MOSIS KƐŊ IZIRAL TƖŊŊAA LƖƖ 10 - WƖA TENIŊ

Hɔbɔ su Ijipiti tinteeŋ

¹ Ŋɩɩ nɛ La TƖƖNA bʋla pɩ Mosis, “Mʋ Ijipiti tinteeŋ kuoro teeŋ, mɩ nɛ ŋaa ʋ dɩ ʋ nɩhɩasɩŋ tʋɔŋ pɩrɛ, dɩ mɩ wuo to ŋɩɩ lɛ a ŋaa wʋmagɩlaa ba tʋɔŋ.

² Ŋɩɩ jaŋ leŋ dɩ ma wuo bʋla pɩ ma biiriŋ arɩ ma nihee ŋɩɩ mɩ sɩ wʋrɩgɛ Ijipiti tɩŋŋaa arɩ wʋmagɩla-la mɩ sɩ ŋaa ba tʋɔŋ, dɩ ma wuo jɩŋ arɩ mɩ nɛ ŋaa ma TƖƖNA.”

³ Ŋɩɩ nɛ Mosis arɩ Arɔŋ mʋ Ijipiti tinteeŋ kuoro teeŋ, a bʋla pʋ, “La TƖƖNA, Iziral tɩŋŋaa Wɩa sɩ, ‘Ɛɛ nɛ ŋ chɛ dɩ ŋ vɩa mɩ niiŋ diene magɛ? Leŋ dɩ mɩ nɩaa mʋ a chʋɔlɛmɛ.

⁴ Dɩ ŋ nɛ vɩa dɩ ŋ leŋ dɩ ba mʋ, mɩ chie jaŋ leŋ dɩ hɔbɔ lɩɩ su ma tinteeŋ kala.

⁵ Ba jaŋ tɔ tinteeŋ kala, lee bɩ jaŋ ka. Ba jaŋ dii kʋŋ na-kala duoŋ tabɩa-la sɩ bɩ kpʋa, arɩ tɩɩsɩŋ kala sɩ hɛ ma bagɩsɩŋ lɛ.

⁶ Hɔbɔ-la jaŋ su ŋ dɩa, ŋ nɩhɩasɩŋ dɩɩsɩŋ a su Ijipiti tɩŋŋaa kala dɩɩsɩŋ. Wɩɩŋ deeŋ jaŋ ŋaa wʋmagɩl ma nyɩmmaba arɩ ma naabalɩmaba ha sɩ bɩ na aŋ ka ba sɩ sie kala.’ ” Ŋɩɩ nɛ Mosis lɩɩ Ijipiti tinteeŋ kuoro teeŋ a viiri.

⁷ Ijipiti tinteeŋ kuoro tɩntɩnnaa pɩɛsʋ, “Bɛɛ kʋŋ wɩɩ nɛ baala deeŋ chɩchɛ dɩ ʋ hɛ la lɛ ŋ-la? Leŋ dɩ nɩalɩŋ mʋ a zil ba Wɩa, ŋ bɩ na dɩ Ijipiti tinteeŋ ka chɛ dɩ ʋ chei?”

⁸ Ŋɩɩ nɛ ba yɩrɛ Mosis arɩ Arɔŋ ba mɩɩra kɔ Ijipiti tinteeŋ kuoro sɩpaaŋ. Ʋ bʋla pɩba, “Má mʋ a zil ma TƖƖNA Wɩa. Ama ma tʋɔŋ kʋbɛɛba nɛ jaŋ mʋ?”

⁹ Ŋɩɩ nɛ Mosis bʋl, “La jaŋ kɛŋ la nɩaa kala mʋ, nɩhɩasɩŋ arɩ hambiisiŋ kala a pɛ la pʋsʋŋ kala lɛ, bɛɛ wɩaa laa mʋ dɩ la gbieli gbieli-bal nɛ a pɩ La TƖƖNA.”

¹⁰ Ŋɩɩ nɛ Ijipiti tinteeŋ kuoro bʋla pɩ Mosis arɩ Arɔŋ, “La TƖƖNA jaŋ kɛmma mʋ, ama mɩ bɩ jaŋ leŋ dɩ ma to kɛŋ ma haalaa arɩ ma biiriŋ a mʋ, bɛɛ wɩaa ʋ naga wʋbɔŋ nɛ ma bɩɩnɛ.

¹¹ Mɩ jaŋ leŋ dɩ ma baalaa dʋndʋŋa nɛ mʋ a zil ma Wɩa arɩ ma sɩɩ chɛ ŋɩɩ.” Ʋ sɩ bʋl ŋɩɩ dɛrɛ, ʋ kiri Mosis arɩ Arɔŋ ʋ sɩpaaŋ.

¹² Ŋɩɩ nɛ La TƖƖNA bʋla pɩ Mosis, “Kɛŋ ŋ nɩsɩŋ zaarɛ Ijipiti tinteeŋ, dɩ hɔbɔ lɩɩ tɔ Ijipiti tinteeŋ kala a dii pɩpaarɩ-la kala duoŋ-tabɩa-la sɩ bɩ kpʋa.”

¹³ Ŋɩɩ nɛ Mosis kɛŋ ʋ dantɩga zaarɛ Ijipiti tinteeŋ lɛ, La TƖƖNA leŋ peliŋ lu a lɩɩ wɩɩpɔsʋŋ dɩɩrɩŋ wɩɩhɛyɛ arɩ tɩtaŋɩŋ kala, taŋ ka pʋl dɩ pel-la kɛŋ hɔbɔ kɔ Ijipiti tinteeŋ.

¹⁴ Hɔbɔ-la faasa yʋgɛ a kʋ tɔ Ijipiti tinteeŋ lee-kala. Hɔbɔ-la doho ha bɩ Ijipiti tinteeŋ ŋɩɩ tɔ aŋ ka, ba maachie ma saa bɩra bɩ jaŋ kɔ dɩ ba tɔ Ijipiti tinteeŋ ŋɩɩ.

¹⁵ Ba tɔ Ijipiti tinteeŋ kala nɛ ʋ biri, a dii kʋŋ na-kala sɩ nyʋa, tɩɩnɛnɛɛ, pɩpaarɩŋ arɩ kʋŋ na-kala duoŋ-tabɩa-la sɩ bɩ kpʋa.

¹⁶ Ŋɩɩ nɛ Ijipiti tinteeŋ kuoro tɩŋ dɩ ba mʋ kɛŋ Mosis arɩ Arɔŋ kɔ lɩma. Ba sɩ kɔ ʋ bʋl, “Mɩ ŋaa wʋbɔŋ nɛ a chei ma dɩ ma TƖƖNA Wɩa.

¹⁷ Mɩɩ sʋlma, má joŋ wɩɩŋ deeŋ mɩ sɩ ŋaa chei a chɛmɛ aŋ sʋl ma TƖƖNA Wɩa dɩ ʋ lɩɩsɛmɛ wʋbɔmʋŋ deeŋ sɩɩ cheimi lɛ.”

¹⁸ Ŋɩɩ nɛ Mosis lɩɩ sʋl La TƖƖNA pɩ Ijipiti tinteeŋ kuoro.

¹⁹ La TƖƖNA kɛŋ pel-la bɩrɩmɛ ʋ lu a lɩɩ wɩɩjʋʋlʋŋ a paa hɔbɔ-la kaa mʋ hɛ mʋgʋ-bal-la ba sɩɩ yɩrɛ Mʋgʋ-fɩaŋ lɛ. Hɔbɔ-la kʋbala ma bɩ ka Ijipiti tinteeŋ lɛ.

²⁰ Ama La TƖƖNA ha leŋ Ijipiti tinteeŋ kuoro tʋɔŋ pɩrɛ, ʋ bɩ Iziral tɩŋŋaa wombiiŋ pa dɩ ba mʋ.

Birimiŋ tɔ Ijipiti tinteeŋ

²¹ Ŋɩɩ nɛ La TƖƖNA bʋla pɩ Mosis, “Kɛŋ ŋ nɩsɩŋ je wɩa-nyuŋ, birimiŋ jaŋ kʋ tɔ Ijipiti tinteeŋ kala, dɩ leriŋ biri churu.”

²² Ŋɩɩ nɛ Mosis kɛŋ ʋ nɩsɩŋ je wɩa-nyuŋ, birimiŋ kʋ tɔ Ijipiti tinteeŋ kala, leriŋ biri lim tapʋlaa batori.

²³ Nʋʋkala bɩ ʋ dɔŋɔ ka na, nʋʋ ma bɩ wuo sii lee-la ʋ sɩ hɛ, ŋɩɩ tapʋlaa batori. Ama pʋlʋmʋŋ hɛ Iziral tɩŋŋaa-na sɩ hɛ lee-la nɛ.

²⁴ Ŋɩɩ nɛ Ijipiti tinteeŋ kuoro yɩrɛ Mosis a bʋla pʋ, “Ma dɩ ma haalaa arɩ ma biiriŋ kala jaŋ wuo mʋ a zil ma TƖƖNA. Ama má leŋ ma pʋsʋŋ-na.”

²⁵ Ŋɩɩ nɛ Mosis bʋl, “Ʋ maga dɩ ŋ leŋ la kɛŋ la pʋsʋŋ mʋ nɛ a kpʋ a ŋaa kʋnyɩgaa Wɩɩsʋlʋŋ pɩ La TƖƖNA.

²⁶ La pʋsʋŋ ma maga dɩ ba to la harɩŋ mʋ nɛ. Kʋŋkala bɩ maga dɩ ʋ ka, ba nɛ la jaŋ kaa zil La TƖƖNA Wɩa. La bɩ jɩŋ pʋna-la la sɩ jaŋ kaa kpʋ zil La TƖƖNA, see dɩ la yi nɩmɛ.”

²⁷ Ŋɩɩ nɛ La TƖƖNA bɩra leŋ Ijipiti tinteeŋ kuoro tʋɔŋ pɩrɛ, ʋ bɩ sɛyɛ dɩ Iziral tɩŋŋaa mʋ.

²⁸ Ŋɩɩ nɛ Ijipiti tinteeŋ kuoro kpɩa Mosis lɛ, “Nyɩɩgɛ mɩ sɩpaaŋ, chɛɛ-la mɩ bɩra sɩ jaŋ naŋ mɩ sɩpaaŋ, ŋ jaŋ sʋʋ.”

²⁹ Ŋɩɩ nɛ Mosis bʋl, “Mɩ nɩa nɛ, mɩ bɩra bɩ jaŋ kɔ ŋ sɩpaaŋ.”