MOSIS KƐŊ IZIRAL TƖŊŊAA LƖƖ 13 - WƖA TENIŊ

Iziral tɩŋŋaa maga dɩ ba joŋ ba hambolibii bumbumba pɩ La TƖƖNA

¹ Ŋɩɩ nɛ La TƖƖNA bʋla pɩ Mosis,

² “Dɩ Iziral tɩɩna kala nɛ lʋl ʋ hambolibii bumbuŋ, ʋ joŋo pɩmɛ, dɩ pʋna ma nɛ lʋl ʋ bii-bumbuŋ dɩ ʋ ŋaa bele, mɩ nɛ tɩɩʋ.”

³ Ŋɩɩ nɛ Mosis bʋla pɩ Iziral tɩŋŋaa, “Má liisi tapʋlʋŋ deeŋ La TƖƖNA sɩ kɛmma lɩɩ Ijipiti tinteeŋ lɛ wɩaa, lee-la ma fa sɩ hɛ a ŋaa yosi. Ʋ chaasa joŋ doluŋ nɛ a kɛmma kʋ lɩɩ. Má sɩ́ kʋŋkala sɩ kɛŋ sɩbʋrʋŋ dii tapʋlɩɩ-la.

⁴ Má lɩɩ Ijipiti tinteeŋ lɛ jɩnɩŋ tapʋlʋŋ, chɛnɛ-la ba sɩɩ yɩrɛ Abib tʋɔŋ nɛ.

⁵ Dɩ La TƖƖNA nɛ kɛmma kaa mʋ Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Hivi tɩŋŋaa arɩ Jebus tɩŋŋaa tinteeŋ, tintee-la sɩ sɩma a kɛŋ kɩaa, ʋ hɛ niiŋ pɩ ma naabalɩmaba arɩ ʋ jaŋ joŋo pɩma, ma jaŋ gbieli gbiele-la chɛnɛ-la tɩtɩa tʋɔŋ.

⁶ Ma jaŋ dii boroboro-la sɩ bɩ sɩbʋrʋŋ kɛnɛ tapʋlaa balɩpɛ. Tapʋl-pɛɩ chɛɛŋ, má gbieli gbiele a zil La TƖƖNA.

⁷ Tapʋlaa deemba balɩpɛ ma jaŋ dii boroboro-la sɩ bɩ sɩbʋrʋŋ kɛnɛ, aŋ paala sɩ́ leŋe dɩ sɩbʋrʋŋ koo boroboro-la sɩ kɛŋ sɩbʋrʋŋ kpagɛ lee-la ma sɩ hɛ.

⁸ Tapʋlɩɩ-la má bʋla pɩ ma biiriŋ, ‘Laa gbieli gbiele deeŋ a tɩŋ wɩɩ-la La TƖƖNA sɩ ŋaa pɩla nɛ bʋa-la lɛ ʋ sɩ kɛnla kaa lɩɩ Ijipiti tinteeŋ lɛ.’

⁹ Gbiele deeŋ jaŋ nagɛ magɩl ma nɩsaa lɛ, a nagɛ magɩl ma tilliŋ lɛ dɩ La TƖƖNA niiŋ wɩaa sɩ́ ma niiŋ lɛ lɛl. Ʋ doluŋ nɛ ʋ kaa kɛmma lɩɩ Ijipiti tinteeŋ lɛ.

¹⁰ Má gbigbieli gbiele deeŋ bʋa deeŋ lɛ jɩna na-kala.

¹¹ Dɩ La TƖƖNA nɛ kɛmma mʋ Kɛnaŋ tɩŋŋaa tintee-la ʋ sɩ hɛ niiŋ pɩ ma naabalɩmaba arɩ ʋ jaŋ joŋo pɩma,

¹² má joŋ ma hambolibii bumbumba arɩ ma pʋsʋŋ ma kala bii-bumbumba sɩ ŋaa belliŋ a pɩ La TƖƖNA.

¹³ Kakusuŋ bii-bumbumba sɩ ŋaa belliŋ, má kɛŋ pie-pɔrɔɔ lenniba. Dɩ ma nɛ bɩ pie-biisiŋ kaa lenni, má mɩlɩmɛ ba baŋŋaa bori. Ma Iziral tɩŋŋaa hambolibii bumbumba maga dɩ ma mɩɩra time laaba.

¹⁴ Maachie dɩ ŋ bie nɛ pɩɛsɩŋ a chɩchɛ dɩ ʋ jɩŋ wɩɩ-la ŋ sɩɩ ŋaa bʋbʋɔŋ, bʋla pʋ, ‘La TƖƖNA kɛŋ ʋ doluŋ nɛ a kɛnla lɩɩ Ijipiti tinteeŋ lɛ, lee-la la fa sɩ hɛ a ŋaa yosi.

¹⁵ Ijipiti tinteeŋ kuoro tʋɔŋ fa sɩ pɩra ʋ bɩ chɛ dɩ ʋ leŋ la lɩɩ ʋ tinteeŋ lɛ, ŋɩɩ nɛ La TƖƖNA kpʋ Ijipiti tɩŋŋaa hambolibii bumbumba arɩ ba pʋsʋŋ bii-bumbumba sɩ ŋaa belliŋ kala. Ŋ-la nɛ tɩɩ mɩ joŋ mɩ hambolibii bumbumba arɩ mɩ pʋsʋŋ ma kala bii-bumbumba sɩ ŋaa belliŋ a ŋaa Wɩɩsʋlʋŋ pɩ La TƖƖNA, ama mɩ hambolibii bumbumba-na mɩ yie time laa nɛ.’

¹⁶ Wɩaa deemba saa jaŋ nagɛ magɩlɩŋ ŋ nɩsɩŋ lɛ, a nagɛ magɩl ŋ tile lɛ arɩ La TƖƖNA nɛ kɛnla lɩɩ Ijipiti tinteeŋ lɛ arɩ ʋ doluŋ.”

Iziral tɩŋŋaa sɩɩ chol mʋgʋ-balɩŋ

¹⁷ Ijipiti tinteeŋ kuoro sɩ ta Iziral tɩŋŋaa dɩ ba viiri, Wɩa bɩ ba kaa to wombii-kuu-la sɩ to Fɩlɩsɩtɩa tɩŋŋaa tinteeŋ. Wɩa sɩ, “Dɩ ba nɛ mʋ cheŋ laalɩŋ wombiiŋ lɛ, ba jaŋ wuo bɩrɩmɛ ba tʋɔbɩɩnaa a mɩɩra mʋ Ijipiti tinteeŋ.”

¹⁸ Ŋɩɩ nɛ Wɩa kɛŋ Iziral tɩŋŋaa gollo to tintee-hɩlɩɩ-la tʋɔŋ a chaasɛ mʋgʋ-bal-la ba sɩɩ yɩrɛ Mʋgʋ-fɩaŋ. Iziral tɩŋŋaa sɩ lɩɩ Ijipiti tinteeŋ lɛ, ba laalɛ ba bayuori kɩaa nɛ.

¹⁹ Mosis pɛ paa Josɛf haŋgbelee arɩ Josɛf fa sɩ leŋe Iziral tɩŋŋaa hɛ niiŋ ŋɩɩ. Ʋ fa sɩ, “Wɩa sɛnɛ jaŋ kʋ laama ta. Dɩ ʋ nɛ kʋ laama ta, má pɛ paa mɩ haŋgbelee kaa lɩɩ Ijipiti tinteeŋ lɛ.”

²⁰ Iziral tɩŋŋaa sɩ sii lee-la ba sɩɩ yɩrɛ Sʋkɔf, ba mʋ hɔŋ Ɛtam lɛ nɛ a kpagɛ tintee-hɩlɩŋ niiŋ.

²¹ Dɩ taŋ nɛ pʋla, La TƖƖNA yie laa ba sɩpaaŋ nɛ a nagɛ duoŋ-bɩlɩmbaanɩŋ sɩ nagɛ jebiiŋ. Tɩtaŋɩŋ ma ʋ nagɛ jebiiŋ sɩ ŋaa nyiniŋ a kɛŋ pʋlʋmʋŋ a laa ba sɩpaaŋ, ba wuo vɩvɛŋ wɩɩhɛyɛ arɩ tɩtaŋɩŋ kala.

²² Duoŋ-bɩlɩmbaaŋ-la sɩ nagɛ jebiiŋ a laa ba sɩpaaŋ wɩɩhɛyɛ, arɩ jebii-la sɩ nagɛ nyiniŋ a laa ba sɩpaaŋ tɩtaŋɩŋ bɩ ba harɩŋ mɩɩra.