti tinteeŋ lɛ. 7 Chie chʋchʋɔŋ ma jaŋ na La TƖƖNA tʋla sɩ nagɛ ŋɩɩ, bɛɛ wɩaa ʋ nɩɩ ma sɩ gʋrɩmɛ wɩalɩŋ ʋ teeŋ nɛ. La ma nɛ kʋbɛɛba ma gʋgʋrɩmɛ wɩaa la teeŋ?” 8 Ŋɩɩ nɛ Mosis bɩra bʋl, “Dɩdaanɩŋ deeŋ La TƖƖNA jaŋ pɩma nammɩa dɩ ma chaŋ. Chie chʋchʋɔŋ ʋ jaŋ pɩma kʋdiilee dɩ ma dii a vɔgɛ. Dɩ ʋ nɛ ŋaa ŋɩɩ, ma jaŋ jɩŋ arɩ La TƖƖNA nɛ kɛmma kaa kɔ daha. Ʋ nɩɩ wɩalɩŋ ma sɩ gʋrʋma ʋ teeŋ nɛ. La ma nɛ kʋbɛɛba maa gʋrɩmɛ wɩaa la teeŋ? La TƖƖNA teeŋ nɛ maa gʋrɩmɛ.” 9 Ŋɩɩ nɛ Mosis bʋla pɩ Arɔŋ, “Bʋla pɩ Iziral tɩŋŋaa kala, dɩ ba kɔ La TƖƖNA sɩpaaŋ, bɛɛ wɩaa ʋ nɩɩ wɩalɩŋ ba sɩɩ gʋrʋmʋ nɛ.” 10 Bʋa-la lɛ Arɔŋ sɩ bʋl wɩaa pɩpɩ Iziral tɩŋŋaa ŋɩɩ, ba beŋ tintee-hɩlɩŋ dɩɩrɩŋ, a na La TƖƖNA tʋla dɩ ʋ chaanɛ duoŋ-bɩlɩmbaanɩŋ lɛ. 11 Ŋɩɩ nɛ La TƖƖNA bʋla pɩ Mosis, 12 “Mɩ nɩɩ Iziral tɩŋŋaa sɩ gʋrɩmɛ wɩalɩŋ nɛ. Bʋla pɩba, ‘Jɩnɩŋ wɩɩ-mul-jʋʋlʋŋ ma jaŋ chaŋ nammɩa, chie chʋchʋɔŋ ma jaŋ dii kʋdiilee a vɔgɛ. Ŋɩɩ nɛ ma jaŋ jɩŋ arɩ mɩ nɛ ŋaa ma TƖƖNA Wɩa.’ ” 13 Ŋɩɩ nɛ dɩdaanɩŋ, jɩmpɩrɩwɩɩba lɩɩ Wɩa-jaŋ kʋ tuu lee-la ba sɩ hɔnɔ kala, chʋchʋɔŋ nyalɩŋ nyala golli ba dɩhɔnʋŋ kala. 14 Nyal-la sɩ huoso dɛrɛ, kʋpʋl gulo gulo biisiŋ sɩ nagɛ nɩdɩma nantʋɔrʋŋ tɔ tintee-hɩlɩɩ-la kala. 15 Iziral tɩŋŋaa sɩ na kɩaa deemba, ba pɩɛsɛ dɔŋɔ, “Bɛɛ kɩaa ma nɛ ŋ-la?” Bɛɛ wɩaa ba bɩ kɩalɩŋ jɩŋ. Ŋɩɩ nɛ Mosis bʋla pɩba, “Kʋdiile-la La TƖƖNA sɩ joŋo pɩma dɩ ma dii nɛ ŋɩɩ. 16 Ŋ-la nɛ La TƖƖNA bʋl, ‘Nʋʋkala paa magɛ ŋ dɩa nɩaa diiniŋ, dɩ ba kʋŋkala laa kuokuo gbaŋa kpaa magɛ dɔŋɔ.’ ” 17 Ŋɩɩ nɛ Iziral tɩŋŋaa ŋaa ŋɩɩ ʋ sɩ daga, dɔnsʋŋ paa yʋgɛ, dɔnsʋŋ ma paa muuri. 18 Ba sɩ magɩsɛ kɩalɩŋ ba sɩ paa, nɩalɩŋ sɩ paa yʋgɛ bɩ na kieli, nɩalɩŋ ma sɩ paa muuri ma bɩ na muuri, nʋʋkala paa magɛ ʋ diiniŋ maŋŋaa nɛ. 19 Ŋɩɩ nɛ Mosis bʋla pɩba, “Nʋʋkala sɩ́ leŋe dɩ ŋ kɩaa chʋa.” 20 Ama ba dɔnsʋŋ bɩ jegile nɩɩ Mosis sɩ bʋl ŋɩɩ aŋ leŋ ba kɩaa chʋa. Taŋ ka pʋl dɩ nanchʋɔlaa jʋa, ba suomo sʋsʋɔrɛ. Ŋɩɩ nɛ Mosis na baanɩŋ ba nyuŋ. 21 Chʋchʋɔ na-kala nʋʋkala yie paa magɛ ŋɩɩ ʋ sɩ jaŋ dii nɛ. Dɩ wɩa nɛ kʋ haasɛ, kɩalɩŋ ba sɩ paa aŋ ka yie ŋmɩɛrɛ nɛ. 22 Tapʋl-dʋ chɛɛŋ ba paa kʋdiile-la ba sɩ yie vɛnɛɛ paa tapʋlɩɩ-kala a magɛ ŋɩɩ naansɩɩŋ bʋlɩa, nʋʋkala gbaŋ-bala. Iziral nɩhɩasɩŋ kʋ hɛ duoso pɩ Mosis. 23 Ŋɩɩ nɛ Mosis bʋla pɩba, “Ŋ-la nɛ La TƖƖNA dagɛ: ‘Chie ŋaa tapʋl-wiesii nɛ a ŋaa La TƖƖNA tapʋl-zɔŋ. Nʋʋkala wasɛ kɩalɩŋ ŋ sɩ jaŋ wasɛ jɩnɩŋ aŋ chɔ kɩalɩŋ ma ŋ sɩ jaŋ chɔ, aŋ joŋ kɩalɩŋ sɩ ka bil dɩ chie.’ ” 24 Ŋɩɩ nɛ ba joŋ kʋdiile-la kʋkaanaa bil arɩ Mosis sɩ dagɛba ŋɩɩ, taŋ pʋl dɩ kʋdiile-la bɩ pʋa, nanchʋɔlaa ma bɩ jʋa. 25 Ŋɩɩ nɛ Mosis bʋl, “Má dii kʋdiile-la ma sɩ kɛnɛ jɩnɩŋ, bɛɛ wɩaa jɩnɩŋ ŋaa tapʋl-wiesii nɛ a pɩ La TƖƖNA, ma bɩ jaŋ na kʋdiilii kala tintee-la lɛ jɩnɩŋ. 26 Tapʋlaa balɩdʋ pɛgɛ ma jaŋ paa kʋdiilee, tapʋl-pɛɩ-chɛɛŋ ŋaa la chɛ-wiesiŋ nɛ, ma bɩ jaŋ na kʋdiilii kala tapʋlɩɩ-la.” 27 Tapʋl-pɛɩ-la chɛɛŋ nɩalɩŋ dɔnsʋŋ vɩa aŋ lɩɩ dɩ ba paa kʋdiile-la a bɩ kʋŋkala na. 28 Ŋɩɩ nɛ La TƖƖNA pɩɛsɛ Mosis, “Ɛɛ nɛ maa chɛ dɩ ma diene magɛ aŋ-na to wombie-la mɩ sɩ bile pɩma arɩ wɩalɩŋ mɩ sɩ dagɛma dɩ ma to? 29 Má bee na, mɩ-na ma TƖƖNA joŋ tapʋl-pɛɩ-la pɩma dɩ ʋ ŋaa ma chɛ-wiesii nɛ. Ŋɩɩ nɛ tɩɩ mɩ joŋ tapʋlaa balɩa kʋdiilee pɩma tapʋl-dʋ chɛɛŋ. Nʋʋkala maga dɩ ʋ hɛ dɩa lɛ nɛ tapʋl-pɛɩ-la chɛɛŋ. Nʋʋkala bɩ maga dɩ ʋ lɩɩ ʋ dɩa lɛ.” 30 Ŋɩɩ nɛ nʋʋkala wiesi tapʋl-pɛɩ-la chɛɛŋ. 31 Iziral tɩŋŋaa kala kɛŋ kʋdiile-la yɩyɩrɛ ‘mana’. Ʋ ŋaa kʋpʋla nɛ a nagɛ sɛrɛɛ-biee, aŋ ŋaa lɛnlɛŋ a nagɛ munuŋ ba sɩ joŋ tʋʋŋ hɛ a wasɛ. 32 Ŋɩɩ nɛ Mosis bʋl, “Ŋ-la nɛ La TƖƖNA bʋl, ‘Má magɩsɛ kʋdiile-la gbaŋa kpaa magɛ dɔŋɔ a bil ma doho nɩaa lɛ, dɩ ba wuo sii na kʋdiile-la mɩ fa sɩ joŋo pɩma tintee-hɩlɩŋ lɛ, bʋa-la lɛ mɩ sɩ kɛmma kaa kʋ lɩɩ Ijipiti tinteeŋ lɛ.’ ” 33 Ŋɩɩ nɛ Mosis bʋla pɩ Arɔŋ, “Joŋ taga a magɩsɛ ‘mana’ gbaŋa kpaa magɛ dɔŋɔ hɛ a joŋo bil La TƖƖNA sɩpaaŋ dɩ la doho nɩaa sii na.” 34 La TƖƖNA sɩ bʋl ŋɩɩ pɩ Mosis, Mosis leŋ Arɔŋ joŋ taga a magɩsɛ ‘mana-la’ hɛ a joŋo bil Wɩa niiriŋ daga-la sɩpaaŋ dɩ ʋ wuo chɩŋ nɩmɛ dɩ nʋʋkala sɩ́ digu. 35 Ŋɩɩ nɛ Iziral tɩŋŋaa dii ‘mana-la’ halɩɩ jɩsɩŋ mahɩŋ balɩa a kaa mʋ yi bʋa-la lɛ ba sɩ yi Kɛnaŋ tintee-la lɛ ba sɩ hɔnɔ. 36 (Kɩaa gbansɩŋ banɔŋ nɛ Iziral tɩŋŋaa kaa yɩrɛ ‘Efa’.) |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.