MOSIS KƐŊ IZIRAL TƖŊŊAA LƖƖ 11 - WƖA TENIŊLa TƖƖNA kpʋ Ijipiti tɩŋŋaa hambolibii bumbumba 1 Ŋɩɩ nɛ La TƖƖNA bʋla pɩ Mosis, “Mɩ ha jaŋ bɩra joŋ wʋbɔŋ a hɛ Ijipiti tinteeŋ kuoro arɩ ʋ nɩaa lɛ, ŋɩɩ harɩŋ nɛ ʋ jaŋ leŋ dɩ Iziral tɩŋŋaa mʋ. Dɩ ʋ nɛ saa sɛyɛ, ʋ jaŋ kiri ma kala dɩ ma lɩɩ ʋ tinteeŋ lɛ. 2 Lɛɛlɛ, bʋla pɩ ŋ nɩaa dɩ baalaa mʋ ba nandɔsʋŋ teeŋ, dɩ haalaa ma mʋ ba tanlɔsʋŋ teeŋ a chɩŋ hɔpʋla kpɩɛraa arɩ sɛlɩmɛ kpɩɛraa.” 3 Ŋɩɩ nɛ La TƖƖNA leŋ Ijipiti tɩŋŋaa cho Iziral tɩŋŋaa. Ijipiti tinteeŋ kuoro nɩhɩasɩŋ arɩ ʋ nɩaa kala joŋ Mosis ʋ ŋaa nɩ-yuŋi. 4 Ŋɩɩ nɛ Mosis bʋla pɩ Ijipiti tinteeŋ kuoro, “La TƖƖNA sɩ ʋ jaŋ gɔllɛ Ijipiti tinteeŋ kala tɩta-siesee. 5 Hambolibii-bumbuŋ na-kala sɩ hɛ Ijipiti tinteeŋ lɛ jaŋ sʋʋ, a chɩŋ Ijipiti tinteeŋ kuoro hambolibii bumbuŋ-la sɩ jaŋ hɔŋ kuoru kpasa lɛ, a kaa tuu yoŋ-haal-la sɩɩ nɔŋ munuŋ nanʋa-hɩaŋ. Ba nɛsɩŋ ma bii-bumbumba sɩ ŋaa belliŋ jaŋ sʋʋ. 6 Ijipiti tɩŋŋaa jaŋ yele su leriŋ kala, bɛɛ wɩaa wʋdoho deeŋ ha bɩ ba lɛ ŋaa aŋ ka, wɩɩŋ deeŋ dɔŋɔ saa bɩra bɩ jaŋ kɔ dɩ ʋ ŋaa Ijipiti tinteeŋ kala lɛ. 7 Ama Iziral tɩŋŋaa tʋɔŋ, vaha ma bɩ jaŋ huosi nʋʋ koo pʋna. Ŋɩɩ nɛ ma jaŋ jɩŋ dabaŋ-la La TƖƖNA sɩ joŋo hɛ Iziral tɩŋŋaa arɩ Ijipiti tɩŋŋaa pɛgɛ. 8 Ŋ tɩntɩnnɩ-hɩasɩŋ kala jaŋ kʋ kpirimi mɩ sɩpaaŋ, a sʋlmɛ dɩ mɩ dɩ mɩ nɩaa kala viiri. La jaŋ viiri.” Mosis sɩ bʋl ŋɩɩ dɛrɛ, ʋ na baanɩŋ woruŋ Ijipiti tinteeŋ kuoro nyuŋ aŋ lɩɩ viiri. 9 La TƖƖNA fa bʋla pɩ Mosis, “Ijipiti tinteeŋ kuoro bɩ jaŋ jegili ŋ teeŋ, ŋɩɩ jaŋ leŋ dɩ mɩ ŋaa wʋmagɩlaa yʋgɛ Ijipiti tinteeŋ lɛ.” 10 Mosis arɩ Arɔŋ ŋaa wʋmagɩla-la kala nɛ Ijipiti tinteeŋ kuoro sɩpaaŋ, ama La TƖƖNA leŋe Ijipiti tinteeŋ kuoro tʋɔŋ pɩrɛ nɛ, ʋ bɩ leŋe Iziral tɩŋŋaa lɩɩ ʋ tinteeŋ lɛ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.