MOSIS KƐŊ IZIRAL TƖŊŊAA LƖƖ 12 - WƖA TENIŊ

La TƖƖNA kieli Iziral tɩŋŋaa dɩɩsɩŋ bal

¹ Ŋɩɩ nɛ La TƖƖNA bʋla pɩ Mosis arɩ Arɔŋ Ijipiti tinteeŋ lɛ,

² “Chɛnɛ deeŋ nɛ jaŋ ŋaa ma jɩna tʋɔŋ chɛŋ-bumbuŋ.

³ Bʋla pɩ Iziral tɩŋŋaa kala, chɛnɛ deeŋ tapʋlaa fii chɛɛŋ, dɩa tɩɩna-kala jaŋ kpʋ pie-bie a pɩ ʋ dɩa nɩaa.

⁴ Dɩ dɩa-la nɩaa nɛ bɩ yʋgɛ a bɩ pie-pilimiŋ wuo chaŋ, ʋ maga dɩ ba pɛ dɩa-la sɩ kpagɛba nɩaa lɛ dɩ ba kala kpʋ pie-bala a chaŋ.

⁵ Pʋna-la ma sɩ jaŋ lɩɩsɛ maga dɩ ʋ ŋaa pie-bele koo gbuŋgbogo a yi jɩna a sɩ́ nyɔɔ kala kɛŋ.

⁶ Dɩ ma nɛ lɩɩsɛ pʋsʋ-la, má beŋ ba nyuŋ a mʋ yi chɛŋ-bumbuŋ-la tapʋlaa fii arɩ banɛsɛ chɛɛŋ, dɩ Iziral tɩɩna-kala kpʋ ʋ pʋna wɩɩ-mul-jʋʋlʋŋ lɛ.

⁷ Dɩɩsɩ-la lɛ ma sɩ jaŋ hɔnɔ chaŋ nammɩa-la, má ŋaa pʋsʋ-la chalɩŋ a taa boiŋ niiŋ sɛsɩŋ arɩ nyuŋ.

⁸ Tɩtaŋ-la tɩtɩa, má wasɛ nammɩa-la arɩ pɩpaa-haarɩŋ, a kɛŋ boroboro-la sɩ bɩ sɩbʋrʋŋ kɛnɛ a dii.

⁹ Má sɩ́ nammɩa-la kʋhuoŋ koo kʋchɔɔlʋŋ chaŋ, má wasɛ ba kala, nyusuŋ, naasɩŋ arɩ tʋɔŋ kɩaa kala.

¹⁰ Má sɩ́ leŋe dɩ nammɩa-la chɩna chʋa. Dɩ ʋ nɛ ka dɩ taŋ pʋl, má joŋo nyɩgɛ.

¹¹ Ŋ-la nɛ ma jaŋ dii kɩalɩŋ: Má vɔɔ ma gɛnnɩŋ arɩ damɛrɩsɩŋ, a hɛ nɛntɛŋŋɛɛ aŋ paa ma dantɩgɩsɩŋ kori a dii kɩalɩŋ lɩma lɩma. Mɩ-na ma TƖƖNA dɩɩsɩŋ kiele bal gbiele nɛ.

¹² Tɩtaŋ-la tɩtɩa, mɩ jaŋ gɔllɛ Ijipiti tinteeŋ a kpʋ ba hambolibii-hɩasɩŋ arɩ ba pʋsʋŋ bii-bumbumba sɩ ŋaa belliŋ a leŋ vesi-la kala sɩ hɛ Ijipiti lɛ jɩŋ arɩ ba bɩ kɩaa ŋaa, mɩ nɛ ŋaa ma TƖƖNA.

¹³ Chal-la ma sɩ ŋaa taa ma dɩɩsɩŋ jaŋ ŋaa magɩl, dɩ mɩ nɛ kʋ naʋ, mɩ jaŋ kiele bal, wʋbɔŋ kala bɩ jaŋ ŋaa ma lɛ dɩ mɩ nɛ kɔ dɩ mɩ yuo Ijipiti tɩŋŋaa.

¹⁴ Tapʋlʋŋ deeŋ jaŋ ŋaa magɩl a pɩma, dɩ ma dɩ ma doho nɩaa kala gbieli a liliisi wɩalɩŋ mɩ-na ma TƖƖNA sɩ ŋaa a kaa mʋ wuu.

¹⁵ Ma jaŋ dii boroboro-la sɩ bɩ sɩbʋrʋŋ kɛnɛ tapʋlaa balɩpɛ. Tapʋl-bumbuŋ, má paa sɩ-bʋrʋ-la kala sɩ hɛ ma dɩɩsɩŋ lɛ lɩɩ ta. A lɩɩ tapʋl-bumbuŋ a kaa mʋ tapʋl-pɛɩ chɛɛŋ, dɩ nʋʋkala nɛ dii kʋdiilii sɩ kɛŋ sɩbʋrʋŋ, má lɩɩsʋ ta Iziral tɩŋŋaa tʋɔŋ.

¹⁶ Tapʋl-bumbuŋ arɩ tapʋl-pɛɩ chɛɛŋ má hilimi La TƖƖNA yɩrɩŋ lɛ. Tapʋlaa deemba, má sɩ́ tɩntɩmɩɩ kala tɩŋ, see kʋdiile-la ma sɩ jaŋ ŋaa dii.

¹⁷ Ʋ maga dɩ maa gbieli boroboro-la sɩ bɩ sɩbʋrʋŋ kɛnɛ gbiele nɛ, bɛɛ wɩaa tapʋlɩɩ-la nɛ mɩ kɛŋ ma doho nɩaa kala kʋ lɩɩ Ijipiti tinteeŋ lɛ. Ma dɩ ma doho nɩaa kala sɩ jaŋ to ma harɩŋ kɔ jaŋ gbigbieli tapʋlʋŋ deeŋ chɛɛŋ a kaa mʋ wuu.

¹⁸ A chɩŋ chɛŋ-bumbuŋ tapʋlaa fii arɩ banɛsɛ chɛɛŋ dɩdaanɩŋ a kaa mʋ tapʋlaa mara arɩ kʋbala dɩdaanɩŋ, nʋʋkala maga dɩ ʋ didii boroboro-la sɩ bɩ sɩbʋrʋŋ kɛnɛ nɛ.

¹⁹ Tapʋlaa balɩpɛ-la pɛgɛ, nʋʋkala bɩ maga dɩ ʋ leŋ dɩ sɩbʋrʋŋ hɛ ʋ dɩa lɛ. Dɩ nʋʋkala nɛ dii kʋŋ sɩ kɛŋ sɩbʋrʋŋ, má lɩɩsʋ ta Iziral tɩŋŋaa tʋɔŋ, dɩ tɩɩna ŋaa Iziral tɩɩna koo nɩwogo.

²⁰ Má sɩ́ kʋŋkala sɩ kɛŋ sɩbʋrʋŋ dii lee na-kala ma sɩ hɛ. Má didii kɩalɩŋ sɩ bɩ sɩbʋrʋŋ kɛnɛ.”

²¹ Ŋɩɩ nɛ Mosis yɩrɛ Iziral tɩŋŋaa kʋhɩasɩŋ hɛ dɔŋɔ a bʋla pɩba, “Má kʋŋkala mʋ lɩma a lɩɩsɛ pie-bel pɔrʋŋ a pɩ ma dɩa nɩaa dɩ ba kpʋ La TƖƖNA dɩɩsɩŋ kiele bal pʋna.

²² Má chɔl kaku-dɩgɩlɩŋ a kaa yuu pʋna-la ma sɩ kpʋa chalɩŋ sɩ hɛ taasɩ-gbaŋa lɛ a taa ma boiŋ niiree sɛsɩŋ arɩ nyuŋ. Nʋʋkala bɩ maga dɩ ʋ kʋ lɩɩ ʋ dɩa tʋɔŋ see taŋ pʋla.

²³ Dɩ La TƖƖNA nɩɩ gɔllɛ Ijipiti tinteeŋ dɩ ʋ kpʋ Ijipiti tɩŋŋaa, ʋ jaŋ na chal-la sɩ taa ma boiŋ niiree a kiele bal, ʋ bɩ jaŋ leŋ dɩ wʋbɔŋ kala jʋʋma.

²⁴ Ma dɩ ma doho nɩaa kala maga dɩ ma tuto wɩaa deemba nɛ a kaa mʋ wuu.

²⁵ Dɩ ma nɛ mʋ tintee-la La TƖƖNA sɩ sɩ ʋ jaŋ joŋo pɩma, má tuto wɩɩŋ deeŋ.

²⁶ Dɩ ma biiriŋ nɛ pɩɛsɛma, arɩ wɩɩŋ deeŋ ma sɩɩ ŋaa ʋ bʋbʋɔŋ nɛ bɛɛ,

²⁷ ma jaŋ bʋla pɩba, ‘Ʋ ŋaa dɩɩsɩŋ kiele bal gbiele nɛ aa zil La TƖƖNA, ʋ sɩ kieli Iziral tɩŋŋaa dɩɩsɩŋ bal Ijipiti tinteeŋ lɛ aŋ kpʋ Ijipiti tɩŋŋaa aŋ leŋ la.’ ” Ŋɩɩ nɛ nɩalɩŋ tuu kpirimi a dɛnnɛ La TƖƖNA.

²⁸ Ŋɩɩ nɛ Iziral tɩŋŋaa ŋaa wɩalɩŋ kala La TƖƖNA sɩ dagɛ Mosis arɩ Arɔŋ.

²⁹ Ŋɩɩ nɛ tɩta-siesee La TƖƖNA kʋ kpʋ Ijipiti tɩŋŋaa hambolibii bumbumba kala, a chɩŋ Ijipiti tinteeŋ kuoro hambolibii bumbuŋ lɛ, a kaa mʋʋ yi nɩalɩŋ ba fa sɩ kaa tɔ dɩa hambolibii bumbumba, a pɛ ba pʋsʋŋ kala bii-bumbumba lɛ.

³⁰ Ŋɩɩ nɛ Ijipiti tinteeŋ kuoro arɩ ʋ tɩntɩnnɩ-hɩasɩŋ arɩ Ijipiti tɩŋŋaa kala sii yele su Ijipiti tinteeŋ tɩtaŋɩŋ, bɛɛ wɩaa dɩa kala tuo Ijipiti tinteeŋ lɛ nʋʋ sɩ bɩ sʋba.

³¹ Tɩtaŋ-la Ijipiti tinteeŋ kuoro yɩrɛ Mosis arɩ Arɔŋ a bʋla pɩba, “Ma Iziral tɩŋŋaa kala sii aŋ leŋ mɩ nɩaa a mʋ zil ma TƖƖNA arɩ ma fa sɩ bʋl ŋɩɩ.

³² Má to kɛsɛ ma piesee, bʋʋnaa arɩ ma nɛsɩŋ a viiri. Dɩ ma nɛ mʋa, ma sʋl Wɩa pɩ mɩ ma.”

³³ Ŋɩɩ nɛ Ijipiti tɩŋŋaa yigiba dɩ ba lɩɩ ba tinteeŋ lɛ lɩma, aŋ bʋl, “Ma lɩɩ, dɩ ŋɩɩ dee la kala jaŋ sʋʋ.”

³⁴ Ŋɩɩ nɛ nɩalɩŋ joŋ ba munnuŋ ba fa sɩ bɩ sɩbʋrʋŋ hɛ a hɛ gbansɩŋ lɛ a kɛŋ gɛnnɩŋ vɔɔ tɔ a joŋo baasɛ baasɛ.

³⁵ Ŋɩɩ nɛ Iziral tɩŋŋaa ŋaa wɩɩ-la arɩ ŋɩɩ Mosis fa sɩ bʋla pɩba. Ba sʋl gɛnnɩŋ, hɔpʋla arɩ sɛlɩmɛ kpɩɛraa Ijipiti tɩŋŋaa teeŋ.

³⁶ Ŋɩɩ nɛ La TƖƖNA leŋ Ijipiti tɩŋŋaa lɛɛlɛ zizil Iziral tɩŋŋaa a joŋ kɩalɩŋ ba sɩ pɩɛsaa chɛ a pɩba. Iziral tɩŋŋaa to ŋɩɩ lɛ a chʋŋ Ijipiti tɩŋŋaa dʋa kala viiri.

³⁷ Iziral tɩŋŋaa vɛŋ naasɩŋ lɛ nɛ a lɩɩ Ramesis sɩ hɛ Ijipiti tinteeŋ lɛ a mʋ Sʋkɔf. Ba baalaa dʋndʋŋa yi bʋɩ zɔɔ-balɩdʋ nɛ, ba haalaa arɩ ba biiriŋ bɩ pɛ.

³⁸ Nɩwogusuŋ yʋga nɛ woruŋ a to ba harɩŋ a pɛ kɛsɛ ba pʋŋ-laalɩŋ: piesee, nɛsɩŋ arɩ bʋʋnaa.

³⁹ Ba sɩ kiriba ba lɩɩ Ijipiti lɛ ŋɩɩ, ba bɩ chɩnɩŋ na dɩ ba ŋaa kʋdiilee. Ŋɩɩ nɛ ba joŋ munnu-la ba sɩ bɩ sɩbʋrʋŋ hɛ a ŋaa boroboro.

⁴⁰ Iziral tɩŋŋaa hɔŋ Ijipiti tinteeŋ lɛ jɩsɩŋ zɔɔ-banɛsɛ arɩ mara arɩ fii nɛ.

⁴¹ Jɩsɩŋ zɔɔ-banɛsɛ arɩ mara arɩ fii deeŋ dɩdɛrɩŋ nɛ La TƖƖNA kɛŋ Iziral tɩŋŋaa doho nɩaa kala kʋ lɩɩ Ijipiti tinteeŋ lɛ.

⁴² Tɩtaŋ-la La TƖƖNA sɩ kɛŋ Iziral tɩŋŋaa lɩɩ Ijipiti tinteeŋ lɛ, ʋ maga dɩ ʋ ŋaa tapʋlɩɩ nɛ dɩ Iziral tɩŋŋaa hɔŋ a sɩ́ doŋ pɩŋ a liliisi ŋɩɩ La TƖƖNA sɩ pɔba. Iziral tɩŋŋaa doho nɩaa maga dɩ baa ŋaa wɩɩŋ deeŋ nɛ a kaa mʋ wuu.

⁴³ Ŋɩɩ nɛ La TƖƖNA Wɩa bʋla pɩ Mosis arɩ Arɔŋ, “Wombiee deemba nɛ ma jaŋ to a gbieli dɩɩsɩŋ kiele bal gbiele. Nɩwogo kala bɩ maga dɩ ʋ pɛ dii.

⁴⁴ Yomo kala ma sɩ yɔbɔ, dɩ ma nɛ keri ʋ peniŋ, ʋ jaŋ wuo dii gbiele-la kʋdiilee.

⁴⁵ Nʋhʋɔra arɩ pachɩŋ diire-na bɩ kɩalɩŋ wuo dii.

⁴⁶ Má dii kɩalɩŋ dɩa tʋɔŋ, má sɩ́ kaa kʋ lɩɩ dɩ-jalɩŋ, má sɩ́ nammɩa-la haŋgbelee ma dɩma yɛrɛ.

⁴⁷ Iziral tɩŋŋaa kala nɛ maga dɩ ba gbieli gbiele deeŋ.

⁴⁸ Dɩ nɩwogo kala nɛ hɛ Iziral tɩŋŋaa tʋɔŋ aa chɛ dɩ ʋ pɛ gbieli mɩ-na ma TƖƖNA dɩɩsɩŋ kiele bal gbiele-la, ʋ maga dɩ ʋ keri baala-la kala sɩ hɛ ʋ dɩa lɛ penee nɛ, aŋ-na mʋ pɛ a nagɛ ʋ ma ŋaa Iziral tɩɩna nɛ. Nʋʋkala sɩ bɩ ʋ peniŋ kere bɩ jaŋ wuo dii mɩ-na ma TƖƖNA dɩɩsɩŋ kiele bal gbiele kʋdiilee.

⁴⁹ Wombiee deemba nɛ maga Iziral tɩŋŋaa arɩ nɩwogusu-la kala sɩ hɛ ba tʋɔŋ tuto a mʋʋ tɩgɛ mɩ-na ma TƖƖNA dɩɩsɩŋ kiele bal gbiele-la lɛ.”

⁵⁰ Ŋɩɩ nɛ Iziral tɩŋŋaa ŋaa wɩalɩŋ kala La TƖƖNA sɩ dagɛ Mosis arɩ Arɔŋ.

⁵¹ Tapʋlɩɩ-la tɩtɩa nɛ La TƖƖNA kɛŋ Iziral tɩŋŋaa doho doho kala kʋ lɩɩ Ijipiti tinteeŋ lɛ.